Tro Sa Thith Tune Kaa?
Iehova Akötresie a ‘drenge la itre thithi së.’ (Salamo 65:2) Easë ju hë ngöne la ketre götran, lai ju hë maine jidr, Nyidrëti a drenge la itre thithi së, goi drenge fe Nyidrëti la itre thithi thaup. Aja i Nyidrë tro sa hë Nyidrë ka hape,“Kaka,” ke, pëkö Kem ka tui Nyidrë. (Mataio 6:9) Tru la ihnimi Nyidrëti koi së matre, Nyidrëti a ini së la aqane tro sa thith.
TROA THITH KOI IEHOVA JËNE IESU
“Maine tro nyipunieti a sipone la ketre ewekë koi Kaka, tro hë nyidrëti a hamë nyipunie ngöne la ëjeng.”—Ioane 16:23.
Iehova a amamane jëne la itre trengewekë i Iesu ka hape, methi Nyidrë tro sa nyijëne la itre thithi së hnene la itre iatre me itre idrola me itre atr ka hmitrötr, itre angela me itre atr ka mec. Ngo, tro hi sa nyijëne la itre thithi së hnei Iesu Keriso. Ame la easa thith koi Akötresie jëne Iesu, easë hi lai a metrötrëne la hnëqa i Iesu. Öni nyidrë, “Pëkö atr ka atreine troa tro koi Kaka, e tha hna jëne ni.”—Ioane 14:6.
FE PI ALIENE HNI EPUN
“Nengepi la ite hni nyipunie xajawa i nyidë.”—Salamo 62:8.
Ame la easa thith koi Iehova, nyipiewekë tro sa ithanata koi Nyidrë tune la easa ithanata kowe la keme së ka tru ihnimin. Tha tro pi kö sa e gufan la itre thith ka ej e hnine la itre itus, ngo tro pe sa fe la itre aliene hni së cememine la metrötr.
THITHI JË THENGE LA AJA I AKÖTRESIE
“E hetre ewekë hne së hna sipon thenge la aja i nyidrë, tro kö nyidrëti a drei së.”—1 Ioane 5:14.
Ame e hnine la Tusi Hmitrötr, Iehova a amamane la aja i Nyidrëti koi së, memine la nyine tro sa kuca koi Nyidrë. Tro Iehova a kapa la itre thithi së, e ka tro “thenge la aja i Nyidrë.” Matre, loi e tro sa inine hnyawane la Tusi Hmitrötr. E tro sa kuca tun, tro hë Nyidrëti a kapa la itre thithi së.
NEMENE LA NYINE TRO SA THITHI FË?
Itre Ka Nyipiewekë Koi Së. Ijiji hi tro sa thithi koi Akötresie, göne la itre ka nyipiewekë koi së, tune la xen, itre iheetre me göi uma. Ka loi e tro mina fe sa sipone koi Nyidrë la inamacan, matre tro sa axecië mekun hnyawa me hetrenyi la trengecatr troa cile kowe la itre itupath. Tro fe sa sipo Nyidrë la lapaun, me ixatua, me senge la itre ngazo së.—Luka 11:3, 4, 13; Iakobo 1:5, 17.
Koi Itre Xan. Madrine catre la kem me thine troa öhne la itre nekönatr a ihnimikeu. Aja i Iehova fe tro la itre nekö i Nyidrëti e celë fen a hane ihnimikeu. Haawe, nyipiewekë tro sa thithi sane la föe së, me ha nekö së, me fami së, me itre sinee së. Öni Iakobo, “Itö ithithi sai ju.”—Iakobo 5:16.
Troa Olen. Iehova a amamane la lolo i Nyidrëti koi së. Öni Tusi Hmitrötr: “Hnei nyidrëti hna hamëne la mani koi nyipunie, me itre ijine menuë xen matre ameji nyipunie me amadrinëne la itre hni i nyipunie.” (Itre Huliwa 14:17) Ame la easa mekune hmaca la itre huliwa i Iehova koi së, easa olene koi Nyidrë. Eje hi, loi e tro sa amamane la hni ne ole së jëne la aqane mele së.—Kolose 3:15.
CATRE JË THITH THE MANO KÖ
Pine laka, tha canga sa kö Akötresie la itre thithi së, easa ha kucakuca. Tro kö sa mekune ka hape, tha sikusiku së kö hnei Akötresie? Waea! Loi e tro pe sa catre thith. Hane hi la itre ka anyipicin.
Öni Steve, lo hna qaja ha ka hape, “Maine patre ju la ixatua ne la thith ekö, ma patre kö ni enehila.” Hnei Steve hna atre tune kaa la enyipiewekëne la thith? Hnei nyidrë hna öhne la enyipiewekëne troa catre thith hnine la Tusi Hmitrötr. Öni nyidrë, “Eni a olene catrëne koi Akötresie, madrine catre hë ni enehila.”
Nge tune kaa ha Jenny, lo ka mekune ka hape, tha tro kö Akötresie a drenge la itre thithi angeic? Öni angeic, “Aija thithi jë kö ni koi Akötresie troa amamane koi ni la kepine matre eni a wangaconyi ni.” Hnene la thith hna xatua angeice tune kaa? Öni angeic, “Hnene la thith hna xatua ni troa xome la aqane waiewekë i Akötresie, ngacama nyi zö ni ju hë hnene la hning, ngo tha celë kö aqane goeë ni hnei Akötresie. Hnene fe la thith hna xatua ni troa catr.” Nemene hë la thangane koi angeic? “Eni ha goeë Iehova ceitu me Akötresing, me Kemeng, me nyipi Sineeng ka tru ihnimin. Tha luelue kö ni laka, e tro ni a kuca la aja i Nyidrë, tro kö Nyidrëti a ce me ni.”
Öni Isabel, “Hnei Iehova hna sa la thithing jëne nyën. Ngacama ka sine wezipo, ka madrine palahi nyën.”
Hane fe la hna melëne hnei Isabel. Ame lo angeic a upune, önine la droketre ka hape, ka wezipo la nekö i angeic. Akötre catre angeic. Öni itre xan, ka loi tro angeic a thi upune. “Eni ha meci hnei xou.” Nemene la hnei angeic hna kuca? Öni angeic, “Tha mano kö ni sipo ixatua koi Akötresie.” Hnahone pi angeic la ketre nekönatr trahmany, ame la ëje i nyën ke, Gerard. Tha thoi ju kö, ka sine wezipo la nekönatr. Hna sa kö la itre thithi Isabel? Öö! Hna tune kaa? Öni Isabel, “14 hë lao macatre ne la neköng. Ame la eni goeëne la aqane madrine nyën, ngacama ka sine wezipo, xecie hnyawa koi ni laka, hnei Iehova hna sa la thithing jëne nyën. Ketre manathithi hi la hnenge hna kapa qaathei Iehova.”
Itre hna melëne lai ka anyipicine lo hna qaja ne la ketre atre cinyihane la Salamo hna hape, “Iehova fe, hnei cilieti hna [dreng] la aja i ange ka ipië ; tro cilieti a acile hutine la hni angat ; tro cilieti a qatixenyën.” (Salamo 10:17) Tha celë kö la ka upi së troa catre thith?
Nyimutre la itre thithi Iesu ka ej e hnine la Tusi Hmitrötr, nge hne së hna atre hnyawa, ene lo hnei Iesu hna inine kowe la itretre drei nyidrë. Nemene la ini koi së?
