1. Nemene la paradraiso ka ketrepengön, nge nemene la hne së hna isine troa kuca?

 AME enehila, traqa koi itre milio lao atr ka mel me huliwa ngöne la ketre paradraiso e celë fen. Ka tingeting la mel ngöne la paradraiso. Itre atr a isine tro palahi a lapa ngöne la götran cili. Nge aja i angatr tro la itre xan a hane lö hnine la paradraiso cili. Nemene jë lai paradraiso cili? Kolo paradraiso ka ketrepengön! a

2. Nemene la ewekë ka mingöming hnei Iehova hna kuca?

² Hetre ewekë ka mingöming hnei Iehova hna kuca. Hnei Nyidrë hna acil la ketre götrane gaa tingeting nyipine la fene i Satana, ka ngazo nge ka iakötrë. (1 Ioa. 5:​19; Hna Am. 12:12) Öhne hnyawa hi Iehova la aqane akötrë së hnene la fene celë. Celë hi matre Nyidrëti a hamë së la tingeting ka xatua së troa nyihlue i Nyidrë ngöne la madrin. Tusi Hmitrötr a aceitunëne la paradraiso ka ketrepengön memine la ketre “hnapo” ka catr, me ketre ‘hlapa hna fi lapan.’ (Isa. 4:6; 58:11) Ngacama jole catre la mel ngöne la fene celë, ngo jëne la manathith qaathei Iehova, ka madrin la itre ka lapane la paradraiso cili.​—Isa. 54:14; 2 Tim. 3:1.

3. Tune kaa la aqane eatr ekö la tusi Isaia mekene 65?

³ Jëne Isaia perofeta, Iehova a amamane la pengöne la mel ngöne la paradraiso ka ketrepengön. Kola qejepengöne lai ngöne Isaia mekene 65. Hna pane eatr lo hna perofetane cili lo 537 M.P.K. Ame ngöne la ijine cili, hna nue la angetre Iudra ka ietra qa Babulona, nge hna aijijë angatr troa bëeke hmaca kowe la nöje i angatr. Hnei Iehova hna amanathithi  angatr. Ketre, hnei Nyidrëti hna aijijë angatr troa xup me amingömingöne hmaca la traon e Ierusalema, me acile hmaca la nyipi hmi ngöne la uma ne hmi hna ahnyipixen e Isaraela.​—Isa. 51:11; Zaka. 8:3.

4. Tune kaa la aqane eatr enehila la tusi Isaia mekene 65?

⁴ Hna eatr hmaca la hna perofetan hnei Isaia lo macatre 1919, lo kola thapa la itre hlue i Iehova qaathei Babulona Atraqatr. Nge hna nyiqane kökötr la paradraiso ka ketrepengön ngöne la fen asë. Hnene la itre trejin hna catre cainöj, nge hna acile trongëne la itre ekalesia. Ketre, hnene la itre hlue i Akötresie hna nyiqane huliwane la wene ne la ua. Ame la itre xan ekö, qëmekene troa nyihlue i Iehova, itre ka isi me ujë tune la itre öni, ngo enehila, angatre hë a “heetrëne la thiina ka hnyipixe, hna eköth thenge la aja i Akötresie.” (Efe. 4:​24) Nyipici laka, ame la itre xaa manathith hnei Isaia hna qaja ke, tro pë hë a eatr elanyi ngöne la fen ka hnyipixe. Ngo ame enehila, öhne hë së la itre xaa manathith ngöne la paradraiso ka ketrepengön. Tro sa ce wang la itre xaa manathith, memine la kepin matre tha tro pi kö sa trotrij la paradraiso cili.

PENGÖNE LA ATR KA LAPA NGÖNE LA PARADRAISO KA KETREPENGÖN

5. Thenge la Isaia 65:​13, tune kaa la mele ne la itre ka lapa ngöne la paradraiso ka ketrepengön?

⁵ Angatr a xeni hnyawa me egöcatr. Isaia perofeta a amamane laka, isapengöne catr la mele ne la itre ka lapa ngöne la paradraiso ka ketrepengöne me itre xan. (E jë la Isaia 65:13.) Iehova a hamën la ka nyipiewekë matre tro la itre hlue i Nyidrë a catre easenyi koi Nyidrë, tune la uati hmitrötr, me Tusi Hmitrötr, memine la itre itus hna nyitrepene hnei Tusi Hmitrötr. Angatr a “xen, . . . ij, . . . [me] madin.” (Wange ju fe la Hna Amaman 22:17.) Ame pena la itre ka lapa tröne la paradraiso ka ketrepengön, ke itre ka “mecijin . . . , pi ij . . . , [me] hmahma.” Pë fe kö imelekeu i angatr me Akötresie.​—Amo. 8:​11.

6. Tune kaa la aqane qejepengöne Ioela 2:​21-​24 la itre ahnahna qaathei Iehova, nge nemene la itre thangane koi së?

⁶ Hnei Ioela perofeta hna qaja la aqane hamëne Iehova la itre xen tune la qitr, me waina, me oel oliv. Kola amaman e cili laka, atreine hi Iehova hamëne la ka nyipiewekë kowe la itre hlue i Nyidrë, matre acatrene la imelekeu i angatr me Nyidrë. (Ioela 2:​21-​24) Celë hi hnei Nyidrëti hna kuca jëne la Tusi Hmitrötr, itre itusi së, la site Ëternet, memine la itre icasikeu me asabele. Loi e tro sa catre huliwan palahi la itre ewekë cili e nöjei drai, matre tro sa egöcatr.

7. Nemene la ka ‘amadrinëne la hni së’? (Isaia 65:14)

⁷ Angatr a madrin me ka lolo la mekun. Itre hlue i Akötresie a “hë draië” ke, tru la hni ne ole i angatr koi Nyidrë. (E jë la Isaia 65:14.) Jëne la itre nyipici qa hnine la Tusi Hmitrötr, me itre hna thingehnaean, memine la mejiune së hna nyitrepene hnene la thupene mel, ke ‘kola madrine la hni’ së. Ame la easa porotrikëne la itre ewekë cili memine la itre trejin, ke easa madrin!​—Sal. 34:8; 133:​1-3.

8. Nemene la lue thiina ka mama thene la itre ka lapa ngöne la paradraiso ka ketrepengön?

⁸ Ihnim me cas la lue thiina ka mama thene la itre ka lapa ngöne la paradraiso ka ketrepengön. Kolo hi lai a xatua së troa lapa mekun la mele së elanyi ngöne la fen ka hnyipixe. Ame ngöne la ijine cili, troa catre la “otrene ka nyipi loi,” me kökötre la ihnim me cas thene la itre hlue i Iehova. (Kol. 3:​14) Ketre trejin föe a qaja la ka  ketri eahlo, lo eahlo a xötrei atre la itre Temoë Iehova. Öni eahlo: “Thatre kö ni la nyine troa kuca matre madrin. Goi tha madrine fe ni ngöne la faming. Eni petre hi a öhne la nyipi ihnim thene la itre Temoë Iehova.” Maine hetre ka ajan troa madrin me lolo la mekun, loi e tro angeic a lö ngöne la paradraiso ka ketrepengön. Ngacama qaja angazone ju hë la itre hlue i Iehova, ngo ame pe, kola wangatrunyi së hnene la itre trejin e cailo fen.​—Isa. 65:15.

9. Nemene la hna qaja hnei Isaia 65:​16, 17 göne la itre jole së?

⁹ Angatr a lapa tingeting me lolo. Isaia 65:14 a hape, ame la itre ka xele ma lö ngöne la paradraiso ka ketrepengön, ke angatr a ‘treije ke seseu la hni’ angatr me ‘hokötre ke hleuhleu la u’ i angatr. Ngo tune kaa fe la itre hlue i Akötresie? Ame asë hi la itre ewekë ka akötrë angatr ke, tro ha “thëthëhmine” me “juetën” qëmeke i Akötresie. (E jë la Isaia 65:​16, 17.) Tro hë Iehova a apatrene la itre jole së, nge tro sa thëthëhmine lo itre ewekë ka akötrë së ekö.

10. Pine nemene matre ketre manathith la troa ce tro memine la itre trejin? (Wange ju fe la iatr.)

¹⁰ Ame enehila, tingetinge la hni së la easa sine la itre icasikeu. Itre ej a aegöcatrenyi së me xatua së, matre tha tro kö a ajolë së hnene la itre ewekë ne fen. Easa fe a acatrene la tingeting ngöne la paradraiso, la easa amamane la itre thiina ne la wene ne la ua, tune la ihnim, me madrin, me tingeting, me loi hni, me menyik. (Gal. 5:​22, 23) Ketre manathith koi së troa hane sine la organizasio i Akötresie! Ame la itre ka lapa ngöne la paradraiso ka ketrepengön, ke tro fe hë angatr a öhne la kola eatre la hnei Nyidrëti hna thingehnaean göne “la hnengödrai ka hnyipixe me fen ka hnyipixe.”

11. Thenge la Isaia 65:​18, 19, tune kaa easë la easa lapa e hnine la paradraiso ka ketrepengön?

¹¹ Hetre hni ne ole i angatr, nge tru la madrin. Isaia a qaja la itre kepin matre easa ‘madrin’ ngöne la paradraiso ka ketrepengön. Nyipici laka, Iehova la Atre acile la paradraiso cili. (E jë la Isaia 65:​18, 19.) Tha sesëkötre kö së laka, Nyidrëti a upi së troa xatuane la itre atr troa trotrij la itre organizasio i fen, hna aceitunën me itre hnapapa ka pë tim, me lö sai angatr kowe la paradraiso ka ketrepengön! Tru la itre manathith hne së hna kapa ke, easa nyihlue i Iehova, nge celë hi ka hamë madrine koi së. Nge kola uku së hnene la madrine cili troa qaja koi itre xan la itre manathithi cili.​—Iere. 31:12.

12. Nemene la ka ej e kuhu hni eö, la eö a e la hna qaja ngöne Isaia 65:​20-​24, nge pine nemen?

 ¹² Hetre ketre kepin matre easa olene me madrine atraqatr. Hetre mejiune ka mingöming hna hamëne kowe la itre ka lapa ngöne la paradraiso ka ketrepengön. Pane mekune jë la itre ewekë hne së hna troa öhne me kuca ngöne la fen ka hnyipixe! Öni Tusi Hmitrötr: ‘Tha tro hmaca kö a canga mec la itre medreng . . . me thupatëne la mele ne la itre qatr. . . . Tro sa xupi itre uma me lapan’ itre ej, nge tro sa eënyi vine me iji wen itre ej. . . . Tha tro kö sa huliwa gufa’ ke, easë fe la itre “hna amanathithine hnei Iehova.” Nyidrëti a thingehnaeane la ketre mel ka mingöming me lolo, nge pëhë akötr. Tha “hë” palakö angatr, nge Nyidrëti fe hë a amejine la aja ne la itre ka mel asë.​—Isa. 65:​20-​24; Sal. 145:16.

13. Tune kaa la aqane qejepengöne Isaia 65:25 la aqane saze la itre atr, la angatr a atre Iehova?

¹³ Angatr a thele tingeting me mele tingeting. Jëne la ixatua ne la uati hmitrötr, hnene la itre atr ka ujë tune la itre öni ekö, hna saze la itre thiina i angatr. (E jë la Isaia 65:25.) Hnei angatr hna isine troa nuetrij la itre thiina hnapan. (Roma 12:2; Efe. 4:​22-​24) Nyipici laka, tha ka pexeje kö la itre hlue i Akötresie, matre angatre palahi a tria. Ngo tha celë kö la ka sewe Iehova troa acasine “la nöjei pengön atr” ngöne la ihnim me tingeting hna thatreine apatren. (Tito 2:​11) Iehova hmekuje hi, Akötresie ka trene men la ka atreine kuca lai!

14. Hna eatre tune kaa la Isaia 65:25 thene la ketre trejin?

¹⁴ Ijiji kö tro la atr a saze? Tro sa ce wange la hna melën hnene la ketre nekötrahmany ka pi isi, nge ka kuca la itre huliwa ka sis. Tha 20 petre kö lao macatre i angeic, nge ase fe hë akalabusi angeic pine badi loto, me atrekënö la itre uma me kuca la itre xaa huliwa ka ngazo. Nge ka thele isi palahi angeic. Ngo ame hë la angeic a atre la itre nyipici qa hnine la Tusi Hmitrötr me nyiqane sine la itre icasikeu, hetre aliene hë la mele i angeic, ene la troa nyihlue i Iehova ngöne la paradraiso ka ketrepengön. Thupen la angeic a bapataiso, hnei angeic palahi hna qaja ka hape, “Hna eatre la Isaia 65:25 ngöne la meleng.” Angeic la ketre atr ka iakötrë ekö tune la liona, ngo ame hë enehila, ceitui angeic hë me neköi mamoe ka menyik me tingeting.

15. Pine nemen matre aja së troa hëne la itre atr troa hane sine la paradraiso ka ketrepengön, nge troa tune kaa?

¹⁵ Hna nyiqane la tusi Isaia 65:13 ka hape: ‘Hane hi la hna qaja hnei Iehova Joxu.’ Nge hna nyipune la xötre 25 ka hape, “öni Iehova.” Ka eatre palahi la hnei Iehova hna qaja. (Isa. 55:​10, 11) Cile hë la paradraiso ka ketrepengön. Iehova a acasine la itre hlue i Nyidrë ngöne la ketre fami ka ketrepengön. Ame la easa cas memine la itre trejin, ke tingeting me lolo la mele së, kösë easë ngöne la ketre paradraiso nyipine la fen ka iakötrë. (Sal. 72:7) Itre kepine lai ka uku së troa xatuane la itre atr, matre tro angatr a hane sine la fami së ka ketrepengön. Celë hi hne së hna kuca la easa catre cainöj me inine la itre atr.​—Mat. 28:​19, 20.

TROA THUE AJA KOWE LA ITRE ATR TROA LÖ NGÖNE LA PARADRAISO KA KETREPENGÖN

16. Nemene la ka troa thue aja kowe la itre atr troa hane lö ngöne la paradraiso ka ketrepengön?

¹⁶ Hetre nyine tro së a isa kuca matre troa thue aja kowe la itre atr troa hane sine la paradraiso ka ketrepengön. Nyipiewekë tro sa nyitipu Iehova. Tha Nyidrëti  kö a musinëne la itre atr troa lö kowe la organizasio i Nyidrë. Ngo Nyidrëti pe a “ee” angatre isa ala cas koi Nyidrë cememine la menyik. (Ioa. 6:​44; Iere. 31:3) Ame la itre ka ipië a öhne ka hape, Akötresie ka ihnim Iehova, nge ka loi thiina, celë hi ka uku angatr troa hane easenyi Nyidrë. Ketre, tro fe la aqane ujë së me itre thiina së, a thue aja koi angatr troa hane lö kowe la paradraiso ka ketrepengön. Tro sa ce wang la aqane tro sa kuca.

17. Tune kaa la aqane tro sa thue aja kowe la itre atr troa hane lö ngöne la paradraiso ka ketrepengön?

¹⁷ Ame la ketre aqane troa thue aja kowe la itre atr, ke ene la troa hnim me thiina ka loi kowe la itre trejin ne la ekalesia. Ame la ketre atr a xötrei sine la itre icasikeu së, aja së tro angeic a qaja tune la itre ka sine la itre icasikeu ne la ekalesia ne Korinito ekö, ka hape: “Nyipici, Akötresie thei nyipunie.” (1 Kor. 14:​24, 25; Zaka. 8:​23) Haawe, catre jë së trongëne la eamo celë: “Isine jë troa mele tingetinge me itre xan.”​—1 Thes. 5:​13.

18. Nemene la ka troa thue aja kowe la itre atr troa hane lö ngöne la organizasio?

¹⁸ Catre jë së goeëne la itre trejine tune la aqane goeë angatr hnei Iehova. Loi e tro sa goeëne la itre thiina ka loi i angatr, ngo tha itre tria i angatre kö, ke itre ka troa patr elany. E traqa ju la ketre iwesitrë, loi e tro sa canga iloi me ihnim. Nge loi e tro palahi së a ‘loi hni’ ketre koi ketre, me utipi itre xan me nue hnyawane la ngazo. (Efe. 4:​32) Matre troa ketr la itre atr hnene la aqane ujë cili, nge tro hë angatr a hane pi lö ngöne la paradraiso ke ketrepengön. b

 LAPA HUTI JU NGÖNE LA PARADRAISO KA KETREPENGÖN

19. (a) Nemene la hna qaja hnei itre xan la angatr a bëek hmaca ngöne la paradraiso ka ketrepengön? (Wange ju la hna eköhagen “ Hnei Angatr Hna Tro Me Bëeke Hmaca.”) (b) Nemene la nyine tro sa isine troa kuca? (Wange ju fe la iatr.)

¹⁹ Ka nyipiewekë catre koi së la paradraiso ka ketrepengön! Mingöminge catre ej enehila, nge tru catre hë la itre hlue i Iehova ka lö ngöne la paradraiso ka ketrepengön. Loi e tro palahi sa olen koi Akötresie la paradraiso hnei Nyidrëti hna hamën koi së. Maine aja ne la ketre atr troa egöcatr me tingeting me mele tingeting, loi e tro angeic lö ngöne la paradraiso ka ketrepengön, me lapa huti e cili! Loi e tro sa hmek, ke Satana a thelejëne troa ananyi së qa ngöne la paradraiso cili. (1 Pet. 5:8; Hna Am. 12:9) The nue jë i angeic pi kö! Isine jë matre tro palahi a mingöming me wië me tingeting la paradraiso ka ketrepengön.