Ame thene la tribu i angetre Levi, tre, tha itre atre huuj asë kö angatr. Ame la itre xan, angatr a thupëne la ene. Angatre fene la musi ne la tan ne la ene. Öni Philon, ketre atr Iudra ka inamacan: “Ame la itre xan, hna amë angatr troa thupën me fe la itre qëhnelö ne la ene; ame pena itre xan, hna amë angatr e hnine la ene qëmekene la gaa hmitrötr, matre tha tro kö lö menu hnei itre xan. Ame itre xan, angatr a tro kanothe la ene, nge angatr a saze e lai me jidr.”

Hna sipone fe koi angatr troa thup ngöne la hnaakotr. Angatre hi la itre ka thup thei angetre Iudra, hna nue hnene la musi Roma.

Öni Joachim Jeremias, ketre ka inamacan: “Trotrohnine hë së la kepin matre hnei Iesu hna eetr ka hape, itre drai ne nyidrëti a cainöj e hnine la ene ngo pëkö ka othi nyidrë. Ame la ka othi nyidrë, tre, kolo itretre thup ne la ene.” Hnei Joachim Jeremias hna qaja ka hape, ame lo itre hna upe troa othi Iesu ke, kolo mina fe la itretre thup ne la ene. (Ioane 7:32, 45, 46) Thupene lai, hna upe la itretre thup me tane i angatr troa tro sane la itretre drei Iesu kowe la hnaakotr. Maine jë, angatre fe lo ka othi Paulo aposetolo me lö sai nyidrë qa hnine la ene.—Itre hu. 4:1-3; 5:17-27; 21:27-30.