TANE MEKUN 5
NYIMA 108 Ihnimi Nyipici i Akötresie
Itre Manathith Qa Ngöne La Ihnimi Iehova
“Hnei Keriso Iesu hna uti kowe la fen matre amelene la itre ka ngazo.”—1 TIM. 1:15.
MEKUN KA TRU
Tro sa ce wange la itre manathith hne së hna kapa qa ngöne la thupene mel, me aqane tro sa amamane la hni ne ole së kowe la ahnahna cili.
1. Nemene la nyine tro sa kuca matre amadrinë Iehova?
PANE mekune jë laka, epuni a hamëne la ketre ahnahna kowe la atr hnei epuni hna hnim. Tune kaa e tro angeic a tha nyipiewekëne la ahnahna me amë acone e hnine la iseif? Eje hi, tha tro kö epuni lai a madrin. Ngo tro epun a madrin, e tro angeic a huliwane lai ahnahna, me olene koi epun. Nemene la ini? Hnei Iehova hna hamën la mele ne la nekö i Nyidrëti thatraqai së. Drei jë kö la madrine i Nyidrë la easa olene la thupene mel, memine la ihnimi Nyidrë! Ihnimi hi lai ka upi Nyidrë troa hamë së la ahnahna cili!—Ioa. 3:16; Roma 5:7, 8.
2. Nemene la hne së hna troa ce wang ngöne la tane mekune celë?
2 Ngo ijije hi tro sa wangacone la thupene mel. Kösë easë hi lai a amë acone la ahnahna i Akötresie ngöne la iseif, me thëthëhmine ej. Celë hi matre, nyipiewekë tro pala hi sa olene koi Iehova me Iesu la hnei nyidro hna kuca koi së. Tro la tane mekune celë a xatua së göne lai. Tro sa ce wange la itre manathith hne së hna kapa enehila me hne së hna troa kapa elany jëne la thupene mel. Tro mina fe sa ce wange la aqane tro sa amamane la hni ne ole së koi Iehova ngöne la ijine Drai Ne Amekunën.
ITRE MANATHITH HNE SË HNA KAPA ENEHILA JËNE LA THUPENE MEL
3. Qaja jë la ketre manathith hne së hna kapa enehila jëne la thupene mel.
3 Hetre manathith hne së hna kapa enehila, jëne la mel hna huujëne hnei Iesu. Jëne la thupene mel, Iehova a nue la itre ngazo së. Pëkö ka upi Nyidrë troa kuca, ngo sipu aja i Nyidrëti kö. Hnei Dravita hna nyimane la hni ne ole i angeic ka hape: “Ke ame nyipë Iehova fe, ka lolo nyipë nge nyipëti a treqen troa nue la ngazo.”—Sal. 86:5; 103:3, 10-13.
4. Hnei Iehova hna hamëne koi drei la thupene mel? (Luka 5:32; 1 Timoteo 1:15)
4 Ame koi itre xan, tha ijije kö tro Iehova a nue la itre ngazo i angatr. Nge nyipici hi, ke itre atr ka ngazo së. Atre hi Paulo aposetolo ka hape, ‘tha ijije kö troa hë angeic ka hape, aposetolo.’ Ngo öni angeic: “Pine la ihnimi gufa i Akötresie, aposetolo fe hë ni.” (1 Kor. 15:9, 10) Ame la easa ietrane la itre ngazo së, Iehova a nue hnyawane itre ej. Pine nemen? Pine laka, tru la ihnimi Nyidrëti koi së, ngacama tha ijiji së kö troa kapa. Maine epuni fe a hane mekune tun, ke the thëthëhmine kö laka, hnei Iehova hna hamëne la thupene mel kowe la itre atr ka ngazo, ngo tha kowe kö la itre atr ka pexej.—E jë la Luka 5:32; 1 Timoteo 1:15.
5. Hapeu, hetre hne së kö hna kuca matre nue pi Iehova la itre ngazo së? Qejepengöne jë.
5 Tha tro pi kö sa mekune ka hape, tro Iehova a nue la itre ngazo së, ke nyimu macatre hne së hna nyihlue i Nyidrë. Nyipici, Iehova a wangatrune la itre macatre ne mele nyipici së. (Heb. 6:10) Ngo ame la thupene mel, ke ahnahna hna hamëne gufan. Tha hna hamëne kö matre nyithupene la itre huliwa ka loi hne së hna kuca. Haawe, tha tro pi kö sa mekune ka hape, Iehova a nue la ngazo së, ke hetre hne së hna kuca koi Nyidrë. Maine tro sa mekune tun, kösë ame koi së, tha hnei Iesu kö hna mec thatraqai së.—Wange ju fe la Galatia 2:21.
6. Hnauëne la Paulo a huliwa catre koi Iehova?
6 Atre hnyawa hi Paulo ka hape, tha Iehova kö a nue la itre ngazo i angeic, ke tru la hnei angeic hna huliwa koi Nyidrë. Nga hnauëne kö la angeic a catre huliwa koi Iehova? Tha angeice kö a huliwa göi thupen, ngo angeice hi a pi amamane la hni ne ole i angeic koi Nyidrë. (Efe. 3:7) Tui Paulo, catre jë së nyihlue i Iehova, matre amamane la hni ne ole së, ngo tha göne kö matre tro Nyidrëti a nue la itre ngazo së.
7. Nemene la ketre manathith hne së hna kapa enehila jëne la thupene mel? (Roma 5:1; Iakobo 2:23)
7 Nemene la ketre manathith hne së hna kapa enehila jëne la thupene mel? Ijiji së hë troa imelekeu hnyawa me Iehova. a Tune lo hne së hna ce wange ngöne la tane mekune hnapan, ame la kola hnaho së, ke pëkö imelekeu së me Iehova. Ngo jëne la thupene mel, ijiji së hë troa mele “tingetinge me Akötresie” me easenyi Nyidrë.—E jë la Roma 5:1; Iakobo 2:23.
8. Hnauëne la easa olene koi Iehova la hna aijijë së troa ithanata koi Nyidrë jëne la thith?
8 Imelekeu së me Iehova a aijijë së troa ithanata me Nyidrë jëne la thith. Ketre manathith ka tru lai! Tha Iehova hmekuje kö a drenge la thith hna tro fë ngöne la itre ijine icasikeu. Nyidrëti fe a drenge la itre thithi së isa ala cas. Kola axapone la hni së me atingetingëne la mekuna së hnene la thith. Ngo tha eje hmekuje kö lai. Kolo fe a acatrene la imelekeu së me Akötresie. (Sal. 65:2; Iako. 4:8; 1 Ioa. 5:14) Ame lo Iesu e celë fen, hnei nyidrëti pala hi hna thith, ke atre hi nyidrë laka, drenge hi Iehova. Nge celë hi ka aeasenyi nyidrë koi Iehova. (Luka 5:16) Atraqatr la ole së koi Iehova, ke jëne la thupene mel, ijiji së hë troa nyisinee i Nyidrë me ithanata koi Nyidrë ngöne la thith!
ITRE MANATHITH HNE SË HNA TROA KAPA ELANY JËNE LA THUPENE MEL
9. Jëne la thupene mel, nemene la hna troa kapa elanyi hnene la itre hlue i Iehova?
9 Nemene la itre manathith hna troa kapa elany hnene la itre hlue i Iehova, jëne la thupene mel? Tro Iehova a hamë angatr la mel ka pë pun. Alanyim la itre ka mekune ka hape, tha ijije kö tro sa mele epine palua, ke qane ekö, kola thapa la itre atr hnene la mec. Ngo ame lo aja i Iehova ngöne la qaan, ke tro la itre atr a mele epine palua. Maine tha ena ju Adramu la wathebo, ke tro asë hi la itre atr a mele utihë epine palua. Maine jole koi së troa mekune ka hape, tro sa mele utihë epine palua elany, the thëthëhmine kö laka, hnei Iehova hna huujëne la mele ne la nekö hnimina i Nyidrë göne lai.—Roma 8:32.
10. Nemene la hna lapa treqene hnene la itre keresiano hna iën, me itre xaa mamoe?
10 Ngacama tro Iehova a hamë së elany la mele ka pë pun, ngo aja i Nyidrë tro sa lapa mekune enehila la mele së elany. Tro la itre keresiano hna iën a madrin troa ce mus me Keriso e hnengödrai. (Hna Am. 20:6) Nge tro la itre xaa mamoe a mel ngöne la paradraiso e celë fen, nge pëhë akötr me hleuhleu. (Hna Am. 21:3, 4) Hapeu, epuni kö a hane sine la hnaaluene gurup ka troa mele epine palua e celë fen? Tha manathith ka co kö lai! Celë hi lo aja i Iehova ngöne la qan. Tha nyine qaja kö la madrine së elanyi hune la ihnadro.
11-12. Qaja jë la itre manathith hne së hna troa kapa elanyi ngöne la paradraiso. (Goeëne ju fe la itre foto.)
11 Pane mekune jë la mele së elany ngöne la paradraiso. Tha tro hmaca kö sa xou troa tithi së hnei mec, maine xou troa mec. (Isa. 25:8; 33:24) Nge tro Iehova a hamëne asë la ka nyipiewekë kowe la mel. Nemene fe la hnei epun hna pi inin elany? Troa atrepengöne la ketre öni? Maine troa elo miuzik? Maine inine troa desë? Eje hi, nyipiewekë troa hetre architecte, me itre ka xupi uma, me itre ka eëny elanyi ngöne la paradraiso. Ngo ka nyipiewekë fe troa hetre ka atreine kuci xen, me ka kuca la itre zuti, me itre ka tra iengen. (Isa. 35:1; 65:21) Pine laka, easë ha mele epine palua, hetre ijine i easë troa kuca la itre huliwa cili, me itre xane ju kö.
12 Ketre madrine ka tru elany troa kapa la itre hna troa amelene hmaca! (It. Hu. 24:15) Nge drei jë kö la madrine i easë troa inine la itre xaa thiina i Iehova jëne la itre hna xup. (Sal. 104:24; Isa. 11:9) Pane mekune jë la madrine së elanyi troa atrunyi Iehova memine la mekuthetheu ka wië! Hapeu, tro kö sa aluzine la itre manathith ka tru cili, matre “madrine fë la ngazo ka canga patr” enehila? (Heb. 11:25) Waea! Maine aja së troa kapa la itre manathith elany, nyipiewekë tro sa nue trengecatr enehila. The thëthëhmine kö laka, easenyi hë troa eatr la mejiune së troa mele ngöne la paradraiso. Troa eatr la nöjei ewekë cili hnene la ihnimi Iehova koi së, memine la mele hna huujën hnei Iesu!
Nemene la itre manathith hnei epun hna lapa treqen ngöne la paradraiso? (Wange ju la paragarafe 11-12)
OLENE JË KOWE LA IHNIMI IEHOVA
13. Tune kaa la aqane tro sa olene kowe la ihnimi gufa i Iehova? (2 Korinito 6:1)
13 Tune kaa la aqane tro sa olene kowe la thupene mel? Troa amë panëne la huliwa i Nyidrë ngöne la mele së. (Mat. 6:33) The thëthëhmine kö laka, hnei Iesu hna mec matre “thatreine hmaca kö la itre ka mel troa mele göi angatre kö, ngo thatraqai nyidrëti pe, atre meci pi angatr nge hna amelene hmaca.” (2 Kor. 5:15) Tha ajane kö së troa sixane la ihnimi gufa i Iehova.—E jë la 2 Korinito 6:1.
14. Tune kaa la aqane tro sa amamane ka hape, easa mejiune koi Iehova?
14 Easa olene koi Iehova la easa mejiune koi Nyidrë me trongëne la itre eamo i Nyidrë. Ame la easa axecië mekun göi ini aqeanyi maine ië huliwa, loi e tro sa thele la mekuna i Nyidrë. (1 Kor. 10:31; 2 Kor. 5:7) Ame la easa axecië mekune thenge la lapaune së, ke kola acatrene la lapaune së memine la imelekeu së me Iehova. Nge kolo fe a acatrene la mejiune së.—Roma 5:3-5; Iako. 2:21, 22.
15. Tune kaa la aqane tro sa amamane la ole së koi Iehova ngöne la ijine Drai Ne Amekunën?
15 Hetre ketre aqane tro sa amamane la ole së kowe la ihnimi Iehova. Ijije hi tro sa amamane la hni ne ole së kowe la thupene mel ngöne la ijine Drai Ne Amekunën. Loi e tro sa isine troa sine la drai cili, me hën asë la itre atr. (1 Tim. 2:4) Qejepengöne jë koi angatr la aqane trongene la drai cili. Nyipiewekë fe tro sa amamane la itre video hna hape, Hnauëne La Iesu a Mec? me Amekunëne Jë La Meci Iesu ngöne jw.org. Loi e tro la itre qatre thup a hëne la itre ka nanazij. Pane mekune jë la madrin e hnengödrai me e celë fen, la kola bëeke hmaca koi Iehova la itre neköi mamoe ka patr! (Luka 15:4-7) Ame ngöne la ijine Drai Ne Amekunën, ibozu jë tune la hne së hna majemin. Loi e tro mina fe sa kapa madrine la itre ka xötrei traqa, me ka hekö hë nue la itre icasikeu. Aja së tro angatr a öhne ka hape, easa madrine troa kepe angatr!—Roma 12:13.
16. Hnauëne laka, loi e tro sa catre huliwa i Iehova ngöne la ijine Drai Ne Amekunën?
16 Hapeu, ijiji epuni kö troa catre huliwa i Iehova ngöne la itre wiik qëmeken me thupene la Drai Ne Amekunën? Ame la easa catre huliwa i Iehova ngöne la ijine cili, ke easë hi lai a amamane la hni ne ole së kowe la hnei Nyidrëti me Iesu hna kuca koi së. Maine tro sa catre nyihlue i Iehova, ke tro hë së lai a öhne laka, Nyidrëti a xatua së. Nge tro hë lai a kökötr la mejiune së koi Nyidrë. (1 Kor. 3:9) E jë fe la itre xötre ne la Tusi Hmitrötr hna hnëkëne thatraqane la Drai Ne Amekunën. Tro epuni lai a öhne la porogaram cili ngöne la Topik Ne La Drai maine ngöne la Pepa Nyine Huliwan. Loi e tro fe epuni a sine thel la itre xötre cili ngöne la epuni a ini Tusi cas.
17. Nemene la ka amadrinë Iehova? (Wange ju fe la hna eköhagen “ Itre Xaa Aqane Troa Olene Kowe La Ihnimi Iehova.”)
17 Maine jë, tha ijiji epuni kö troa eatrën asë la hna qaja ngöne la tane mekune celë. Ngo the thëthëhmine kö laka, tha Iehova kö a goeëne la hnei epun hna kuca, memine la hna kuca hnei itre xan. Nyidrëti pe a goeëne la ka ej e kuhu hni epun. Madrine catre Nyidrë troa öhne laka, atraqatre la hni ne ole i epun kowe la ahnahna i Nyidrë, ene la thupene mel.—1 Sam. 16:7; Mar. 12:41-44.
18. Pine nemene matre tru la hni ne ole së koi Iehova me Iesu?
18 Jëne la thupene mel, Iehova a nue la itre ngazo së, me imelekeu me easë, me hamë së la mel ka pë pun. Haawe, catre jë së amamane la hni ne ole së kowe la ihnimi Iehova, ke celë hi ka uku Nyidrë troa hamë së la itre manathithi cili. (1 Ioa. 4:19) Loi e tro mina fe sa amamane la hni ne ole së kowe la ihnimi Iesu, ke hnei nyidrëti hna hamëne la mele i nyidrë thatraqai së!—Ioa. 15:13.
NYIMA 154 Nyipi Ihnim
a Hnei Iehova hna nue la ngazo ne la itre hlue i Nyidrë ka mel qëmekene tro Iesu Keriso a huujëne la mele i nyidrë. Pine nemen? Ke xecie koi Nyidrë laka, tro Iesu a mele nyipici uti hë mec. Matre ame koi Iehova, kösë ase hë hamëne la thupene mel.—Roma 3:25.
