TANE MEKUN 18
NYIMA 1 Itre Thiina i Iehova
Mejiune Jë Kowe “La Atre Iameköti e Cailo Fen” Ka Utipin!
“Hapeu, tha tro kö la Atre Iameköti e cailo fen a kuca la ka meköt?”—GEN. 18:25.
MEKUN KA TRU
Tro la tane mekune celë a acatrene la mejiune së laka, tro kö Iehova elany a amelene hmaca la itre ka tha meköti kö cememine la meköt me utipin.
1. Nemene la nyipici hnei Iehova hna qaja koi Aberahama, nge ka akeukawanyi së enehila?
THA thëthëhmine kö Aberahama la porotrike i angeic me Iehova. Jëne la ketre angela, hnei Iehova hna thuemacanyi angeic laka, tro Nyidrëti a apatrenyi Sodroma me Gomora. Hnei Aberahama hna seseu, matre öni angeic: “Nyipici kö lai laka, tro nyipëti a ce apatrene la atre ka meköt me ka ngazo? . . . Hapeu, tha tro kö la Atre Iameköti e cailo fen a kuca la ka meköt?” E cili, hnei Iehova hna qaja kowe la sinee i Nyidrëti hna hnim, la ketre nyipici ka akeukawanyi së enehila laka, tha tro jë kö Nyidrëti a apatrene la itre ka meköt.—Gen. 18:23-33.
2. Hnauëne laka, xecie koi së ka hape, ka ihnim me meköt la aqane iameköti Iehova?
2 Hnauëne laka, xecie koi së ka hape, ka ihnim me meköt la aqane iameköti Iehova? Ke atre hi së laka, ame Iehova, “nyidrëti a goeëne la ka ej e kuhu hni” ne la atr. (1 Sam. 16:7) Eje hi, atre hi Nyidrëti “la aliene la hni ne la itre atr” isa ala cas. (1 It. Jo. 8:39; 1 Aq. Jo. 28:9) Hapeu, tha nyine haine kö lai? Thatreine kö sa mekune la etrune la inamacane i Iehova la Nyidrëti a ameköti ewekë. Celë hi matre öni Paulo aposetolo göi Iehova Akötresie ka hape: “Pëkö ka trotrohnine la itre iameköti nyidrë!”—Roma 11:33.
3-4. a) Nemene la itre hnyinge së e itre xaa ijin? b) Nemene la hne së hna troa ce wange ngöne la tane mekune celë? (Ioane 5:28, 29)
3 Ame itre xaa ijin, tro hi sa hane hnyinge tui Aberahama, ka hape: ‘Ijije kö tro Iehova a amelene hmaca la itre atr hnei Nyidrëti hna apatren, tune lo angetre Sodroma me Gomora? Hapeu, tro kö a amelene hmaca la itre xan thei angatr elany?’—It. Hu. 24:15.
4 Tro hmaca së a ce wange lo hne së hna atre hë göne la melehmaca. Ame lo eue hi lo, hna ahnyipixene hmaca lo ini göne la melehmaca “kowe la mel” me melehmaca kowe “la iameköti.” a (E jë la Ioane 5:28, 29.) Hnene lai, matre hetre itre xaa ini hna ahnyipixen. Nge celë hi hne së hna troa ce wang ngöne la tane mekune celë me e thupen. Tro sa ce wange la itre aqane ameköti ewekë i Iehova ekö, memine la itre ewekë hne së hna thatre me atre.
ITRE HNE SË HNA THATRE
5. Nemene la hna qaja hnene la itre itusi së ekö göne la angetre Sodroma me Gomora?
5 Nemene la hna qaja hnene lo itre itusi së ekö, göne la itre atr hnei Iehova hna amekötine ka hape, itre ka tha meköti kö? Itre eje lo a qaja ka hape, ame la itre atr tune lo angetre Sodroma me Gomora, ke pëkö melehmaca ka ijije koi angatr. Ngo thupene la hna sine ajuine la ini cili me thith, kola mama ka hape, tha eje kö lai. Pine nemen?
6. Drei la itre atr ka tha meköti kö hnei Iehova hna apatren, nge nemene la hne së hna thatre?
6 Tro sa ce wange la itre xaa hna melëne e hnine la Tusi Hmitrötr, lo Iehova a amekötine la itre atr ka tha meköti kö. Ame ngöne lo ijine Iwë Atraqatr, hnei Iehova hna amekötin la itre atr, nge thatre kö së la etrune la itre ka mec. Nge e thupen, hnei Nyidrë hna upe la nöje i Nyidrë troa apatrene la 7 lao nöj ka lapan la Nöje Hna Thingehnaean. Kolo fe a qaja lo 185 000 lao sooc ne Asuria hna humuthe hnene la angela i Iehova ngöne hi la ca jidr. (Gen. 7:23; Dreut. 7:1-3; Isa. 37:36, 37) Tusi Hmitrötre kö a amamane e cili ka hape, ase hë Iehova amekötine tro angatr a mec palua, nge pë hmaca kö melehmaca koi angatr? Waea. Pine nemene matre qaja jë së lai?
7. Nemene la hne së hna thatre göne la itre ka mec ngöne lo ijine Iwë Atraqatr, memine lo kola thapa la nöje Kanana? (Wange icetrön.)
7 Thatre kö së la aqane ameköti angatr isa ala cas hnei Iehova. Ketre thatre kö së ka hape, hnei angatre kö hna hane atre Nyidrë me ietra. Tusi Hmitrötr a qaja ka hape, Noa la “atre cainöjëne la meköt” qëmekene troa traqa la Iwë Atraqatr. (2 Pet. 2:5) Ngo tha Tusi Hmitrötr kö a qaja ka hape, hnei angeic hna thele troa thuemacanyine asë la nöjei atr ka hape, calemi hë la Iwë Atraqatr, nge ketre huliwa ka tru fe troa cane la aka. Ketre tun, thatre kö së ka hape, hnene kö la itre atre asë ne Kanana hna hane atre Iehova me saze la aqane ujë i angatr.
Noa me fami angeic a cane la ketre he atraqatr. Tha ase kö qaja ka hape, ame ngöne la ijine cane la aka, ke hnei Noa mina fe hna catre cainöj kowe la itre atr asë qëmekene troa traqa la Iwë Atraqatr (Wange ju la paragarafe 7)
8. Nemene la hne së hna thatre göne lo itre atr ne Sodroma me Gomora?
8 Nge tune kaa fe lo itre atrene Sodroma me Gomora? Lota la ketre atr ka meköt ka ce mele me angatr. Hnei angeice kö hna cainöj koi angatr asë? Thatre kö së. Itre ka ngazo thiina angatr, ngo hapeu atreine kö angatr wangatrehmekune la loi me ngazo? Mekune hi epuni lo, hna traqa la itre trahmanyi ne Sodroma troa angazone lo lue hna hën hnei Lota. Tusi Hmitrötr a qaja ka hape, ame lo itre ka traqa, ke “qaane la nekönatr uti hë la qatr.” (Gen. 19:4; 2 Pet. 2:7) Hapeu, tro kö sa qaja ka hape, ase hë Iehova Akötresie ka tru trenge utipin, ameköti angatr isa ala cas kowe la meci ka epine palua? Waea. Nyipici laka, öni Iehova lo koi Aberahama ka hape, goi tha traqa fe koi 10 lao atr ka meköt ngöne la traone cili. (Gen. 18:32) Matre, itre atr ka tha meköti kö angatr, nge ame koi Iehova angatre kö lai a xeni pun la itre huliwa i angatr. Ngo hapeu, ijiji kö tro sa qaja ka hape, pëkö ala cas thei angatr ka troa hane melehmaca elany? Waea, tha ijije kö tro sa qaja lai!
9. Nemene la hne së hna thatre göi Solomona?
9 Tusi Hmitrötre fe a qaja lo itre atr ka meköt, ngo ka kuca la ngazo e thupen. Tui Solomona joxu. Ka atre Iehova angeic, nge atre fe hi angeic la aqane troa nyihlue i Nyidrë, nge tru la itre manathith hnei angeic hna kapa qaathei Iehova. Ngo e thupen, hnei angeic hna thil koi itre haze. Matre hnei Iehova hna elëhni pine angeic kuca la itre ngazo cili, nge hna xeni pune pë hë hnene la angetre Isaraela ngöne la itre macatre thupen. Nyipici, öni Tusi Hmitrötr, hnei Solomona “hna meköl memine la itre qaaqaa i nyidrë ngöne la mec,” kolo itre atr ka meköt tui Dravita joxu. (1 It. Jo. 11:5-9, 43; 2 It. Jo. 23:13) Ngo, hapeu, tro kö a amele angeic hmaca, ke hna ce kelemi angeic memine lo itre ka meköt? Tha hna qaja kö hnei Tusi Hmitrötr. Maine jë, tro itre xan a qaja ka hape, “ame la atre ka mec, tre pëhë ngazo i angeic.” (Roma 6:7) Kösë angatr a qaja ka hape, ame la ka mec, ke tro kö angeic a melehmaca. Ngo tha eje kö lai. Tha tro kö a amelen asë la itre ka mec. Ame la melehmaca ke, ketre ahnahna lai qaathene la Akötresi së ka ihnim. Nyidrëti a hamëne la ahnahna cili kowe la itre ka ajane troa nyihlue i Nyidrë uti hë epine palua. (Iobu 14:13, 14; Ioa. 6:44) Hapeu, tro kö Solomona a hane kapa la ahnahna cili? Iehova hmekuje hi la ka atre. Ngo ame la hne së hna atre, ke ka meköti palahi la aqane ameköti ewekë i Iehova.
ITRE HNE SË HNA ATRE
10. Aja i Iehova kö troa apatrene la ketre atr? (Ezekiela 33:11) (Wange ju fe la iatr.)
10 E jë la Ezekiela 33:11. Pine laka, tru la ihnimi Iehova, Nyidrëti a qaja la aliene hni Nyidrë, la Nyidrëti a amekötine la ketre atr. Tui Ezekiela, öni Peteru aposetolo, “Xele kö [Iehova] troa apatrene la ketre e nyipunie.” (2 Pet. 3:9) Eje hi, tune la hna qaja hnei Peteru, atre hi së laka, xele kö Iehova troa canga apatrene paluane la ketre atr. Ka tru trenge utipine Nyidrë, matre Nyidrëti a pane utipi së qëmekene troa amekötin.
Jëne la melehmaca ne la itre ka tha meköti kö, tro la nöjei pengöne atr a hane atre Iehova (Wange ju la paragarafe 10)
11. Drei la itre atr laka, tha tro kö a amele angatr hmaca, nge hne së hna atre tune kaa?
11 Hetre atre kö hne së hna atre laka, tha tro kö a hane amele angeic hmaca? Öö, Tusi Hmitrötr a qaja la itre xan. b Hnei Iesu hna qaja ka hape, tha tro kö a amele Iudra Isakariota. (Mareko 14:21; wange ju fe la note d’étude qene Wiwi ngöne Ioane 17:12.) Eje hi hnei Iudra hna kuca atre la ewekë ka ngazo, ene la troa icilekeu me Iehova me Iesu. (Wange ju la Mareko 3:29 memine la itre note d’étude qene Wiwi.) Ketre, öni Iesu ka hape, ame la itre xaa he ne hmi ka icilekeu me nyidrë, ke pëkö melehmaca ka ijij koi angatr. (Mat. 23:33; wange ju la Ioane 19:11 memine la note d’étude qene Wiwi “l’homme.”) Hnei Paulo mina fe hna qaja ka hape, ame la itre ka iamenumenu ka tha ietra kö, ke tha tro kö a hane amele angatre hmaca.—Heb. 6:4-8; 10:29.
12. Nemene la hne së hna atre göne la utipine i Iehova? Qaja jë la lue ceitun.
12 Ngo ka utipine Iehova, nge “xele kö Nyidrë troa apatrene la ketre e nyipunie.” Nemene la ka anyipicine lai? Tro sa ce wang la aqane utipine Iehova la lue atr ka kuca la itre ngazo ka tru. Hnei Dravita joxu hna nyixetë me ihumuth. Hnei angeic hna ietra, matre hnei Iehova hna köletrij la itre ngazo i angeic. (2 Sam. 12:1-13) Tui Manase Joxu, ame ngöne la mele i nyidrë, tru catr la itre ewekë ka ngazo hnei nyidrë hna kuca. Ngo, hnei Iehova hna utipi nyidrë. Hnei Iehova hna öhne laka, hnei Manase hna ietra, matre hnei Nyidrëti hna nue la ngazo i Manase. (2 Aq. Jo. 33:9-16) Lue tulu celë a amamane laka, Iehova a nue la ngazo ne la atr ka ietra. Tro kö Iehova a amelene hmaca la itre atr ka tui Dravita me Manase, itre ka hacefë la itre ngazo i angatr, me ietra.
13. (a) Hnauëne la Iehova a utipine la angetre Nineve? (b) Nemene la hnei Iesu hna qaja göne la angetre Nineve?
13 Tro sa ce wang la aqane utipine Iehova la angetre Nineve. Öni Akötresie koi Iona: “Xulu hë qëmekenge la ngazo i angat.” Ngo ame hë la angatr a ietra, ke hnei Iehova hna nue la ngazo i angatr. Hnei Iona hna elëhni, ngo hnei Iehova hna utipi angatr. Öni Akötresie kowe la perofeta i Nyidrë ka hape, thatreine kö la angetre Nineve wangatrehmekune la loi me ngazo. (Iona 1:1, 2; 3:10; 4:9-11) E thupen, hnei Iesu hna qaja la tulu i angetre Nineve matre troa inine kowe la itretre dreng ka hape, ka meköt me utipine Iehova. Öni nyidrë mina fe ka hape, “tro ha amelene hmaca . . . la angetre Nineve [ka ietra] ngöne la Drai Ne Iameköti.”—Mat. 12:41.
14. Nemene la ka troa traqa kowe la angetre Nineve hna amelene hmaca kowe la “iameköti”?
14 Eu “la Drai Ne Iameköti,” ijine troa amelene hmaca la angetre Nineve? Öni Iesu, hetre atr hna troa amelene hmaca elanyi kowe la “iameköti.” (Ioa. 5:29) Nyidrëti a qaja la ijine tro nyidrëti “a amelene la itre atre ka meköt, me ka tha meköti kö” ngöne la 1 000 lao macatre ne musi nyidrë. (It. Hu. 24:15) Ame la itre ka tha meköti kö, troa amele angatr kowe la “iameköti.” Tro Iehova me Iesu a goeëne la aqane ujë i angatr kowe la itre trenge nyipici hna troa ini angatr. Ame la angetre Nineve ka xele ma nyihlue i Iehova, ke troa apatrene palua angatr. (Isa. 65:20) Ngo ame kö la itre ka iën troa nyihlue i Iehova, me mele nyipici, ke tro hë angatr a mel utihë epine palua!—Dan. 12:2.
15. (a) Pine nemene matre tha tro kö sa qaja ka hape, tha tro kö a amelene la angetre Sodroma me Gomora? (b) Tro sa trotrohnine tune kaa la hna qaja ngöne Iudra 7? (Wange ju la hna eköhagen “ Nemene La Hna Qaja Hnei Iudra?”)
15 Tro pena sa ce wang la itre atr ka mel e Sodroma me Gomora. Öni Iesu ka hape, ame ngöne “la Drai Ne Iameköti,” loi ju kö la itre thiina i angatr hune lo itre ka nuetriji Iesu me itre ini nyidrë. (Mat. 10:14, 15; 11:23, 24; Luka 10:12) Kola hapeue lai? Maine jë, tro sa mekune ka hape, Iesu a xom la ketre ceitun matre amamane laka, ngazo catre palaha la itre thiina ne la itre atr ne la hneijine i nyidrë, hune la itre atr e Sodroma me Gomora. Ngo tha eje kö lai, casi hi la hnei nyidrëti hna qaja göne la angetre Nineve me itre atrene Sodroma me Gomora. Matre casi hi “la Drai Ne Iameköti” koi angetre Nineve me angetre Sodroma me Gomora. Hnei angatr hna kuca la itre ewekë ka ngazo tune la angetre Nineve. Ngo ame kö la angetre Nineve, hna nue ijine koi angatr troa ietra. Ketre, öni Iesu, ame la itre atr hna troa amelene hmaca kowe la “iameköti,” ke kolo “itre ka kuca la ngazo.” (Ioa. 5:29) Matre easa trotrohnine laka, ijije hi troa amelene hmaca la angetre Sodroma me Gomora. Maine jë, troa amelene la itre xan e angatr, nge tro sa ini angatr troa atre Iehova me Iesu Keriso!
16. Tune kaa la aqane kuca i Iehova matre amekötin ka hape, drei la hna troa amelene hmaca? (Ieremia 17:10)
16 E jë la Ieremia 17:10. Kola mama ngöne la xötre celë la hne së hna atre laka, Iehova la Atre “thele la hni” me Atre “tupathe la ite mekun.” Ame ngöne la ijine melehmaca, tro kö Nyidrëti a “isa hamëne kowe la nöjei ate tune la ite jë i angat.” E hetre nyipi kepin, tro Iehova a amekötin, ngo tro palahi Nyidrëti a utipin. Matre tha tro pi kö sa canga qaja ka hape, tha tro kö a amelene hmaca la ketre atr, e pëkö hna qaja hnei Tusi Hmitrötr!
“TRO KÖ LA ATRE IAMEKÖTI E CAILO FEN A KUCA LA KA MEKÖT”
17. Nemene la ka troa traqa kowe la itre atr ka mec?
17 Qane lo Adramu me Eva a ce xöle me Satana, traqa koi itre miliar lao atr ka mec. Ame la mec, ke ketre “ithupëjia” ka ngaa së! (1 Kor. 15:26) Nemene la ka traqa kowe la itre atr ka mec? Ame la itre xaa atre drei Keriso ka mele nyipici, ka ala 144 000, tro angatr a mele palua e koho hnengödrai. (Hna Am. 14:1) Nge ame la itre trahmany me föe ka alanyim ka mele nyipici me hnimi Iehova, “itre atre ka meköt,” ke tro fe a amele angatr e celë fen. E tro angatr a mele nyipici ngöne la ijine Musi Iesu ka 1 000 lao macatre me ngöne la itupath tixenuë, ke tro hë angatr a mele palua. (Dan. 12:13; Heb. 12:1) Ame ngöne la 1 000 lao macatre, tro ha nue ijine kowe la itre “ka tha meköti kö,” kola qaja la itre ka thatre Iehova memine la “itre ka kuca la ngazo,” troa saze, me hane nyihlue i Nyidrë. (Luka 23:42, 43) Ngo, ame kö la itre atr ka ngazo thiina, itre ka icilekeu me Iehova memine la aja i Nyidrë, ke tha tro kö Nyidrëti a amele angatr.—Luka 12:4, 5.
18-19. (a) Pine nemene matre xecie koi së laka, ka meköt la aqane tro Iehova a amekötine la itre ka mec? (Isaia 55:8, 9) (b) Nemene la hne së hna troa ce wang ngöne la tane mekun e thupen?
18 Ka xecie kö koi së ka hape, ka lolo palahi la aqane axecië mekune i Iehova, la Nyidrë a amekötine la itre atr? Öö! Tui Aberahama, trotrohnine hnyawa hi easë ka hape, Iehova la Atre Iameköti, ka inamacan me tru trenge utipin. Nyidrëti la “Atre Iameköti e cailo fen.” Hnei Nyidrëti hna inin me nue la Nekö i Nyidrë troa ameköti ewekë. (Ioa. 5:22) Atre hnyawa hi Iehova me Iesu la aliene hni së isa ala cas. (Mat. 9:4) Nge tro palahi nyidro a kuca “la ka meköt”!
19 Isa isine jë së troa mejiune koi Iehova. Atre kö Nyidrë hu së la nyine troa kuca! Tha qa i easë kö troa amekötine la ketre atr, ngo hnëqa i Iehova hmekuje hi. (E jë la Isaia 55:8, 9.) Loi e tro sa nue koi Iehova me koi Iesu, Joxu ka meköt me utipine tui Iehova, troa amekötine asë la itre ewekë. (Isa. 11:3, 4) Ame elanyi ngöne la ijine akötr atraqatr, tune kaa jë la aqane tro Nyidrëti a ameköti ewekë? Nemene la itre ewekë hne së hna thatre me hne së hna atre? Tro la tane mekun e thupen a sa la hnyinge cili.
NYIMA 57 Troa Cainöje Kowe La Nöjei Atr Asë
a Wange ju la Ita Ne Thup ne Semitrepa 2022, g. 14-19.
b Ame göi Adramu, Eva, me Kaina, wange ju la Ita Ne Thup ne 1 Januare 2013, g. 12, ithuemacany.