Ame koi María, Raúl, me Arne, me itre xan, ketre manathith ka tru la tro sa thithi koi Akötresie. Xecie koi angatr ka hape, jëne la thith, ijije hi tro angatr a ithanata koi Akötresie, olene me thele ixatua thei Nyidrë. Tha luelue kö angatr la hna qaja hnei Tusi Hmitrötr göne la thith, hna hape: “Hane hi la mejiune së koi nyidrë, laka, e hetre ewekë hne së hna sipon thenge la aja i nyidrë, tro kö nyidrëti a drei së.”—1 Ioane 5:14.

Ngo alanyimu catr la itre atr ka tha mejiune kö kowe la hna qaja hnei Tusi Hmitrötr göne la thith. Öni Steve: “Ame lo kola 17 lao macatreng, köni sineeng ka mec. Ca ka mec hna hna hnei loto, nge lue xan ka nunucil ngöne la hnagejë.” Nemene la hna kuca hnei Steve?  “Hnenge hna thith koi Akötresie matre qaja koi ni la kepine la kola traqa la ewekë cili, ngo tha sa pi kö la thithing. Matre öninge jë hi, ‘Nyine ue la tro sa thith?’ ” Haawe, e tro sa mekun ka hape, pëkö ka troa sa la itre thithi së, öni itre xane jë hi: “Nga nyine ue hö la tro sa thith?”

Hetre itre xa kepin ka acilëne la itre atr troa thith. Öni itre xan: “Pine laka, atre hnyawa hi Akötresie la itre aja së, me itre jol ka traqa koi së, nyine ue hö la troa qaja koi Nyidrë?”

Öni itre xane fe: “Tha tro kö Akötresie a sa la thithing, hnene la itre ngazong ekö.” Öni Jenny: “Ame la ka jol koi ni, ke hnenge hna mekun ka hape, ka pë hnënyöngön lë ni. Tru la itre ngazo hnenge hna kuca, matre tro Akötresie a drei ni fë nemen.”

Nge nemene fe la mekuna i epun göne la thith? Maine hnei epuni fe hna hane mekune tun göne la thith, tro kö la Tusi Hmitrötr a akeukawane la hni epun, me sa la itre hnyinge i epun. Tusi Hmitrötre hi la ka troa sa la itre hnying göne la thith. * Ijije hi tro la Tusi Hmitrötr a sa la itre hnyinge i easë tune la hna hape:

• Akötresieti kö a dreng la itre thithi së?

• Hnauëne laka, tha sa kö Akötresie la itre xa thithi së?

• Nemene la aqane tro sa thith matre tro Akötresie a dreng la itre thithi së?

• Tro la thith a xatua epun tune kaa?