KA QA NGÖNE ICETRÖN | HAPEUE LA THIINA KA LOI ENEHILA?

Itre Ethanyine La Troa Huliwa Thoi

AMELEN

“Ijije pala hi troa senge la jol e troa nango huliwa thoi.” —Samantha, qaa Afrique du Sud.

Hapeu, mekuna i epuni fe hi lai? Tui Samantha hne së fe hë hna hane qëmeke kowe la itre jol. Tro la aqane ujë së ngöne la ijine cili, a qajaqaja la pengö së. Kola hape, e ka tru kö koi së la aqane goeë së hnei atr, canga tro hi së lai a huliwa thoi. Ngo ame hë la kola mama e thupen, ke, kola xeni pun la aqane huliwa cili. Hanawange la itre xa ethanyin.

KOLA APATRENE LA MEJIUN

Hna nyitrepene la aqane imelekeu ne la lue treme sineen hnene la mejiun. Nge maine ka catre la trepene cili, tro hë la lue treme sineen a mele tingeting. Ngo ame pe, tha ka xulu xane kö la mejiun. Nyipiewekë tro nyidro a pane imajemikeu, me ifekeune hnyawa la aliene hni i nyidro, me ikucakeune la loi. Ngo eje hi laka, ijije hi troa thë la aqane imelekeu i nyidro, hnene la hna huliwa thoi hnei ketre. Nge ame hë e cili, huliwa ka tru catr la troa xupe hmaca la aqane imelekeu i nyidro.

Hapeu, hna hane fe traqa tune lai koi epun? Maine eje hi, nemene la mekuna i epun? Maine jë, tro epuni a akötr me hleuhleu. Trotrohnine hi së lai. Ame la huliwa thoi ke, ka thë la ecatren la aqane imelekeu ne la lue treme sineen.

KA IXÖTREKEU

Hnene la ketre trahmanyi ka inamacan, Robert Innes la ëjen, hna qaja ka hape, “ka ceitu la aqane ujë ka thoi memine la ketre sine mec ka ixötrekeu.” Haawe, maine tro sa majemine ce tro lapa memine la itre atr ka huliwa thoi, tro fe hë së a hane xome la thiina cili.

Nemene la aqane tro sa neëne matre tha tro kö sa hane huliwa thoi? Tusi Hmitrötre hi la ka troa xatua së. Tro sa ce wange la itre xa trepene meköti ka troa xatua së.

Itre Aqane Huliwa Thoi

Thoi

NEMENE LA ALIENE LA THOI? Kola qaja la itre ewekë ka tha nyipici kö hnei ketre koi ketre. Kolo fe a qaja la kola juetrë ithuemacanyi ka tru, maine ngöne la kola amenune la ketre atr, maine pena, ngöne la tru menu pala ha la aqane qaja la itre ewekë ka traqa ha.

NEMENE LA HNA QAJA HNEI TUSI HMITRÖTR? “Ke sisi Iehova ene la ate thina ka qali, ngo nyidëti a isilixelë me ite ka meköt.” (Ite Edomë 3:32) Nge, “tijepi la thoi nyipunie, nge isa qeje nyipici kowe la ate eashenyi nyipunie.”—Efeso 4:25.

Ixöjetrij

NEMENE LA ALIENE LA IXÖJETRIJ? Kola sili trengathoi hui ketre matre troa adrone la ëje i angeic.

NEMENE LA HNA QAJA HNEI TUSI HMITRÖTR? “Ame la ate ka qali, te, kola aciane la iwatratra ; nge ame la ate ixöjetije, te, kola aiananyine la itete me sinen.” (Ite Edomë 16:28) Nge “e pë sinöe, pi hë la eë ; kete tune e pëkö ate ixöjetije, pë hë iwesitë.”— Ite Edomë 26:20.

Qene Atrekënö

NEMENE LA ALIENE LA TROA QENE ATREKËNÖ? Kola thoi kowe la ketre atr, matre uku angeic troa hamë mani atrun, maine nue la ketre mo i angeic pena.

NEMENE LA HNA QAJA HNEI TUSI HMITRÖTR? “The tro kö eö a qana angazone la hlue ate xomi thupen, ka aköte me pë ewekë.” (Deuteronomi 24:14, 15) Nge “ame la ate axösisine la ka pë ewekë, te, kola qaja angazone la ate xupi angeic ; ngo ame la ate hnime la ka pë ewekë, te, kola atrunyi nyidë.”—Ite Edomë 14:31.

Atrekënö

NEMENE LA ALIENE LA ATREKËNÖ? Kola xome la ketre ewekë ngo tha ewekë i angeic pe.

NEMENE LA HNA QAJA HNEI TUSI HMITRÖTR? “Ame la ate kë ’nö, the ënö hmaca kö ; ngo loi pe tro angeic’ a huliwa, kola kuca hnei lue ime la ewekë ka loi, mate hetenyi angeice la nyine hamëne kowe la ka pë ewekë.” (Efeso 4:28) Nge “the amenu nyipunieti kö. . . [ame la] ite ate kë ’nö, me angete meciun, me angete hmo hnei ka hait, me ite cateqë, me angete thepe mo, tha tro kö angate a hane sine la baselaia i Akötesie.”—1 Korinito 6:9, 10.

ITA NE THUP