Akötresieti Kö a Dreng La Itre Thithi Së?
Hnei epuni kö hna hane hnying ka hape, “Akötresieti kö a dreng la itre thithing?” Maine öö, tha epuni casi kö. Tru la itre ka thith koi Akötresie göne la itre jol ka traqa koi angatr, ame pe, angatr palahi e hnine la itre jol. Kolo kö lai a hape, tha nyipiewekëne kö Akötresie la itre thithi së? Waea! Öni Tusi Hmitrötr, e tro sa thith thenge la aja i Akötresie, Nyidrëti a drei së. Hane hi la hna qaja hnei Tusi Hmitrötr.
ÖÖ, AKÖTRESIE A DRENG.
“Ate shamatine [dreng] la thithi fe, tro nöjei ate asëjëihë a traqa koi cilie.”—Salamo 65:2.
Ame itre xan, angatre hi a thith, göne hi matre lolo pi angatr, ngo ame koi angatr, pëkö ka dreng. Ngo tha eje kö lai la enyipiewekëne la thith. Öni Tusi Hmitrötr, “Eashenyi Iehova * koi angat’ asë angete hë nyidë, angete hë nyidë ngöne la nyipici. . . . Tro nyidëti a [dreng] la hnei angate hna teij.”—Salamo 145:18, 19.
Haawe, xecie koi së laka, Iehova Akötresie a dreng la itre thith ne la itre hlue i Nyidrë. Öni Nyidrë: “Nge tro nyipunie a hë ni, me tro mate thithi koi ni, ame hnenge hna troa dei nyipunie.”—Ieremia 29:12.
AJA I AKÖTRESIE TRO SA THITHI KOI NYIDRË.
“Thithi jë the mano kö.”—Roma 12:12.
Tusi Hmitrötr a ithuecatre koi së troa ‘catre thith’ me “qaja la nöjei pengöne thith.” Celë hi aja i Iehova.—Mataio 26:41; Efeso 6:18.
Hnauëne laka, aja i Akötresie tro sa thith koi Nyidrë? Pane mekune jë la: Ajan asë hi la itre kem tro la itre nekö i angatr a sipone ka hape, “Kaka, moië kö tro nyipëti a xatua ni?” Eje hi, atre hnyawa hi la kem la aja ne la nekönatr, memine la ka ej e kuhu hni nyën. Ngo, ame la nyidrëti a dreng la kola qaja tun hnene la nekönatr, kolo hi lai a amamane laka, ka mejiune la nekönatr koi nyidrë. Nge ka epe catre nyën kowe la keme i nyën. Ketre tune mina fe, ame la easa thith koi Iehova Akötresie, easë hi lai a amamane koi Nyidrë laka, easa mejiun koi Nyidrë, nge aja së troa easenyi Nyidrë.—Ite Edomë 15:8; Iakobo 4:8.
KA TRU EPUN KOI AKÖTRESIE.
“Nu asë pi koi nyidrë la itre hnei nyipunieti hna hnehengazon, ke nyidrëti a meku nyipunie.”—1 Peteru 5:7.
Aja i Akötresie tro sa thith, ke, Nyidrëti a hnim me meku së. Atre hnyawa hi Nyidrë la itre jol memine la itre hne së hna hnehengazon. Nge, aja i Nyidrë troa xatua së.
Tha mano kö Dravita joxu thith koi Iehova, me sipone la ixatua i Nyidrë, me qaja la aliene hni angeic. (Salamo 23:1-6) Nge tune kaa Akötresie? Akötresie a hnimi Dravita me dreng la itre thithi angeic. (Itre Huliwa 13:22) Ketre, Akötresie a dreng la itre thithi së, ke, ka tru së koi Nyidrë.
“ENI A HNIMI IEHOVA KE NYIDRËTI A DREI NI”
Celë hi trengewekë ne la ketre atre cinyihane la Salamo. Xecie hnyawa koi angeic laka, Akötresie a dreng la itre thithi angeic, nge ka hetre thangane catr koi angeic. Easenyi catre angeic koi Akötresie, nge hetre trengecatre i angeic qëmekene la itre akötr me itre treije i angeic.—Salamo 116:1-9.
E xecie koi së laka, Akötresie a dreng la itre thithi së, tha tro kö së lai a cil troa thith. Hane hi la hna melëne hnei Pedro, qa Espagne. Hna mec la nekö i nyidrë ngöne la ketre aksida, nge nyën petre hi a 19 lao macatre. Hace catr angeic, matre hnei angeic hna treij koi Iehova me anyimua thith koi Nyidrë, matre troa kapa la iakeukawanyi me ixatua i Nyidrë. Nemene hë la ewekë ka traqa? Öni Pedro, “Hnei Iehova hna sa la itre thithing, hnei Nyidrëti hna hamë ni me föeng la ixatua me iakeukawan jëne la itre trejin ne la ekalesia.”
Ame itre xa ijin, kola sa la itre thithi së jëne la itre xa trejin ka hnimi së
Ngacama patre hë la nekö i nyidrë, ngo ixatua la thith koi nyidrë me fami nyidrë. Öni María Carmen, föi nyidrë ka hape: “Hnene la thith hna axapone la treijeng. Atre hi ni ka hape, trotrohni ni hi hnei Iehova, ke, ame la eni a thith, tingeting pi hi la hning.”
Tusi Hmitrötr me itre hna melën a anyipicine koi së laka, Akötresie a dreng la itre thithi së. Ngo eje hi, tha Nyidrëti kö a sa asë la nöjei pengöne thith. Hnauëne hö la Akötresie a sa la itre xa thith, nge ame itre xan pë hë ke?
^ par. 5 Iehova la sipu ëje i Akötresie.—Salamo 83:18.
