TANE MEKUN 21
NYIMA 107 Xome Jë La Aqane Ihnimi Akötresie
Aqane Troa Thele La Föi Easë
“Drei la atre öhne la föe loi thiina? Sisitria kö angeic hune la itre korail.”—It. Ed. 31:10, NWT.
MEKUNE KA TRU
Nemene la ka amamane ka hape, ka ihmeku hi me ni la trejin cili? Tro sa xatuane tune kaa la itre trejin ka pi faipoipo? Tro sa ce wange ngöne la tane mekune celë, la itre trepene meköt ka troa sa lai lue hning.
1-2. (a) Nemene la nyine troa kuca hnene la trejin ka tha faipoipo palakö qëmekene troa nyiqane iatre? (b) Kola hapeue la troa “iatre”? (Wange ju la ithuemacany “Göi Troa Trotrohnin.”)
AJA i eö kö troa faipoipo? Nyipici laka, ijije hi tro sa madrin, ngacama tha ka faipoipo kö së. Ame pe, alanyim la itre trejin ka jeune maine qatr, ka hane pi faipoipo. Ngo qëmeken troa iatre me ketre, loi e tro eö a macaj, me hetre huliwa, me imelekeu hnyawa me Iehova. a (1 Kor. 7:36) Matre, tro hë eö elanyi a mele madrin me föi eö.
2 Ngo tha ka hmaloi kö troa öhne la atr ka ihmeku me easë. (It. Ed. 31:10) Nge e öhne hë eö la ketre trejin hnei eö hna ajan troa atre hnyawa, ke tha ka hmaloi kö troa nyiqane iatre. b Ame ngöne la tane mekun celë, tro sa ce wange la ka troa xatuane la trejin ka tha faipoipo palakö troa öhne la ketre atr ka ihmeku me angeic, me nyiqane iatre. Tro fe sa ce wang la aqane tro la ekalesia a xatuane la itre ka pi faipoipo.
AQANE TROA ÖHNE LA FÖI EÖ
3. Nemene la nyine troa atre hnyawa hnene la trejin ka pi faipoipo?
3 Qëmeken troa iatre me ketre, loi e tro eö a atre hnyawa la itre thiina hnei eö hna thel thene la atr hnei eö hna pi faipoipo memin. c Maine thatre hnyawa kö eö, tro eö lai a iëne la ketre atr ka tha ihmeku kö me eö, me tha nyipiewekëne la atr ka ihmeku me eö. Maine mekune hë eö troa faipoipo, ke tro hi a thel thene la itre ka bapataiso. (1 Kor. 7:39) Ngo tha hnene kö laka, ka bapataiso hë angeic, matre ka ihmeku me eö. Loi e tro fe eö a hnying ka hape: ‘Nemene la hnenge hna ajan troa kuca ngöne la meleng? Nemene la itre thiina hnenge hna thele thene la trejin hnenge hna pi faipoipo memin? Hapeu, tru palaha la hnenge hna thel thei ketre?’
4. Nemene la hna thithi fë hnene la itre trejin ka tha faipoipo palakö?
4 Maine eö a thele föi eö, ke ma hnei eö hë hna thithi göne lai. (Fil. 4:6) Eje hi laka, tha hnei Iehova kö hna qaja ka hape, tro Nyidrëti a hamë föi easë. Ngo ka tru koi Nyidrë la itre aja i eö me itre aliene hni eö, matre tro kö Nyidrëti lai a xatua eö. Catre jë pe qaja koi Nyidrë la itre aja i eö me itre mekuna i eö. (Sal. 62:8) Nge sipo Nyidrëti jë troa xatua eö troa atreine itreqe me inamacan. (Iako. 1:5) Hane hi la hna thithi fë hnei trejin John, d qa Etazini, ka tha faipoipo palakö: “Eni a qaja koi Iehova la itre thiina hnenge hna thel thene la jajiny. Eni fe a sipo Nyidrë troa hetre ijin matre tro ni a iöhny memine la ketre trejin föe ka ihmeku me ni. Ketre, eni a sipo Nyidrë troa xatua ni troa hetrenyi la itre thiina ka loi matre tro ni a ketre trahmany ka loi thiina.” Öni Tanya, ketre trejin qa Sri Lanka ka hape: “Tha öhne palakö ni la föeng, ngo eni a sipo Iehova troa xatua ni troa mele nyipici me madrin.” Maine jol koi eö troa öhne la ketre atr ka ihmeku me eö, ke the luelue kö laka, tro kö Iehova a hamë eö la ka nyipiewekë.—Sal. 55:22.
5. Nemene la aqane tro la trejin ka pi faipoipo a iöhny memine la itre xaa trejin ka pi faipoipo, nge ka hnimi Iehova? (1 Korinito 15:58) (Wange ju fe la iatr.)
5 Tusi Hmitrötr a ithuecatr koi së ‘tro pala hi a tru hnei huliwa së koi Joxu.’ (E jë la 1 Korinito15:58.) Maine eö a catre huliwa koi Iehova, me ce tro lapa memine la itre trejin, ke tro eö lai a kepe thangane ka loi. Jëne tro fe eö a iöhny memine la itre xaa trejin ka pi faipoipo, nge ka amë panëne la huliwa i Iehova tui eö. Nge maine tro eö a isine troa amadrinë Akötresie, ke tro hë eö a öhne la nyipi madrin.
Maine ka catre huliwa i Iehova eö me ce tro palahi memine la itre trejin, itre ijine hi lai koi eö troa iöhny memine la itre trejin ka pi faipoipo (Wange ju la paragarafe 5)
6. Nemene la nyine troa mekun hnyawa hnene la itre ka pi faipoipo?
6 Ngo wange palakö, tha tro kö la aja i eö troa faipoipo a tro pa ngöne la mele i eö. (Fil. 1:10) Ame la nyipi madrin, ke ka xulu qa ngöne la imelekeu së me Iehova, ngo tha qa ngöne kö la faipoipo. (Mat. 5:3) Ame la ijin pë palakö föi eö, tru catre la traeme i eö, matre huliwa catr jë koi Iehova. (1 Kor. 7:32, 33). Haawe, ijine hi lai troa nu asë koi Iehova. Hnei Jessica qa Etazini hna faipoipo lo angeic a 40 lao macatre. Öni angeic: “Hnenge ekö hna catre cainöj, celë hi ka hamë madrine koi ni, ngacama eni a pi faipoipo.”
GOEËNE HNYAWANE JU LA AQANE UJË I ANGEIC
7. Pine nemen matre nyipiewekë troa pane xomi ijin troa goeëne hnyawan la aqane ujë ne la ketre trejin, qëmeken troa sipon troa iatre? (Itre Edromë 13:16)
7 Nemene la nyine tro eö a pane kuca, e öhne hi eö ka hape, ka ihmeku la ketre trejin me eö? Tro kö eö a canga qaja koi angeic ka hape, eö a pi iatre me angeic? Tusi Hmitrötr a qaja ka hape, ame la atr ka inamacan, ke ka hetre atrehmekun, kolo lai a hape, angeic a pane ithel qëmeken troa kuca la ketre ewekë. (E jë la Itre Edromë 13:16.) Ketre, qëmeken troa qaja koi angeic ka hape, eö a pi iatre me angeic, ke loi e troa pane goeëne la aqane ujë i angeic. Öni Aschwin qa Pays-Bas ka hape: “Ka canga mejë la ihnim, ngo ka canga patre fe. Haawe, nyipiewekë troa xomi ijin troa pane goeëne hnyawan la aqane ujë i angeic, matre tha tro kö la hni i eö a huli eö troa canga iatre. Ketre, ame la eö a pane goeëne hnyawan la aqane ujë i angeic, ke ma tro eö lai a öhne ka hape, tha ka ihmeku kö epon.
8. Tune kaa la aqane tro la ka pi faipoipo a goeëne hnyawa la atr hnei angeic hna pi iatre memin? (Wange ju fe la iatr.)
8 Tune kaa la aqane tro eö a goeëne hnyawane la atr hnei eö hna pi iatre memin? Ame ngöne la itre icasikeu ne la ekalesia me itre ijine madrin, ke ijine hi lai tro eö a goeëne la nyipi pengöi i angeic, me aqane imelekeu i angeic me Akötresie, me aqane ujë i angeic memine la itre xaa trejin. Hnyinge jë ka hape: Drei la itre sinee i angeic? Nge nemene la hnei angeic hna lapa ithanatan? (Luka 6:45) Ka ceitu kö la itre objectifs i nyio? Ijije hi tro eö a ithanata memine la itre qatre thup ne la ekalesia i angeic, maine itre xaa trejine ka macaj ka atre angeic hnyawa. (It. Ed. 20:18) Aqane tro eö lai a atre la itre thiina me pengöi angeic. (Rut. 2:11) Ngo thupëne kö, matre tha tro kö a ahmahmanyi angeic. Metrötrë angeic ju, nge the lö hnine menune kö la mele i angeic.
Pane goeëne hnyawane jë la atr hnei eö hna pi iatre memin, qëmeken troa qaja koi angeic (Wange ju la paragarafe 7-8)
9. Nemene la ka troa xeci koi eö qëmeken tro eö a qaja la aja i eö troa iatre?
9 Eu la tro eö a qaja la mekuna i eö koi angeic, thupene la hna pane goeë angeic hnyawa? Maine tro eö a canga wai angeic, ke tro angeic lai a mekun ka hape, tha ka inamacane kö eö. (It. Ed. 29:20) Nge e drenge hë angeic ka hape, eö a pi iatre me angeic, ngo hmitre palaha eö, ke tro angeice lai a mekun ka hape, eö a luelu. (A. Cai. 11:4) Qëmeken tro eö a qaja la aja i eö troa iatre me angeic, ke the thëthëhmine kö laka, ma tha angeic kö la hnei eö hna troa faipoipo memin. Ame pe, loi e troa xeci koi eö laka, ijiji eö hë troa faipoipo, nge maine jë ka ihmeku hi epon.
10. Nemene la nyine tro eö a kuca, e öhne hi eö ka hape, ketre atr a pi iatre me eö, ngo tha aja i eö pe?
10 Nemene la nyine tro eö a kuca, e öhne hi eö ka hape, ketre atr a pi iatre me eö, ngo tha aja i eö pe? Amamane jë ngöne la aqane ujë i eö ka hape, tha aja i eö kö. Tha ka loi kö troa elo angeic, me nue angeic troa mekun ka hape, tro epon a iatre elany, ngo tha eje kö.—1 Kor. 10:24; Efe. 4:25.
11. Ame ngöne la itre nöj laka, itre fami la ka eköth la faipoipo, nemene la nyine tro la itre keresiano a mekun hnyawan?
11 Ame ngöne la itre xaa nöj, ke kem me thine la ka iëne la atr ka troa faipoipo memine la nekö i nyidro. Nge ame ngöne pena la itre xaa nöj, ke fami maine itre sinee la ka thel la atr hna troa faipoipo memin. Qanyi angatre kö sa la drai ne tro nyidroti a iöhny, me nue nyidro troa ketre wang ka hape, ka ihmeku kö nyidro. Maine kola sipo eö troa thele föi ketre, maine thele trejin nyine troa iatre memin, ke nyipiewekë tro eö a pane atre la isa aja i nyidro. Maine eö a mekun la ketre atr ka ihmeku memine lai hnei eö hna thele föen, ke loi e troa pane hnyingë pengöi angeice thei itre xan, tune la itre thiina i angeic me aqane imelekeu i angeic me Iehova. The thëthëhmine kö laka, imelekeu me Iehova la ka nyipiewekë catr hune la troa trenamo, me hetre diplôme maine ka hetre göhnë ka mama. Mekune palakö laka, qanyine kö la trejin trahmany me trejin föe axeciën ka hape, tro nyidroti a faipoipo maine waea.—Gal. 6:5.
AQANE TROA NYIQANE IATRE
12. Maine eö ha ajane troa nyiqane iatre, tune kaa la aqane tro eö a qaja koi angeic?
12 Maine eö ha ajane troa nyiqane iatre memine la ketre atr, tune kaa la aqane tro eö a qaja koi angeic? e Maine jë tro eö a iöhnyi me angeic ngöne la ketre götran gaa tru atr, maine troa hë angeic pena ngöne telefon. Qaja hnyawane jë koi angeic la itre mekuna i eö. (1 Kor. 14:9) Pane nue ijine pi koi angeic troa mekune hnyawa qëmeken troa sa koi eö. (It. Ed. 15:28) Nge maine tha ajane kö angeic, ke metrötrëne ju la mekuna i angeic.
13. Tune kaa la aqane tro eö a ujë e kola sipo eö troa iatre? (Kolose 4:6)
13 Tune kaa la aqane tro eö a ujë e kola sipo eö troa iatre? Hnei angeic lai hna pane triji xou, matre troa ithanata me eö. Haawe, nyipiewekë tro eö a loi thiina me metrötrë angeic. (E jë la Kolose 4:6.) Maine eö a ajane troa pane xomi ijin matre axecië mekun, ke qaja jë koi angeic. Ngo the hmitre kö troa canga sa koi angeic. (It. Ed. 13:12) E tha ajane kö eö, ke qaja hnyawane jë koi angeic cememine la metrötr. Hane hi la ka traqa koi Hans, ketre trejin trahmany qa Autriche, la kola sipo angeic hnene la ketre trejin föe. Öni Hans: “Hnei eni hna ithanata amenyikene koi angeic, me qaja hnyawane la mekunang. Hnenge hna canga sa koi angeic, ke tha ajange kö tro angeic a itreqe menu. Ketre, hnenge hna thupëne la aqane ujëng koi angeic e thupen.” Maine eö a kapa la sipo ne la atr ka pi iatre me eö, ke qaja jë koi angeic nge ce ithanatane jë la aqane tro epon a iatre. Nyipici laka, tro lai a isapengöne la aqane waiewekë i epon hnene laka, isa qenenöje i epone kö me itre xaa ewekë ju kö.
AQANE TRO SA XATUAN LA TREJIN KA THA FAIPOIPO PALAKÖ
14. Tune kaa la aqane tro sa xatuane la itre keresiano ka pi faipoipo?
14 Tune kaa la aqane tro sa xatuane la itre keresiano ka pi faipoipo? Troa thupëne la aqane tro sa ithanata me angatr. (Efe. 4:29) Hnyinge jë ka hape: ‘Tha eni kö la a ialinekeu nyidro? Ame la eni a goeëne la trejin trahmany me jajiny ka tha faipoipo palakö a porotrik, ke hapeu, tha eni kö a nango mekuhni nyidro?’ (1 Tim. 5:13) Ketre, tha tro kö sa qaja maine amaman kowe la ketre trejin ka tha faipoipo palakö ka hape, ka loi tro angeic a hane faipoipo. Öni Hans, lo hna qaja ha ka hape: “Önine la itre xaa trejin ka hape, ‘hnauëne laka tha hane kö eö faipoipo? Ke iqatre hë eö lai.’ Itre trenge ithanata lai ka troa thaipiëne la itre ka tha faipoipo palakö. Tro angatre lai a mekun ka hape, pëkö eloi angatr, nge kola uku angatr troa faipoipo!—1 Thes. 5:11.
15. (a) Thenge la tusi Roma 15:2, nemene la nyine tro sa wange hnyawane qëmekene troa thele föene la ketre trejin ka pi faipoipo? (Wange ju fe la iatr.) (b) Nemene la ini hnei eö hna xome qa ngöne la video?
15 Nemene la nyine troa kuca e easa pi ialinekeune la lue trejin ka tha faipoipo palakö? Tusi Hmitrötr a qaja laka, nyipiewekë troa metrötrëne la mekuna i itre xan. (E jë la Roma 15:2.) Alanyim la itre trejin ka tha faipoipo palakö ka xele troa thele föi angatr, matre loi e troa metrötrëne la mekuna i angatr. (2 Thes. 3:11) Ame la itre xan, ke aja i angatre hi, ngo tha qanyi së kö troa thele föi angatr e tha hnei angatre kö hna qaja koi së. f (It. Ed. 3:27) Ame pena itre xan, ke loi e troa kuca, ngo tha tro kö a tru hnei ka atre. Öni Lydia, ketre trejin föe qa Allemagne: “Ijije hi tro sa itrony memine la itre trejin nge ce nyidroti fe me easë. Ijine tro hi nyidroti lai a iöhny, nge qanyi nyidroti pë hë.”
Ame la itre ijine kola itrony la itre trejin, ke itre ijine hi lai kowe la lue trejin ka tha faipoipo palakö troa iöhny (Wange ju la paragarafe 15)
16. Nemene la nyine troa mekun hnene la trejin ka tha faipoipo palakö?
16 Ijiji easë asë hi, itre ka tha faipoipo palakö me itre ka faipoipo, troa mele madrin! (Sal. 128:1) Ngo e tha öhne palakö eö la aja i eö, ke catre jë kö huliwa i Iehova. Öni Sin Yi ketre trejin qa Macao ka hape: “The qaja palaha la etrune la ijine eö a troa ce mele elany memine la föi eö ngöne la paradraiso hune enehila la eö a lapa cas. Haawe, melëne hnyawa jë la ijine tha faipoipo palakö eö.” Ngo tune kaa e eö ha nyiqane iatre me ketre? Ame ngöne la tane mekun e thupen, tro pë hë së a ce wang la itre eamo ka troa xatua së matre tro loi la ijine iatre.
NYIMA 137 Itre Föe Ka Mele Nyipici, Itre Keresiano Föe
a Maine eö a ajan troa atre ka hape, ijiji eö hë troa hane faipoipo, ke wange ju la tane mekun “Relations amoureuses—Fréquenter (partie 1) : Suis-je prêt ?” ngöne jw.org.
b GÖI TROA TROTROHNIN: Ame la hnaewekë “iatre,” ke kola qaja la trejin trahmany me föe ka thel troa atrepengöi ketre, matre wang ka hape, ka ihmeku kö nyidro. Tro itre xan a qaja ka hape, nyidro a nyiqane iöhny. Kola nyiqane iatre la trahmany me föe, la nyidroti a isa qaja la aja i nyidro troa atrepengöi ketre hnyawa. Tro nyidro a iatre, utihë la tro nyidroti a faipoipo, maine tro pena nyidroti a inu.
c Ame la itre trepene meköt hna qaja ngöne la tane mekune celë, ke thatraqane la itre trejin trahmany me föe.
d Hna saze la itre ëj.
e Ame ngöne la itre xaa nöj, ke trejin trahmany la ka sipone la trejin föe troa nyiqane iatre. Ngo tha ka ngazo kö e tro la trejin föe a sipo iatre kowe la trejin trahmany. (Rut. 3:1-13) Maine epuni a aja itre xaa ithuemacany, wange ju la tane mekun “Les jeunes s’interrogent. . . Comment lui dire ce que je ressens pour lui ?” ngöne Hmeke Jë! ne 22 Okotropa 2004.
f Wange ju ngöne jw.org la video, Itre Ka Catre Lapaun—Itre Ka Pë Föen.