Drei La Ëje i Akötresie? Öni Nyidrë: “Iehova ni, celë hi ëjeng.” (Isaia 42:8) A 7 000 lao mama la ëje i Akötresie e hnine la Tusi Hmitrötr. Ngo, nyimutre la itre xaa Tusi Hmitrötr ka xometrij la ëje i Nyidrë, me nyihnane ej hnene la itre aqane hën ka hape; “Joxu.” Aja i Akötresie tro epuni a nyisinee i Nyidrë, matre Nyidrëti a ithuecatre koi epun troa ‘hëne la ëje i Nyidrë.’—Salamo 105:1.

Itre Aqane Hë Iehova. Hetrenyi e hnine la Tusi Hmitrötr la itre aqane hë Iehova, ka hape, “Akötresie,” “Ka Tru Trene Men,” “Atre Xup,” “Kem,” “Joxu,” me “Joxu Ka Sisitria.” Nyimutre la itre thith e hnine la Tusi Hmitrötr, nge kola hëne la sipu ëje i Nyidrë memine la ketre aqane hë Nyidrë.—Daniela 9:4.

 Pengöi Akötresie. Ketre U lae Akötresie. (Ioane 4:24) Tusi Hmitrötr a anyipicine laka, “pëkö ca atr ka hane öhnyi Akötresie.” (Ioane 1:18) Ej a qaja amamane la aliene hni Nyidrë. Ijije hi tro la itre atr a akötrë Nyidrë, maine amadrinë Nyidrë.—Ite Edomë 11:20; Salamo 78:40, 41.

Itre Thiina i Akötresie. Tha ka ië hna hnime kö Akötresie. Nyidrëti a hnim la itre atr ka traqa qa ngöne la itre nöj, me itre xaa götran. (Itre Huliwa 10:34, 35) Ketre, “ate utipine me ka ihnim, ate xomi hni ahoean, nge ka tru loi me nyipici.” (Esodo 34:6, 7) Ngo, foa lao thiina i Akötresie ka sisitria.

Men. “Akötesie ka ’tein’ asë,” pëkö ifegone la mene i Nyidrë, matre ijiji Nyidrë troa eatrën la itre hnei Nyidrë hna thingehnaean.—Genese 17:1.

Inamacan. Pëkö ka atreine weje la inamacane i Akötresie. Celë hi hnei Tusi Hmitrötr hna qaja ngöne la kola hape, “ka pë sane la inamacane i Akötresie.”—Roma 16:27.

Meköt. Akötresie pala hi a kuca la meköt. Ka “pexeje” la itre huliwa i Nyidrë, me “pë engazon.”—Deuteronomi 32:4.

Ihnim. Öni Tusi Hmitrötr, “Akötresieti la ihnim.” (1 Ioane 4:8) Tha Akötresieti hmekuje kö a amamane la ihnimi Nyidrë, Nyidrëti la ihnim. Kola mama la ihnimi Nyidrë ngöne la itre huliwa i Nyidrë, me koi së mina fe.

Aqane Imelekeu Akötresie Me Itre Atr. Akötresie la Keme së e hnengödrai. (Mataio 6:9) Maine tro sa lapaune koi Nyidrë, ijije hi tro sa enehmu i Nyidrë. (Salamo 25:14) Akötresie a ithuecatre koi së troa easenyi Nyidrë jëne la thith, me ‘nu asë koi nyidrë la itre hne së hna hnehengazon, ke nyidrëti a meku së.’—1 Peteru 5:7; Iakobo 4:8.

Tha Akötresieti Kö Iesu. Pëkö ka tui Iesu, hna xupe mekötine hnei Akötresie. Celë hi matre, Tusi Hmitrötr a qeje nyidrë ka hape, nekö i Akötresie. (Ioane 1:14) Thupene la hna xupi Iesu, hnei Iehova hna nyijëne nyidrë, lo ‘ka atreine huliwa’ matre troa xup la itre atr, memine la itre xaa ewekë.—Ite Edomë 8:30, 31; Kolose 1:15, 16.

 Tha ase kö Iesu Keriso selëne ka hape, nyidrëti la Akötresie. Öni Iesu pe: “Eni hi la qeneqaja i [Akötresie], nge hnei nyidrëti hna upi ni.” (Ioane 7:29) Ame lo Iesu a ithanata kowe la ketre atre dreng, hnei nyidrëti hna qeje Iehova ka hape, “Kemeng, me Keme i nyipunieti fe” me “Akötresing, nge Akötresi nyipunieti fe.” (Ioane 20:17) Thupene la Iesu a mec, hnei Iehova hna amele nyidrëti hmaca hnengödrai eë, troa lapa ngöne la götrane maca i Akötresie me hamë hnëqa ka tru koi nyidrë.—Mataio 28:18; Itre Huliwa 2:32, 33.

Tro Iesu a Xatua Së Troa Easenyi Koi Akötresie

Hnei Iesu hna uti kowe la fen matre troa ini së la pengöne la Keme i nyidrë. Öni Iehova göi Iesu: “Hane hi la Nekönge hniminang. Drei nyëne ju!” (Mareko 9:7) Pëkö ka atrepengöi Akötresie tui Iesu. Öni nyidrë: “Pëkö atr ka atrepengöne hnyawa la Kem, ngo Neköne hi, me itre atr hna inin hnene la Nekön.”—Luka 10:22.

Hnei Iesu hna amamane la itre thiina i Akötresie. Iesu la ka nyitipune hnyawa la itre thiina ne la Keme i nyidrë, matre öni nyidrë: “Ame la atre öhnyi ni, ketre öhne fe hë angeic la Kem.” (Ioane 14:9) Hnei Iesu hna ea la itre atr koi Akötresie hnene la aqane nyitipune la ihnimi Nyidrë ngöne la aqane ithanata, me ujë. Öni nyidrë: “Eni hi la gojeny, me nyipici me mel. Pëkö atr ka atreine troa tro koi Kaka, e tha hna jëne ni.” (Ioane 14:6) Öni nyidrëti fe: “Itre nyipi hlu a nyihlue i Akötresie cememine la u me nyipici, ke Akötresieti a thele la itre atr ka tun göi troa nyihlue i nyidrë.” (Ioane 4:23) Drei la ketre madrine ka tru! Iehova a thel la itre atr ka tui epun, ka hetre aja troa atre la nyipici göi Nyidrë.