1. Hnauëne laka, nyipiewekë tro sa atrune la Drai Ne Amekunën la meci Iesu e nöjei macatre?

 NYIPICI laka, ahnahna ka sisitria la thupene mel! (2 Kor. 9:​15) Jëne la mel hna huujëne hnei Iesu, ijije hi tro sa hane imelekeu me Iehova, me kapa la mel ka pë pun. Eje hi, nyimutre la itre kepin matre easa olene kowe la ahnahna cili, hatrene la ihnimi Nyidrëti koi së! (Roma 5:8) Hnei Iesu hna upi së troa atrune la Drai Ne Amekunëne la meci nyidrë e nöjei macatre, matre tro pala hi sa hetre hni ne ole me wangatrune la thupene mel.​—Luka 22:​19, 20.

2. Nemene la hne së hna troa ce wang ngöne la tane mekune celë?

² Ame ngöne la macatre ce, tro sa atrune la Drai Ne Amekunën e Mecixen 12 Eiperem 2025. Eje hi, ajan asë hi së troa sine la drai cili. Ngo tro lai a hetre eloine koi së, e tro sa xomi ijine troa lapa mekun a la hnei Iehova me Iesu hna kuca koi së. Ame ngöne la tane mekune celë, tro sa ce wange la itre thiina i Iehova me Iesu ka mama qa ngöne la thupene mel. Nge ngöne la tane mekune thupen, tro sa ce wange la itre manathith hne së hna kapa qa ngöne la thupene mel, me aqane tro sa amamane la hni ne ole së kowe la ahnahna cili.

THUPENE MEL A INI SË LA PENGÖI IEHOVA

3. Tro la meci ne la ala cas a itöne tune kaa la mele ne la itre milio lao atr? (Wange ju fe la foto.)

³ Thupene mel a ini së laka, Akötresie ka meköti Iehova. (Dreut. 32:4) Pane mekune jë la: Pine la tha idrei i Adramu, matre edrö së pë hë la ngazo me mec. (Roma 5:​12) Hnei Iehova hna upi Iesu troa huujëne la mele i nyidrë,  matre thepe së qa ngöne la ngazo me mec. Ngo tro la huuj ne la ca atr ka pexej a itöne tune kaa la mele ne la itre milio lao atr? Öni Paulo aposetolo: “Hna jelengazone la nöjei atr asë pine la hna tha idrei hnene la ala cas [Adramu], haawe, tune mina fe, jëne la idrengethenge ne la ala cas [Iesu], ala nyimu la itre hna troa jelemekötin.” (Roma 5:​19; 1 Tim. 2:6) Tune la hna qaja hnei Paulo, ngazo asë hë së me mec, pine la tha idrei ne la ca atr ka pexej. Matre troa thepe së qa ngöne la ngazo me mec, hnene la idrengethenge ne la ca atr ka pexej.   

4. Hnauëne laka, tha hamëne hi Iehova la mele ka pë pun kowe la itre madra i Adramu ka idrei?

⁴ Hapeu, tro kö Iesu a mec matre amele së? Hnauëne laka, tha hamëne kö Iehova la mele ka pë pun kowe la itre matra i Adramu ka idrei? Ame koi easë itre atr ka ngazo, ketre mekun ka meköti hi lai. Ame pe, tha kolo kö a tro thenge la meköti Iehova. Eje hi, thatreine kö Iehova thinge la luemeke i Nyidrë qëmekene la ngazo i Adramu.

5. Pine nemene matre xecie koi së laka, tro pala hi Iehova a kuca la meköt?

⁵ Tune kaa e tha hamëne ju Iehova la thupene mel, me nue pena la itre matra i Adramu troa mel epine palua? Nga tro fe hë së lai a mekune ka hape, tha tro kö Nyidrëti a meköt ngöne la itre xaa götran. Nge tro la itre atr a luelu laka, tro kö Nyidrëti a eatrëne la itre hnei Nyidrëti hna thingehnaean. Ngo the seseu kö. Hnei Iehova hna kuca la meköt, ngacama akötre ka tru la troa huujëne la nekö i Nyidrë. Kolo hi lai a amamane laka, tro pala hi Nyidrëti a kuca la meköt.

6. Hnauëne la easa qaja ka hape, thupene mel a amamane la etrune la ihnimi Iehova koi së? (1 Ioane 4:​9, 10)

⁶ Easa trotrohnine jëne la thupene mel laka, ka meköti Iehova. Ngo kolo fe a amamane la etrune la ihnimi Nyidrëti koi së. (Ioa. 3:​16; e jë la 1 Ioane 4:​9, 10.) Kola amamane hnene la thupene mel laka, aja i Iehova tro sa mel epine palua me hane sine la fami i Nyidrë. Ame lo Adramu a ena la wathebo, hnei Iehova hna helë angeic qa ngöne la fami i Nyidrë. Qane ju hi lai, pëkö atr hna kapa ngöne la fami i Iehova. Ngo jëne la thupene mel, Nyidrëti a nue la itre ngazo së. Nge ame elany, tro hë la itre ka lapaun me idrengethenge a hane sine la fami i Iehova. Ngo ame enehila, ijiji easë troa imelekeu hnyawa me Nyidrë me itre xaa hlue i Nyidrë. Tha nyine qaja kö la aqane hnimi së hnei Nyidrë!​—Roma 5:​10, 11.

7. Hnauëne laka, itre akötre i Iesu a xatua së troa trotrohnine la etrune la ihnimi Iehova koi së?

 ⁷ Easa trotrohnine hnyawa la etrune la ihnimi Iehova koi së, la easa lapa mekun la hace i Nyidrë la Nyidrëti a goeëne la nekö i Nyidrëti e akötr. Öni Satana ka hape, pëkö ca hlue i Akötresie ka troa mele nyipici koi Nyidrë ngöne la itupath. Ngo hnei Iehova hna nue la nekö i Nyidrë troa akötr qëmekene troa mec, matre jelethoine la hna qaja hnei Satana. (Iobu 2:​1-5; 1 Pet. 2:​21) Hnei Iehova hna goeëne la itre he ne hmi a hnyimasai Iesu, me itre sooc a lep angazo nyidrë uti hë la kola neni la madra i nyidrë, me jei fao nyidrë hune la sinöe ne iaxösisi. Thupene lai, hnei Iehova hna goeë Iesu e akötr qëmeken troa mec. (Mat. 27:​28-​31, 39) Atreine hi Iehova troa apatrene la itre akötre i Iesu ngöne la ijine cili. Ame lo itre ka icilekeu a qaja ka hape: “Nue Akötresieti pi troa amele angeic, maine celë hi aja i Akötresie,” ke maine ju, ijiji Iehova hi troa kuca. (Mat. 27:​42, 43) Ngo maine kuca ju Nyidrë la hnei angatr hna qaja, ke tha tro kö a hetreny la thupene mel, nge luzi hnyawa ha së enehila. Celë hi matre, hnei Iehova hna nue la nekö i Nyidrëti troa akötr uti hë la patre la hnamano i nyidrë.

8. Tune kaa Iehova la Nyidrëti a goeëne la nekö i Nyidrëti a akötr? Qejepengöne jë. (Wange ju fe la foto.)

⁸ Tha hnene kö laka, ka tru trenge mene i Akötresie, matre ka pë hni lae Nyidrë! Hna xupi së hnaiji Nyidrë, matre e hetre hni së, ke kolo hi lai a amamane ka hape, hetre hni Nyidrëti fe. Öni Tusi Hmitrötr, hnei Nyidrë hna hane ‘akötr’ me ‘hleuhleu.’ (Sal. 78:​40, 41) Tro sa pane ce wange la pengöi Aberahama me Isaaka. Hnei Iehova hna upi Aberahama troa huujëne la nekö i nyidrëti ka cas. (Gen. 22:​9-​12; Heb. 11:​17-​19) Pane mekune jë së la itre aliene hni Aberahama, la nyidrëti a troa humuthi Isaaka. Eje hi, tru catre pala kö la akötr me hleuhleu i Iehova, la Nyidrëti a goeëne la itre atr ka pë lapaun a axösisine me akötrëne la nekö i Nyidrë uti hë la mec!​—Wange ju ngöne jw.org la video hna hape, Nyitipune Jë La Lapaune i Angatr​—ABERAHAMA, Götrane 2.

9. Roma 8:​32, 38, 39 a xatua së tune kaa troa trotrohnine la etrune la ihnimi Iehova koi së me kowe la itre trejin?

⁹ Kola amamane hnene la thupene mele laka, pëkö atr ka hnimi së tui Iehova. Co hi la hna hnimi së hnene la ketre sipu sinee së. (E jë la Roma 8:​32, 38, 39.) Nge, tru catre kö la aqane hnimi së hnei Iehova hune la aqane hnimi së hnei easë kö. Hapeu, aja i epuni kö troa hane mel epine palua? Nga the qaja palaha Iehova. Aja i epuni kö troa hane köletrij la itre ngazo i  epun? Co hi la aja së hui Iehova. Ame hi la hnei Nyidrëti hna ajan, ke ene la tro sa hetre hni ne ole kowe la thupene mel me lapaune koi Nyidrë me drengethenge Nyidrë. Ame la thupene mel, ke celë hi hatrene ka tru ne la ihnimi Nyidrë. Ame elany ngöne la fen ka hnyipixe, tro pala hi sa inine la itre xaa hnei Nyidrëti hna kuca koi së.​—A. Cai. 3:​11.

THUPENE MEL A INI SË LA PENGÖI IESU

10. (a) Nemene la ka akötrë Iesu? (b) Nemene la itre aqane ahmitrötrëne Iesu la ëje i Iehova? (Wange ju fe la hna eköhagen “ Hna Ahmitrötrëne La Ëje i Iehova Hnene La Hna Mele Nyipici Hnei Iesu.”)

¹⁰ Iesu a hnehengazon la aqane goeëne la itre atr la Kem i nyidrë. (Ioa. 14:31) Kola qeje Iesu ka hape, atre pë metrötr koi Akötresie, nge ka ihumuth. Tru la akötre i nyidrë ke, tha aja i nyidrëti kö troa qaja angazone la ëje i Iehova. Matre öni Iesu: “Kakati fe, maine loi hi, epi ananyine pi qaathenge la vere celë.” (Mat. 26:39) Hnei Iesu hna ahmitrötrëne la ëje i Iehova, la nyidrëti a mele nyipici uti hë mec.

11. Hnei Iesu hna amamane tune kaa la ihnimi nyidrëti kowe la itre atr? (Ioane 13:1)

¹¹ Kolo fe a ini së hnene la thupene mel laka, Iesu a hnehengazone la itre atr, ngo tru catre pala kö kowe la itretre drei nyidrë. (It. Ed. 8:​31; e jë la Ioane 13:1.) Atre hi Iesu laka, tha tro kö a hmaloi la huliwa ne cainöj i nyidrë, nge tro fe a humuthi nyidrë. Tha hnei nyidrëti hmekuje kö hna eatrëne la huliwa, ke hna upi nyidrë, ngo hnei nyidrëti fe hna kuca cememine la hni ka pexej. Hnei nyidrëti pala hi hna cainöj me hamë ini me xatuane la itre atr cememine la ihnim. Goi ame fe lo jidr qëmeken tro nyidrëti a mec, hnei nyidrëti hna xomi ijine troa wasine la lue ca ne la itre aposetolo, me ithuecatr me ini angatr. (Ioa. 13:​12-​15) Ame lo nyidrëti hune la sinöe ne  iaxösisi, hnei nyidrëti hna xomi ijine troa ahnith la thine i nyidrë koi Ioane, me hamë mejiun kowe lo atre ihumuth ezi nyidrë. (Luka 23:​42, 43; Ioa. 19:​26, 27) Tha hnei Iesu hmekuje kö hna amamane la ihnimi nyidrë lo nyidrëti a mec, ngo memine fe lo nyidrëti a xatuane la itre xan.

12. Nemene la ka amamane laka, Iesu pala hi a huliwa thatraqai së?

¹² Ngacama “aca meci hi” Iesu, nyidrëti pala hi a huliwa thatraqai së. (Roma 6:​10) Eje hi, nyidrëti a nue trengecatr me traem, matre aijijë së troa kapa la itre manathith ka xulu qa ngöne la thupene mel. Pane mekune jë la nöjei huliwa hnei nyidrëti hna kuca. Nyidrëti la Joxu, me Atre Huuj Ka Sisitria me he ne la ekalesia. (1 Kor. 15:25; Efe. 5:​23; Heb. 2:​17) Nyidrëti a acasine la itre hna iën memine la ka ala nyimu. Hnëqa lai hna ahnith koi nyidrë, nge hna troa afenesin qëmeken la pun la akötr atraqatr. b (Mat. 25:32; Mar. 13:27) Nyidrëti a thupën matre tro pala hi la itretre drei nyidrë a kapa hnyawane la xen, ngöne la itre drai ne la pun. (Mat. 24:45) Nge ame ngöne la musi nyidrë ka ca thauzan, tro pala hi nyidrëti a huliwa thatraqai së. Eje hi hnei Iehova hna upe la Nekö i Nyidrëti koi së!

CATRE JË INI

13. Nemene la nyine tro epuni a kuca matre atrepengöne hnyawa la ihnimi Iehova me Iesu koi epun?

¹³ Tro epuni lai a atrepengöne hnyawa la ihnimi Iehova me Iesu koi epun, e tro pala hi epuni a lapa mekun la hnei nyidroti hna kuca koi epun. Ngöne la macatre ce, tune kaa e tro epuni a e la cas maine nyimu Evangelia ngöne la ijine Drai Ne Amekunën? Tha nyipiewekë kö troa aca tro e la nyimu xötr. Loi pe troa e hmiitrëne la itre xötr me xomi ijine troa thele la itre xaa kepin ka upi së troa hnimi Iehova me Iesu. E thupen, thele jë troa ce thawa me itre xan la hnei epun hna inin.

14. Thenge la Salamo 119:97 me ithuemacany, nemene la aqane tro epuni a kapa la itre xaa ini göne la thupene mel me itre xaa mekun? (Wange ju fe la foto.)

¹⁴ Maine ka hekö hë epun ngöne la nyipici, maine jë tro epuni a hnyinge ka hape, hetre ini pala kö nyine tro epuni a kapa, göne la meköt me ihnimi Iehova me thupene mel. Hetre nyine tro pala hi sa inine göne la itre götrane cili me xaa mekune ju  kö. Matre, nemene la nyine tro epuni a kuca? E hnyawane jë la itre mekun ka mama ngöne la itre itusi së. Nge e hetre mekun hna tha trotrohnin, ke ithele jë. Lapa mekune jë ngöne la drai, la ini hnei epuni hna öhne göi Iehova me nekö i Nyidrë, memine la aqane hnimi epun hnei nyidro.​—E jë la Salamo 119:97 me ithuemacany.

15. Hnauëne laka tro pala hi sa thele la itre ini qa hnine la Tusi Hmitrötr?

¹⁵ Maine pëkö mekune ka hnyipixe hnei epuni hna öhne la epuni a ini Tusi cas maine ithel, ke the cile pi kö. Ceitui epun me ketre atr ka tami ngöni, matre öhnyi gool. Ame la itre ka thele gool, ke itre ka catre ithel. Itre hawa me itre drai ne tro angatre lai a huliwa göne hi la ca neköi mutine gool. Ngo angatr a nue trengecatr, ke maine neköi mutine hi, ngo ka tru catre koi angatr. Nga the qaja pala ha koi së la itre ini hne së hna öhne qa hnine la Tusi Hmitrötr! (Sal. 119:127; It. Ed. 8:​10) Haawe, catre jë kö trongëne la porogaram ne e Tusi Hmitrötre i epun.​—Sal. 1:2.

16. Tune kaa la aqane tro sa nyitipu Iehova me Iesu?

¹⁶ Ame la epuni a ini Tusi cas, hnyinge jë ka hape, ‘Tune kaa la aqane tro ni a trongëne la hnenge hna inin?’ Ijije hi tro epuni a nyitipune la meköti Iehova, la epuni a hnime ceitune la itre atr. Ijije fe tro epuni a nyitipune la ihnimi Iesu kowe la Keme i nyidrë me kowe la itre atr, la kola akötrë epun pine la ëje i Akötresie me ngöne la epuni a xatuane la itre trejin. Ketre, epuni a nyitipu Iesu la epuni a cainöj kowe la itre atr, matre tro fe angatr a hane kapa la ahnahna hnei Iehova hna hamë angatr.

17. Nemene la hne së hna troa ce wang ngöne la tane mekun e thupen?

¹⁷ Maine tro sa trotrohnine hnyawa la ini qa ngöne la thupene mel, tro hë lai a kökötre la hni ne ole së koi Iehova me Iesu, memine fe la ihnimi së koi nyidro. Nge tro pala kö a tru la ihnimi nyidroti koi së. (Ioa. 14:21; Iako. 4:8) Haawe, huliwane jë së la itre jia ne huliwa hna hnëkëne hnei Iehova, matre atrepengöne hnyawa la thupene mel. Ame ngöne la tane mekun e thupen, tro sa ce wange la itre xaa manathith hne së hna kapa qa ngöne la thupene mel, me aqane tro sa amamane la hni ne ole së koi Iehova.