“Ame la nyipunie a thith, the qaja lapane kö la itre trengewekë ka cas.”—Mataio 6:7.

Tha aja i Iehova kö tro sa e gufan la itre thith, me xom la itre thith hna hnëkëne hë. Nyidrëti a pi dreng la itre thith ka qa kuhu hni. Pane mekune jë la ewekë celë: E nöjei drai, casi pala pe hi la hna qaja hnene la sinee i epun, tro hë epuni lai a hmanono hna drei angeic. Ame la aja së, ke, tro la sinee së a fe la aliene hni angeic. Ame la easa thith kowe la Keme së e hnengödrai, loi e tro sa fe la aliene hni së.

“E sipone hë nyipunie, ketre tha kapa kö, ke kola sipone fë la aja ka ngazo. —Iakobo 4:3.

Atre hi easë laka, hetre thiina hnei Akötresie hna xele ma wang. E tro sa thithi koi Nyidrë, nge hetre thiina së ka ngazo, tha tro kö Nyidrëti lai a sa la thithi së. Hane hi la ketre ceitun. Xele Akötresie ma wang, la itre ka meciun, me ka mejiune koi chance. Hapeu, tro kö Akötresie a kapa la thithi ne la atr ka elo mani? (Isaia 65:11; Luka 12:15) Atre hi së lai ka hape, tha tro kö Nyidrëti a kapa la thithi ne la atre cili! Maine aja së tro Akötresie a sa la itre thithi së, loi e tro sa sipone thenge la aja i Nyidrë ka ej e hnine la Tusi Hmitrötr.

 “Ame la ka xele ma dreng la wathebo, tha tro kö a dreng la thithi angeic.”—Ite Edomë 28:9, MN.

Ame ekö, tha Akötresieti kö a dreng la thithi ne la itre ka xele ma dreng la wathebo. (Isaia 1:15, 16) Nge tha saze kö Iehova. (Malaki 3:6) E aja së tro Akötresieti a kapa la itre thithi së, loi e tro sa drengethenge Nyidrë. E ka hape, hne së hna kuca la ewekë ka ngazo ekö, hapeu, tro kö Akötresie a drenge la itre thithi së? Öö! E hne së hna ietra, me thel troa amadrinë Nyidrë. E cili, tro Nyidrëti a nuetrij la itre ngazo së.—Itre Huliwa 3:19.