1. Nemene la hnei Iehova hna ajane koi së?

 MADRINE catre la lue trefën la kola mala la nekö i nyidro, nge ka egöcatr. Ngacama, tru catre la ihnimi nyidro koi nyën, ngo aja i nyidro tro nyën a tru trootro. E tha kökötre kö nyën, tro nyidroti lai a seseu. Ketre tun, madrine catre Iehova la easa nyiqane atre drei Iesu, nge Nyidrëti a ajan tro palahi sa kökötr ngöne la nyipici. (1 Kor. 3:1) Nyidrëti a ajane tro sa ‘macaj.’​—1 Kor. 14:20.

2. Nemene la hne së hna troa ce wang ngöne la tane mekune celë?

² Kola hapeu la troa keresiano ka macaj? Nemene la nyine tro sa kuca matre troa macaj? Pine nemen matre kola acatrene la imelekeu së me Iehova, la easa inine la itre nyipici qa hnine la Tusi Hmitrötr? Hnauëne laka, tha tro pi kö sa mekun ka hape, ka macaje hë së, matre tha nyipiewekë hë troa acatrene la imelekeu së me Iehova? Tro la tane mekune celë a sa la itre hnyinge celë.

KOLA HAPEU LA TROA KERESIANO KA MACAJ?

3. Kola hapeu la troa keresiano ka macaj?

³ Ame la hnaewekë qene Geres göi “thupëtresij” ngöne la Tusi Hmitrötr, ke kola hape, ka “macaj,” maine ka “pexej.” a (1 Kor. 2:6) Matre, tune la aqane tru trootro la medreng uti hë la thupëtresij, loi e tro mina fe sa akökötrene palahi la imelekeu së me Iehova. Celë hi aqane tro la keresiano a macaj. Ngacama ka macaje hë së, ngo nyipiewekë palahi tro sa acatrene la imelekeu së me Iehova. (1 Tim. 4:​15) Ijiji së asë hi, me itre jeune mina fe, troa macaj.  Ngo, nemene la ka amamane ka hape, ka macaj la keresiano?

4. Nemene la ka amamane ka hape, ka macaj la ketre keresiano?

⁴ Ame la keresiano ka macaj, ke tha angeic kö a iëne hi la itre hna amekötine i Akötresie nyine tro angeic a trongën. Ngo angeice pe a trongëne asë itre ej. Pine laka, tha ka pexeje kö angeic, tro fe angeice lai a hane tria. Ngo ame ngöne la mele i angeic, angeic a mekun tui Iehova me kuca la aja i Nyidrë. Angeic a heetrëne la thiina ka hnyipixe, me thele tro palahi a nyitipune la aqane waiewekë i Iehova. (Efe. 4:​22-​24) Ka majemine angeic xomi mekun thenge la itre wathebo me itre trepene meköti Iehova. Tha nyipiewekë kö troa hetre wathebo, matre tro angeic a atre la aqane tro angeic a ujë. Nge, thupene la hnei angeic hna xomi mekun, angeic a isine troa eatrën itre ej.​—1 Kor. 9:​26, 27.

5. Nemene la ka troa traqa kowe la keresiano ka tha macaje kö? (Efeso 4:​14, 15)

⁵ Ame pena la keresiano ka tha macaj, ke tro lai a canga huli angeic hnene la “nyinyithiina i atr” me “itre hni ka iaö.” Ijije fe hi troa ajojezi angeic hnene la itre ka inamacan ne la fen celë, maine itre ka iamenumenu. b (E jë la Efeso 4:​14, 15.) Tro angeice lai a zalu koi itre xan, maine drenge akötrëne la kola qaja la ketre ewekë koi angeic. Angeice fe a thele iwesitrë, maine kei kowe la ngazo.​—1 Kor. 3:3.

6. Qaja jë la ketre ceitun ka amamane la aqane kökötre la imelekeu së me Iehova? (Wange ju fe la iatr.)

⁶ Tune lo hne së hna ce wang, Tusi Hmitrötr a aceitunëne la keresiano ka kökötre trootro uti hë la macaj, memine la nekönatr ka tru trootro uti hë la nyën a thupëtresij. Ame la itre nekönatr, pë palakö hnei nyudreni hna atre, matre nyipiewekë tro la itre ka tru a thupë nyudren. Hane hi la ketre ceitun. Qëmekene troa thupa la gojeny, tro la ketre thine a ea la wanakoim ne la nekö i eahlo jajiny. Nge ame hë la nyën a nango tru, eahlo a nue nyëne troa ketre thupa casine la gojeny, ngo tro palahi eahlo lai a upi nyën troa goeëne la götrane maca me götrane mi. E  tru hë angeic, atre hë angeic ketre tro cas. Nyipiewekë tro la itre ka tru a goeën me xatuane la itre nekönatr wanga eatre pi nyudren. Ketre tun, nyipiewekë tro la itre keresiano ka tha macaje kö, a thele ixatua thene la itre keresiano ka macaj, matre acatrene la imelekeu i angatre me Iehova, me axecië mekune hnyawa. Ngo ame la itre keresiano ka macaj, atreine kö angatr wangatrehmekun la mekuna i Iehova ngöne la itre trepene meköt ne la Tusi Hmitrötr, me trongën itre ej, matre axecië mekun hnyawa.

7. Itre keresiano ka macaje kö a hane aja ixatua?

⁷ Kolo kö lai a hape, tha ka aja ixatua kö la keresiano ka macaj? Waea. Ame itre xaa ijin, tro angeice lai a sipo ixatua. Nemene la eisapengöne i angeic memine la keresiano ka tha macaj? Ame la atr ka tha macaje kö, ke angeic a treqene tro itre xan a qaja la nyine tro angeic a kuca, maine tro pena a axecië mekun koi angeic. Ame kö la keresiano ka macaj, ke angeic a xomi ini qa ngöne la inamacan me itre hna melën hnei itre xan, nge atre hi angeic laka, qanyi angeice kö ‘thue la ehnefe’ i angeic.​—Gal. 6:5.

8. Nemene la ka amamane ka hape, isapengöne kö la itre keresiano ka macaj?

⁸ Nyipici laka, ka isapengöne la itre atr. Ketre, tha ka ceitu kö la itre thiinan la itre keresiano ka macaj. Ame la itre xan, ka inamacan, nge itre xan ka catr. Nge ame pena itre xan, ka ham catr, nge itre xan ka utipin. Ketre, qëmekene la ketre jol, ngacama lue keresiano a trongëne la itre trepene meköt, ngo isapengöne kö la aqane axecië mekune i nyidro. Ka nyipici catre lai, la kola axecië mekun thenge la isa mekuthetheu i angatr. Celë hi matre tha nyidroti kö a qaja angazone la hna axeciën hnei ketre. Nyidroti pe a isine troa cas.​—Roma 14:10; 1 Kor. 1:​10.

NEMENE LA NYINE TROA KUCA MATRE TROA MACAJ?

9. Hapeu, tro kö a kökötre xan la aqane imelekeu së me Iehova? Qejepengöne jë.

⁹ Kola tro la itre macatre, nge kola tru trootro la nekönatr. Ngo ame kö së, troa kökötr la aqane imelekeu së me Iehova, e tro sa nue trengecatr. Hnene lo itre trejin ne Korinito hna kapa la maca ka loi, me xomi bapataiso. Hnei angatre fe hna kapa la uati hmitrötr, me kepe thangane la itre ini qaathei Paulo. (It. Hu. 18:​8-​11) Ngo thupene la itre macatre, tha macaje palakö la itre xan. (1 Kor. 3:2) Nemene la nyine tro sa kuca matre tha tro kö sa hane tui angatr?

10. Nemene la nyine tro sa kuca matre troa macaj? (Iudra 20)

¹⁰ Tro sa macaj, e hne së hna ajan. Ame la itre ka xele ma kökötr ngöne la huliwa i Akötresie, ke tha pi atre kö angatr la aja i Nyidrë, tro pe hi angatr a lapa tune lai. (It. Ed. 1:​22) Tha aja së kö troa tune la itre xaa atr laka, itre ka tru hë, ngo angatr palahi a nue koi itre kem me thine troa axecië mekun koi angatr. Loi e tro pe së a isa xomi hnëqan me acatrene la aqane imelekeu së me Iehova. (E jë la Iudra 20.) Maine aja i epun troa macaj, sipo Iehova jë troa hamë epun la ‘aja me trengecatre troa trongën.’​—Fil. 2:​13.

11. Nemene la hnei Iehova hna hamën matre tro sa macaj? (Efeso 4:​11-​13)

¹¹ Atre Iehova laka, tha ijiji së kö troa macaj hnene la sipu trengecatre së. Hnei Nyidrëti hna hamë së la itre atre thup, me itretre hamë ini ngöne la ekalesia, matre xatua së troa atr “ka tru” me traqa kowe “la hmae ka tru i Keriso.” (E jë la Efeso 4:​11-​13.) Iehova mina fe a hamë së la uati  hmitrötr, matre tro sa hetrenyi la “aqane waiewekë i Keriso.” (1 Kor. 2:​14-​16) Ketre, hnei Akötresie hna hamë së la foa lao Evangelia, matre tro sa atre la aqane waiewekë i Iesu, me itre hnei nyidrëti hna qaja me kuca lo nyidrëti e celë fen. Maine tro eö a isine troa xom la aqane waiewekë i Iesu me ujë tui nyidrë, ke tro hë eö lai a ketre keresiano ka macaj.

THANGANE LA NYIPI XEN QAATHEI IEHOVA

12. Nemene la “itre pane ini göi Keriso”?

¹² Tro sa macaj, e tro sa pane atre “la itre pane ini göi Keriso.” Kolo itre pane ini tune lo ini göi ietra, me lapaun, me bapataiso memine la melehmaca. (Heb. 6:​1, 2) Celë hi matre, itre ini cili la hnei Peteru hna qaja kowe la ka alanyim ngöne lo ijine Penetekos. (It. Hu. 2:​32-​35, 38) Maine aja së troa itretre drei Keriso, nyipiewekë tro fe sa atre itre ej. Celë hi matre Paulo a qaja ka hape, e tha mejiune kö së kowe la melehmaca, ke tha ijiji së kö troa itretre drei Keriso. (1 Kor. 15:​12-​14) Tha tro kö sa cil ngöne la itre pane ini.

13. Nemene la nyine tro sa kuca matre troa kepe thangane la nyipi xen hna qaja ngöne Heberu 5:​14? (Wange ju fe la iatr.)

¹³ Tha ceitune kö la itre pane ini memine la nyipi xen. Ame la nyipi xen, ke kola qaja la itre wathebo i Iehova me itre trepene meköti Nyidrë, ka aijijë së troa trotrohnine la aqane waiewekë i Nyidrë. Tro sa kepe thangane la xeni cili, e tro sa inine la Trengewekë i Iehova, me lapa mekune me trongëne ej. Tro lai a xatua së troa xom la itre mekune ka troa amadrinë Nyidrë. c​—E jë la Heberu 5:​14.

14. Hnei Paulo hna xatuane tune kaa la angetre Korinito troa macaj?

¹⁴ Thatreine kö la itre keresiano ka tha macaje kö troa axecië mekune thenge la itre trepene meköt. Pine laka, pëkö wathebo hna acil, itre xan a qaja ka hape, ijije hi troa isa kuci mekun. Ame pena itre xan, angatr kö a ketre sipu acili wathebo. Tro sa ce wange la ka traqa kowe la itre keresiano ne Korinito. Hnei angatr hna sipo Paulo troa acil la ketre wathebo, göi troa  xen maine tha xen pena la ketre xen hna huujëne koi itre idrola. Tha hnei Paulo kö hna qaja la nyine troa kuca, ngo hnei angeic pe hna amamane la enyipiewekëne la mekuthetheu memine la troa isa “ië ewekë.” Hnei angeic hna hamën la itre trepene meköt matre tro palahi a lolo la mekuthetheu i angatr me tha tro kö a athixötrë ketre, la angatr a xomi mekun. (1 Kor. 8:​4, 7-9) Paulo a xatua angatr e cili troa macaj me atreine waiewekë, hune la troa drei ketre atr maine ketre wathebo.

15. Hnei Paulo hna xatuane tune kaa la itre keresiano ne Heberu troa macaj?

¹⁵ Hetre ini fe nyine tro sa xome qa ngöne la tusi Paulo kowe la itre keresiano ne Heberu. Hna nanazije la itre xan, matre “kösë bëeke hmaca ha [angatr] koi melek, nge tha ijiji [angatr] kö la nyipi xen.” (Heb. 5:​12) Xele kö angatre ma kapa la itre ini ka hnyipixe qaathei Iehova, hna hamëne ngöne la ekalesia. (It. Ed. 4:​18) Alanyim la itre keresiano ne Iudra ka catre fë laka, tro kö a trongëne la Wathebo i Mose, ngacama ase hë apëne ej hnene la mele hna huujëne hnei Iesu, a 30 hë lao macatre. (Roma 10:4; Tito 1:​10) Thötre lao macatre hna pane nue angatr troa saze! Hapeu, tha ijije kö lai? Tro la itre ka e la tusi Paulo koi angetre Heberu a anyipicine laka, nyipi xeni hi lai qaathei Iehova. Celë hi ka troa xatua angatr troa trotrohnine ka hape, ka sisitria catre kö la hmi hna acile hnei Iesu. Nge tro fe eje a hamë trengecatre koi angatr troa cainöj, ngacama kola icilekeu hnene la angetre Iudra.​—Heb. 10:​19-​23.

WANGE KÖ KE KEI PI EÖ!

16. Ngacama ka macaje hë së, ngo nemene la nyine tro palahi sa kuca?

¹⁶ Nyipiewekë tro sa catr, matre tro palahi sa macaj.Ngo the mekune kö ka hape, tha tro kö së a hane kei. (1 Kor. 10:12) Loi e tro palahi së a ‘isa waipengö’ së matre wange ka hape, ka macaje palahi së ngöne la huliwa i Iehova.​—2 Kor. 13:5.

17. Tune kaa la aqane amamane la tusi Paulo koi angetre Kolose la enyipiewekëne tro palahi a macaj?

¹⁷ Ame ngöne la tusi Paulo kowe la angetre Kolose, hnei angeic hmaca hna qaja la enyipiewekëne troa macaj. Ngacama  itre ka macaje hë angatr, ngo hnei Paulo hna hmekë angatr göne la aqane waiewekë i fen. (Kol. 2:​6-​10) Hnei Epafera, ketre trejin ka atre hnyawa la itre trejin ne Kolose, hna catre thithi sai angatr matre ‘tro pala hi angatr a cile hut’ maine macaj. (Kol. 4:​12) Nemene la ini? Atre hnyawa hi Paulo me Epafera laka, tro sa macaj, e tro sa nue trengecatr me sipo ixatua koi Akötresie. Aja i nyidro tro la angetre Kolose a macaj, ngacama traqa ju hë la nöjei jol.

18. Nemene fe la ewekë ka traqa kowe la atr ka macaj? (Wange ju fe la iatr.)

¹⁸ Hnei Paulo hna qejepengöne kowe la itre keresiano ne Heberu ka hape, ijije hi tro Iehova a nuetrije paluan la ketre trejin ngacama ka macaj angeic. Maine tro la ketre keresiano a catre që, me xele ma ietra, ke tha tro kö Akötresie a nue la ngazo i angeic. Eloine pe, tha celë kö ka traqa kowe la itre trejin ne Heberu. (Heb. 6:​4-9) Ngo, tune kaa fe kowe la itre ka nanazij enehila maine itre hna upetröneë, ngo ka ietra e thupen? Pine laka itre ka ietra angatr matre, tha ceitu i angatre kö memine la itre atr hnei Paulo hna qaja ngöne la tusi angeic. Ngo ame la angatr a bëeke hmaca koi Iehova, nyipiewekë tro angatr a thele ixatua thei Nyidrë. (Ezek. 34:​15, 16) Celë hi matre, tro la itre qatre thup a sipone kowe la ketre trejin ka macaj, troa xatuane la ka nanazij maine hna upetröneëne ekö, troa acatrene hmaca la aqane imelekeu i angeic me Iehova.

19. Nemene la nyine tro sa isine troa traqa kow?

¹⁹ Eö kö a isine troa macaj? Maine eje hi, the luelue kö, ijiji eö hi troa traqa kow. Matre catre jë xome la nyipi xen qaathei Iehova me waiewekë tui Nyidrë. Maine ka macaje hë eö, catre jë kö matre tro palahi eö a macaj.