Maine easa pi atre la ketre atr, eje hi laka, tro sa pane hnyingëne la ëje i angeic. Nge, e tro sa hnyinge tune koi Akötresie, nemene jë la hnei Nyidrëti hna troa sa?

“Iehova ni, celë hi ëjeng.”—Isaia 42:8.

Ka tru koi Akötresie la ëje i Nyidrë. Pëkö ka ati ëje i Akötresie; Nyidrëti kö la ka sipu iëne la ëje i Nyidrë. Öni Nyidrë: “Celë hi ëjenge epine palua, nge celë hi nyine meku ni ngöne la nöjei xöt.” (Esodo 3:15) Ame e hnine la Tusi Hmitrötr, anyimua mama kö la ëje i Akötresie hune la itre xa aqane hë Nyidrë: Kapucatinasë, Tretretro, Joxu, maine Akötresie, me itre xa ëj, tui Aberahama, Mose, Davita, maine Iesu. Ketre, aja i Iehova tro la itre atr asë a atre la sipu ëje i Nyidrë. Öni Tusi Hmitrötr: “Tro nöjei ate a ate laka cilieti la Kasisitia hmekuje hune la fene hnengödrai asëjëihë, nge Iehova la [ëje] i cilie.”—Salamo 83:18.

Ka tru koi Iesu la ëje i Akötresie. Jëne la tulu ne thith, hnei Iesu hna inine la itretre dreng troa thithi koi Akötresie. Öni nyidrë: “Epi hmitrötre la ëje i Cilie.” (Mataio 6:9, MN) Öni Iesu fe e thith: “Angakaka, atrunejë la [ëje] i cilie.” (Ioane 12:28) Ame la ka sisitria koi Iesu, tre, ene la troa atrune la ëje i Akötresie. Celë hi matre, öni nyidrë e thith: “Hnenge hna amamane koi angate la [ëje] i cilie, nge tro kö ni a amaman.”—Ioane 17:26.

Ka tru kowe la itre ka atre Akötresie la ëje i Nyidrë. Tha sihngödri kö kowe la itre hlue i Akötresieti ekö ka hape, troa thupën, me amele angatr, e tro angatr a atre la ëje i Nyidrë. Öni Tusi Hmitrötr, “Hnapo ka cate la [ëje] i Iehova ; kola köte kowe hnene la ate ka meköt, mate adraië angeic.” (Ite Edomë 18:10) “Tro ha eje laka ame la ate hëne la  [ëje] i Iehova, te, tro ha amele angeic.” (Ioela 2:32) Tusi Hmitrötr a amamane laka, troa wangatrehmekune la itre hlue i Iehova hnene la ëje i Nyidrë. “Ke nöjei ate asë a isa tro ngöne la ëjene la ite haze i angat, tro pe kö sha tro ngöne la [ëje] i Iehova Akötesi shë epine palua.”—Mika 4:5; Ite Huliwa 15:14.

Ëje i Nyidrë hmekuje hi. Hna qaja hnene la itre ka inamacan ka hape, ame la aliene la ëje i Iehova, tre, “Ka Aejëne Nyidrë.” Nge, jëne la itre hnei Iehova hna qaja koi Mose, easa trotrohnine hnyawa la aliene la ëje i Nyidrë. Öni Nyidrë: “INI LA KA EJ, NGE EJE KÖ NI.” (Esodo 3:14) Easa trotrohnin, jëne la ëje i Nyidrë, laka, Nyidrëti hi la Atre Xupe la nöjei ewekë asë. Ngo tha eje hmekuje kö lai. Eje fe a amamane laka, ijiji Nyidrëti hi troa sipu aejë Nyidrëti kö, me nyijëne la itre hnei Nyidrëti hna xup matre troa eatrëne la aja i Nyidrë. Kola mama jëne la itre aqane hë Nyidrë, la göhnë, me mus, me mene i Nyidrë. Ngo, ëje i Nyidrëti hmekuje hi, ene Iehova, la ka amamane la pengöi Nyidrë, me aqane ketre sipu aejë Nyidrëti kö.

Ëje lai ka amamane la ihnimi Akötresieti koi së. Kola mama hnene la aliene la ëje i Akötresie, la ihnimi i Nyidrë koi së me kowe la itre hna xup. Aja i Nyidrë tro sa atrepengöi Nyidrë. Celë hi matre Nyidrëti a aijiji së troa atre la ëje i Nyidrë. Nyidrëti la ka pane qaja la ëje i Nyidrë koi së. Akötresie a ajane tro sa atre Nyidrë, ceitu memine la ketre atr ka ajane troa easenyi koi së. Ngo, tha ka tune kö la itre xa haze ka nany.—Salamo 73:28.

Ame la easa qaja la ëje i Akötresie, easë hi lai a amamane la aja së troa atrepengöi Nyidrë. Maine epuni a iöhnyi memine la ketre, nge aja i epun troa nyisinee angeic, tro epuni lai a upi angeic troa hëne la sipu ëje i epun. Tune kaa, e xele ju angeic? Tro epuni lai a mekun ka hape, xele kö angeice ma nyisinee i epun. Ceitune hi lai me Akötresie. Hnei Iehova hna qaja kowe la itre atr la ëje i Nyidrë, nge aja i Nyidrë troa hëne la ëje cili. Ame la easa ujë tun, easë hi lai a amamane la aja së troa easenyi Nyidrë. Öhne kö Nyidrë la itre ka “mekune la [ëje] i nyidë”!—Malaki 3:16.

Nyipiewekë tro sa pane atre la ëje i Akötresie. Ngo, tha tro kö a hmaca e cili. Loi e tro fe sa atre la pengöi Nyidrë, memine la itre thiina i Nyidrë.