1. Pine nemen matre ketre manathith ka tru la troa hane sine la organizasio i Iehova?

 KETRE manathith ka tru la troa hane sine la organizasio i Iehova, ngöne la itre drai ne la pun. Ngacama kola ngazo catre la mel enehila, ngo hnei Iehova hna hamë së la ketre fami, ene la itre trejin ne la ekalesia. (Sal. 133:1) Nyidrëti fe a xatua së troa mele madrin ngöne la fami së. (Efe. 5:33–​6:1) Ketre, Nyidrëti a hamë së la atrehmekun me inamacan, matre tro sa atreine xomihnine la itre jol ka traqa koi së me tingetinge la hni së.

2. Nemene la nyine tro sa kuca, nge pine nemen?

² Nyipiewekë tro sa nue trengecatr, matre tro pala hi sa catre nyihlue i Iehova. Pine nemen? Pine laka, tro lai hane a akötrë së hnene la aqane ujë me ithanata ne la itre xan. Tro fe së lai a hace hnene la itre sipu tria së, nge tro lai a ngazo catr e tro sa kuca lapan. Ngo nyipiewekë tro sa cile catr ngöne la huliwa i Iehova, la (1) kola akötrë së hnene la ketre trejin, (2) kola akötrë së hnene la föi easë, me (3) ngöne la easa hace hnene kö la itre sipu tria së. Ame ngöne la tane mekune celë, tro sa ce wange la tulu ne la köni hlue i Iehova ekö, ka mele nyipici koi Nyidrë, ngacama hnei angatre hna isa melëne la itre jol e caha.

CILE CATRE JU LA KOLA AKÖTRË EPUN HNENE LA KETRE TREJIN

3. Nemene la itre jol hne së hna cile kow?

³ Jol hna cile kow. Ame itre xaa ijin, easa wesitr kowe la aqane ujë ne la itre xaa trejin. Maine jë, hnene la itre xan hna akötrë së, maine thaipië së maine pë metrötr koi easë. Nge tha ka pexeje kö la itre qatre thup. Pine la itre jole cili, tha mejiune hë itre xan kowe la organizasio i Iehova.  Maine ju, tro hi angatr a catre nyihlue i Iehova memine la itre trejin ngöne “la hni ka cas,” ngo angatr pena a xele ma ithanata memine la itre ka akötrë angatr, me nuetrij la itre icasikeu. (Zefa. 3:9) Ka inamacane kö la aqane ujë cili? Tro sa xomi ini qaathene la ketre hlue i Iehova ekö ka melëne la jole cili.

4. Nemene la itre jol hnei Paulo hna cile kow?

⁴ Tulu qa hnine la Tusi Hmitrötr. Atre hnyawa hi Paulo aposetolo ka hape, tha ka pexeje kö la itre trejin. Ame lo angeic a xötrei traqa kowe la ekalesia ne Ierusalema, ke kola xou la itre trejin, nge tha mejiune kö angatr laka, atre drenge fe hë angeic. (It. Hu. 9:​26) Ame e thupen, hnei angatr hna qaja angazo angeic, matre tha tro hmaca kö la itre xan a mejiun koi angeic. (2 Kor. 10:10) Hnei Paulo hna öhne la aqane ujë ne la ketre qatre thup ka trene hnëqa, maine ju ketre aqane ujë lai ka troa akeine la ka alanyim. (Gal. 2:​11, 12) Ketre, hace catre Paulo kowe la aqane ujë i Mareko, sinee i angeic. (It. Hu. 15:​37, 38) Maine ju, tro hi angeic a xele ma wang la itre trejin cili ka akötrë angeic. Ngo, hnei angeic pala hi hna wangatrun la itre trejin me catre huliwa i Iehova. Nemene la ka xatua angeic troa cile catr?

5. Nemene la ka xatua Paulo troa nue la ngazo ne la itre trejin me ce huliwa palahi me angatr? (Kolose 3:​13, 14) (Wange ju fe la iatr.)

⁵ Tru catr la ihnimi Paulo kowe la itre trejin. Celë hi ka upi angeic troa goeëne catrëne la itre thiina ka lolo i angatr, hune la itre tria i angatre kö. Ketre, eje fe a xatua angeic troa trongëne lo hnei angeic hna cinyanyine ngöne Kolose 3:​13, 14. (E jë.) Tro sa ce wange la aqane ujë i Paulo koi Mareko. Ngacama hnei Mareko hna trotriji Paulo ngöne lo pane tronge i angeic, tha hnei angeic kö hna lapa fë trengehni koi Mareko. Ame ngöne la tusi angeic kowe la ekalesia ne Kolose, hnei angeic hna qaja aloinyi Mareko ka hape, sine huliwa i angeic ka lolo, ka “akeukawanyi” angeic. (Kol. 4:​10, 11) Nge ame lo kola akalabusi angeic e Roma, hnei angeic hna sipon tro Mareko a traqa troa xatua angeic. (2 Tim. 4:​11) Eje hi, hnei Paulo hna nue la ngazo ne la itre trejin me ce huliwa palahi me angatr. Nemene la ini koi së?

6-7. Tune kaa la aqane tro pala hi sa amamane la ihnimi së kowe la itre trejin, ngacama tha ka pexeje kö angatr? (1 Ioane 4:7)

⁶ Ini koi së. Aja i Iehova tro pala hi sa amamane la ihnimi së kowe la itre trejin. (E jë la 1 Ioane 4:7.) Maine tro la ketre trejin a ngazo thiina koi së, the canga  mekune kö ka hape, hnei angeice hna thë. Ngo ma angeice jë a isine troa amadrinë Iehova. (It. Ed. 12:18) Tru catr la ihnimi Iehova kowe la itre hlue i Nyidrë, ngacama tha ka pexeje kö angatr. Ame la easa tria, ke tha Iehova kö wesitr, ngo Nyidrëti pala hi a hnimi së. (Sal. 103:9) Nyipiewekë tro sa nyitipune la Keme së me nue la ngazo i itre xan!​—Efe. 4:32–​5:1.

⁷ Ketre, the thëthëhmine kö laka, easenyi catre hë la pun, matre loi e tro palahi sa acatrene la imelekeu së memine la itre trejin. Atre hi së laka, tro palahi lai a catrehnine la icilekeu. Maine jë troa akalabusi së pine la lapaune së. E cili hi la easa ajan la ixatua ne la itre trejin. (It. Ed. 17:17) Hane hi la hna melëne hnei Josep, a ketre qatre thup qa Espagne. Hna akalabusi angeic me itre xaa trejin, ke tha hane kö angatr sooc. Öni angeic: “Pine laka hna ce umë hun e hnine la kalabus, matre ame itre xaa ijin, eahuni a ihmönyiny. Ijine hi lai troa ixomihnikeu me inualoinekeun la itre ngazo. Celë hi ka xatua eahun troa cas me itö ithupë. Ketre, ce eahun memine la itre atr ka tha nyihlue i Iehova kö. Ame lo ketre drai, hna eatr la wanakoimeng matre hna ami plâtre. Pëkö huliwa hnenge hna atreine kuca, matre hnene la ketre trejin hna wasine la itre iheetreng me kuca la itre xaa jole ju kö. Hnenge hna öhn e cili la ihnimi ne la itre trejin la eni a aja ixatua.” Eje hi, ijine hi la tro sa canga iloi memine la itre trejin me easë!

CILE CATRE JU LA KOLA AKÖTRË EPUN HNENE LA FÖI EPUN

8. Nemene la itre jole hna cile kow hnene la itre trefën?

⁸ Jol hna cile kow. Tusi Hmitrötr a qaja hnyawan ka hape, tro la itre ka faipoipo a ixelë me “itre akötr.” (1 Kor. 7:​28) Eje hi, pë ju pë hë trefëne ka tha cile kowe la itre jol. Pine nemen? Pine laka, kola acasine hnene la faipoipo la lue atr ka tha pexej, nge ka isa mekun me aqane waiewekë. Maine jë isa nöje i nyidroti kö, nge isapengöne kö la aqane hetru nyidro. E qea ha, kolo ha mama la itre thiina ka tha mama ekö qëmekene troa faipoipo. Itre ewekë lai ka troa ajolëne la mele ne trefën. Ketre, ame la kola traqa la ketre jol, nyidroti a iupekeun, ngo tha ce thele pe la nyin lai jol. Traqa ha la mekun koi nyidro troa isalapa maine seihnacil. Hapeu, ka loi hi lai aqane ujë cili? b Tro sa ce wange la tulu ne la ketre föe e hnine la Tusi Hmitrötr, ka cile catr, ngacama tha ka loi kö la mele ne trefën i angeic.

9. Nemene la jol hnei Abigaila hna cile kow?

⁹ Tulu qa hnine la Tusi Hmitrötr. Öni Tusi Hmitrötr, Abigaila la föi Nabala, ketre atre ka iakötrë nge ka ngazo thiina. (1 Sam. 25:3) Tha ka hmaloi kö koi eahlo troa ce mele memine la trahmanyi ka tune lai. Hapeu, ijiji Abigaila kö troa trotriji nyidrë? Maine ju, tro hi eahlo a kötr, lo Dravita a traqa troa humuthi Nabala, ke hnei nyidrë hna qaqa Dravita me itre sooc i angeic. (1 Sam. 25:​9-​13) Ijiji eahlo hi troa kötr me nue Dravita troa humuthi nyidrë. Ngo hnei eahlo pe hna sipo iele Dravita troa amele Nabala. (1 Sam. 25:​23-​27) Nemene la ka uku eahlo troa ujë tun?

10. Hnauëne laka, tha trotriji Nabala kö hnei Abigaila?

¹⁰ Tru catre la ihnimi Abigaila koi Iehova, nge eahlo a wangatrun la itre trepene meköt  göi faipoipo. Atre hi eahlo lo hnei Akötresie hna qaja koi Adramu me Eva, lo kola acile la faipoipo i nyidro. (Gen. 2:​24) Ketre atre hi Abigaila laka, ewekë ka hmitrötr la faipoipo koi Iehova. Pine laka, aja i eahlo troa amadrinë Akötresie, matre hnei eahlo hna thel troa amelene la fami eahlo, itre hlue i eahlo memine fe la föi eahlo. Celë hi matre hnei eahlo hna canga sewe Dravita troa humuthi Nabala. Ketre, hnei eahlo hna qeje menu pine la ngazo i Nabala. Eje hi, tru la ihnimi Iehova koi eahlo, ketre föe ka catr me ka ihnim. Nemene la ini nyine tro la itre trefëne a xome qa ngöne la tulu i Abigaila?

11. (a) Nemene la aja i Iehova kowe la itre ka faipoipo? (Efeso 5:​33) (b) Nemene la ini hnei epun hna xom qa ngöne la aqane kuca i Carmen, matre cilehut la faipoipo i eahlo? (Wange ju fe la iatr.)

¹¹ Ini koi së. Aja i Iehova tro la lue trefën a metrötrëne la faipoipo, ngacama jole ju hë la föi easë. Madrine catre Nyidrë kowe la itre trefëne ka isine troa nyinyine la itre jol, me ka ihnimikeu me imetrötrekeu. (E jë la Efeso 5:​33.) Tro sa ce wange la hna melën hnei Carmen. Thupene la sikis lao macatre ne faipoipo, hnei eahlo hna nyiqane ini Tus memine la itre Temoë Iehova. E thupen, hnei eahlo hna xomi bapataiso. Öni eahlo, “Tha madrine kö la föeng. Nge nyidrëti a zalu koi Iehova. Nyidrëti palahi a qaqa ni, me qaja lapan ka hape, tro nyidrëti a triji ni.” Ame pe, hnei Carmen hna cile catr. Ame ngöne la 50 lao macatre, hnei eahlo palahi hna hnim me metrötrëne la föi eahlo. Öni eahlo, “Ame ngöne la itre macatre, hnenge hna thele troa trotrohni nyidrë me ithanata amenyiken koi nyidrë. Hnenge hna kuca asë la hnenge hna atrein, matre troa cilehut la faipoipo i nyio, ke atre hi ni laka, ka hmitrötr koi Iehova la faipoipo. Nge pine laka, ka hnimi Iehova ni, patre pi kö theng la mekun troa triji nyidrë.” c Maine troa jol la mele ne trefëne i epun, ke the luelue kö laka, tro kö Iehova a xatua epun troa cile catr.

CILE CATRE JU LA EPUNI A HACE PINE LA ITRE SIPU TRIA I EPUN

12. Tune kaa la atr ka kuca la ketre ngazo ka tru?

¹² Jol hna cile kow. Maine hnei epun hna kuca la ketre ngazo ka tru, tro epuni lai a mekune ka hape, ka luzi hë epun. Tusi Hmitrötr a qaja ka hape, tro la itre ngazo së a “thë” la madrine së me akucakucanyi së. (Sal. 51:17) Itre macatre hnei Robert hna catr huliwa, matre troa hane atre ixatua. Ngo, hnei angeic hna kuca la ketre ewekë ka ngazo, me akötrë Iehova. Öni  angeic “Tha lapa hnyawa ha ni, nge jole hë la mekuthetheung kösë eni a thu la ketre ewekë ka hace. Tru la akötreng. Hnenge hna treij koi Iehova. Ase hë ni mekun laka, tha tro hmaca kö Nyidrëti a drei ni. Tro Nyidrëti a drei ni fë nemen, nge hnenge pe hna nuetriji Nyidrë?” Maine hne së hna kei kowe la ngazo, tro hë lai a hace la hni së, nge easë fe a nyiqane mekune ka hape, ase hë Iehova nuetriji së, nge tha ijiji së fe hë troa nyihlue i Nyidrë. (Sal. 38:4) Maine celë hi lai aqane mekune i epun, lapa mekune ju la tulu i Peteru, ketre atr ka mele nyipici, nge ka catre huliwa i Iehova, ngacama hnei angeic hna kuca la ketre ngazo ka tru.

13. Nemen la itre tria hna kuca hnei Peteru, nge nemene la ngazo ka tru hnei angeic hna kuca e thupen?

¹³ Tulu qa hnine la Tusi Hmitrötr. Ame lo jidr qëmekene tro Iesu a mec, anyimua tria Peteru, uti hë la angeic a kuca la ketre ngazo ka tru. Ame la hnapan, hnei Peteru hna mekun ka hape, ka catre kö angeic hui itre xan. Öni angeic ka hape, maine tro la itre xaa aposetolo a nuetriji Iesu, ngo tha angeice fe kö. (Mar. 14:​27-​29) Ketre, ame ngöne lo lapa e Gethesemane, tha hnei angeic kö hna hmek, anyimua meköle angeic. (Mar. 14:​32, 37-​41) Thupene lai, ame la kola traqa la itre sooc troa xolouthi Iesu, hnei angeic hna kötr. (Mar. 14:50) Nge, akönia qaja angeic ka hape, thatre Iesu kö hnei angeic, uti fe hë la angeic a sisiny. (Mar. 14:​66-​71) Tune kaa Peteru, la angeic a öhne ka hape, ka ngazo catre la hnei angeic hna kuca? Hace catre angeic, matre hnei angeic hna treije hleuhleu. (Mar. 14:72) Pane mekune jë la pengöi Peteru la angeic a atre laka, ase hë humuthi Iesu. Angeic jë a mekune ka hape, pëkö eloi angeic!

14. Nemene la ka xatua Peteru tro palahi a catre huliwa i Iehova? (Wange ju la icetrön.)

¹⁴ Ngo, nyimu kepin matre Peteru a catre huliwa i Iehova. Tha hnei angeice kö hna umë, ngo hnei angeice pe hna ce tro memine la itre xaa trejin. Matre hnei angatr hna akeukawanyi angeic. (Luka 24:33) Ketre hnei Iesu hna mama koi angeic thupene lo kola amele nyidrëti hmaca, matre hna ithuecatre koi angeic. (Luka 24:34; 1 Kor. 15:5) Thupene lai, tha hnei Iesu kö hna ameköti angeic, ngo hnei nyidrëti pe hna ahnith koi angeic la itre hnëqa ka tru. (Ioa. 21:​15-​17) Atre hi Peteru ka hape, ka ngazo catr la hnei angeic hna kuca, ngo tha hnei angeic kö hna mekun laka, ka luzi hë angeic. Pine nemen? Pine laka, xecie koi angeic ka hape, tru palahi  la ihnimi Iesu koi angeic. Ketre, hnene la itre trejin hna xatua angeic. Nemene la ini hne së hna xome qa ngöne la tulu i Peteru?

15. Nemene la hnei Iehova hna ajan tro sa hane atre? (Salamo 86:5; Roma 8:​38, 39) (Wange ju fe la iatr.)

¹⁵ Ini koi së. Aja i Iehova tro sa atre laka, tru la ihnimi Nyidrëti koi së, nge aja i Nyidrëti fe troa nue la itre ngazo së. (E jë la Salamo 86:5; Roma 8:​38, 39.) Tha lapa hnyawa ha së, la easa kuca la ketre ewekë ka ngazo. Nge eje kö lai. Ngo, tha tro pi kö sa mekun ka hape, tha tro hmaca kö Iehova a hnimi së, me nue la itre ngazo së. Nyipiewekë pe tro sa canga thele ixatua. Öni Robert, lo trejin hna qaja ha ekula, ka hape: “Hnenge hna kei kowe la ngazo, ke hnenge hna mejiun kowe la sipu trengecatreng.” Öhne hi angeic ka hape, nyipiewekë tro angeic a wang la itre qatre thup. Öni angeic: “Thupene jë hi lai, öhne hë ni la ihnimi Iehova, jëne la itre qatre thup. Tha hnei angatre kö hna nuetriji ni. Celë hi ka amamane ka hape, Iehova palahi a hnimi ni.” Ketre tu së fe, e tro sa ietra, me thele ixatua, me isine matre tha tro hmaca kö a kei kowe la ngazo, ke tro lai a xecie koi së laka, tro kö Iehova a hnimi së, me nue la itre ngazo së. (1 Ioa. 1:​8, 9) Maine ka xecie hnyawa lai koi së, tro pala hi sa catre huliwa i Iehova, ngacama hne së hna kei kowe la ngazo.

16. Pine nemene matre xecie koi epun troa catre nyihlue i Iehova?

¹⁶ Iehova a madrine la easa nue trengecatr troa nyihlue i Nyidrë, ngöne la itre drai ne la pun. Jëne la ixatua i Nyidrë, ijiji së hi troa cile catr ngöne la kola akötrë së. Loi e tro pala hi sa hnime la itre trejin me nue la itre ngazo i angatr. Easa amamane la ihnimi së koi Iehova me metrötre së kowe la faipoipo, la easa canga nyinyine la itre jol, ngöne la faipoipo. Maine hne së hna kuca la ketre ewekë ka ngazo, loi e tro sa sipo ixatua koi Iehova, me kapa la ihnimi Nyidrë me aqane nue Nyidrë la itre ngazo së, me catre nyihlue i Nyidrë. Xecie koi së laka, tro kö Nyidrëti a amanathithi së, e hne së hna “catre . . . kuca la loi.”​—Gal. 6:9.