HAPEU, IJIJE KÖ TRO SA IËNE LA MELE SË ELANY? Hetre itre atr ka mekun laka, tha qanyi angatre kö troa iëne la mele i angatr elany ke, ase hë amekötin. Ame la angatr a trian la ketre ewekë ngöne la mele i angatr, kösë tha nyipiewekë kö. Öni angatr, “Aqane kö, hna amekötine hë lai!”

Ame pena itre xan, kucakuca catr angatr la angatr a öhne laka, pëkö ka atreine saze la fen ka ngazo enehila. Maine jë, hnei angatre hna tupath troa saze la mele i angatr. Ngazo pe, hnene la itre ewekë ka akötr tune la isi, me iakötrë, me hulö, maine meci pena, matre paatre pi hi la itre hnei angatre hna mekun. Öni angatre jë hi, ‘Tha ka nyipiewekë kö.’

Nyipici laka, thenge la itre ewekë ka traqa, ijije hi troa saze la itre mekuna së kowe la mel elany. (Ate cainöj 9:11) Ngo, nyipiewekë tro sa axecië mekune hnyawa göne la mel ka tha ase palua kö elany. Tusi Hmitrötr a amamane laka, isa qanyi së kö iëne la mele së elany. Hane hi la hna qaja.

Qëmekene troa lö hnine la Nöje Hna Thingehnaean, hnei Iehova hna upi Mose, lo atre elemekene la nöje Isaraela ekö, troa qaja kowe la nöj ka hape: “Ase hë ni amë qëmeke i ’ö la mele me mec, nge manathithi me hnëjin, ngöne hi lai iënejë la mele mate mele eö memine la ite matra i ’ö; mate tro eö a hni Iehova Akötesi ’ö, me denge thenge la aqane ula i nyidë, me fede koi nyidë.”​—Deuteronomi 30:15, 19, 20.

“Ase hë ni amë qëmeke i ’ö la mele me mec, nge manathithi me hnëjin, ngöne hi lai iënejë la mel.”​—Deuteronomi 30:19

Eje hi! Hnei Akötresieti hna thapa la angetre Isaraela hna thahluën e Aigupito, nge hnei Nyidrëti hna amamane koi angatr laka, ijije hi troa mele madrin ngöne la Nöje Hna Thingehnaean. Ngo hetre ewekë nyine tro angatr a kuca. Maine angatr a ajane troa kapa la itre manathithi cili, nyipiewekë tro angatr a ‘iëne la mel.’ Tune kaa? ‘Tro angatr a hni Iehova, me drengethenge Nyidrë, me fedre koi Nyidrë.’

Ame enehila, hetre ketre ewekë nyine tro fe sa isa iën, nge ka troa hetre thangane kowe la mele së elany. Maine easa iëne troa hnimi Akötresie, me drengethenge Nyidrë, me fedre koi Nyidrë, easë hi lai a iëne la mel ka tha ase palua kö ngöne la Paradraiso e celë fen. Ngo nemene la nyine tro sa kuca?

Ame la ihnim, tre, celë hi thiina ka sisitria i Akötresie. Jëne la uati hmitrötr, hnei Ioane hna cinyihan ka hape, “Akötesieti la ihnim.” (1 Ioane 4:8) Celë hi matre, öni Iesu e qaja la wathebo ka sisitria: “Tro eö a aja Joxu Akötesi ’ö hnene la hni ’ö ka pexej, me u i ’ö ka pexej, me mekune i ’ö ka pexej.” (Mataio 22:37) Eje hi, ihnim la ka upi së troa nyihlue i Iehova Akötresie, ngo tha hnene kö laka hnëqa së maine hnei xoue pena. Ngo, pine nemene matre loi e tro sa iëne troa hnimi Akötresie?

Ceitune hi la aqane hnime Iehova la itre atr, memine la aqane hnimi kuku hnei kem me thin. Nyipici laka, tha ka pexeje kö la kem me thin. Ngo hnene la ihnim, matre nyidroti a inin me ithuecatr, me sajuën me hajine la itre nekö i nyidro. Aja i nyidro tro nyudren a madrin me mele ka loi. Pine nemene matre nyidroti a ujë tune lai? Nyidroti a ajane tro la itre nekönatr a hnimi nyidro me trongëne la itre ini qaathei nyidro, matre kepe thangane qa ngön.  Hapeu, tha celë kö lai aja ne la Keme së e koho hnengödrai, ene la tro sa amamane la ihnim me hni ne ole së kowe la nöjei ewekë hnei Nyidrëti hna kuca koi së?

Maine easa ajane troa drengethenge Akötresie, nyipiewekë tro sa pane atre la itre hnei Nyidrëti hna qaja. Ngacama thatreine kö tro sa drenge mekötine la nine i Akötresie, ngo easa drei Nyidrë ngöne la easa e me trongëne la hna qaja e hnine la Wesi Ula i Nyidrë, ene la Tusi Hmitrötr.—1 Ioane 5:3.

Hnei Iesu hna amamane la enyipiewekëne la troa drei Akötresie. Öni nyidrëti e ketre ijin: “Tha tro kö a mele la ate hnei areto hmekuje hi, ngo hnene la nöjei tenge ewekë asë ka xulu qa ngöne la ine ula i Akötesie.” (Mataio 4:4) Tune la xen ka nyipiewekë kowe la mele së, ketre tune fe, nyipiewekë troa atre Akötresie. Pine nemen? Öni Solomona Joxu: “Nyine titaxapo la inamacan, nge nyine titaxapo la mani; nge ame la tropane la wangate hmekune la inamacane, te, kola amelene la ite ka hetenyi ej.” (Ate cainöj 7:12) Haawe, wangatrehmekun me inamacane qaathei Akötresie la ka thupë së enehila, me xatua së troa xölehuje la mel ka tha ase palua kö elany.

Pane mekune hmaca jë lo ceitun hna hamën hnei Iesu ngöne lo tane mekun hnapan. Öni nyidrë: “Ilite la qanahag, me co hi la gojenyi ne tro kowe la mel; nge ala xalaithe hi angete öhne lai.” (Mataio 7:13, 14) Maine easa ajane troa xötrëne la ketre gojenyi ka tune lai, nyipiewekë troa hetre ketre atr ka troa amamai gojenyi koi së, matre tro sa traqa kowe la pun, ene la mel ka tha ase palua kö. Haawe, nyipiewekë tro sa easenyi catr koi Akötresie. (Salamo 16:8) Ngo, troa tune kaa?

Pine laka, tru catre palaha hnei huliwa së ngöne la drai, matre pëhë traeme së troa meku Akötresie. Celë hi matre, Tusi Hmitrötr a hmekë së me hape: “Wange hnyawa kö la aqane tronge i nyipunie, the tune kö la ite hmo, ngo tune ju la ite ka inamacan, kola anyipi ewekëne la nöjei ijin, ke ngazo la nöjei drai.” (Efeso 5:15, 16) Easa lapa easenyi Akötresie ngöne la easa amë panëne la aqane imelekeu së me Nyidrë ngöne la mele së.—Mataio 6:33.

Ngacama thatreine kö së saze la mele së ekö, ngo ijije hi tro sa kuca matre troa lolo la mele së me itre sinee së elany. Tusi Hmitrötr a amamane laka, ka tru së koi Iehova Akötresie, lo Keme së e koho hnengödrai. Celë hi matre, Nyidrëti a qaja la aja i Nyidrëti koi së. Hane hi la hna qaja hnei Mika perofeta:

“Ase hë nyidëti amamane koi ’ö, ate, la ka loi; nge nemene la ewekë Iehova a ajane thei ’ö? ue kö troa kuca la meköt, me hnine la ihnim, me ce trotro me Akötesi ’ö memine la hni ka ipië.”​—Mika 6:8.

Aja i epuni kö troa kapa la ihë Iehova troa ce tro me Nyidrë, me kapa la itre manathith ka epine palua, hna hnëkëne kowe la itre ka idrengethenge? Isa qanyi epuni kö!