Ngacama ame la Tusi Hmitrötr, ke tha itusi kö qaathei itre droketre, ngo ej pe a xatuane la itre atr hna tith hnene la itre mec hna hape, trouble de la santé mentale. Hane hi la itre xaa ixatua.

“Tha nyipiewekë kö la droketre kowe la itre ka egöcatr, ngo koi itre wezipo.”—MATAIO 9:12.

Tusi Hmitrötr a ithuecatre koi së troa wai droketre. Alanyim la itre ka öhnyi ixatua thene la itre droketre, ke hna qejepengöne koi angatr la meci angatr.

“Hetre eloine la troa jumijumi itrei.”—1 TIMOTEO 4:8.

Ame la easa xomi ijine troa majemine kuca la itre ewekë ka troa aegöcatrene la ngönetrei së, ke tro lai a xatua së ngöne la meci së. Ame la itre hna majemine cili, ke kola qaja la troa jumijumi itrei, me xen me meköle hnyawa.

“Ame la hni ka madin, te, kola ameune hnyawa ; ngo ame la hni ka hleuhleu, te, kola aqaqacilene la ite jun.”—ITE EDOMË 17:22.

Ame la easa e la itre xötr ne la Tusi Hmitrötr me mekun la itre ewekë nyine tro sa eatrën, ke tro lai a xatua së troa madrin. Maine tro sa goeëne hi la itre ewekë ka loi ne la mel me  mejiun laka, troa tro loi la mel elany, ke tro lai a xatua së ngöne la meci së.

“Thei angete ipië la inamacan.”—ITE EDOMË 11:2.

Maine öhne hi easë laka, tha ijiji së kö troa kuca casine la itre ewekë hne së hna ajan, ke loi e tro sa kapa la ixatua itre xan. Itre sinee me fami së a ajane troa xatua së, ngo ma thatre kö angatr la nyine troa kuca. Haawe, loi e tro sa qaja koi angatr la hne së hna ajan matre tro angatr a kuca. Loi e tro fe sa atre laka, hetre ifego i angatre hi, ngo tro pe sa olene la ixatua qaathei angatr.

“Qange hna wai droketre, ke drenge hi ni laka, tha loi kö ni. Hnene lai droketre hna öhne la mecing. Celë hi ka xatua ni troa atrepengöne la mecing, me kapa la itre drösinöe.”—Nicole, a ka meci fë troubles bipolaires.

“Eni a öhne laka, ame la eni me föeng a e lapane la Tusi Hmitrötr, ke kola xatua ni troa nyiqane la drai memine la itre mekun ka loi nge ka ithuecatr. Maine tha loi kö ni, ke hetre xötr hnenge hna e ka xatua ni.”—Peter, ka meci fë dépression.

“Hmahma catre ni troa qaja la mecing koi itre xan. Ngo, hnene la ketre sineeng hna drei ni hnyawa me thele troa trotrohni ni. Hnene laka ce angeic palahi me ni, matre hetre ixatua koi ni ke, tha eni casi hmaca kö.”—Ji-yoo, ka meci fë trouble alimentaire.

“Hnei Tusi Hmitrötr hna xatua ni troa atreine waiewekë göi huliwa me mano hnyawa. Eje fe a xatua ni troa cile kowe la itre mekun ka ngazo ka traqa koi ni.”—Timothy, ka meci fë troubles obsessionnels compulsifs.