Canga tro hi sa kucakuca e traqa jë la mec kowe la ketre sinee së. Ngo loi e tro sa ce me angeic me xatua angeic troa cile kowe la meci cili. Tune kaa?

“Nyipiewekë troa saqe dreng.”—IAKOBO 1:19.

Ame la ketre aqane troa xatuane lai sinee i epun, ke ene la troa drenge hnyawa la angeic a ithanata. The nyipiewekëne asë kö la itre hna fe koi epun. Drenge ju hi, nge amamane jë la utipine i epun koi angeic. The dreng akötrëne kö la itre hna qaja koi epun, nge tha tro kö a iameköti. Ame itre xaa ijin, ke tro angeice lai a ithanata menu me mekune pë hë e thupen ka hape, tha ka loi kö la aqane ujë i angeic.—Iobu 6:2, 3.

Troa “hamëne la itre trenge ithanata ka keukawa.”—1 THESALONIKA 5:14.

Ma kolo jë hnehengazo la sinee i epun, maine pena, angeic a wangaconyi angeic. Ngacama thatre kö epun la nyine troa qaja, ngo loi e tro epuni a akeukawanyi angeic me ithuecatre koi angeic.

“Ketre sinee a ihnim ngöne la nöjei ijin asë.”—ITE EDOMË 17:17, MN.

Thele jë la aqane troa xatua angeic. Hnyingë angeice jë la nyine tro epuni a kuca. Maine jole kowe lai sinee i epun troa qaja la nyine  kuca, ke ce kuca jë me angeic la itre jole i angeic. Tune la troa ce ngenu, maine troa ce komisio me angeic, maine ce nyidrawa hnalapa pena me itre xaa jole ju kö.—Galatia 6:2.

“Xomihnine” ju.—1 THESALONIKA 5:14.

Ame itre xaa ijin, ke tha pi ithanata kö la sinee i epun. Akeukawanyi angeice jë me hape, e angeic a pi porotrik, ke tro epuni a drei angeic. Hnene la meci angeic matre tro angeic lai a ithanata akökötreny. Tro fe angeice lai a wesitrameny me tha metrötrëne lo hnei epone hna isapui. Loi e tro epuni e cili a xomihni angeic me xatua angeic.—Ite Edomë 18:24.

“Eni a amamane koi angeic ka hape, nyipi sinee hi ni. Ngacama thatreine kö ni nyinyine la meci angeic, ngo eni palahi a isine troa drei angeic. Ame hi la aja i angeic e itre xaa ijin, ke tro hi ni a drei angeic.”—Farrah, a ketre sinee ne la ketre ka meci fë troubles alimentaires me dépressif.

“Ka lolo catre la thiina ne la ketre sineeng nge ka madrine palahi. Hnei angeic hna hë ni troa ce xeni me angeic e koilo hnalapa i angeic. Drenge ju hi ni la keukawa me ihnim matre ase petre hi ithuecatre koi ni!”—Ha-eun, ka meci fë dépression.

“Ka nyipiewekë catr la xomihni. E kolo mina akötrë ni hnene la föeng, ke atre hi ni laka, hnene la dépression, nge tha hnei angeice kö hna thë troa ujë tune koi ni. Celë hi matre tha hnenge kö hna canga elëhni, ngo eni pe a isine troa trotrohni angeic.”—Jacob, föe i angeic la ka dépressif.

“Tru la ixatua ne la föeng. Ame mina la eni a hnehengazo, tha hnei angeice kö hna upi ni troa kuca la ketre ewekë nge tha ajange kö. Ame itre xaa ijin, ke pi tro catre angeic a kuca la ketre ewekë, ngo pine laka, tha ajange kö matre tha kuca ju kö angeic. Ka ketri ni catr la ixatua me ihnimi angeic.”—Enrico, ka meci fë troubles anxieux.