Hnei Jack me Marie-Line hna ce huliwa i Iehova ngöne la drai ka pexej, qaane lo macatre 1988. Hnei nyidroti hna atreine canga kapa la itre xaa aqane mel, matre tru catre la itre hnëqa hna hamë nyidro e Guadeloupe me e Guyane. Lue nöje lai hna elemekene hnene la filial ne Faras. Tro sa pane ce ithanata me nyidro.

Pine nemene matre hnei epon hna nyiqane huliwa i Akötresie ngöne la drai ka pexej?

Marie-Line: Hnenge hna tru e Guadeloupe. Nge hnenge hna majemine ce cainöj me nenë ngöne la drai ka pexej. Ka catre cainöj palahi eahlo. Tru la ihniming kowe la itre atr, matre ame la eni a fenesi qa hnaini lo macatre 1985, hnenge hna xom la huliwa ne pionie.

Jack: Ame lo eni a co, ce eni palahi memine la itre trejin ka huliwa i Akötresie ngöne la drai ka pexej, nge ka wangatrune la huliwa ne cainöj. Ame ngöne la itre ijine vakas, eni a xom la huliwa ne pionie ka ixatua. Ame e pune wiik, eahuni a xomi kar matre troa itrony memine la itre xaa pionie ngöne la teritoar. Eahuni a pane cainöj, nge thupene lai, eahuni a tro koi hnagejë. Lolo catr la ijine cili!

Thupene la faipoipong me Marie-Line lo 1988, öning, ‛Pëkö ka ajolë nyio, matre ijije hi tro nyio a catre cainöj?’ Hnenge hna ce xom la huliwa ne pionie me Marie-Line. Ca macatre thupen, hnei nyio hna sine la Ini Koi Itre Pionie, nge hna upi nyio troa pionie hut. Tru catre la itre hnëqa hnei nyio hna kapa e Guadeloupe, qëmekene troa upi nyio a tro Guyane.

Nemene la ka xatua epon troa kapa la itre hnëqa ka nyimutre?

Marie-Line: Atre hi la itre trejin ka huliwa ngöne la Bethela e Guyane laka, nyio palahi a e la tusi Isaia 6:8. Ame la angatr a hë nyio, angatr a pane ihnyima me hnying ka hape, “Mekun palahi epon lo xötre aja i epon?” Canga trotrohnine ju hi nyio laka, kola troa  upi nyio kowe la ketre götran. Öni nyio, “Nyio hi la! Upi nyio jë!”

Tha hnei nyio kö hna mekun la eisapengönene la itre hnëqa, wanga kucakuca pi nyio nge tro ha pë madrine i nyio. Hnei nyio pe hna thel troa easenyi catr kowe la itre trejin.

Jack: Ame ekö, xele kö la itre trejin troa nue nyio, matre hnei angatr hna sipo nyio troa lapa. Ngo ame la nyio a tro qa Guadeloupe, hnene la ketre trejin hna amexej lo hna qaja hnei Iesu ngöne Mataio 13:38, ka hape: “Ame la hlapa, tre fen.” Ame la kola saze la hnëqa i nyio, nyio a canga mekun ka hape, ngacama ketre nöje ju hë, ngo caasi hi la huliwa i nyio. Sisitria catre kö la troa xatuane la itre atr ne la teritoar!

Ame la nyio a traqa kowe la ketre teritoar ka hnyipixe, nyio a öhne laka, ijije hi troa mele madrin e cili. Celë hi matre, nyio a pane thel troa mel tune la itre atr. Ngacama isapengöne kö la xen, ngo nyio a xen me iji tui angatr, me thupëne hnyawan la mel. Nyio a thel tro palahi a qaja aloine la nöj.

Marie-Line: Tru catr la itre ini hnei nyio hna kapa qaathene la itre trejin. Mekune palahi ni lo nyio a xötrei traqa e Guyane. Ame ngöne la itre ijine mani, öni nyio ka hape, loi e troa pane loi drai matre tro jë troa cainöj. Ngo önine la ketre trejine föe, “Easë pe a tro?” Sesëkötre ju hi ni matre öning, “Tro sa tune kaa?” Öni angeic, “Xom trongëne jë la iabalala, nge tro sa ti velo.” Qane ju hi lai, atreine hë ni troa ti velo fë iabalala. Maine ju, tha tro kö ni a hane cainöj, e kola mani!

Hna upi epon troa tro ngöne la 15 lao nöj. Hetre eamo kö hnei epon hna pi hamën koi itre xan?

Marie-Line: Ketre jol ka tru la troa fek koi ketre nöj. Ngo loi e troa hetre götran hnë tro sa nango mano thupene la hna cainöj trootro.

Jack: Hnenge hna majemine peidrëne la itre hnalapa i nyio ka hnyipixe. Maine tha tro kö nyio a lapa aqeany ngöne la ketre uma, kola canga thuemacanyi ni hnene la itre trejin ka huliwa ngöne Bethela ka hape, “Jack, the peidrëne kö la uma celë!”

Atreine hnyawa Marie-Line troa sa trengetreng! Angeic a amë la itre ewekë hnine la itre  karto hna cinyihan ka hape, “hnë si,” “hnahag,” me “kecen.” Ame la nyio a traqa kowe la uma ka hnyipixe, canga hmaloi hi troa amë la itre karto ngöne la isa göhnen. Angeic a sija la aliene la itre karto, matre canga öhne hi nyio la itre ewekë hna thel.

Marie-Line: Pine laka majemi hë nyio hnëkë hnyawa, matre pëkö traem hna aluzin nge canga tro hi nyio a cainöj.

Nemene la hnei epon hna kuca matre troa “eatrëne hnyawa la huliwa” i epon? —2 Tim. 4:5.

Marie-Line: Ame e nöjei Thupenehmi, nyio a mano me hnëkëne la itre icasikeu. Ame pë hë la itre xaa drai, nyio a cainöj.

Jack: Ngacama hetre etrune lao hawa hna athip e nöjei treu, ngo tha celë kö la hnei nyio hna goeën. Ame la ka sisitria koi nyio, tre, ene la troa cainöj. Qaane la nyio a nue la hnalapa utihë la nyio a bëek, nyio a thele troa ithanata kowe la nöjei atr hnei nyio hna ixelë memin.

Marie-Line: Drei la ketre ceitun. Ame la nyio a tro troa ce xen, eni a xom trongëne la itre tarak. Tha qaja kö nyio ka hape, lue Atre Anyipici Iehova nyio. Ngo itre atr a sipo itusi koi nyio. Celë hi matre, nyio a thupëne la aqane heetr me aqane ujë ke, itre atr a goeë nyio.

Jack: Nyio fe a thiina ka menyik kowe la itre ka lapa ezi nyio. Eni a hlem la itre pepa ka mala, me trije la pubel, me raton la itre dröne hnitr. Ame itre xaa ijin, itre atr ka lapa ezi nyio a qaja ka hape, “Hetre Tusi Hmitrötre i nyipëti palakö?”

Hnei epon hna hane cainöj ngöne la itre götrane gaa nany. Hetre hnei epone kö hna pi ce thawa me eahun?

Jack: Ame e Guyane, jole catr troa tro kowe la itre xaa teritoar. Ame itre xaa ijin, eahuni a tro koi 600 km, ngöne hi la caa wiik, nge ka ngazo la itre gojeny. Mekune palahi ni la nyio a tro St. Élie, ngöne la Hnaxulu e Amazonie. Itre hawa hne huni hna xomi loto me ti he. Ame la itre atr ka lapa e cili, tre, kolo itre ka thele gool. Angatr a madrine la itre itus, matre angatr a hamë gool koi hun! Ame la ketre jidr, hne huni hna amamane la ketre video. Alanyimu la itre ka traqa.

Marie-Line: Hna sipo Jack troa cile fë la cainöj göi Drai Ne Amekunën e Camopi. Qëmekene troa traqa e cili, hnei nyio hna pane ti he koi foa lao hawa ngöne la Hneopegejë ne Oyapock. Madrine catre ni la ijine cili.

Jack: Jole catr ngöne la eahuni a traqa kowe la itre gaa tru thelec. Eahuni a hain me xou la kola kaca la tim. Loi e tro la atre xomiuijine la he a atre hnyawa la nyine troa kuca e cili. Ngo, lolo catr la tronge hun e cili. Ngacama ala 6 hi la itre trejin, ngo traqa koi 50 la itre ka sine la Drai Ne Amekunën, tune la itre Amérindiens!

Marie-Line: Ijije hi tro la itre trejine thöth a hane melëne la itre ewekë cili, e hnei nyudreni hna catre huliwa i Iehova. Maine tro sa mejiune koi Iehova ngöne la itre ijine cili, tro lai a acatrene la lapaune së. Easa öhne la ixatua qaathei Iehova.

Nyimu qene hlapa hnei nyipëti hna inin. Hapeu, ka hmaloi kö koi nyipë troa inine la itre qene hlapa?

Jack: Waea. Hnenge hna inine la itre qene hlapa cili ke, ka nyipiewekë thatraqane la huliwa ne cainöj. Hnenge hna xomiujine la Ita Ne Thup qene Sranan Tongo *, ngo tha pane e Tusi Hmitrötre kö ni ngöne la qene hlapa cili! Hnenge hna hnyingëne kowe la ketre trejin e trotrohnine hi angatr. Öni angeic: “Pëkö hne huni hna trotrohnin, ngo ka loi hi.” Itre nekönatr la ka xatua ni. Maine ka tria la aqane qajang, nyudreni a canga qaja koi ni, tha tune kö la itre ka tru.

Marie-Line: Ame ngöne la ketre teritoar, eni a ini tusi memine la itre ka qene Wiwi me qene Portuguais, me qene Sranan Tongo. Hnene la ketre trejin hna upi ni troa nyiqaane  qa ngöne la qene hlapa ka jol koi ni, me afenesine pë hë memine la ini tusi ne la atr ka qaja la qene hlapa ka hmaloi. Lolo catr la eamo celë.

Ame la ketre drai, hnenge hna pane ini tusi memine la ketre föe ka qene Sranan tongo, me afenesine memine la ketre föe ka qene Portuguais. Ame la eni a nyiqaane la hnaaluene ini tus, önine la trejin ka ce cainöj me eni: “Marie-Line, pane cile ju.” Eni a qene Sranan tongo kowe la föe ka qene Portuguais!

Tru la ihnimi ne la itre trejin ka ce huliwa me epon. Nemene la hnei epon hna kuca matre acatrene la aqane imelekeu i epun?

Jack: Kola qaja ngöne Ite Edomë 11:25: “Troa atena mone la ate ihaban.” Nyio a xomi ijine kowe la itre xan, me xatua angatr. Ame ngöne la kola nyidrawane la Uma Ne Baselaia, önine la itre trejin trahmany: “Thatraqane la itre xaa trejin pë hë lai.” Ngo öning: “Ketre trejine fe ni. Maine hetre huliwa, eni a ajane troa ixatua.” Eje hi laka, easa ajane troa pane lapa caas, ngo tha tro kö lai a sewe së troa kuca la loi koi itre xan.

Marie-Line: Nyio a thele troa xatuane la itre trejin. Maine jë, hetre itre trejin ka ajane troa thupëne la itre nekö i angatr, maine itrothei ngöne la hnaini. Nyio lai a thel la aqane troa ixatua. Kola acatrene la aqane imelekeu hun.

Nemene la itre manathith hnei epon hna kapa qa ngöne la hna tro kowe la ketre götrane ka aja ixatua?

Jack: Atraqatr la madrine i nyio qane lo nyio a xome la huliwa ne pionie hut. Nyio a lapa mekun me haine la nöjei ewekë hna xup hnei Iehova. Ngacama nyimutre la itre jol ka traqa, ngo tingetinge la hni nyio. Atre hi nyio laka, kola xatua nyio hnene la organizasio i Iehova.

Ame lo eni a thöth, hna akalabusi ni e Guyane pine la lapauneng. Tha hnenge kö hna mekun laka, tro ni a bëeke hmaca kowe la nöje celë, me mesinare, me aumônier. Eni hmaca a iöhnyi memine la itre hna akalabusin ekö. Akötresieti ka hame Iehova, nge Nyidrëti a amanathithi së!

Marie-Line: Eni a madrine troa xatuane la itre xan, me catre nyihlue i Iehova. Celë hi ka acatrene la ihniming me Jack. Ame itre xaa ijin, Jack a sipo ni troa könëne la lue trefën ka nango kucakuca. Öning: “Casi hi la mekuna i nyiso!” Nge hna tune palahi.

Jack: Hna tithi ni hnei kaser ne prostate. Xele catre Marie-Line troa porotrikëne lai. Ngo öning: “Marie-Line, maine tro ni a meci elany, tha kolo kö ke, ‘nyipi qate catë hë ni, nge nyimu macatreng.’ Tro ni a mec me madrin laka, hnenge hna catre huliwa i Iehova nge tha ka gufa kö la meleng.”—Gen. 25:8.

Marie-Line: Hnei Iehova hna hamë hnëqa ka tru koi nyio. Ame koi nyio, tha ijiji nyio kö. Madrine la mele i nyio, nge nyio a lapaune koi Iehova. Ame la organizasio a upi nyio kowe la ketre götran, nyio a canga tro!