1-2. (a) Paulo ekaa, la angeic a cinyanyine la tusi Efeso? (b) Nemene la lue hnyinge hne së hna troa sa?

 NGACAMA kola akalabusi Paulo aposetolo e Roma, ngo hnei angeic hna thel troa thuecatrene la itre trejin. Pine laka, tha ijiji angeice kö troa wai angatr, matre hnei angeic hna cinyanyi tus. Hnei angeic hna cinyanyine la tusi Efeso, hmekune lo itre macatre 60 maine 61 M.K.​—Efe. 1:1; 4:1.

² Ame lo treen lao macatre qëmeken, hnei Paulo hna pane lapa e Efeso, matre cainöj me inine la itre atr. (It. Hu. 19:​1, 8-​10; 20:​20, 21) Tru catre la ihnimi angeic kowe la itre trejin, nge aja i angeic troa xatua angatr troa mele nyipici koi Iehova. Ngo hnauëne la angeic a qeje jidr me lai, kowe la itre keresiano hna iën? Nemene la itre ini nyine tro la itre keresiano asë a xom, qa ngöne la tusi angeic? Tro sa ce sa la lue hnyinge cili.

KOLA TRO QA NGÖNE LA JIDR KOWE LA LAI

3. Nemene la ceitune hnei Paulo hna xome kowe la angetre Efeso?

³ Öni Paulo kowe la itre keresiano ne Efeso ka hape: “Ame ekö, itre nekö ne la jidri nyipunie, ngo enehila, hna alai nyipunie.” (Efe. 5:8) Paulo e celë a xome la ceitun ne la jidr me lai matre amamane la aqane saze la mel ne la angetre Efeso. Tro sa pane ce wange la kepine matre, Paulo a qaja ka hape, “ame ekö, itre nekö ne la jidri” la angetre Efeso.

4. Pine nemene matre easa qaja ka hape, ame göne la hmi, angetre Efeso ekö ngöne la jidr?

 ⁴ Hmi ka thoi. Qëmekene tro la angetre Efeso a atre la nyipici, ka mejiune angatr kowe la itre ini ka thoi me kuci haze. Ame ngöne la traon e Efeso, hna acile la uma ne hmi i Artemis, kolo ketre uma lai ka mingöminge catr hna hain hnene la itre atr. Itre atr a traqa e cili, matre troa thile koi hnasaatr. Nge hna nyithupene atrun, la itre ka kuca me salemëne la itre neköi hnasaatr me idrola. (It. Hu. 19:​23-​27) Ketre, ka hlemu angatr göi kuci haze.​—It. Hu. 19:19.

5. Pine nemene matre easa qaja ka hape, ame göne la itre huliwa, angetre Efeso ekö ngöne la jidr?

⁵ Huliwa ka sis. Ame la angetre Efeso, itre ka kuca amamane la itre huliwa ka sis, nge pëkö hmahma thei angatr. Ame ngöne la itre théâtres me itre feet göi hmi, ke itre trengewekë ka sis palahi la hna qaja. (Efe. 5:3) Alanyim thei angatr la ka “pë hë wangatrehmekun,” maine ka pëkö xou me hmahma, kösë “tha drenge hë angatr la akötr.” (Efe. 4:​17-​19) Qëmekene tro angatr a atre la itre trepene meköti Akötresie göi loi me ngazo, tha huliwa kö la mekuthetheu i angatr. Ketre, tha ka nyipiewekë kö koi angatr la mekuna i Iehova. Celë hi matre Paulo a qaja ka hape, “jidri la itre mekuna i angatr, nge trenyiwa angatr göne la mel ka eje thei Akötresie.”

6. Pine nemene matre Paulo a qaja kowe la angetre Efeso ka hape, “enehila, hna alai nyipunie”?

⁶ Ngo, ame la itre xan thene la angetre Efeso, hnei angatr hna trotrij la jidr. Hnei Paulo hna cinyianyine ka hape, “enehila, hna alai nyipunie ke ce nyipunieti hë me Joxu.” (Efe. 5:8) Angatre hë a mele thenge la Trengewekë i Akötresie, kösë lai ka eatrongë angatr. (Sal. 119:105) Hnei angatr hna nuetrij la itre hna majemin göi hmi ka thoi, me itre huliwa ka sis. Hnei angatre hna “nyitipu Akötresieti” me isine troa nyihlue i Iehova me amadrinë Nyidrë.​—Efe. 5:1.

7. Pine nemene matre ka ceitu la mele i easë enehila me angetre Efeso ekö?

 ⁷ Ketre tun, qëmeken tro sa atre la nyipici, easë ekö ngöne la jidr, göne la hmi me itre huliwa së. Easë ekö a sine la itre feete ne la hmi ka thoi, maine kuca la itre huliwa ka sis. Ngo ame hë la easa atre la itre trepene meköti Iehova göi loi me ngazo, easë ha sazene la aqane mele së. Easa nyiqane mel thenge la aja i Akötresie. Nge tru hnei manathith hne së hna kapa. (Isa. 48:17) Ame pe, easë enehila a cile kowe la itre jol. Celë hi matre, nyipiewekë tro sa isi, matre ananyine la jidr, lo hne së hna trotrij, me ‘catre tro tune la itre nekö ne la lai.’ Troa tune kaa?

KÖTRENE PI LA JIDR

8. Thenge la Efeso 5:​3-5, nemene la nyine tro la angetre Efeso a nuetrij?

⁸ E jë la Efeso 5:​3-5. Loi e tro la itre keresiano ne Efeso a catre nuetrij la itre ewekë ka tha amadrinë Iehova, matre lapa iananyi memine la jidr. Kolo fe a qaja la itre huliwa me itre trengewekë ka sis. Hnei Paulo hna amexej kowe la angetre Efeso, la enyipiewekëne troa nuetrij asë la itre huliwa ka sis, e aja i angatr troa “hane kepe edrö hnine la Baselaia i Keriso me Akötresie.”

9. Pine nemene matre nyipiewekë tro sa canga nuetrij la itre ewekë ka troa uku së troa kei kowe la ngazo?

⁹ Ketre tu së fe, loi e tro pala hi sa isi, matre tha tro kö a kuca “la itre huliwa ne la jidr ka pë eloin.” (Efe. 5:​11) Nyipici laka, e tro la ketre atr a majemine goeën, me dreng maine ithanatane la itre ewekë ka sis, ke tro angeic lai a kei kowe la ngazo. (Gen. 3:6; Iako. 1:​14, 15) Hnene la itre trejin trahmany ngöne la ketre nöj, hna kuca la ketre gurup ngöne Ëternet, matre ce porotrik. Ame lo xötrei, angatr a porotrikëne la itre hnei angatr hna kuca ngöne la huliwa i Iehova. Ngo, ame e thupen, angatr ha porotrikëne la itre ewekë ka sis. Önine la itre xaa trejin ka hape, hnene hi la itre porotrike cili, matre kei pi angatr kowe la ngazo.

10. Tune kaa la aqane amenu së hnei Satana? (Efeso 5:6)

¹⁰ Fene i Satana a thel troa amenu së. Ej a uku së troa mekun ka hape, tha ka ngazo kö la itre ewekë hnei Iehova hna sisin. (2 Pet. 2:​19) Tha sesëkötre kö së! Ke ka hekö hë la nyinyithina i Satana cili. Aja i angeic troa luz la itre atr me thatreine wangatrehmekun la loi me ngazo. (Isa. 5:​20; 2 Kor. 4:4) Celë hi matre, kola mama ngöne la itre film, me tele, me Ëternet, la itre huliwa ka tha ihmeku kö memine la itre trepene meköti Iehova! Aja i Satana tro sa mekun ka hape, tha ka ngazo kö, nge jëne madrine la troa kuca la itre huliwa ka sis me itre hna majemin ka ngazo, nge ka pë kö ethan.​—E jë la Efeso 5:6.

11. Kola amamane tune kaa hnene la hna melën hnei Angela laka, nyipiewekë troa trongëne la hna qaja ngöne Efeso 5:7? (Wange ju fe la iatr.)

¹¹ Aja i Satana tro sa ce tro memine la itre atr ka tha metrötrëne kö la itre trepene meköti Akötresie. Celë hi matre, Paulo a hmekëne la angetre Efeso ka hape: “The ce tro kö me angatr,” kola qaja la itre ka kuca la itre ewekë ka ngazo qëmekei Akötresie. (Efe. 5:7) Nyipiewekë catre kö koi së enehila troa hmek. Ame enehila, easa ce porotrik memine la itre atr e cahu hna tro, me ngöne Ëternet. Hnei Angela, a ka mel e Asie, hna öhne laka, hetre thangane ka ngazo  fe la Ëternet. Öni angeic: “Ka jole catre la Ëternet, ke ijije hi tro ej a nango saze la aqane mekuna i epun. Tha hmahma ha ni troa “nyisineene” la itre atr ka tha metrötrëne kö la itre trepene meköti Iehova. Eni fe hë a mekune ka hape, pëkö engazone troa kuca la itre ewekë ka tha amadrinë Iehova.” Eloine pe, hnene la itre qatre thup hna xatua Angela troa saze. Öni angeic: “Ame enehila, eni ha nyialiene la heng hnene la itre mekuna i Iehova, ngo tha hnene hmaca kö la itre hna qaja ngöne Ëternet.”

12. Nemene la ka troa xatua së troa metrötrëne la itre trepene meköt Iehova göi loi me ngazo?

¹² Loi e tro sa hmek, matre tha tro kö a löthi së hnene la aqane mekuna i fen laka, pëkö engazone troa kuca la itre huliwa ka sis. Ngo, atre hi së la nyipici göne lai. (Efe. 4:​19, 20) Isa hnyinge jë ka hape: ‘Eni kö a thupën, matre tha tro kö ni a ce tro lapa memine la itre sine huliwang, me itre sine ining maine itre atr ka tha metrötrëne kö la itre trepene meköti Iehova? Eni kö a isigöline la itre trepene meköti Iehova, ngacama itre xan a qaja ka hape, eni a nyi ka meköt?’ Nge tune la hna qaja ngöne 2 Timoteo 2:​20-​22, loi e tro mina fe sa iëne hnyawane la itre sinee së e hnine la ekalesia. Ijije hi tro la itre xan a sewe së troa mele nyipici koi Iehova me catre huliwa i Nyidrë.

CATRE JË “TRO TUNE LA ITRE NEKÖ NE LA LAI”

13. Kola hapeue la troa ‘catre tro tune la itre nekö ne la lai’? (Efeso 5:​7-9)

¹³ Hnei Paulo hna ithuecatr kowe la itre keresiano ne Efeso, troa kötrene la jidr me ‘catre tro tune la itre nekö ne la lai.’ (E jë la Efeso 5:​7-9.) Kola hapeue lai? Ame la troa catre tro tune la itre nekö ne la lai, ke kola hape, troa melëne la nyipici. Celë hi matre, nyipiewekë tro sa e me inine la Tusi Hmitrötr me la itre itusi së. Ame la easa ini Tus, loi e tro sa lapa mekun la tulu me itre ini qaathei Iesu, lo “lai ne la fen.”​—Ioa. 8:​12; It. Ed. 6:​23.

14. Tune kaa la aqane tro la uati hmitrötr a xatua së?

 ¹⁴ Nyipiewekë fe tro sa kapa la ixatua ne la uati hmitrötre i Akötresie, matre tro pala hi sa tro “tune la itre nekö ne la lai.” Pine nemen? Pine laka, jole catr troa pë ethan, ngöne la fene celë ka ngazo. (1 Thes. 4:​3-5, 7, 8) Tro la uati hmitrötr a xatua së troa nuetrij la itre ini me aqane mekune i fen ka tha ihmeku kö memine la mekuna i Akötresie. Eje fe a xatua së troa “loi hni ngöne la nöjei ewekë asë, me meköt.”​—Efe. 5:9.

15. Easa kapa tune kaa la uati hmitrötr? (Efeso 5:​19, 20)

¹⁵ Ame la ketre aqane tro sa kapa la uati hmitrötr, ke ene la troa thith. Öni Iesu ka hape, Iehova a “hamë uati hmitrötr kowe la angetre sipo nyidrë.” (Luka 11:13) Easë mina fe a kapa la uati hmitrötr, la easa atrunyi Iehova ngöne la ijine icasikeu. (E jë la Efeso 5:​19, 20.) Tro la uati hmitrötr a xatua së troa mele thenge la itre aja i Iehova.

16. Nemene la ka troa xatua së troa axecië mekun hnyawa? (Efeso 5:​10, 17)

¹⁶ Qëmekene troa xome la ketre mekune ka tru, nyipiewekë tro sa “trotrohnine la aja i Iehova” me trongën ej. (E jë la Efeso 5:​10, 17.) Ame la easa thele la itre trepene meköti Iehova göne la jole hne së hna cile kow, ke easë hi lai a thel la mekuna i Nyidrë. Nge, ame la easa trongëne la itre trepene meköt cili, tro hë së lai a axecië mekun hnyawa.

17. Tune kaa la aqane tro sa huliwane hnyawane la traeme së? (Efeso 5:​15, 16) (Wange ju fe la iatr.)

¹⁷ Hnei Paulo mina fe hna ithuecatre kowe la itre keresiano ne Efeso, troa huliwane hnyawane la traeme i angatr. (E jë la Efeso 5:​15, 16.) Aja i Satana lo “atre ka ngazo,” tro sa catre huliwa kowe la fen, matre troa pë ijine së koi Iehova. (1 Ioa. 5:​19) Tro hë lai a jole kowe la ketre  keresiano troa thele la itre aqane tro angeic a huliwa i Iehova, ke angeice pena ha thele mani, me ini maine huliwa. Aqane ujë lai ka amamane ka hape, angeic ha nyiqane mekun tune la itre atre ne fen. Nyipici, tha ka ngazo kö la itre ewekë cili, ngo ame pe, tha tro kö itre ej a tro pa ngöne la mele së. Maine aja së troa tro “tune la itre nekö ne la lai,” ke nyipiewekë tro sa “huliwane hnyawane la traeme” së, ene la troa amë panëne la itre ka nyipiewekë.

18. Nemene la hna kuca hnei Donald, matre troa huliwane hnyawane la traeme i angeic?

¹⁸ Thele jë la itre aqane troa catre huliwa i Iehova. Celë hi hna kuca hnei Donald, ketre trejin qa Afrique du Sud. Öni angeic: “Hnenge hna pane waipengöne la meleng, e thupen, hnenge hna thith koi Iehova, matre xatua ni troa catr cainöj. Ketre, hnenge hna sipo Nyidrë troa hamë ni la ketre huliwa ka aijijë ni troa catre cainöj. Nge hnei Nyidrë hna hamë ni la huliwa. Celë hi matre, hnenge me föeng hna huliwa i Iehova drai ka pexej.”

19. Tune kaa la aqane tro pala hi sa tro ngöne la lai?

¹⁹ Hnene la tusi Paulo kowe la angetre Efeso, hna ithuecatr koi angatr troa lapa hut ngöne la huliwa i Akötresie. Tro fe la itre eamo cili a xatua së enehila. Tune la hne së hna ce wang, tro itre ej a hamë së la inamacan, matre iëne hnyawane la itre sinee së me itre nyine iamadrinë. Itre ej fe a xatua së troa catre inine la Tusi Hmitrötr matre tro palahi sa lapa ngöne la lai ne la nyipici. Ketre, itre ej a amamane la enyipiewekëne la uati hmitrötr, matre melëne la itre thiina ka loi. Maine tro sa trongëne la itre eamo i Paulo, tro hë së lai a axecië mekun hnyawa thenge la mekuna i Iehova. Haawe, ame e cili, ijiji së hë troa kötrene la fene celë ka jidr, me lapa ngöne la lai!