1. Nemene la ini hne së hna xom qa ngöne la tusi Ate Cainöj 3:1, 7?

 AME itre xan, ka majemine ithanata lapa. Ame pena itre xan, ka lapa thaup. Tune la hna qaja ngöne la xötr ka nyitrepene la tane mekun, hetre ijine troa ithanata, nge hetre ijine troa lapa thaup. (E jë la Ate Cainöj 3:1, 7.) Easa ajane tro la itre xaa trejin a hane ithanata, nge tro itre xan a hane lapa thaup.

2. Drei la ka ijij troa qaja koi së la ijine me aqane tro sa ithanata?

² Ketre ahnahna qaathei Iehova la troa ithanata. (Eso. 4:10, 11; Hna ama. 4:11) Jëne la Tusi Hmitrötr, Iehova a xatua së troa huliwane hnyawane la ahnahna cili. Ame ngöne la tane mekun celë, tro sa ce wang la itre xaa ceitun qa hnine la Tusi Hmitrötr, ka amamane la ijine troa ithanata me ijine troa lapa thaup. Tro fe sa ce wang la aqane wangatrune Iehova la itre hne së hna qaja koi itre xan. Ngo tro sa pane wang la itre ijine tro sa ithanata.

3. Thenge la hna qaja ngöne Roma 10:14, eu la ijine tro sa ithanata?

³ Loi e tro palahi sa qeje Iehova memine la Baselaia i Nyidrë. (Mat. 24:14; e jë la Roma 10:14.) Celë hi aqane tro sa nyitipu Iesu. Hnei nyidrëti hna traqa e celë fen, matre troa inine la nyipici göne la Keme i nyidrë. (Ioane 18:37) Ngo tha tro kö sa thëthëhmine laka, nyipiewekë catre fe la aqane ithanata së. Ame la easa qeje Iehova, loi e tro sa ithanata “cememine la menyike me metrötr atraqatr.” Loi e tro sa wangatrune la itre aliene hni ne la itre atr, me itre hnei angatr hna mejiune kow. (1 Pet. 3:15)  E cili, tha tro hmekuje kö sa ithanata, ngo tro fe sa inine la itre atr, matre ketr la hni angatr.

4. Thenge la hna qaja ngöne Ite Edomë 9:9, nemene la eloine la troa ithanata koi itre xan?

⁴ Ame la itre qatre thup a öhn laka, kola aja ixatua hnene la ketre trejin, angatr a canga thele troa ithanata me angeic. Angatr a iëne hnyawa la ijine ka loi, matre tha tro kö angeic a hmahma, nge angatr a ithanata caasi me angeic. Ketre, itre qatre thup a metrötrëne lai trejin. Tha tro kö angatr a cile troa amexeje la itre trepene meköt, ka troa xatua angeic. (E jë la Ite Edomë 9:9.) Pine nemene matre ka loi e troa qaja mekötine la jol kowe la trejin? Hanawang la lue ceitun: Ame la hnapan, tha hnene kö la kem hna ithanata kowe la lue nekö i nyidrë. Nge ame la hnaaluen, ketre föe a qaja mekötine kowe la ketre atr ka troa joxu ka hape, ka ngazo la aqane axecië mekune i nyidrë.

5. Maine ju, eu la ijine tro Eli a ithanata?

⁵ Eli ekö la Atre Huuj Ka Sisitria, nge lue nekö hnimina i nyidrë trahmany. Lue atre huuje nyidro, matre nyipiewekë la hnëqa i nyidro. Ngo ame pe, tha hnei nyidroti kö hna metrötrëne la itre huuj hna kuca koi Iehova, nge ngazo la aqane huliwane nyidro la hnëqa i nyidro. Ketre, hnei nyidroti hna kuca la itre huliwa ka sis. (1 Sam. 2:12-17, 22) Thenge la Wathebo i Mose, loi e troa humuthe la lue nekö i Eli. Ngo hnei nyidrëti hi hna ithanata koi nyidro, me nue nyidroti hmaca troa huliwa e hnine la ene. (Deu. 21:18-21) Nemene la mekuna i Iehova? Öni Nyidrëti koi Eli: ‘Pine nemene matre eö a atrune la lue nekö i ’ö hung?’ Hnei Iehova hna humuthi nyidro.—1 Sam. 2:29, 34.

6. Nemene la hna ini së hnene la tulu i Eli?

⁶ Hetre ini hne së hna xom qa ngöne la tulu i Eli. Ame la easa atre laka, hna tria hnene la ketre sinee së, loi e tro sa canga amexeje koi angeic la itre trepene meköti Iehova. Loi e tro fe sa ithuecatre koi angeic troa sipo ixatua thene la itre qatre thup. (Iako. 5:14) Tha easë kö a ajane troa tui Eli, ene la troa nyixölene la ketre sinee së hui Iehova. Ngacama tha ka hmaloi kö, ngo ka hetre eloine la troa canga ithanata kowe la ketre trejin. Tro sa ce wang la eisapengönene la tulu i Eli me Abigaila, ketre föe ne Isaraela.

7. Pine nemene matre hnei Abigaila hna ithanata koi Dravita?

 ⁷ Abigaila la ifënekö i Nabala, ketre atr trenamo me trenadro. Ame lo ijine Dravita me itre sine xöle i nyidrë a kötre Saulo joxu, hnei angatr hna thupëne la itre mamoe i Nabala qa ngöne la itre ka atrekënö. Hapeu, hetre hni ne ole i Nabala kö? Ohea. Ame lo Dravita a upe la itre sine xöle i nyidrë troa sipo xen me tim koi Nabala, hnei angeic hna elëhni me qaja la itre trengewekë ka akötr. (1 Sam. 25:5-8, 10-12, 14) Hnei Dravita hna mekun troa humuthi Nabala me itre ka huliwa koi angeic. (1 Sam. 25:13, 22) Nemene la ka traqa? Atre hi Abigaila laka, celë hi ijine tro eahlo a ithanata. Hnei eahlo hna tro troa ixelë memine la ala 400 lao trahmany ka mecijin, me ka elëhni, nge ka trene jiane isi, nge hnei eahlo hna ithanata koi Dravita.

8. Nemene la hna ini së hnene la tulu i Abigaila?

⁸ Tha hnei Abigaila kö hna xou troa ithanata koi Dravita. Hnei eahlo hna ithanata cememine la metrötr, me qaja la itre trengewekë ka ijij, matre troa saze la mekuna i Dravita. Ngacama tha zöi Abigaila kö, ngo hnei eahlo hna qeje menu. Hnei eahlo hna qaja aloinyi Dravita ka hape, ka loi la thiina i nyidrë, nge tro kö nyidrëti a kuca la loi. Xecie koi eahlo laka, tro kö Iehova a xatua eahlo. (1 Sam. 25:24, 26, 28, 33, 34) Loi e tro sa nyitipu Abigaila. Ame la easa öhn laka, kola troa tria hnene la ketre trejin, loi e tro sa canga hmekë angeic. (Sal. 141:5) Tha tro kö sa xou troa ithanata, cememine palahi la metrötr. Celë hi aqane tro sa amamane la ihnimi së kowe la trejin, me amamane laka, itre nyipi sinee së.—Ite edomë 27:17.

9-10. Nemene la hna kuca hnene la itre qatre thup ngöne la angatr a hamë eamo?

 ⁹ Tha tro kö la itre qatre thup a cil troa ithanata kowe la itre ka tria. (Gal. 6:1) Atre hi angatr laka, tha ka pexeje kö angatr nge tro fe angatr elany a hane aja ixatua. Ngo tha tro pi kö angatr a cile troa ithanata kowe la ketre trejin. (2 Tim. 4:2; Tito 1:9) Ame la itre qatre thup a hamë eamo, angatr a thupëne la aqane ithanata, me thele troa hamë ini hnyawa. Itre qatre thup a hnime la itre trejin. Celë hi matre angatr a xatua nyudren. (Ite edomë 13:24) Ngo ame la ka sisitria koi angatr, tre, troa atrunyi Iehova. Celë hi matre angatr a trongëne la itre hna amekötin me thupëne la ekalesia.—Itre hu. 20:28.

¹⁰ Tune la hne së hna ce wang, hetre ijine tro sa ithanata. Ngo, hetre ijine fe tro sa lapa thaup. Pine nemene matre jol e itre xaa ijin?

11. Nemene la ceitun hna qaja hnei Iakobo, nge pine nemene matre ka ihmeku hnyawa memine la aqane tro sa ithanata?

¹¹ Tha ka hmaloi kö troa lapa thaup. Celë hi hna qaja hnei Iakobo. Öni angeic: “Maine tha tria kö ketre hnei ithanata, atre ka pexej angeic, nge ka atreine xomacone la ngönetrei angeic.” (Iako. 3:2, 3) Ame la hnaewekë “xomacone” ngöne la xötr celë, tre, kola qaja la ibirit ne hoos. Ame la ibirit ke, ketre fao hna amë ngöne la që ne la hoos me oth kowe la he. Maine tro sa hule la lue eno ne la ibirit, troa jea la hoos maine acilëne pena. Ngo maine tro sa nue la lue eno, tro ha eatr la hoos memine lo lai ka tith. Ketre tune fe, maine tha xomehnöthe kö së la thineme  së, tro ha hetre ethan. Tro sa ce wang la itre ijine tro sa lapa thaup.

12. Eue la ijine tro sa xomehnöthe la thineme së me lapa thaup?

¹² Nemene la aqane tro sa ujë kowe la trejin ka atre la ketre ewekë, ngo tha nyine tro kö a qaja? Maine jë, easa iöhnyi memine la ketre trejin ka mel ngöne la ketre nöj hna wathebon. Hapeu, easë kö a pi atre la pengöne la huliwa ne cainöj e cili? Easa hnime la itre trejin, matre easa ajane troa atre la aqane mele i angatr, me thithi sai angatr. Ngo loi e tro sa xomehnöthe la thineme së me lapa thaup. Maine tro sa iele angatr troa qaja la itre ithuemacany tha nyine tro kö a qaja, tha easë kö lai a hnimi angatr memine la itre trejin ka mejiune koi angatr. Tha ajane kö së troa traqa la itre jol koi angatr me kowe la itre xaa trejin, me kowe fe la huliwa i Iehova. Ketre tui angatre fe, tha tro kö angatr a qaja la aqane trongene la huliwa i Akötresie ngöne la nöje së.

13. Thenge la Ite Edomë 11:13, nemene la hna troa kuca hnene la itre qatre thup, nge pine nemen?

¹³ Loi e tro la itre qatre thup a trongëne la hna qaja ngöne Ite Edomë 11:13. (E jë.) Tha tro kö angatr a qaja la itre ithuemacany ka sihngödr. Ngo tha ka hmaloi kö kowe la itre qatre thup ka faipoipo. Ame la lue trefën ke, nyidroti a ifekeune la itre mekun me qaja la itre aliene hni nyidro, tune la itre hna hnehengazo fë. Ngo atre hi la qatre thup laka, tha tro kö a qaja la itre ithuemacany ka sihngödr göne la itre atrene la ekalesia. Maine tro angeic a kuca tune lai, tha tro hë a mejiune koi angeic, nge tro ha qaja angazo angeic. Thatreine kö tro la itre ka trene hnëqa a “lue hna ithanata,” maine iaö pena. (1 Tim. 3:8, ithuemacany.) Ketre, tha tro kö angatr a huliwa iaö maine qeje gele i ketre pena. Maine ka hnime la qatre thup la föe i angeic, tro hë angeic a thupën matre tha tro kö a qaja la itre ithuemacany ka sihngödr.

14. Nemene la aqane tro la itre föe ne qatre thup a xatua angatr?

¹⁴ Ijije hi tro la itre föe a kuca, matre tro palahi a qaja aloinyi la itre föi nyudren. Nyudren a thupën matre tha tro kö a hnyingëne la itre ithuemacany ka sihngödr. Celë hi aqane tro nyudreni a sajuëne la huliwa ne la itre föi nyudren, me wangatrune la itre trejin hna xatuan. Ketre, nyudreni a amadrinë Iehova, me thele troa tingeting me caas la ekalesia.—Rom. 14:19.

15. Nemene la aqane goeëne Iehova la köni sinee i Iobu, nge pine nemen?

¹⁵ Tro la tusi Iobu a amamane la aqane me ijine tro sa ithanata. Hna traqa itrai la itre jol koi Iobu, matre hnene la foa lao sinee i nyidrë hna traqa troa xatua nyidrë. Hnei Elifaza, Biledad, me Zofar hna pane lapa thaup. Tha hnei angatre kö hna thele aqane troa xatua Iobu. Hnei angatre pe hna thele la aqane troa upezö Iobu, pine la itre akötr ka traqa koi nyidrë. Eje hi laka, ka nyipici hi la itre xaa mekun hna qaja, ngo hnei angatre fe hna qaja angazon me silitrengathoi Iobu me Iehova. Öni angatr ka hape, ketre atr ka ngazo Iobu. (Iobu 32:1-3) Nemene la hna kuca hnei Iehova? Hnei Nyidrëti hna elëhni ke, hnei angatr hna “qene hmo.” Hnei Nyidrëti hna upi angatr troa sipo Iobu troa thithi sai angatr.—Iobu 42:7-9.

16. Nemene la itre ini hne së hna xom qa ngöne la tulu i Elifaza, Biledad, me Zofar?

¹⁶ Nyimutre la itre ini hne së hna xom  qa ngöne la tulu i Elifaza, Biledad, me Zofar. Ame la hnapan, tha tro kö sa qeje gelene la ketre trejin. (Mat. 7:1-5) Loi e tro pe sa drei angatr hnyawa me hmitr troa ithanata. Tro hë sa trotrohnine la jol ka eje thei angatr. (1 Pet. 3:8) Ame la hnaaluen, loi e tro sa ithanata cememine la menyik, me qaja palahi la itre trenge nyipici. (Efe. 4:25) Nge ame la hnaakönin ke, Iehova a drenge la itre hne së hna iqajakeun.

17. Nemene la hna ini së hnene la tulu i Elihu?

¹⁷ Elihu la hnaafoane trahmany ka traqa troa wai Iobu, nge ketre sinee i Aberahama. Hnei Elihu hna drenge hnyawa la Iobu a ithanata memine lo köni xan. Hnei Elihu hna drenge hnyawa ke, nyidrëti a ajane troa haji Iobu cememine la ihnim, me xatua angeic troa wenë amekötine la mekuna i angeic. (Iobu 33:1, 6, 17) Nyipiewekë catre koi Elihu troa atrunyi Iehova, ngo tha angeic kö maine ketre atr pena. (Iobu 32:21, 22; 37:23, 24) Kola amamane hnene la tulu i Elihu laka, hetre ijine troa pane dreng me lapa thaup. (Iako. 1:19) Ketre, ame la kepin matre easa hamë eamo, tre, troa atrunyi Iehova ngo tha easë kö.

18. Nemene la aqane tro sa amamane la hni ne ole së kowe la ahnahna qaathei Iehova?

¹⁸ Easa wangatrune la ahnahna qaathei Iehova, ngöne la easa trongëne la hna qaja hnei Tusi Hmitrötr. Easa ithanata ngöne la nyipi ijin me thupëne la aqane ithanata së. Öni Solomona joxu: “[Ite wene pom, MN] gole hnine ite tenge sileva la tenge ewekë hna qaja ngöne la ijin’ ej.” (Ite edomë 25:11) Maine tro sa drenge hnyawa la hna qaja hnei itre xan me mekun qëmeken troa ithanata, tro ha ceitu la itre trengewekë së memine la itre wene pom gole ka mingöming. Ngacama ka lapa ithanata së maine lapa thaup pena, ngo tro ha hetre thangane la itre hne së hna qaja, nge tro hë sa amadrinë Iehova. (Ite edomë 23:15; Efe. 4:29) Aqane tro hi së lai a wangatrune la ahnahna qaathei Akötresie!