Ame la epuni a e la itre hna melëne hnene la itre atre cili ka isi memine la ketre mec ka ajolëne la mekune i angatr, ke tha celë kö lai ka traqa koi epun, maine kowe la ketre sinee i epuni pena?

Maine eje hi, ke tha epuni casi kö. Ame enehila, alanyim catre la itre atr hna ketr hnene la meci cili. Nge maine tha angatre kö la hna ketr, ke ketre sinee i angatre pena.

Easa melëne la “itre ijin akötr hna thatreine xomihnin” matre tru la nöjei pengöne jol ka axouenyi së. (2 Timoteo 3:1) Önine la itre ka ithel, ame ngöne la fene hnengödrai, thene la ala 8 ke, cas la hna ketr hnene la meci cili. Ame lo 2020 ngöne lo ijine COVID-19, hna elë koi 26% lao atr hna ketr hnene la meci hna hape, troubles anxieux, nge hna elë koi 28% la itre ka dépressifs.

Nyipici, ka nyipiewekë troa atre la etrune la itre atr hna ketr hnene la meci cili. Ngo ame la ka nyipiewekë catr, ke ene la ka ej e kuhu hni epun me itre sinee i epun, memine la aqane melëne epun la meci cili e nöjei drai.

Kolo lai a hape, ka lolo me tingetinge la mele së. Nge atreine hi së elëhune la itre ejolene la mel, me öhnyi thangane ka loi qa ngöne la huliwa së, me madrine ngöne la mele së.

• KE THA thangane kö la ketre thiina së ka ngazo.

• KE ketre mec ka axulune la xou the së, nge ka ajolëne la aqane waiewekë së. Ketre, thatreine kö së xomehnöthe la itre aliene hni me aqane ujë së.

• Kola ajolëne la aqane imelekeu së me itre xan, nge thatreine hë së cile kowe la itre ejolene la mel.

• Kola ketr la nöjei pengöne atr, ngacama isa qenenöj, hane ngönetrei, hmi, aqane hetrun maine aqane mele së kö.

Hetre ka saze kö thei epun maine thene la ketre sinee i epun? Hapeu, tha meköle hnyawa ha epun, tha pi xeni hë epun, nge qea la hnei epuni hna kucakuca, me xou, me latresi? Tro epuni a öhnyi ixatua ekaa? Maine celë hi lai ka traqa koi epun, maine kowe la ketre sinee i epun, ke loi e tro epuni a wai droketre matre troa atre la qaane me thele nyin.

Öni Iesu Keriso, lo atr ka inamacan ka qa celë fen ka hape: “Tha nyipiewekë kö la droketre kowe la itre ka egöcatr, ngo koi itre wezipo.” (Mataio 9:12) Ame la aqane troa nyinyine la itre sine mec, ke ene la troa xome la itre drösinöe ka ijije troa aloine la mecine la atr. Nge maine kolo pala hi a catrehnine catr la mec, ke the cile kö troa thele xaa nyin. a

Ngacama tha itusi kö qaathei itre droketre la Tusi Hmitrötr, ngo ijije hi tro ej a xatuan la itre hna ketr hnene la itre mec ka ajolëne la mekun. Tro la itre tane mekun e thupen, a amamane la ixatua hna hamën hnei Tusi Hmitrötr kowe la itre atr hna ketr hnene la itre meci cili.