1-2. Nemene la nyine troa kuca qëmeken troa xomi bapataiso?

 AME ngöne la faif lao macatre ka ase hë, hna sasaith la 1 milio lao atr ka xomi bapataiso thene la itre Temoë Iehova. Alanyimu thei angatr ka nyiqane ini Tus “lo co petre kö” angatr, tui Timoteo ekö. (2 Tim. 3:​14, 15) Ame la itre xan, angatr a atre Akötresie lo tru hë angatr. Nge ame pena itre xan, ke kolo hë lo angatr a qatr. Tune la ketre qatre föe ka ini Tus memine la itre Temoë Iehova, nge ka xomi bapataiso lo eahlo a 97 lao macatre!

² Maine eö a ini Tus memine la itre Temoë Iehova maine hna hetru eö ngöne la nyipici, eö kö a mekune troa hane xomi bapataiso? Ketre mekune lai ka lolo catr! Ngo qëmekene tro eö a xomi bapataiso, nyipiewekë tro eö a pane nue mel koi Iehova. Tro la tane mekune celë, a qejepengöne la aliene la troa nue mel koi Akötresie. Nge maine ka hnëkë hnyawa eö, ngo eö palakö a xou, tro fe la tane mekune celë a xatua eö troa nue mel me bapataiso.

KOLA HAPEU LA TROA NUE MEL KOI AKÖTRESIE?

3. Drei la itre xaa ka nue mel koi Iehova e hnine la Tusi Hmitrötr?

³ Ame e hnine la Tusi Hmitrötr, ame la atr ka nue mel koi Akötresie, ke hna ië angeic troa kuca la ketre hnëqa ka hmitrötr. Ame la nöje Isaraela, ke ketre nöj hna iën hnei Iehova. Ngo hetre itre xan thei angatr ka nue mel koi Iehova, matre kuca la ketre hnëqa ka hmitrötr. Hna acatrene qëmekene la itrapetre i Arona la “korona ka hmitöt,” ketre sine fao gool ka melemel. Celë hi lai ka amamane  laka, hna ië nyidrë kowe la ketre hnëqa ka hmitrötr, ene la troa atre huuj ka sisitria e Isaraela. (Lev. 8:9) Ame fe la itre Nazeri, ke hnei angatr hna nue mele koi Iehova. Ame la hnaewekë “Nazeri,” ke qa ngöne la qene Heberu nazirʹ, kola hape, “Hna Amë Acon,” maine “Ka Nue Mel.” Tro la itre Nazeri a drengethenge la itre hna amekötine thatraqai angatr, hna qaja e hnine la Wathebo i Mose.​—Num. 6:​2-8.

4. (a)Ame la eö a nue mel koi Iehova, nemene hë la hnei eö hna iën? (b) Kola hapeu la troa “xele” eö kö? (Wange ju fe la iatr.)

⁴ Ame la eö a nue mel koi Iehova, eö hi lai a iëne troa atre drei Iesu Keriso me amë panëne la aja i Akötresie ngöne la mele i eö. Kola hapeue lai? Öni Iesu: “Maine tro la ketre atr a pi xötrethenge ni, loi e tro angeic a pane xele angeice kö.” (Mat. 16:24) Maine eö a ajan troa nue mele koi Iehova, loi e tro eö a xelene la itre ewekë ka tha ihmeku kö memine la aja i Nyidrë. (2 Kor. 5:​14, 15) Kola qaja la troa xelene “la itre huliwa ne ngönetrei,” tune la kuci ngazo. (Gal. 5:​19-​21; 1 Kor. 6:​18) Kolo kö a othe la mele i eö? Waea, pine laka ka hnimi Iehova eö, nge ka xecie koi eö ka hape, nyine loi koi eö la itre wathebo cili. (Sal. 119:97; Isa. 48:​17, 18) Öni Nicholas ketre trejin, ka hape, “Ijije hi tro eö a goeëne la itre trepene meköti Iehova, tune la kalabus ka sewe eö troa kuca la hnei eö hna ajan, maine tune la hage ka thupë eö qa ngöne la itre liona.”

5. (a)Tune kaa la aqane troa nue mel koi Iehova? (b) Pine nemene matre ka isapengöne kö la troa nue mel koi Iehova me xomi bapataiso? (Wange ju fe la iatr.)

⁵ Tune kaa la aqane troa nue mel koi Iehova? Eö a nue mel koi Iehova la eö a thithi koi Nyidrë, me sisinyi troa nyihlue i Nyidrëti hmekuje hi me amë panëne la aja i Nyidrë ngöne la mele i eö. Eö hi lai a sisiny ka hape, tro palahi eö a hnimi  Nyidrë “hnene la hni eö ka pexej, me mele i eö ka pexej, me mekuna i eö ka pexej, me trenge catre i eö ka pexej.” (Mar. 12:30) Ame la eö a nue mel, ke eö hmekuje hi me Iehova. Tha ceitu kö memine la bapataiso laka, eö a amamane koi nöjei atr ka hape, ase hë eö nue mel koi Iehova. Ame la eö a nue mel koi Iehova, ke ketre mekune lai ka hmitrötr, nge tha nyine tro kö a xom ahmalohmaloeën. Nge aja i Iehova tro eö a metrötrëne ej. Matre isine jë troa eatrëne ej.​—A. Cai. 5:​4, 5.

HNAUËNE LA EÖ A NUE MEL KOI IEHOVA?

6. Nemene la ka ukune la ketre atr troa nue mel koi Iehova?

⁶ Ame la kepine matre eö a nue mel koi Iehova, ke hnene la ihnimi eö koi Nyidrë. Tha hna nyitrepene hmekuje kö la ihnimi cili hnene la itre alien ne hni eö, ngo hnene fe la “nyipi atrehmekun” me “trotrohnin” göne la aja i Nyidrë. Kolo itre ewekë hnei eö hna inin göi Nyidrë. (Kol. 1:9) Itre ewekë lai ka acatrene la ihnimi eö koi Nyidrë. Pine laka hnei eö hna ini Tus, matre xecie koi eö laka, (1) ka mele Iehova, (2) Trengewekë i Nyidrë la Tusi Hmitrötr, nge (3) Nyidrëti a huliwane la organizasio i Nyidrë troa eatrëne la aja i Nyidrë.

7. Nemene la nyine kuca qëmeken troa nue mel koi Akötresie?

⁷ Ame la atr ka nue mel koi Iehova, ke atre hë angeic la itre ini ka tru ne la Tusi Hmitrötr, nge angeice fe a trongëne la itre trepene meköti Nyidrë. Tha cile kö angeic troa qaja koi itre xan la itre hnei angeic hna inin. (Mat. 28:​19, 20) Kola kökötre trootro la ihnimi angeic koi Iehova, nge aja i angeic troa atrunyi Nyidrë hmekuje  hi. Tune kaa fe eö? Maine tune hi lai ihnimi eö koi Iehova, trotrohnine hë eö laka, tha eö kö a nue mel me xomi bapataiso, göne hi troa amadrinëne la ka ini Tus me eö, maine kem me thine i eö, maine tro pena a nyitipune la itre sinee i eö.

8. Nemene la ketre kepin matre easa nue mel koi Iehova? (Salamo 116:​12-​14)

⁸ Maine tro eö a mekune la itre ewekë hnei Iehova hna kuca koi eö, tro hë lai a thue aja koi eö troa nue mel koi Nyidrë. (E jë la Salamo 116:​12-​14.) Tusi Hmitrötr a qaja ka hape, qaathei Iehova la “nöjei loi me nöjei ahnahna ka pexej.” (Iako. 1:​17) Ame la ahnahna ka sisitria, ke ene la mel hna huujën hnei Iesu. Pane mekune jë laka, hnene la thupene mel, ijiji eö hi troa hetre imelekeu me Iehova, me hane mel utihë epine palua. (1 Ioa. 4:​9, 10, 19) Ame la eö a nue mel koi Iehova, ke eö hi lai a amamane la hni ne ole i eö kowe la thupenne mel, ene la hatrene ihnim ka tru. Nge eö mina fe a amamane la hni ne ole i eö kowe la itre xaa manathith qaathei Nyidrë. (Dreut. 16:17; 2 Kor. 5:​15) Hna acatrene la mekune cili ngöne la itus Gojenyi Kowe La Nyipi Mel! ngöne la mekene 46, ini 4. Hetrenyi fe ngöne la ini cili, la video ka köni menetr hna hape, Hamëne Jë La Itre Ahnahna Koi Akötresie.

IJIJI EÖ HË TROA NUE MEL ME XOMI BAPATAISO?

9. Nemene la ewekë tha nyine tro kö a kuca hnene la ketre atr, e tha ijiji angeic palakö troa nue mel koi Iehova?

⁹ Hapeu, eö a mekune ka hape, tha ijiji eö palakö troa nue mel koi Iehova me xomi bapataiso? Maine jë, hetre nyine tro palakö eö a saze, matre ihmeku memine la itre trepene meköti Iehova. Maine pena, eö a xomi ijine troa pane acatrene la lapaune i eö. (Kol. 2:​6, 7) Isapengöne kö la aqane kökötr ne la itre ka ini Tus. Ame la itre jeune, ke isa macatrene kö la angatr a nue mel koi Iehova me xomi bapataiso. Haawe, maine eö a pi atre la nyine troa saze ngöne la huliwa Iehova, ke the goeëne kö la huliwa i ketre. Ngo goeëne jë pe la huliwa hnei eö hna atreine kuca.​—Gal. 6:​4, 5.

10. Nemene la nyine tro eö a kuca, e eö a öhne laka, tha ijiji eö palakö troa nue mel me xomi bapataiso? (Wange ju fe la hna eköhagen “ Itre Hna Hetrun Ngöne La Nyipici.”)

¹⁰ Maine eö a öhne ka hape, tha ijiji eö palakö troa nue mel koi Iehova, ke the nuetrije pi kö lo mekun hnei eö hna ajane troa eatrën. Sipo Iehova jë pe troa amanathithine la itre trengecatr hnei eö hna troa kuca, matre saze. (Fil. 2:​13; 3:​16) Mejiune ju laka, tro kö Iehova a drenge me sa la itre thithi eö.​—1 Ioa. 5:​14.

KEPIN MATRE ITRE XAN A LUELU

11. Iehova a xatua së tune kaa troa mele nyipici koi Nyidrë?

¹¹ Ame itre xan, ijiji angatre hë troa nue mel koi Iehova me xomi bapataiso, ngo angatr a luelu. Öni angatr, ‘Tro lai a upetröneë ni e tro ni a kuca la ketre ewekë ka ngazo.’ Maine eö a xou, tro kö Iehova a hamë eö la ka nyipiewekë, matre tro eö a “tro” thenge la aja i nyidrë, me “amadrinë nyidrë.” (Kol. 1:​10) Tro fe Nyidrëti a hamë eö la trengecatr matre kuca la loi. Ijiji Nyidrëti hi, ke hnei Nyidrëti hna xatuane la itre xan ekö. (1 Kor. 10:13) Ketre kepine hi lai, matre xalaithe hi la hna upetröneë. Eje hi, Iehova kö la ka xatua së troa mele nyipici.

12. Nemene la ka troa xatua eö matre tha tro kö a kei kowe la ngazo?

¹² Pine laka itre atr ka tha pexeje kö së, matre kolo palahi a huli së kowe la  itre ewekë ka ngazo. (Iako. 1:​14) Ngo, isa qanyi së kö iën ka hape, troa kei maine cile catre qëmekene la itupath. Eje hi, eö kö la ka sipu mus. Ngacama itre xan a mekun ka hape, thatreine kö tro sa xomehnöth la itre aja së ka ngazo, ngo ijiji eö hi. Maine traqa hmaca ju itre ej, ke ijiji eö hi troa cile catr. Celë hi matre, catre jë pe thith e nöjei drai, me inine la Tusi Hmitrötr, me sine la itre icasikeu ne la ekalesia, me ce thawa la lapaune i eö me itre xan. Tro hë lai a hetre trengecatre i eö troa metrötrëne la hnei eö hna sisiny. Nge the thëthëhmine kö laka, tro kö Iehova a xatua eö göne lai.​—Gal. 5:​16.

13. Nemene la ini hne së hna xome qa ngöne la tulu i Iosefa?

¹³ Tro eö a metrötrëne la hnei eö hna sisiny, e tro eö a canga mekune la aqane tro eö a ujë ngöne la itupath. Celë hi hna kuca hnene la itre xaa hlue i Akötresieti ekö. Anyimua thele la föi Potifara troa ce meköl me Iosefa. Ngo atre fe hë angeic la nyine troa kuca, qëmekene la jole cili. Öni Tusi Hmitrötr, “Xele kö Iosefa” ma kapa la aja i eahlo, nge öni angeic, “Ngazo ka tru lai, matre hnauëne laka, tro ni a kuca la ngazo cili koi Akötresie?” (Gen. 39:​8-​10) Atre hë Iosefa la nyine tro angeic a kuca, qëmeken tro la föi Potifara a tupathi angeic. Celë hi matre, atreine hi angeic cile catr qëmekene la jol.

14. Nemene la ka troa xatua së troa cile catr qëmekene la itupath?

¹⁴ Tune kaa la aqane tro eö a cile catr kowe la itupath, tui Iosefa? Loi e troa canga mekune enehila la nyine tro eö a kuca e traqa ju la itupath. Inine jë troa canga thipetrij la itre ewekë hnei Iehova hna sisin, nge isine jë matre tha tro hmaca kö a mekune itre ej. (Sal. 97:10; 119:165) Matre, ame hë la kola traqa la itupath, ke atreine eö cile catr. Atre hë eö la aqane troa ujë, ke ka hnëkë hnyawa eö.

15. Tune kaa la aqane tro la ketre atr a amamane ka hape, angeic a “thele” Iehova? (Heberu 11:6)

¹⁵ Nge tune kaa fe eö? Maine atre hë eö la nyipici, nge aja i eö troa nyihlue i Iehova, nemene la ka ajolë eö troa nue mel koi Nyidrë me xomi bapataiso? Nyitipune jë la tulu i Dravita Joxu troa sipo Iehova ka hape: “Akötesieti fe, thelethele ni jë, me atejë la hning ; tupathi ni ju, nge atejë la ite mekuneng ; nge [goeëne ju],  maine ej’ e kuhu hninge la jëne aköt, nge e ni jë ngöne la gojenyi ka epine palua.” (Sal. 139:​23, 24) Iehova a amanathithine “la itre ka thele nyidrë.” Eö a amamane ka hape, eö a thele Iehova la eö a kuci trengecatr troa nue mel koi Nyidrë me xomi bapataiso.​—E jë la Heberu 11:6.

CATRE JË EASENYI IEHOVA

16-17. Nemene la nyine tro la itre nekönatr hna hetrune ngöne la nyipici a kuca matre easenyi koi Iehova? (Ioane 6:​44)

¹⁶ Öni Iesu ka hape, pëkö atr ka troa atre drei nyidrë, e tha hna pane e angeic hnei Iehova. (E jë la Ioane 6:​44.) Hapeu, trotrohnine kö eö la enyipiewekëne me aliene la hnei Iesu hna qaja? Öhne kö Iehova la ewekë ka loi thene la atr hnei Nyidrëti hna ea koi Nyidrë. Nyidrëti a goeë angeic, kösë “atu ka co i nyidë,” maine ewekë ka tru catr koi Nyidrë. (Dreut. 7:6) Celë fe hi aqane goeë eö hnei Nyidrë.

¹⁷ Maine jë, eö la ketre jeune hna hetrune ngöne la nyipici. Eö a mekun ka hape, eö a hmi thenge la kem me thine i eö, ngo tha hnei Iehova kö hna ee eö. Ngo öni Tusi Hmitrötr: “Easenyi Akötresieti jë, nge tro nyidrëti a easenyi koi nyipunie.” (Iako. 4:8; 1 Aq. Jo. 28:9) Maine tro eö a easenyi Iehova, ke tro hë Nyidrëti lai a easenyi koi eö. Tha Iehova kö a goeë eö ke, ka hmi la fami eö. Nyidrëti a ee së isa ala cas, tune fe la itre nekönatr hna hetrun ngöne la nyipici. Matre, ame la kola easenyi Iehova hnene la ketre nekönatr hna hetrune ngöne la nyipici, ke Nyidrëti a easenyi angeic tune la hna qaja ngöne Iakobo 4:8.​—Wange ju fe la 2 Thesalonika 2:​13.

18. Nemene la hne së hna troa ce wang ngöne la tane mekun e thupen? (Salamo 40:8)

¹⁸ Ame la eö a nue mel koi Iehova me xomi bapataiso, ke eö hi lai a nyitipu Iesu. Madrine catre Iesu troa amamane koi Iehova laka, aja i nyidrë troa kuca la hna amekötine hnei Keme i nyidrë. (E jë la Salamo 40:8; Heb. 10:7) Ame ngöne la tane mekun e thupen, tro sa ce wange la ka troa xatua eö troa catre nyihlue i Iehova thupene la hna bapataiso.