1. Nemene la itre ithuemacany hne së hna kapa ngöne la icasikeu ka tru ne la macatre 2023?

 AME ngöne la icasikeu ka tru ne la macatre 2023, a hne së hna kapa la itre ithuemacanyi ka hnyipixe göne la itre xaa ini hne së hna mejiune kow, me itre xaa ithuemacany göi huliwa ne cainöj. Hne së hna trotrohnine laka, ijije palakö tro la itre xaa atr a lö kowe la nöje i Iehova, thupene la kola apatrenyi Babulona Atraqatr. Ketre, ase fe hë lo thuemacanyi së laka, qane Nofeba 2023, tha nyipiewekë hë troa makën la itre hawa ne cainöje së. Hapeu, kolo kö lai a qaja ka hape, tha nyipiewekë hë la huliwa ne cainöj? Waea, tha eje kö lai!

2. Pine nemene matre kolo palahi a nyipiewekë catr la huliwa ne cainöj? (Mareko 13:10)

² Kola tro la itre drai, nge kolo palahi a nyipiewekë catr la huliwa ne cainöj. Pine nemen? Pine laka saqe catre hë la pun. Mekune jë lo hnei Iesu hna qaja göi huliwa ne cainöj ngöne la itre drai ne la pun. (E jë la Mareko 13:10.) Ame ngöne la tusi Mataio, öni Iesu, troa cainöjëne la maca ka loi ngöne la fen asë, qëmekene troa traqa “la pun.” (Mat. 24:14) Ame la hnaithanata cili, ke kola qaja la pun ne la fen ka ngazo i Satana. Atre hi së ka hape, ase hë Iehova sa “la drai me hawa” ne traqa la itre ewekë cili. (Mat. 24:36; 25:13; It. Hu. 1:7) Kola tro la itre drai, nge easa palahi a easenyi catr kowe la pun. (Roma 13:11) Matre nyipiewekë tro palahi sa catre cainöj.

3. Nemene la ka uku së troa cainöj?

 ³ Mekune jë së la huliwa ne cainöj, nge thele jë ka hape: Pine nemene matre eni a cainöjëne la maca ka loi? Eje hi, ihnim la ka uku së troa cainöj. Huliwa ne cainöj a qajaqaja la pengöne la ihnimi së kowe la maca ka loi, ihnimi së kowe la itre atr, me ihnimi së koi Iehova me ëje i Nyidrë. Tro sa ce wang la köni ewekë celë.

EASA CAINÖJ KE KA TRU KOI SË LA MACA KA LOI

4. Nemene la hne së hna canga kuca la easa kapa la ketre maca ka loi?

⁴ Pane mekune jë la ijin, eö a kapa la ketre maca ka loi. Maine jë, kola thuemacanyi eö ka hape, mala ha la nekön ne la ketre atrene la fami eö, maine öhne hë eö la huliwa hnei eö hna ajan. Tune kaa eö la eö a dreng la itre maca cili? Eö a pi canga qaja kowe la fami me itre sinee i eö. Celë kö aqane ujë i eö, la eö a kapa la maca ka sisitria catr, ene la maca ka loi ne la Baselaia i Akötresie?

5. Tune kaa eö la eö a atre la nyipici qa hnine la Tusi Hmitrötr? (Goeëne ju fe la itre iatr.)

⁵ Pane mekune jë la ijin eö a xötrei dreng la nyipici qa hnine la Tusi Hmitrötr. Eö a atre e cili ka hape, Keme i eö e hnengödrai a hnimi eö, nge aja i Nyidrë tro eö a hane sine la fami Nyidrë. Ketre, tro Nyidrëti a apatrene la akötr, me amelene hmaca la itre sinee i eö ngöne la fen ka hnyipixe, me itre xaa ewekë hmaca kö. (Mar. 10:​29, 30; Ioa. 5:​28, 29; Roma 8:​38, 39; Hna Am. 21:​3, 4) Itre ini lai ka ketr la hni i eö. (Luka 24:32) Ka tru catr koi eö la hnei eö hna inin, matre thatreine kö eö lapafë!​—Wange ju la Ieremia 20:9.

6. Nemene la ini hnei eö hna xom qa ngöne la tulu i Ernest me Rose?

⁶ Tro sa ithanatane la hna melën hnene la ketre trejin, Ernest. b Hna mecitriji angeic hnene la keme i angeic lo angeic a 10 lao macatre. Öni Ernest: “Eni a pi atre ka hape:  ‘Ekaa jë nyidrë? E koho hnengödrai? Maine ka meci palua ha?’ Eni a nango zalu kowe la itre xaa nekönatr ka mele kemen.” Ernest a tro lapa kowe la hnë kelewezipo, me saiwatingöneca qëmekene la hua i keme i angeic me thith ka hape: “Akötresieti fe, eni a pi atre ka hape, ekaa jë kaka.” Thupene la 17 lao macatre, hnene la ketre Temoë Iehova hna hë angeic troa ini Tus, ame hnei angeic hna kapa. Kola elë la trenge madrine i angeic la angeic a atre ka hape, thatre hë koilo hnene la itre ka mec, ke angatr a hmulizië. Nge Tusi Hmitrötr a qaja ka hape, hetre melehmaca. (A. Cai. 9:​5, 10; It. Hu. 24:15) E cili hi la angeic a kapa la itre mekun ka sa lo itre hnyinge ka ajolëne la hni angeic qaan ekö! Madrine catre Ernest la kola atre la itre nyipici qa hnine la Tusi Hmitrötr. Hnei Rose, föi angeic hna hane nyiqane ini Tusi Hmitrötr, nge ka tru koi angeic la itre ini hnei angeic hna kapa. Hna bapataiso nyidro lo 1978. Canga saqe hi nyidro ce thawa la itre nyipici cili kowe la itre fami, me itre sinee i nyidro, memine la itre atr ka pi drei nyidro. Ame la thangan, ase hë sasaith la 70 lao atr hnei Ernest me Rose hna xatuane troa atre Iehova me xomi bapataiso.

7. Nemene la ka traqa la kola ketr la hni së hnene la Tusi Hmitrötr? (Luka 6:​45)

⁷ Eje hi laka, ame la kola ketri së hnene la Tusi Hmitrötr, thatreine hë së lapafë la itre hne së hna inin. (E jë Luka 6:​45.) Casi hi la mekuna së memine lo atre drei Iesu ekö, lo nyidro a hape: “Thatreine kö nyio cipane la itre ewekë hnei nyio hna öhne me dreng.” (It. Hu. 4:​20) Ka tru catre koi së la nyipici, matre tru la aja së troa ce thawa ej memine la nöjei pengöne atr.

EASA CAINÖJ KE KA TRU KOI SË LA ITRE ATR

8. Nemene la ka uku së troa ce thawa me itre xan la maca? (Wange ju la hna eköhagen “ Hnime Jë La Itre Atr Hnei Epun Hna Inin.”) (Wange ju fe la iatr.)

⁸ Tui Iehova me Iesu, easa hnim la itre atr. (It. Ed. 8:​31; Ioa. 3:​16) Easa utipine la itre atr ka ‘pë Akötresie’ me ‘pë mejiun.’ (Efe. 2:​12) Pine laka, tru catr la itre jol ka traqa, kösë angatr e kuhu hnin la ketre hnaop ka jui catr. Eloine pe, hetrenyi the së la eno nyine huli angatr, ene la maca ka loi ne la Baselaia i Akötresie. Ihnim me utipine së koi angatr la ka troa uku së, troa ce thawa me angatr la maca ka loi. Tro eje lai a hamë angatr la mejiun, ka troa xatua angatr troa hetre mel ka loi enehila, me kapa elanyi la “nyipi mel,” ene la mel ka pë pun ngöne la fen ka hnyipixe.​—1 Tim. 6:​19.

9. Nemene la maca hne së hna tro fë, nge pine nemen? (Ezekiela 33:​7, 8)

⁹ Tro fe la ihnimi së kowe la itre atr a uku  së troa thuemacanyi angatr laka, easenyi hë la pun la fen celë. (E jë la Ezekiela 33:​7, 8.) Hetre utipine së kowe la nöjei atr, me kowe mina fe la itre fami së ka tha nyihlue i Iehova kö. Tru catr la ka kuci mekun, nge thatre kö angatr laka, easenyi hë la “akötr atraqatr, ewekë ka tha hane kö traqa qaane lo Akötresie a nyiqaane xupe la fene hnengödrai uti hë enehila, nge tha tro hmaca kö a hane tun.” (Mat. 24:21) Aja i easë tro angatr a atre laka, easenyi hë troa apatrene la hmi ka thoi, nge e thupen, troa apatren asë la fene ka ngazo e Amagedro. (Hna Am. 16:​14, 16; 17:​16, 17; 19:​11, 19, 20) Easa thith matre tro la nöjei atr a hane kapa la maca hne së hna tro fë, me ce nyihlue i Iehova me easë. Ngo tune kaa pë hë lo itre atr ka xele ma drei së enehila, tune la itre xaa fami së?

10. Pine nemene matre ka nyipiewekë catr enehila tro sa canga thuemacanyine la itre atr laka, tro ha apatrenyi Babulona Atraqatr?

¹⁰ Tune la hne së hna ce wang, maine jë tro fe Iehova a amelene ngöne la ijine Amagedro, la itre atr ka saze, la kola apatrenyi Babulona Atraqatr. Celë hi matre, nyipiewekë catr enehila tro sa canga thuemacanyine la itre atr laka, easenyi hë la pun. The thëthëhmine kö laka, ame la kola apatrenyi Babulona Atraqatr elany, maine jë tro hmaca angatre lai a mekun lo hnei easë hna qaja koi angatr ekö. (Wange ju la Ezekiela 33:33.) Nge celë hi ka troa uku angatr troa hane nyihlue i Iehova me easë, e ijine petre kö. Ame lo atre thupëne la kalabus e Filipi, hnei angeic hna saze, lo kola enijëne la kalabus hnene la “sa atraqatr.” Ketre tune fe, ijije hi tro la itre xan ka xele ma dreng la maca së enehila, a saze la angatr a öhne la kola lepi Babulona Atraqatr.​—It. Hu. 16:​25-​34.

EASA CAINÖJ KE KA TRU IEHOVA MEMINE LA ËJE I NYIDRË KOI SË

11. Nemene la aqane tro sa atrun me metrötrë Iehova, nge nemene la aqane tro sa hamë Nyidrë la “men”? (Hna Amaman 4:​11) (Goeëne ju fe la itre iatr.)

¹¹ Ame la nyipi kepin matre easa cainöjëne la maca ka loi, ke hnene la ihnimi së koi Iehova, me kowe la ëje i Nyidrë ka hmitrötr. Ame la huliwa ne cainöj, ke jëne tro sa atrune la Akötresie hne së hna hnim. (E jë la Hna Amaman 4:​11.) Xecie hnyawa koi së laka, ijiji Iehova troa kapa la lolo, me iatruny, me men qaathene la itre hlue i Nyidrë. Easa atrune me metrötrë Nyidrë la easa amamane kowe la itre atr laka, Nyidrëti la ka “xup asë,” nge qaathei Nyidrë la mele së. Nge ame la easa nue la trengecatre së, me traeme së, me mo së troa cainöjëne la maca, easë hi lai hamë Nyidrë la “men.” (Mat. 6:​33; Luka 13:24; Kol. 3:​23) Eje hi,  tru la aja së troa qaja la Akötresie hne së hna hnim. Kolo fe a uku së troa qaja koi itre xan la ëje i Nyidrë, memine la itre thiina i Nyidrë. Pine nemen?

12. Nemene la aqane tro sa ahmitrötrëne la ëje i Iehova ngöne la hna cainöj?

¹² Hnene la ihnimi së koi Iehova matre easa isine troa ahmitrötrëne la ëje i Nyidrë. (Mat. 6:9) Easë fe a hane pi qaja koi itre xan laka, itre trengathoi lo hnei Satana hna qaja göi Iehova. (Gen. 3:​1-5; Iobu 2:4; Ioa. 8:​44) Ame la easa cainöj, tru la aja së troa isigöline la Akötresi së, me qaja la nyipici kowe la itre atr ka pi drei së. Aja i easë tro la nöjei atr a atre laka, ihnim la thiina ka tru i Nyidrë, nge meköt la aqane musi Nyidrë. Ketre, easenyi hë tro la Baselaia i Nyidrë a apatrene la nöjei akötr, me traqa fë la tingeting kowe la itre atr e celë fen. (Sal. 37:​10, 11, 29; 1 Ioa. 4:8) Ame la easa qaja koi itre xan la nyipi pengöi Iehova ngöne la hna cainöj, easë hi lai a ahmitrötrëne la ëje i Nyidrë. Nge easë fe a madrin, ke easa xom hnyawane la ëje së, ene la troa Itretre Anyipici Iehova. Hnauëne la easa qaja tun?

13. Pine nemene matre ketre manathith ka tru la troa hë së ka hape, itre Temoë Iehova? (Isaia 43:​10-​12)

¹³ Hnei Iehova hna ië së troa “itete anyipici” Nyidrë. (E jë la Isaia 43:​10-​12.) Hane hi la hna qaja ngöne la ketre tus qaathene la Lapa Ne Xomi Meköt, ngöne la itre macatre ka ase hë: “Pëkö ketre manathith ka tru hune la troa hë së ka hape, Temoë Iehova.” c Hnauën la easa qaja tun? Hane hi la ketre ceitun: Pane mekune jë laka, hna upezö eö hnene la hnakootr, nge nyipiewekë troa hetre temoë ka troa anyipicine laka, pëkö ewekë ka ngazo hnei eö hna kuca. Drei la hnei eö hna troa iën? Tro eö lai a iën la ketre  atr hnei eö hna atre hnyawa, me hnei eö hna mejiune kow. Ketre atre lai hna qaja aloin, matre e qaja ha angeic la ketre ithanata, ke tro hi a canga kapa hnei itre xan. Ame la Iehova a ië së troa temoë i Nyidrë, ke kolo hi lai a amamane ka hape, atre easë hnyawa hi hnei Nyidrë, nge Nyidrëti a mejiune koi së. Atre hi Nyidrë laka, tro kö easë a eatrëne la hnëqa së, ene la troa qaja koi nöjei atr ka hape, Nyidrë la nyipi Akötresie. Ketre manathithi ka tru la tro së a temoë i Nyidrë, matre easa isine troa qaja koi itre xan la ëje i Nyidrë, me qaja amamane la itre trengathoi i Satana. Celë hi matre, tha kolo kö a hën menu së ka hape, itre Temoë Iehova!​—Sal. 83:18; Roma 10:​13-​15.

TRO SA CATRE CAINÖJ UTIHË LA PUN

14. Nemene la itre ewekë nyine hain hne së hna troa öhn?

¹⁴ Easenyi hë tro sa öhne la itre ewekë nyine hain! Easa mejiune laka, jëne la ixatua i Iehova, tro la itre atr ka alanyimu a kapa la nyipici qëmekene troa nyiqane la akötr atraqatr. Ketre, easa madrin laka, ame ngöne la ijine akötr atraqatr, ketre ijine jol hna tha hane kö traqa qaan ekö, troa aijijëne la itre atr ka alanyim troa trotrij la fene i Satana, me ce tro me easë troa atrunyi Iehova!​—It. Hu. 13:48.

15-16. Nemene la hne së hna isine troa kuca, nge utihë eu?

¹⁵ Tru palakö hnei huliwa hne së hna troa kuca. Ame enehila, easa sine la ketre huliwa tha tro hmaca kö sa öhn, ene la huliwa ne cainöjëne la maca ka loi ne la Baselaia i Akötresie ngöne la fen asë. Loi e tro mina fe sa catre thuemacane la itre atr laka, easenyi hë la pun. Nyipiewekë tro angatr a atre! Matre e traqa ha la ijine iameköti, tro angatr a atre e cili laka, ame la maca hne së hna cainöjën ke, qaathei Iehova.​—Ezek. 38:23.

¹⁶ Nemene la hne së hna isine troa kuca? Pine laka, tru la ihnimi së koi Iehova me ëje i Nyidrë, nge ka tru koi së la maca ka loi, me itre atr, easa isine tro palahi a catre cainöjëne la maca ka loi, utihë la Nyidrëti a qaja ka hape, “Ase hë la huliwa!”