TANE MEKUN 10
Hetre Ihnim Me Hni Ne Ole Koi Iehova Matre Kola Xomi Bapataiso
“Nemene pe kö la ka ajolë ni troa xomi bapataiso?”—ITRE HU. 8:36.
NYIMA 37 Nyi Hlue i Iehova Jë Cememine La Hni Ka Pexej
MEKUN KA TRU *
1-2. Thenge la Itre Huliwa 8:27-31, 35-38, nemene la ka upe la atre Aithiope troa xomi bapataiso?
AJA i epuni kö troa xomi bapataiso me hane xötrethenge Keriso? Itre xan a xomi bapataiso ke, tru la ihnim me hni ne ole i angatr koi Akötresie. Hanawang la tulu ne la hlue ne la isola ne Aithiope.
2 Hnene la atre Aithiope hna canga ujë thenge la itre hnei angeic hna inine ngöne la Itre Hna Cinyihan. (E jë la Itre Huliwa 8:27-31, 35-38.) Pine nemen? Angeic a wangatrune la itre trengewekë i Akötresie. Ame lo angeic ngöne ikariota, angeic a e la tusi Isaia. Ketre, angeic palahi a ithanata me Filipo, matre hna acatrene la hni ne ole i angeic kowe la hna kuca hnei Iesu. Ngo hnauëne la angeic a fek a tro Ierusalema? Angeic a hnimi Iehova. Nemene la ka anyipicine lai? Angeic petre hi a hane hmi koi Iehova e Ierusalema. Hnei angeic hna nue la hmi angeic hnapan, matre sine la nöj ka nyihlue i Akötresie. Ihnimi angeic koi Iehova la ka upi angeic troa xomi bapataiso me hane xötrethenge Keriso.—Mat. 28:19.
3. Nemene la ka sewe së troa xomi bapataiso? (Wange ju la hna eköhagen hna hape, “ Ka Tune Kaa La Hni Së?”)
3 Ihnimi së koi Iehova la ka upi së troa xomi bapataiso. Ngo ijije fe troa sewe së hnene la ihnim. Kola hapeue lai? Hanawang la itre ceitun. Easa hnime la itre fami së ka tha hmi kö, matre easa xou laka, maine tro sa xomi bapataiso, tro hë angatr a methinë së. (Mat. 10:37) Maine jë, easa majemine kuca la itre xaa ewekë hna sisin hnei Akötresie, nge jole koi së troa nue itre ej. (Sal. 97:10) Maine pena, easa majemine sine la itre feet ka sajuëne la hmi ka thoi. Nge easa madrin ngöne la easë mekune hmaca la itre ijine feet cili ekö. Eje hi, jole hë koi së troa nuetrije la itre hna majemin hna sisin hnei Iehova. (1 Kor. 10:20, 21) Loi e tro sa isa hnying ka hape, “Drei la hnenge hna hnime catrën?”
DREI LA HNE SË HNA HNIME CATRËN?
4. Nemene la ka upi së troa xomi bapataiso?
4 Nyimutre la itre ewekë hne së hna hniin. Drei la ketre ceitun. Qëmekene tro sa atre Iehova, ka metrötrëne hë së la Tusi Hmitrötr, nge ka hnimi Iesu hë së. Ngo ame enehila, easa atre la Itretre Anyipici Iehova, nge easa madrine troa ce tro memine la itre trejin. Ngo tha kolo kö lai a hape, tro hë sa xomi bapataiso. Ame la ka upi së troa xomi bapataiso, tre, ene la ihnimi së koi Iehova. Maine tru catre kö la ihnimi së koi Iehova, tha tro kö sa nue la ketre atr maine ketre ewekë troa sewe së troa nyihlue i Nyidrë. Tro la ihnimi së koi Iehova a upi së troa xomi bapataiso, me xatua së tro palahi a catre mele nyipici koi Nyidrë.
5. Nemene la itre hnying hne së hna troa ce wang?
5 Öni Iesu ka hape, loi e tro sa hnimi Iehova hnene la hni së, me mele së, me mekuna së, me trengecatre së ka pexej. (Mar. 12:30) Nemene la ka xatua së troa hnimi Iehova tune lai? Maine tro sa lapa mekun la ihnimi Iehova koi së, tro ha acatrene la ihnimi së koi Nyidrë. (1 Ioane 4:19) Nemene la itre xaa thiina hne së hna troa eënyine e ka ihnimi së? *
6. Thenge la Roma 1:20, nemene la aqane tro sa atrepengöi Iehova?
6 Troa atrepengöi Iehova jëne la itre hna xup. (E jë la Roma 1:20; Hna ama. 4:11) Tro sa lapa mekun la inamacane i Iehova ka mama ngöne la itre feja me itre öni, me inine la aqane kuca Nyidrëti la ngönetrei ne atr. (Sal. 139:14) Loi e tro fe sa mekun la mene i Iehova ka mama ngöne la aqane xupe Nyidrëti la jö. Nge the qaja palaha la itre miliar lao xaa wëtresij. * (Is. 40:26) E cili, troa acatrene la metrötre së koi Iehova. Ngo hetre ketre ewekë kö nyine tro sa kuca, matre easenyi catr koi Iehova. Loi e tro sa thel troa atrepengöi Nyidrëti hnyawa.
7. Nemene la ka troa xecie koi së, e easa ajane troa acatrene la ihnimi së koi Iehova?
7 Loi e troa xecie koi së laka, Iehova a hnimi së. Hapeu, jole kö koi së troa mekun laka, kola hnimi së me wangatrunyi së hnene la Atre xup asë? Maine eje hi, the thëthëhmine kö laka, “tha ka nanyi kö [Iehova] koi së.” (Itre hu. 17:26-28) Nyidrëti a “thele la nöjei hni asë.” Nge tune la hnei Dravita hna qaja koi Solomona, “maine eö a thele nyidë, tro eö a öhnyi nyidë.” (1 A. l. ite jo. 28:9) Eje hi, ame la kepin matre easa ini Tusi Hmitrötr, tre, öni Iehova, “Hnenge hna ahoeane la ihnimi koi ’ö.” (Iere. 31:3) Maine tro sa hetre hni ne ole kowe la hnei Iehova hna kuca koi së, tro hë lai a acatrene la ihnimi së koi Nyidrë.
8. Nemene la aqane tro sa olene koi Iehova la ihnimi Nyidrë?
8 Ame la ketre aqane tro sa olene koi Iehova la ihnimi Nyidrë, tre, ene la troa thith. Maine tro sa qaja koi Akötresie la itre hne së hna hnehengazon, me olene la itre hnei Nyidrëti hna kuca, tro ha kökötr la ihnimi së koi Nyidrë. Nge ame la easa öhne la aqane sa Nyidrëti la itre thithi së, kola acatrene la aqane imelekeu së me Nyidrë. (Sal. 116:1) Xecie koi së laka, Nyidrëti a trotrohni së. Ngo maine easa ajane troa easenyi catre koi Iehova, nyipiewekë tro sa trotrohnine la kepin matre Nyidrëti a hniin la itre xaa ewekë me xelene la itre xan. Loi e tro fe sa atre la aja i Nyidrëti koi së. Celë hi kepin matre, nyipiewekë troa ini Tusi Hmitrötr.
Maine easa ajane troa easenyi catr koi Akötresie me atre la aja i Nyidrë, loi e tro sa ini Tusi Hmitrötr (Wange ju la paragarafe 9) *
9. Nemene la aqane tro sa amamane la hni ne ole së kowe la Tusi Hmitrötr?
9 Troa wangatrune la itre trengewekë i Akötresie, ene la Tusi Hmitrötr. Tusi Hmitrötre hi la ka qatreng la nyipici göi Iehova, me itre aja i Nyidrëti koi së. Easa amamane la hni ne ole së kowe la Tusi Hmitrötr, ngöne la easa e o drai, me hnëkëne la ini tusi së, me trongëne la hne së hna inin. (Sal. 119:97, 99; Ioane 17:17) Hapeu, hne së kö hna kuca la ketre porogaram ne e Tusi Hmitrötr? Easë kö a xötrethenge hnyawa la porogaram?
10. Nemene la hne së hna öhn e hnine la Tusi Hmitrötr?
10 Hetrenyi e hnine la Tusi Hmitrötr la itre hna melën hnene la itre atr ka öhnyi Iesu. Celë hmekuje hi la itusi ka qaja la nyipici göne la hnei Iesu hna kuca thatraqai së. Ame la easa inine la itre hnei Iesu hna qaja me kuca, kola thue aja së troa hane nyisinee i nyidrë.
11. Nemene la ketre aqane tro sa acatrene la ihnimi së koi Iehova?
11 Troa hnimi Iesu, matre acatrene la ihnimi së koi Iehova. Pine nemen? Pine laka, hnei Iesu hna xom la itre thiina ne la Keme i nyidrë. (Ioane 14:9) Maine tro sa atrepengöi Iesu hnyawa, tro hë sa trotrohnine me hnimi Iehova. Pane mekune jë la aqane utipine Iesu la itre hna wangacone hnei itre xan, tune la itre ka pë ewekë, me ka wezipo, me itre ka kucakuca. Pane mekune jë la aqane xatua së hnene itre eamo ka lolo hnei nyidrëti hna hamën, matre lolo hë la mele së enehila.—Mat. 5:1-11; 7:24-27.
12. Nemene la hne së hna ajane troa kuca ngöne la easa atrepengöi Iesu hnyawa?
12 Troa acatrene la ihnimi së koi Iesu, e hne së hna lapa mekun la mel hnei nyidrëti hna huujën, matre troa nue la itre ngazo së. (Mat. 20:28) Ame la easa atre laka, hnei Iesu hna mec thatraqai së, kola upi së troa ietra me thele tro Iehova a nue la ngazo së. (Itre hu. 3:19, 20; 1 Ioane 1:9) Pine laka, easa hnimi Iesu me Iehova, matre easë fe a easenyi catr kowe la itre xan ka hane ujë tun.
13. Nemene la hnei Iehova hna hamëne koi së?
13 Troa hnime la lapa ka cahae i Iehova. Maine jë, tha trotrohnine kö la itre sinee së la kepin, matre easa ajane troa sa xepu koi Iehova. Maine jë, angatr a icilekeu me easë. Tro kö Iehova a xatua së me hamë sinee së e hnine la ekalesia. Maine tro palahi sa easenyi catr kowe la itre trejin ne la ekalesia, tro hë sa öhnyi ixatua me ihnim. (Mar. 10:29, 30; Heb. 10:24, 25) Ketre, ijije palakö tro la itre sipu fami së a hane nyihlue i Iehova me trongëne la itre hnei Nyidrëti hna amekötin.—1 Pet. 2:12.
14. Thenge la 1 Ioane 5:3, nemene la hne së hna öhn göne la itre hna amekötin qaathei Iehova?
14 Troa wangatrune me xötrethenge la itre hna amekötin hnei Iehova. Qëmekene troa atre Iehova, hne së hna xötrethenge la itre sipu mekuna së. Ngo ame enehila, öhne hë së laka, lolo catre kö la itre hna amekötin qaathei Iehova. (Sal. 1:1-3; e jë la 1 Ioane 5:3.) Pane mekune jë la itre eamo hna hamën thatraqane la itre trefën, itre kem me thin, me itre nekönatr. (Efe. 5:22–6:4) Hapeu, hetre thangane kö hne së hna kapa qa ngöne la hna trongëne la itre eamo celë? Tune kaa la mele së ngöne la easa iëne hnyawa la itre sinee së? Hapeu, easë kö a madrin? (Ite edomë 13:20; 1 Kor. 15:33) Easë asë hi a troa sa ka hape, eje hi.
15. Nemene la nyine troa kuca e thatre kö së la aqane troa trongëne la itre xaa trepene meköt?
15 Ame itre xaa ijin, thatre kö së la aqane troa trongëne la itre xaa trepene meköt. Celë hi matre, jëne la organizasio i Nyidrë, Iehova a hamë së la itre jiane huliwa hna nyitrepene hnei Tusi Hmitrötr. Itre ej a xatua së troa atre la loi qa ngöne la ngazo. (Heb. 5:13, 14) Ame la easa e me inine la itre jiane huliwa celë, easa öhn la enyipiewekëne itre ej. Ketre, kola thue aja së troa hane sine la organizasio i Iehova.
16. Nemene la aqane eköthe Iehova la nöje i Nyidrë?
16 Troa hnim me sajuëne la organizasio i Iehova. Hnei Iehova hna eköth la nöje i Nyidrë, me acile la itre ekalesia. Iesu la he ne la itre ekalesia. (Efe. 1:22; 5:23) Hnei Iesu hna acile la ketre neköi gurup, itre hna iën, matre troa elemekene la huliwa i nyidrëti enehila. Hnei Iesu hna hën la gurup cili ka hape, “hlue ka nyipici me ka inamacan.” Angatr a xatua së troa easenyi catr koi Akötresie, me thupëne la aqane imelekeu së me Nyidrë. (Mat. 24:45-47) Angatre fe a acile la itre qatre thup, matre troa eatrongë së me thupë së. (Is. 32:1, 2; Heb. 13:17; 1 Pet. 5:2, 3) Itre qatre thup a kuca asë la hnei angatr hna atrein, matre troa akeukawanyi së, me xatua së troa easenyi catre koi Iehova. Ngo ame la ka sisitria, tre, angatr a xatua së troa inine la itre xan la pengöi Iehova.—Efe. 4:11-13.
17. Thenge la Roma 10:10, 13, 14, pine nemene matre easa qeje Iehova koi itre xan?
17 Troa xatuane la itre xan troa hnimi Iehova. Hnei Iesu hna upe la itretre drei nyidrë troa inine la itre xan la pengöi Iehova. (Mat. 28:19, 20) Tha hnene kö laka, hnëqa së, matre easa drengethenge la hna amekötin celë. Pine laka, kola kökötre la ihnimi së koi Iehova, matre easa mekun tui Peteru aposetolo me Ioane. Öni nyidro: “Thatreine kö nyio cipane la itre ewekë hnei nyio hna öhne me dreng.” (Itre hu. 4:20) Kola elitrauje la madrine së ngöne la easa xatuane la ketre atr troa hnimi Iehova. Pane mekune jë la etrune la madrine i Filipo, ngöne la angeic xatuane la atre Aithiope troa inine la nyipici qa hnine la Itre Hna Cinyihan me xomi bapataiso! Ame la easa nyitipu Filipo me drengethenge Iesu me catre cainöj, easë hi lai a amamane la aja së troa hane Anyipici Iehova. (E jë la Roma 10:10, 13, 14.) Maine jë, tro fe sa hane hnying tune la atre Aithiope, ka hape: “Nemene pe kö la ka ajolë ni troa xomi bapataiso?”—Itre hu. 8:36.
18. Nemene la hne së hna troa ce wang ngöne la ketre tane mekun?
18 Ketre ijine ka sisitria la ijine easa xomi bapataiso. Celë hi matre, nyipiewekë tro sa pane trotrohnine la aliene la troa xomi bapataiso. Nemene la nyine tro sa atre göne la bapataiso? Nemene la nyine troa kuca qëmekene me thupene la hna xomi bapataiso? Tro la ketre tane mekun a sa la itre hnying celë.
NYIMA 2 Iehova La Ëje i Cilie
^ Ame itre xan, ka hnimi Iehova angatr. Ngo thatre kö angatr maine ijiji angatre hë troa xomi bapataiso. Maine celë hi mekuna së, tro la tane mekun celë a amamane la itre nyine troa kuca, matre xatua së troa xomi bapataiso.
^ Isapengöne kö la itre atr, matre isapengöne kö la aqane tro angatr a trongëne la itre mekun hna qaja ngöne la tane mekun celë.
^ Maine epuni a aja itre xaa ceitun, goeëne jë la boroshür, La vie a-t-elle été créée? me Cinq questions à se poser sur l’origine de la vie.
^ ITRE IATR: Ketre trejine föe a hamë tarak kowe la ketre neköjajiny ngöne la hna komisio.
