Maine epuni a ajane troa atrepengöne la ketre atr, loi e tro epuni a pane atre la itre huliwa hnei angeic hna eatrëne hë, memine la itre jol hnei angeic hna cile kow. Ketre tune mina fe, maine epuni a ajane troa atrepengöi Akötresieti hnyawa, loi e troa atre la itre hnei Nyidrëti hna kuca. Tro hë epuni lai a öhne la itre hnei Nyidrëti hna kuca ekö, nge nyine loi koi së enehila, me elanyi mina fe.

Iehova Akötresie la Atre Xup la nöjei ewekë asë, nge “ame la nöjei ewekë i nyidëti ka sihngödi qane la hna xupe la fene hnengödrai, te, mama cile pi hë, mama ha hnene la nöjei ewekë hna xup.” (Roma 1:20) “Nyidëti la ate xupe la fene hnene la mene i nyidë, me acile hutine la hlapa hnene la inamacane i nyidë, me sheluthe la hnengödrai hnene la wangate hmekune i nyidë.” (Ieremia 10:12) Kola mama la ihnimi Akötresieti koi së jëne la itre hnei Nyidrëti hna xup.

Pane mekune jë së, la aqane xupi së hnei Iehova. Ka ketre pengöne kö. Hnei Nyidrëti hna xupi së “hnaiji nyidë.” (Genese 1:27) Kola hape, hnei Nyidrëti hna aijijë së troa xome la itre thiina ka lolo i Nyidrë. Hnei Nyidrëti hna xupi së memine la atreine troa trotrohnine la mekuna i Nyidrë, me itre trepene meköti Nyidrë. Pine laka, easa isine troa mele thenge itre ej, haawe, tru catr la madrine së, nge hetre aliene fe hë la mele së. Nge ketre, hnei Nyidrëti hna aijijë së troa hane imelekeu me Nyidrë.

Ame la easa goeëne la nöjei ewekë hnei Akötresie hna xup hune la ihnadro, haawe, easa trotrohnine la ejuine la ihnimi Nyidrëti koi së. Öni Paulo aposetolo, ngöne la angeic a qeje Akötresie ka hape, “Eje pala kö la nyine anyipici nyidë, ngöne la kola kuca la loi hnei nyidë, ene la kola hamë [së] la manie qa hnengödrai, me ite ijine ka meledrai, me amejine la ite hni [së] hnene la xeni me madin.” (Ite Huliwa 14:17) Tha hnei Akötresieti hmekuje kö hna hamë së la ka nyipiewekë kowe la mel. Hnei Nyidrëti fe hna kuca matre troa mana, me isapengöne la nöjei ewekë cili, matre troa thue  madrine së. Ngo, eje hi laka, nyimutre catre kö la itre ewekë hnei Akötresie hna kuca thatraqai së.

Hnei Iehova hna xup la ihnadro matre troa mele ngöne epine palua hnene la itre atr. Öni Tusi Hmitrötr: “Hnei nyidëti hna hamëne la fene hnengödrai kowe la ite nekö i at,” nge tha hnei Nyidrëti kö hna “xupe gufan’ ej ; hnei nyidëti hna xup’ eje mate lapan.” (Salamo 115:16; Isaia 45:18) Ngo, troa lapan hnei drei, nge utihë eu? “Tro ha la ange ka meköti a hetenyi la nöj, me lapa palua kö ngön’ ej.”—Salamo 37:29.

Haawe, hnei Iehova hna xupe la pane trahmanyi me föe, Adamu me Eva, me ami nyidro ngöne la paradraiso matre “troa eën’ eje me thupën.” (Genese 2:8, 15) Lue ewekë hi hnei Akötresie hna upi nyidro troa kuca. Öni Nyidrë: “Manapi me hate, me atiqane la fene hnengödrai, me xom’ acon’ ej.” (Genese 1:28) Tro Adamu me Eva a hetrenyi la mele ka tha ase palua kö e celë fen. Ame la engazon, hnei nyidroti hna sipu mekun troa icilekeu me Akötresie, matre tha tro hmaca kö nyidroti a hane sine la “ange ka meköti” ka troa “hetenyi la nöj.” Ngo, tune la hne së hna troa ce wang, tha saze kö la aja i Iehova koi së me kowe la ihnadro. Tro sa pane ce wang la ketre ewekë hnei Akötresie hna kuca thatraqai së.

Hna hëne fe la Tusi Hmitrötr ka hape, Wesi Ula i Akötresie. Pine nemene matre hamëne jë Iehova la Tusi Hmitrötr? Pine laka, aja i Nyidrë tro sa atrepengöi Nyidrë. (Ite Edomë 2:1-5) Nyipici laka, tha hna sa asë kö la nöjei hnying göi Akötresie hnei Tusi Hmitrötr, ketre tune fe la itre xa itus. (Ate Cainöj 3:11) Ngo, ame asë hi la aliene la Tusi Hmitrötr, tre, ka xatua së troa atre Akötresieti hnyawa. Easa öhne la pengöi Nyidrë ngöne la aqane ujë Nyidrë kowe la nöje i Nyidrë. Easa trotrohnine la pengöne atr hnei Nyidrëti hna kapa maine hna xelene pena. (Salamo 15:1-5) Easa atre la aqane waiewekë i Nyidrë göne la hmi me itre mo, me troa lapa pë ethan. Easa atre hnyawa la pengöi Iehova jëne la itre hnei Iesu Keriso hna qaja me kuca, nge hna cinyihan e hnine la Tusi Hmitrötr.—Ioane 14:9.

Ame la ketre kepin matre hamëne jë Iehova la Tusi Hmitrötr, tre, matre tro sa mele madrin, me troa hetre aliene la mele së. Jëne la Tusi Hmitrötr, Iehova a qaja koi së la aqane troa mele madrine la itre hnepe lapa, me mejihnine la hna hetreny, nge tha tro kö a hnehengazo menu. Nge, tune la hne së hna troa ce wang ngöne la zonale celë, Tusi Hmitrötr a sa la itre hnying ka nyipiewekë koi së, tune la kola hape: Pine nemene matre kola elë la etrune la itre akötr enehila? Nemene la itre ewekë ka troa traqa elany? Ketre, ej a qejepengöne la itre hnei Akötresie hna kuca, matre troa eatr lo aja i Nyidrë ngöne la qaan.

Hetre itre xa aqane tro sa amamane ka hape, qaathei Akötresieti la Tusi Hmitrötr, nge ketre itus ka sisitria catre kö hune la itre xa itus. Traqa koi 1 600 lao macatre ne cinyihane ej hnene la ala 40 lao trahmany. Nge, casi hi la hnei angatr hna ithanatan, ke, qaathei Akötresie la Tusi Hmitrötr. (2 Timoteo 3:16) Tha ceitune kö ej memine la itre xa itus ka hekö, ke, ka cilehuti palahi qaan ekö, nge hna anyipicine ej hnene la itre xa igötranene la Tusi Hmitrötr hna nyipi öhn. Ketre, tha patre kö la Tusi Hmitrötr, ngacama hna sawa la itre atr troa ujëne ej, me e, me ihamënekeun. Ame enehila, celë hi itusi hna ujën atrune hune la itre xa itus, nge hna kapa hnene la itre atr ka alanyim. Hnene laka, tha patre kö la Tusi Hmitrötr, kolo hi lai a amamane ka hape, “ka cile huti epine palua la wesi ula i Akötesi shë.”—Isaia 40:8.

Hetre ketre ewekë kö hnei Akötresie hna kuca. Ewekë lai ka troa amamane laka, tro kö a eatre la aja i Nyidrë. Tune hë lo hne së hna ce wang, aja i Akötresie tro la itre atr a mel epine palua e celë fen. Pine laka, hnei Adamu hna icilekeu me Akötresie, me kei kowe la ngazo, haawe, luzi hë la edrö i angeic, ene la troa mele epine palua. Ngo, tha angeic hmekuje kö, kolo fe a hane xeni pun hnene la itre matra i angeic. Öni Tusi Hmitrötr, “Traqa ha la ngazo kowe la fene hnengödrai hnene la ate ka cas, nge meci fe pine la ngazo ; tune lai hna traqa la meci kowe la nöjei ate asë, ke ngazo asë hë.” (Roma 5:12) Hnene la tha idrei Adamu, matre kösë triane hë lo aja i Akötresie kowe la ihnadro. Nemene la hna troa kuca hnei Iehova?

Ka ce tro palahi la itre huliwa i Iehova memine la itre thiina i Nyidrë. Ame koi Nyidrë, zöi Adamu me Eva la ewekë ka traqa. Ngo, pine laka, ka ihnimi Nyidrë, hetre hnei Nyidrëti hna troa kuca thatraqane la itre matra i nyidro. Ketre, ka inamacane Iehova, matre canga mama hi koi Nyidrë la aqane troa elë hune  la jole celë. Ame hnei Nyidrëti hna hamëne la nyin. (Genese 3:15) Matre, jëne la nekö i Akötresie, ene Iesu Keriso, tro ha thapa la itre atr qa ngöne la ngazo me mec. Nemene la aliene lai?

Aja i Iehova troa itöne la mele ne la itre atr, itre ka xeni pun la icilekeu i Adamu. Celë hi matre, hnei Nyidrëti hna upi Iesu kowe la fen matre troa inine la itre atr la aqane mel, me “hamëne la mele i [nyidrë] nyine thupene mele ne la nöjei ate ka kösau.” a (Mataio 20:28; Ioane 14:6) Iesu hi la ka ijij troa hamëne la thupene mel, ke, ketre atr ka pexeje nyidrë, tui Adamu. Hnei nyidrëti pe hna drengethenge Akötresie utihë mec. Hnei Iehova hna amele Iesu hmaca e hnengödrai, ke, thatreine kö tro Nyidrëti a nue Iesu troa mec. Hnei Iesu hna kuca la hnei Adamu hna thatreine kuca, ene la troa aijijëne la itre atr ka idrengethenge, troa hetrenyi la mel ka tha ase palua kö. Öni Tusi Hmitrötr, “Ite ka ngazo hë la ka ala nyimu hnene la tha idei ne la ka cas, tune lai troa jele mekötine la ka ala nyimu hnene la idei ne la ka ala cas.” (Roma 5:19) Jëne la thupene mel hna hamëne hnei Iesu, tro Akötresieti a aejëne la aja i Nyidrë, ene la troa mel epine palua la itre atr e celë fen.

Hetre ini hne së hna kapa göi Iehova qa ngöne la aqane ujë Nyidrë ngöne la kola icilekeu hnei Adamu. Easa öhne laka, pëkö ketre ewekë ka troa sewe Nyidrë troa eatrëne lo aja i Nyidrë ngöne la qaan; tro kö a “eate” la itre trengewekë i Nyidrë. (Isaia 55:11) Easë fe a trotrohnine la ejuine la ihnimi Iehova koi së. Öni Tusi Hmitrötr, “Mamapi hi la ihnimi Akötesieti koi shë, ke hnei Akötesie hna upe kowe la fene hnengödrai la Hupuna i nyidëti ka cas, mate melepi shë hnei nyidë. Dei lola ihnim, ka, hape ; tha hne shë kö hna aja Akötesie, ngo hnei nyidëti hna hnimi shë me upe la Hupuna i nyidë nyine huje pine la ite ngazo shë.”—1 Ioane 4:9, 10.

Akötresie la “ate tha cipane kö la Hupuna i nyidë, ngo hna nue nyidëti thatraqai shë asë.” Celë hi matre, xecie hnyawa koi së laka, “tro kö nyidëti a ce hamëne gufane me nyidë la nöjei ewekë asë koi shë,” tune lo hnei Nyidrëti hna qaja amë hë. (Roma 8:32) Nemene la hnei Akötresie hna troa kuca koi së? Tro sa ce wang.