1-2. Nemene la itre manathith hnei epun hna troa kapa, thupen la hna xomi bapataiso?

 MADRINE catre së, la easa xomi bapataiso me nyiatrene fe la fami Iehova. Ketre manathithi koi së troa hetre imelekeu me Nyidrë, nge casi la mekuna së me Dravita, la nyidrëti a hape: “Manathithi la ate hnei [Iehova] hna iëne me aeashenyi cilie, mate tro angeic’ a lapane la ite hnahage i cilie.”​—Sal. 65:4.

² Tha nöjei atr menu kö la hnei Iehova hna kapa ngöne la fami Nyidrë. Ngo tune lo hne së hna ce wang ngöne la tane mekun hnapan, Nyidrëti a easenyine la itre atr ka ajane troa imelekeu me Nyidrë. (Iako. 4:8) Ame la epuni a nue mel koi Iehova me xomi bapataiso, ketrepengöne hë la imelekeu i epuni me Nyidrë. Thupene la epuni a xomi bapataiso, tro kö Nyidrëti a “nenge hui nyipunie la manathithi uti hë atraqate cat.”​—Mala. 3:​10; Iere. 17:​7, 8.

3. Nemene la nyine troa kuca hnene la atr ka nue mel koi Iehova me xomi bapataiso? (Ate Cainöj 5:​4, 5)

³ Ame la epuni a xomi bapataiso, ke kolo hi lai a nyiqane la mele i epun ngöne la huliwa i Iehova. Thupen la bapataiso, nyipiewekë tro epuni a isine troa mele thenge la hnei epun hna sisiny, ngacama traqa ju hë la itre jol me itre itupath. (E jë la Ate Cainöj 5:​4, 5.) Pine laka, ketre atre drei Iesu hë epun, loi e tro epuni a trongëne hnyawa la tulu me itre wathebo i nyidrë. (Mat. 28:​19, 20; 1 Pet. 2:​21) Tro la tane mekune celë a xatua epun göne lai.

 TRO “PALA HI” A XÖTETHENGE IESU NGACAMA HETRE JOL ME ITUPATH

4. Nemene la aliene la kola hape, tro la itretre drei Iesu a isa ajöne “la sinöe ne iaxösisi”? (Luka 9:​23)

⁴ The mekune kö ka hape, pëkö jol ka troa traqa koi epun thupene la bapataiso. Eje hi, hnei Iesu lo hna qaja ka hape, tro la itretre drei nyidrë a isa ajöne “la sinöe ne iaxösisi.” Nge, öni nyidrëti fe, tro angatr a ajöne ej “o drai.” (E jë la Luka 9:​23.) Kolo kö lai a hape, tro palahi la itretre drei nyidrë a akötr? Waea. Nyidrëti pe a qaja e celë ka hape, tha tro hmekuje kö angatr a kepe manathith, ngo tro fe angatr a hane ixelë me itre jol. Nge ame la itre xaa jole cili, ke ka troa catrehnin.​—2 Tim. 3:​12.

5. Nemene la itre manathith hnei Iesu hna troa hamën kowe la itre atr ka nue la itre ewekë i angatr thatraqane la Baselaia?

⁵ Hna hane kö icilekeu me epun hnei fami? Hnei epuni kö hna acone la itre hawa i epun koi maseta matre amë panëne la Baselaia? (Mat. 6:​33) Maine eje hi, öhne kö Iehova la hnei epun hna kuca matre mele nyipici koi Nyidrë. (Heb. 6:​10) Epuni ha jelenyipicine la hna qaja hnei Iesu, ka hape: “Pëkö atr nue uma, me trejin, me xa, me thin, me kem, me ha nekönatr, me hlapa pine la ëjeng, nge pine la maca ka loi, ka tha tro kö a kapa ngöne la hneijine celë la 100 hmaca kö lao uma, me trejin, me xa, me thin, me ha nekönatr, me hlapa ce memine la akötr, nge ngöne la fen ka troa traqa, la mele ka pë pun.” (Mar. 10:​29, 30) Eje hi, tru kö la itre manathith hnei epuni hna kapa, hune la itre ewekë hnei epun hna nu.​—Sal. 37:4.

6. Pine nemen matre tro palahi epuni a isi memine la itre “aja ne ngönetrei” thupene la bapataiso?

⁶ Thupene la bapataiso, tro palahi epuni lai a isi memine la itre “aja ne ngönetrei.” (1 Ioa. 2:​16) Pine laka, ketre matra i Adramu epun, matre atr ka ngazo me ka tha pexeje kö epun. Ame itre xaa ijin, tro hi epuni a mekun tui Paulo. Öni angeic: “Ngacama hnine catrëne ju hë ni la trenge wathebo i Akötresie, ngo eni a öhne ngöne la ngönetreing la ketre wathebo ka cile kowe la mekunang, nge ka hnöthi ni, me nue ni kowe la wathebo ne la ngazo ka eje ngöne la ngönetreing.” (Roma 7:​22, 23) Maine epuni a kucakuca, ke epuni palahi a isi memine la itre aja ka ngazo, lapa mekune jë lo ijine epuni a nue mel koi Iehova. Celë hi ka troa xatua epun troa cile catr ngöne la itupath. Ame hë la epuni a cile kowe la ketre itupath, tro la hnei epun hna sisinyi koi Iehova a xatua epun troa cile catr. Troa tune kaa?

7. Kola xatua epuni tune kaa troa mele nyipici, hnene la hnei epun hna nue mel koi Iehova?

⁷ Ame la epuni a nue mel koi Iehova, epuni hi lai a xele epuni kö. Kolo lai a hape, troa nuetrij la itre sipu aja i epun, me itre mekun hnei epun hna thel troa eatrën, nge ka isazikeu memine la aja i Iehova. (Mat. 16:24) Matre ame la epuni a cil kowe la ketre itupath, atre hë epun la nyine troa kuca me tha kuca, matre mele nyipici koi Iehova. Tro epuni lai a isine troa amadrinë Nyidrë. E cili, epuni hi lai a nyitipu Iobu. Ame lo angeic a cile kowe la itre itupath ka tru, öni angeic: “Tha tro kö ni a nuetrije la aqane mele nyipicing!”​—Iobu 27:5.

8. Kola xatua epun tune kaa troa cile kowe la itre itupath, la epuni a mekun lo thithi i epun lo epuni a nue mel koi Iehova?

⁸ Maine tro epuni a lapa mekun lo thithi epun koi Iehova, lo epuni a nue mel koi Nyidrë, ke tro lai a xatua epun troa cile catr ngöne la nöjei pengöne itupath. Hapeu, tro kö epuni a sas kowe la ketre atr ka ikötresai hë? Waea! Ase hë epuni lo nuetrij la itre aqane ujë cili. Maine tro epuni a  canga fejetrij qa kuhu hni epun la itre thiina cili, tha tro kö epuni lai a isi me itre ej e thupen. Tro hë epuni lai a ananyine “la jëne la ite ka menu.”​—It. Ed. 4:​14, 15.

9. Kola xatua epun tune kaa troa amë panëne la itre huliwa i Iehova, la epuni a mekun lo thithi i epun lo epuni a nue mel koi Nyidrë?

⁹ Tune kaa e traqa ju hamë epun la ketre huliwa ka sewe epun troa sine la itre icasikeu? Atre hi epun la nyine troa kuca, tha tro kö epuni lai a kapa. Qëmekene troa hamën la huliwa cili, ase hë epun axeciën laka, tha tro kö epuni a kapa la ketre huliwa ka troa ajolë epun troa sine la itre icasikeu. Hnene laka, tha ase kö epun kapa lai huliwa, matre tha tro kö epuni lai a thel e thupen la aqane tro epuni a amë panë Iehova ngöne la mele i epun. Hnei Iesu palahi hna isine troa amadrinëne la Keme i nyidrë. Maine tro epuni a lapa mekun la tulu i Iesu, ke tro lai a xatua epuni troa canga thipetrij la itre ewekë ka troa akötrë Iehova.​—Mat. 4:​10; Ioa. 8:​29.

10. Tune kaa la aqane tro Iehova a xatua epun troa xötrethenge Iesu “pala hi” thupene la bapataiso?

¹⁰ Troa mama jëne la itre jol me itre itupath laka, hetre aja i epun troa xötrethenge Iesu “pala hi.” Maine tro palahi epuni a xötrethenge Iesu, tro kö Iehova a xatua epun. Öni Tusi Hmitrötr: “Ka nyipici Akötresie, matre tha tro kö nyidrëti a nue nyipunie kowe la itupath hnei nyipunie hna thatreine xomihnin, ngo hnine la itupath, tro kö nyidrëti a nyi jëne kötre i nyipunie, matre atreine jë nyipunie cile hut.”​—1 Kor. 10:13.

AQANE TRO PALA HI A XÖTRETHENGE IESU

11. Nemene la ketre aqane troa xötrethenge Iesu pala hi? (Wange ju fe la iatr.)

¹¹ Hnei Iesu hna huliwa koi Iehova cememine la hni ka pexej, nge thith la ka xatua  Iesu troa lapa qal koi Iehova. (Luka 6:​12) Ame la ketre aqane tro epuni a xötrethenge Iesu pala hi thupene la bapataiso, ke troa catre kuca la itre huliwa ka troa easenyi epun koi Iehova. Öni Tusi Hmitrötr: “Pine laka hne së asë hi hna kökötr ngöne la lapaun, loi e tro pala hi së a isa nyinyape hnyawa ngöne la iwaja ka cas.” (Fil. 3:​16) Ame itre xaa ijin, epuni a drenge la kola qaja la itre trejin ka catre huliwa i Iehova. Maine jë, hnei angatr hna hane sine lo Ini Koi Itre Ka Cainöj (EER), maine fek pena kowe la ketre götran ka aja ixatua. Maine ijiji epun troa hane tui angatr, ke the cile kö. Aja ne la itre hlue i Iehova asë troa catre cainöj. (It. Hu. 16:9) Maine tha ijiji epun pala kö, ke the mekune pi kö ka hape, ka nyipiewekë kö angatr hui epun. Ame la ka nyipiewekë ngöne la iwaja kowe la mel, ke ene la troa cile hut. (Mat. 10:22) The wangacone kö la itre huliwa hnei epun hna kuca koi Iehova. Madrine catre Nyidrë la epuni a huliwane la atreine i epun, me kuca la ka ijij. Ame la epuni a catre huliwa i Iehova, ke aqane tro hi epuni lai a xötrethenge Iesu pala hi, thupene la bapataiso.​—Sal. 26:1.

12-13. Nemene la nyine troa kuca e epuni a nyiqane nanazij? (1 Korinito 9:​16, 17) (Wange ju fe la hna eköhagen “ Cile Huti Ju Ngöne La Iwaja.”)

¹² Tune kaa la epuni a mekun ka hape, tha epuni hë a thith qa kuhu hni, maine co hë la aja i epun troa cainöj, nge tha madrine hë epun troa e Tusi Hmitrötr? Maine celë hi ka traqa koi epun thupen la bapataiso, the mekune kö ka hape, patre hë la uati hmitrötre i Iehova thei epun. Pine laka, tha ka pexeje kö epun, matre ame itre xaa ijin, kola saze la itre aja i epun. Maine epuni a nyiqane nanazij, mekune jë lo tulu i Paulo aposetolo. Ngacama angeic a isine troa nyitipu Iesu, ngo ame itre xaa ijin,  pëhë aja i angeic troa kuca la huliwa hna upi angeic. (E jë la 1 Korinito 9:​16, 17.) Ngo öni angeic: “E tro ni a kuca nge tha ajange kö, hnëqange kö lai.” Kolo lai a hape, ngacama pëkö aja i angeic troa cainöj, ngo angeice kö a catre cainöj.

¹³ Ketre tun, ame la epuni a axecië mekun, the keithenge kö la hni epun. Catre pi kuca la nyine kuca, ngacama tha aja i epuni kö. Maine tro pala hi epuni a kuca la hna upi epun hnei Akötresie, tro ha traqa trootro la aja. Maine tro epuni a ini Tus, me thith, me sine la itre icasikeu, me catre cainöj, ke tro lai a xatua epun tro pala hi a xötrethenge Iesu, thupene la bapataiso. Tro la aqane cile catre i epun a thuecatrene la itre trejin.​—1 Thes. 5:​11.

‘ISA WAIPENGÖI EPUNI JË’

14. Nemene la nyine tro palahi epuni a kuca thupene la bapataiso, nge pine nemen? (2 Korinito 13:5)

¹⁴ Thupene la epuni a bapataiso, nyipiewekë mina fe tro epuni a isa waipengöi epuni kö. (E jë la 2 Korinito 13:5.) Ame itre xaa ijin, nyipiewekë troa pane mekun la pengöne la mele i epun. Tune la aqane thithi epun, me e me ini Tusi Hmitrötr, me sine la itre icasikeu me cainöj. Thele jë troa öhnyi madrin qa ngöne la itre huliwa hnei epun hna kuca koi Iehova. Celë hi matre isa hnyinge jë ka hape: ‘Atreine kö ni qejepengöne la itre ini ka tru ne la Tusi Hmitrötr? Nemene la nyine tro ni a kuca matre öhnyi madrine ngöne la huliwa ne cainöj? Eni kö a qaja hnyawa la itre ajang koi Iehova ngöne la thith? Nge itre thithinge kö a amamane ka hape, eni a lapaune koi Nyidrë? Eni kö a sine lapane la itre icasikeu ne la ekalesia? Nemene la nyine tro ni a kuca, matre troa drenge hnyawa ngöne la ijine icasikeu, me hane hamë mekun?’

15-16. Nemene la ini hnei epun hna xome qa ngöne la hna melëne hnei Robert?

¹⁵ Waipengöi epuni hnyawa jë, matre öhne la nyine tro epuni a saze. Celë hi hna kuca hnei Robert, ketre trejin. Öni angeic: “Ame lo kola 20 lao macatre, hnenge hna huliwa sine hi la drai. Ase jë hi ni huliwa, hna hë ni hnene la ketre sine huliwang, kowe la hnalapa i angeic. Öni angeic, ‘Nyiso hi edrëhe, nge pëkö ka troa iajolë.’ Ame lo xötrei, eni a thele kepin, ngo e thupen, eni pa qaja hnyawane jë ka hape, waea, me qaja la kepin.” Ka lolo catr, ke tha hnei Robert kö hna kei kowe la itupath. Ngo, ame hë la angeic a mekun hmaca lo ewekë ka traqa, öhne hi angeic laka, maine ju tha tro kö angeic ekö a ujë tune lai. Öni angeic: “Tha hnenge kö hna canga thipetrij la sipo  ne la sine huliwang, tune lo aqane kuca i Iosefa kowe la föi Potifara. (Gen. 39:​7-9) Eni a sesëkötr la eni a öhne laka, jole pi hë koi ni troa canga thipëne la sipo i angeic. Eni a trotrohnin e cili laka, nyipiewekë tro ni a acatrene la imelekeung me Iehova.”

¹⁶ Ka nyipiewekë catr tro epuni a isa waipengöi epun, tui Robert. Maine hnei epun hna cile kowe la ketre itupath, hnyinge jë ka hape, ‘Hapeu, hnenge kö hna canga thipën?’ Maine öhne hi epun ka hape, hetre ketre aqane tro epuni ekö a ujë, ke the kucakuca kö. Madrine jë pe, ke öhne hë epun la nyine troa saze. Thithi jë thatraqane lai, nge isine jë troa acatrene la aja i epun troa metrötrëne la itre trepene meköti Iehova.​—Sal. 139:​23, 24.

17. Tune kaa la aqane atrune la ëje i Iehova ngöne la hna melë hnei Robert?

¹⁷ Hetre ketre ini hne së hna xome qa ngöne la hna melën hnei Robert. Öni angeic: “Thupene la hnenge hna thipëne la sipo ne la sine huliwang, öni angeic, ‘Ka lolo catr, tha kei pi kö eö!’ Matre hnenge hna hnyingë angeic la kepin matre angeic a qaja lai. Öni angeic, hnene la ketre sinee i angeic ka Temoë Iehova ekö, hna qaja ka hape, ame asë hi la itre jeune ka Temoë, ke ka lue iqëmek. Nge maine tro ketre a uku angatr, ke canga tro hi angatr a kuca juetrëne la itre ewekë ka ngazo. Matre, öni angeic kowe la sinee i angeic ka hape, tro angeic a tra thethi ni, me wange ka hape, tro kö ni a kei. Madrine catre ni, ke hnenge hna atrune la ëje i Iehova.”

18. Nemene la nyine tro palahi epuni a kuca thupene la bapataiso? (Wange ju fe la hna eköhagen “ Lue Tane Mekun Ka Troa Xatua Epun.”)

¹⁸ Ame la epuni a nue mel koi Iehova me xomi bapataiso, ke epuni hi lai a amamane ka hape, aja i epun troa atrune la ëje i Iehova, ngacama traqa ju hë la itre itupath. Atre kö Iehova la itre jol me itre itupath hnei epun hna cile kow. Tro kö Nyidrëti a amanathithin la itre trengecatre hnei epuni hna kuca matre mele nyipici koi Nyidrë. Ketre, jëne la uati hmitrötr, tro Nyidrëti a hamë epuni la trengecatr ka ijij. (Luka 11:​11-​13) Jëne la ixatua i Iehova, tro hë epuni lai a atreine xötrethenge Iesu pala hi, thupene la bapataiso.