Ame ngöne la itre tane mekune ka ase hë, hne së hna ce wange la itre ithuemacanyi ka troa xatua së troa sa la hnying hna hape, Drei lae Akötresie? Jëne la Tusi Hmitrötr, hne së hna inine ka hape, Iehova la ëje i Nyidrë, nge ihnim la thiina ka sisitria i Nyidrë. Hne së mina fe hna ithanatane la itre ewekë hnei Nyidrëti hna kuca, memine la itre hnei Nyidrëti hna troa kuca thatraqane la itre atr asë. Eje hi laka, nyimutre catre kö la nyine tro sa atre göi Akötresie. Maine jë, epuni a ketre hnyinge ka hape, “Nemene la eloin, e tro ni a atre la itre ewekë cili?”

Ase hë Iehova qaja amë ka hape, “maine eö a thele nyidë, tro eö a öhnyi nyidë.” (1 Aqane lapa ite joxu 28:9) Pane mekune jë la ahnahna ka sisitria hne së hna troa kapa, e tro sa thele me atrepengöi Akötresie! Tro sa “ithanatacone me Iehova” maine easenyi catre koi Nyidrë! (Salamo 25:14) Nemene la eloin, e troa easenyi koi Akötresie?

Nyipi madrin. Iehova la “Akötresie ka madrin.” (1 Timoteo 1:11, MN) Maine tro sa easenyi catre koi Nyidrë, me nyitipu Nyidrë, tro hë sa madrin. Troa tingetinge la hni së, me mekuna së, nge tro fe sa egöcatr. (Salamo 33:12) Ketre, tro hë sa mele madrin, ke, easa ananyine la itre hna majemine ka ngazo, me hetrenyi la itre hna majemine ka loi, me imelekeu hnyawa memine la itre atr. Ame hë e cili, casi hi la mekuna së memine la atre cinyihane la Salamo, la kola hape: “Loi koi ni troa eashenyi Akötesie.”—Salamo 73:28.

Ixatua thatraqai së. Öni Iehova kowe la itre hlue i Nyidrë ka hape: “Tro ni a haji ’ö me alamekë eö.” (Salamo 32:8) Kolo hi lai a hape, tru catre la hnei Iehova hna mekune la itre hlue i Nyidrë, angatr isa ala cas. Nge, Nyidrëti a hamë ixatua koi angatr thenge la hnei angatr hna isa ajan. (Salamo 139:1, 2) Maine tro sa acatrene la aqane imelekeu së me Nyidrë, tro hë sa öhne ka hape, Nyidrëti palahi a xatua së.

Mejiune koi elany. Iehova a xatua së troa hetrenyi la mele ka loi enehila. Ketre, Nyidrëti a aijijë së troa mejiune kowe la mele ka mingöming elany. (Isaia 48:17, 18) Öni Tusi Hmitrötr: “Dei lola mele ka tha ase palua kö, laka tro angat’ a ate hmekua cilie la nyipi Akötesieti ka cas, me Iesu Keriso la hnei cilieti hna upengëtin.” (Ioane 17:3) Ceitune hi la mejiune së memine la ketre iuhni laka, “ka tha uke me ka cat.” Akötresie a hamë së la mejiune celë, matre tro sa atreine cile kowe la itre jole hne së hna melën enehila.—Heberu 6:19.

Celë hi itre xa kepine matre, loi e tro sa atrepengöi Akötresie, me acatrene la aqane imelekeu së me Nyidrë. Maine easa aja itre xa ithuemacany, easenyine jë la ketre Atre Anyipici Iehova, maine tro jë kowe la site së jw.org/dhv.