TANE MEKUN 2
NYIMA 132 Enehila Caa Ngönetrei Hë So
Itre Trahmanyi Fe, Nyipiine Jë La Itre Föi Epun
“Nyipunieti fe itre trahmany, . . . nyipiine jë la itre föe.”—1 PET. 3:7.
MEKUN KA TRU
Tro sa ce wang la aqane tro la trahmany a nyipiine la föi angeic ngöne la aqane ithanata me ujë.
1. Nemene la ketre kepin matre hnei Iehova hna hamë së la faipoipo?
IEHOVA la “Akötresie ka madrin” matre aja i Nyidrë tro fe së a hane madrin. (1 Tim. 1:11) Hnei Nyidrëti hna hamë së la itre ahnahna matre troa lolo la mele së. (Iako. 1:17) Ame la ketre ahnahna ke, ene la faipoipo. Ame la kola faipoipo la trahmanyi me föe, nyidroti a sisinyi troa ihnimikeu, me imetrötrekeu, me wangatrunyi ketre. Maine ka catre la ihnimi nyidro, tro nyidroti lai a madrin.—It. Ed. 5:18.
2. Hnauëne laka, tha madrine kö la itre xaa trefën?
2 Ngazo pe, alanyim la itre trahmanyi me föe ka wangesixan la faipoipo i angatr. Ame la pun, tha madrine kö angatr. Önine la ketre rapor qaathene la Organisation mondial de la santé ka hape, alanyim la itre trahmany ka lep, me qaqan, me qanangazone la itre föi angatr. Hetre itre xaa trahmany ka nyi ka loi qëmeke itre xan, ngo ame e koilo hnalapa, ke itre ka isi. Nge ka jol la mele ne la itre xaa trefën, ke kola goeë pornographie la trahmany.
3. Hnauëne laka, itre xaa trahmany a qanangazone la itre föi angatr?
3 Hnauëne laka, itre xaa trahmany a qanangazone la itre föi angatr? Maine jë, tru jë hi angatr a öhne la keme i angatr a isi, matre ame koi angatr, aqane tro hi lai a ujë kowe la itre föe. Maine jë, hna löthi angatr hnene la qenenöje i angatr. Ame koi angatr, loi e troa amamane kowe la föe laka, angatr la ka mus e kuhu hnalapa. Maine pena, tha hna ini angatre kö troa xomihnine la elëhni. Ame la itre xan, angatr a kuca angazone la itre föe, ke tru la hnei angatr hna goeë pornographie. Ketre, önine la itre ka ithel ka hape, ngazo catre hë thupene lo COVID-19. Eje hi laka, pëkö nyipi kepin matre tro la trahmany a qanangazone la föi angeic.
4. Nemene la nyine tro la itre trahmany keresiano a hmekën, nge pine nemen?
4 Nyipiewekë tro la itre trahmany keresiano a thupëne matre tha tro kö a xom la aqane waiewekë i fen göne la itre föe. a Hnauën? Ke ame la atr, angeic a ujë thenge la mekuna i angeic. Hnei Paulo aposetolo hna hmekën la itre keresiano hna iën ne Roma ka hape, “loi ju hë hna mele thenge la itre thiina ne la fene celë.” (Roma 12:1, 2) Tha hna nyipi acile kö la ekalesia ne Roma, la Paulo a cinyanyine la itusi angeic. Ngo easa öhne ngöne la tusi Paulo laka, ame la itre xaa atrene la ekalesia, ke angatr pala hi a xötrethenge la itre qenenöj, me aqane waiewekë i fen. Celë hi matre, hnei Paulo hna ithuecatr koi angatr troa saze la itre aqane mekun me aqane ujë. Thatraqane mina fe la itre trahmany keresiano enehila. Ngazo pe, ame la itre xan, angatr pala hi a xötrethenge la aqane waiewekë i fen, matre angatr a qanangazone la itre föi angatr. b Nemene la aqane tro la itre trahmany a ujë kowe la itre föi angatr matre amadrinë Iehova? Celë hi hna sa hnene la xötr ka nyi tane la tane mekune celë.
5. Thenge la 1 Peteru 3:7, tune kaa la aqane tro la itre trahmany a ujë kowe la itre föi angatr?
5 E jë la 1 Peteru 3:7. Iehova a up la itre trahmany troa nyipiine la itre föi angatr. Ame la atr hne së hna nyipin, ke easa metrötrë angeic. Matre loi e tro la trahmany a hnim me thiina ka loi kowe la föi angeic. Ame ngöne la tane mekune celë, tro sa ce wang la aqane tro la trahmany a nyipiine la föi angeic. Ngo tro sa pane ce wang la itre thiina ka thaipiëne la itre föe.
THIPETRIJE PI LA ITRE AQANE UJË KA THAIPIËNE LA FÖI EÖ
6. Tune kaa la aqane goeëne Iehova la trahmany ka lep la föi angeic? (Kolose 3:19)
6 Ka isi. Xele catre Iehova ma wang la itre atr ka isi. (Sal. 11:5) Nge the qaja pala ha la itre trahmany ka lep la itre föi angatr. (Mal. 2:16; e jë la Kolose 3:19.) Tune la hna qaja ngöne 1 Peteru 3:7, ame la trahmany ka qanangazone la föi angeic, ke angeice hi lai a angazone la aqane imelekeu i angeic me Iehova. Goi xele fe Iehova ma dreng la itre thithi angeic.
7. Thenge la Efeso 4:31, 32, nemene la itre trengewekë nyine tro la itre trahmany a thipetrij? (Wange ju fe “Göi Troa Trotrohnin.”)
7 Ka iqaqa. Ame la itre xaa trahmany, angatr a qanangazone la itre föi angatr hnene la itre trenge ithanata ka akötr. Ngo methi Iehova la “elëhni, me iwesitrë, me sue, me iqaqa.” c (E jë la Efeso 4:31, 32.) Dreng asë hi Iehova. Nge ka nyipiewekë koi Nyidrë la aqane ithanata ne la trahmany kowe la föi angeic, ngacama nyidroti casi hi. Ame la trahmany a ithanata akökötrene kowe la föi angeic, angeice hi lai a thë la mele ne trefën i nyidro, ngo memine fe la imelekeu i angeic me Iehova.—Iako. 1:26.
8. Nemene la mekuna i Iehova kowe la itre iatr ka sis, nge pine nemen?
8 Ka goeë pornographie. Sisine catre Iehova la itre iatr ka sis. Matre ame la trahmany ka goeë iatr ka sis, ke angeic a thë la aqane imelekeu i angeic me Iehova, me thaipiëne la föi angeic. d Aja i Iehova tro la itre trahmany a mele nyipici kowe la itre föi angatr ngöne la aqane ujë, ngo memine fe ngöne la mekun. Nge öni Iesu, ame la trahmany ka meciun la ketre föe, nge tha föi angeice pe, ke angeice hi lai a nyixetë “e kuhu hni.” e—Mat. 5:28, 29.
9. Pine nemene matre Iehova a xele ma wang la trahmany ka ukune la föi angeic troa kuca la itre huliwa ka sis, nge ka thaipië eahlo?
9 Itre aqane ce meköl ka thaipiëne la föe. Itre xaa trahmany a musinën la föi angatr troa kuca la itre xaa huliwa ka sis ka thaipië nyudren, nge ka angazone la mekuthetheu i nyudren. Xele catre Iehova ma wang la itre aqane ujë cili, ka pi tru, nge ka pë ihnim. Aja i Iehova tro la itre trahmany a hnim me loi thiina kowe la itre föi angatr, me metrötrëne la mekuthetheu i nyudren. (Efe. 5:28, 29) Maine tro la trahmany keresiano a thaipiën, me qanangazone la föi angeic, maine goeë pornographie, nemene la nyine tro angeic a kuca, matre saze la aqane mekun me aqane ujë?
TRO SA NUETRIJ TUNE KAA LA ITRE AQANE UJË KA NGAZO
10. Tro la tulu i Iesu a xatuane tune kaa la itre trahmany?
10 Nemene la ka troa xatuane la trahmany matre tha tro hmaca kö angeic a qanangazon, maine thaipiëne la föi angeic? Loi e tro angeic a xötrethenge la tulu i Iesu. Ngacama tha ka faipoipo kö Iesu, ngo loi e tro la itre trahmany a xötrethenge la aqane ujë i nyidrë kowe la itretre dreng. (Efe. 5:25) Tro sa ce wang la itre ini nyine tro la itre trahmany a xom qa ngöne la aqane ujë, me aqane ithanata i Iesu kowe la itre aposetolo.
11. Tune kaa la aqane ujë i Iesu kowe la itre aposetolo?
11 Hnei Iesu pala hi hna loi thiina me metrötrëne la itre aposetolo. Tha ka icatrë kö nyidrë, maine musinë angatr. Ngacama nyidrëti la Joxu me Maseta, ngo tha hnei nyidrëti kö hna thaipië angatr, maine axouenyi angatr. Hnei nyidrëti pala hi hna nyihlue i angatr. (Ioa. 13:12-17) Öni nyidrë kowe la itretre dreng: “Inine jë theng, ke meköti ni me ipië. Nge e tro nyipunieti a tun, tro hë nyipunie a catr, ke tha hace kö troa ce huliwa me eni, nge tro hë nyipunie a eatrëne lo hnenge hna ahnithe koi nyipunie.” (Mat. 11:28-30) Iesu la ketre atr ka menyik. Ame la atr ka menyik, ke tha ka kucakuca kö, ngo ka tru trengecatre pe, ke ka atreine xomihni. Ame la kola ngazo thiina koi angeic, angeic a xomihni me lapa thaup.
12. Tune kaa la aqane ithanata i Iesu koi itre xan?
12 Hnei Iesu pala hi hna akeukawan me ithuecatr koi itre xan. Tha ase pi kö nyidrë catrën la itretre dreng. (Luka 8:47, 48) Ame la kola qaqa nyidrë hnene la itre ithupëjia, “tha hane kö nyidrëti iqaqa.” (1 Pet. 2:21-23) Nge ame itre xaa ijin, tha nyidrëti kö a sa, ngo nyidrëti pe a lapa thaup. (Mat. 27:12-14) Hane hi la ketre tulu kowe la itre trahmany keresiano!
13. Thenge la Mataio 19:4-6, tune kaa la aqane tro la trahmany a “fedr kowe la föi angeic”? (Wange ju fe la foto.)
13 Hnei Iesu hna upe la itre trahmany troa nyipici kowe la itre föi angatr. Hnei Iesu hna amexeje la itre trengewekë i Iehova lo Nyidrëti a hape, loi e tro la trahmanyi a “fedr kowe la föi angeic.” (E jë la Mataio 19:4-6.) Iesu hi lai a amamane la ecatrene la imelekeu ne la trahmanyi me föe, kösë lue atr hna afedren. Maine troa aisane la lue trefën, ke tro asë hi nyidroti lai a akötr. Ame la trahmany ka isine troa acatrene la imelekeu i angeic memine la föi angeic, ke tro angeice a kötrene la pornographie. Angeic a canga ‘ajean la luemeke i angeic qa ngöne la ewekë ka pë alien.’ (Sal. 119:37) Kösë angeic a isisinyikeu memine la luemeke i angeic, wathebo tro angeic a meciun la ketre föe, nge tha föi angeice pe.—Iobu 31:1.
Ame la trahmany ka nyipici kowe la föi angeic, ke tha ka goeë pornographie kö (Wange ju la paragarafe 13) g
14. Nemene la nyine tro la trahmany ka qanangazone la föi angeic a kuca matre troa imelekeu hmaca memine la föi angeic, me Iehova?
14 Nyipiewekë tro la trahmany ka isi me ka iqaqa a xötrethenge la tulu i Iesu, me isine troa acatrene la imelekeu i angeic me föi angeic, ngo me Iehova mina fe. Nemene la nyine tro angeic a kuca? Hnapan, loi e tro angeic a pane wangatrehmekun la jole ka ej thei angeic. Pëkö ewekë hna juetrën qëmekei Iehova. (Sal. 44:21; A. Cai. 12:14; Heb. 4:13) Hnaaluen, tha tro hmaca kö angeic a qanangazone la föi angeic, me saze aqane ujë. (It. Ed. 28:13) Hnaakönin, loi e tro angeic a qeje menu kowe la föi angeic, me koi Iehova, me amamane laka, tha tro hmaca kö angeic a ujë tun. (It. Hu. 3:19) Loi e tro fe angeic a sipo iele Iehova troa hamë angeic la aja troa saze me atreine xomihnine la itre mekuna i angeic, me itre aqane ithanata, me itre aqane ujë. (Sal. 51:10-12; 2 Kor. 10:5; Fil. 2:13) Hnaafoan, loi e tro angeic a tro thenge la itre thithi angeic, me methinëne la nöjei aqane isi me iqaqa. (Sal. 97:10) Hnaafaifin, loi e tro angeic a canga thele ixatua thene la itre qatre thup ne la ekalesia. (Iako. 5:14-16) Hnaasikisin, loi e tro angeic a atre hnyawa la nyine tro angeic a kuca, ka troa sewe angeic matre tha tro hmaca kö a ujë tun ekö. Loi e tro fe la trahmany ka goeë pornographie a trongëne la 6 lao mekun e caha. Tro kö Iehova lai a amanathithine la itre trengecatr hna nue hnene la keresiano ka faipoipo matre troa saze. (Sal. 37:5) Ngo tha tro hmekuje kö la keresiano a nuetrij la itre aqane ujë ka thaipiëne la föi angeic. Loi e tro mina fe angeic a inin la aqane troa nyipiine la föi angeic. Troa tune kaa?
AQANE TRO LA TRAHMANY A NYIPIINE LA FÖI ANGEIC
15. Tune kaa la aqane tro la trahmany a amamane la ihnimi angeic kowe la föi angeic?
15 Amamane jë la ihnimi eö koi angeic. Ame la itre trahmany ka madrine ngöne la faipoipo, ke ka majemine amamane la ihnimi angatr kowe la itre föi angatr. (1 Ioa. 3:18) Tro la trahmany a amamane la ihnimi angeic kowe la föi angeic jëne la itre xaa aqane ujë, tune la troa ie maine haluth la föi angeic. Ijije fe hi tro nyidrëti a iupifë message kowe la föi nyidrë ka hape, “Eni a meku nyipo” maine “Tune kaa nyipo?” Ame itre xaa ijin, ijiji nyidrë troa cinyanyine la ketre kart matre qaja la etrune la ihnimi nyidrë koi eahlo. Aqane tro hi la trahmany a nyipiine la föi angeic, me acatrene la mele ne trefën i nyidro.
16. Pine nemene matre nyipiewekë tro la trahmany a qaja aloine la föi angeic?
16 Qaja jë la hni ne ole i eö koi angeic. Ame la trahmany ka nyipiine la föi angeic, ke angeic a ithuecatr me qaja aloinyi eahlo. Nge angeic fe a qaja la hni ne ole i angeic kowe la aqane xatua angeic hnei eahlo. (Kol. 3:15) Ame la angeic a ujë tun, ke kola ketr la hni ne la föi angeic. Nge drenge hi eahlo laka, kola hnim me atrunyi eahlo, me thupë eahlo hnyawa.—It. Ed. 31:28.
17. Tune kaa la aqane tro la trahmany a metrötrëne la föi angeic?
17 Thiina ka loi jë koi angeic, nge metrötrë angeice jë. Ame la trahmany ka hnim la föi angeic, ke angeic a atrunyi eahlo me nyipiewekë eahlo. Angeic a goeë eahlo tune la ketre ahnahna ka tru qaathei Iehova. (It. Ed. 18:22; 31:10) Angeic a thiina ka loi, me metrötrë eahlo ngöne mina fe la nyidroti a ce meköl trefën. Tha angeice kö a uku eahlo troa kuca la itre huliwa ka sis ka troa ahmahmanyi eahlo, maine thaipië eahlo, maine angazone la mekuthetheu i eahlo. f Angeice a isine matre tro pala hi a wië fe la mekuthetheu i angeic qëmekei Iehova.—It. Hu. 24:16.
18. Nemene la nyine tro la itre trahmanyi a catre kuca? (Wange ju la hna eköhagen “ Foa Lao Aqane Tro La Trahmany a Metrötrëne La Föi Angeic.”)
18 Itre trahmanyi fe, the luelue kö laka, öhne hi Iehova, nge madrine catre Nyidrë kowe la itre trengecatr hnei epuni hna nu matre metrötrëne la föi epun ngöne la mele ne trefën. Nuetrije pi la itre thiina ka akötrëne la föi epun, nge catre jë pe loi thiina, me metrötr, me hnimi angeic. Aqane tro hi epuni lai a amamane ka hape, epuni a hnimi angeic, nge ka tru angeic koi epun. Ame la epuni a nyipiine la föi epun, epuni hi lai a thupëne la imelekeu ka sisitria catr, ene la imelekeu i epun me Iehova.—Sal. 25:14.
NYIMA 131 “Hnei Akötesie Hna Isilekeun”
a Troa xatuane la itre trahmany hnene la tane mekun “Epuni Kö a Metrötrëne La Itre Föe Tui Iehova?” ka mama ngöne la Ita Ne Thup ne Januare 2024.
b Troa xatuane la itre hna lep hnei föe hmunë hnene la tane mekun “De l’aide pour les victimes de violences conjugales” ngöne “Divers” ka mama ngöne jw.org maine JW Library®.
c GÖI TROA TROTROHNIN: Ame la “itre iqaqa” ke, kola qaja la itre trengewekë ka thaipië ketre, me ka qanangazo ketre. Ame la itre trengewekë la ngazo, ka ithaipië, maine itre trenge ka sis, ke itre aqane iqaqa lai.
d Wange ju ngöne jw.org maine JW Library la tane mekun “La pornographie peut briser votre couple.”
e Troa xatuane la föe laka, ka goeë pornographie la föi eahlo hnene la tane mekun “Maine Ka Goeë Iatr Ka Sis La Föi Epun” ka mama ngöne la Ita Ne Thup ne Ogas 2023.
f Tha Tusi Hmitrötr kö a qaja la itre aqane ce meköl ka loi maine ka ngazo kowe la trahmany me föe ka faipoipo. Isa qanyine kö la itre trefën axecië mekun, ngo loi e tro pala hi nyidro a atrunyi Iehova me madrin ngöne la mele ne trefën, me hetre mekuthetheu ka loi. Eje hi, tha tro kö la lue trefën a qaja koi itre xan la mele ne trefën i nyidro.
g ITRE FOTO: Itre sine huliwa a ukune la ketre trejin trahmany troa goeën la ketre itus ka amamai pornographie.
