Ame ngöne la tane mekun hnapan, hne së hna ce wange la ka traqa koi Crésus, lo kola iaö angeic hnene la atre kuci haze e Delphi. Hna apatrene la nöje i angeic hnene la joxu ne Peresi. Ngo, hnei Tusi Hmitrötre fe hna hane perofetan göne lai joxu ne Peresi, nge nyimutre la itre ithuemacanyi hna hamën ka eatre hnyawa.

Ame ngöne la 200 lao macatre qëmekene troa hnahone la joxu, hnei Isaia perofeta hna qaja la ëje i Koreso. Ketre, hnei angeice mina fe hna qejepengöne la aqane tro Koreso a thapa la nöj ka catr e Babulona.

Isaia 44:24, 27, 28: “Dei la hna ulatine hnei Iehova, . . . ate qaja kowe la ga jui, Eaju; nge tro ni a aqaqacilene la ite hneopegejë i ’ö; ate qaja göi Koreso, ka hape, Ate thupë mamoeng, tro angeic’ a kuca asë la ajang; nge ate qaja koi Ierusalema, Troa xupi ’ö, me qaja kowe la ēnē, Troa ami tepenyi ’ö.”

Hnei Hérodote, ketre atre Heleni ka inamacan hna qaja ka hape, hnene la itre sooce i Koreso hna kuj me ajeane lo tim ka kanothe la traon e Babulona, ene la hneopegejë ne Euferata. Ame hë la kola qaqacile la tim, itre sooce i Koreso a lö hnine la traon. Thupene la hna thapa la traon, hnei Koreso hna nue hmaca la angetre Iuda ka po e Babulona, me aijijë angatr troa bëek a tro Ierusalema, matre xupe hmaca la traon hna apatren ekö laka, 70 hë lao macatre.

Isaia 45:1: “Dei la hna ulatine hnei Iehova kowe la ate hna siëne hnei nyidë, ene Koreso, ini a xölehuje la ime maca i angeic, mate xom’ acone la ite nöje qëmeke i angeic, me shenge la ite otene gö ne la ite joxu; troa fe qëmeke i angeice la lue thingen, nge tha tro kö a thinge la ite qanahag.”

Hnene la angetre Peresi hna lö hnine la traon, jëne la lue qanahag ka catr ke, hna fe angangane lue ej. Maine canga atre ju la angetre Babulona laka, tro Koreso a traqa, tro hë angatre lai a canga thing la nöjei qëhnelö asë ka qëmek kowe lo hneopegejë. Ngo tune lo hna thingehnaean, pëkö ka thupëne la traon.

Nyimutre catre kö e hnine la Tusi Hmitrötr la itre xa hna perofetan, nge ka eatre hnyawa. a Tha ka ceitu kö la itre hna thingehnaean hnei atr, memine la itre hna perofetan hnei Akötresie. Tusi Hmitrötr a qeje Akötresie, ka hape: “Ate amamane la pune  qa ngöne la qan; nge kola qaja ekö la ite ewekë ka tha hna kuca pete kö.”—Isaia 46:10.

Iehova hmekuje hi la ka ijije troa perofetan la itre ewekë ke, Nyidrëti la Nyipi Akötresie. Ame la aliene la ëje i Nyidrë, tre, “Ka Aejëne Nyidrë.” Kolo lai a amamane laka, atre kö Iehova la itre ewekë ka troa traqa elany, nge ijije hi tro Nyidrëti a kuca matre troa aejëne la aja i Nyidrë. Haawe, xecie hnyawa ha koi së laka, tro palahi a eatr la nöjei ewekë hnei Nyidrëti hna thingehnaean.

Hapeu, aja së kö troa atre la itre hna perofetan göne la hneijine së? Traqa ha koi 2 000 lao macatre ne perofetan hnei Tusi Hmitrötr ka hape, troa traqa “la nöjei ijine ka aköte ngöne la ite drai hnapin.” Itre drai hnapin göi nemen? Tha kolo kö a qaja la ihnadro maine itre atr pena. Ngo kolo pe a qaja la ijine kola troa paatre la itre isi me iakötrë me akötr, ene lo itre ewekë ka akötrëne la mele ne la itre atr qane ekö. Tro sa pane ce wang la itre xa hna perofetan ka nyihatrene la “ite drai hnapin.”

2 Timoteo 3:1-5: “Ngöne la ite drai hnapin, . . .  tro nöjei ate a hnimi angate kö, me meciu mani, me selën, me nyi tru, me pi tru, me tha dei keme me thin, me tha ole kö, me tha metöte kö, angete tha hnimi sinen, me tha ihnimi kö, me itete ixöjetij, me ka tha’teine xomehnöth, me ka cate mek, me itete tha ajane kö la loi, itete wanaxoe, me huliwa wathöthöl, me ka kekë, me itete ajane la nyine amadine ngo tha ajane kö koi Akötesie; angete kösë thina ka ijiji Akötesie, ngo xelene pe la menen’ ej.”

Hapeu, tha celë kö aqane ujë ne la itre atr enehila? Öhne fe hi epuni la itre atr ka lapa xötreithi së, kola meciu mani me pi mama? Nge tune kaa la itre ka thatreine xomehnöth la elëhni nge ka tha meku itre xan? Ketre, easa öhne enehila la aqane tha idrei ne la itre nekönatr, memine la aqane ajane la itre atr la itre nyine iamadrinë, nge tha aja Akötresieti pe. Eje hi, tro palakö a kökötre trootro la ngazo.

Mataio 24:6, 7: “Nge tro hë nyipunieti a denge la ite ishi, me ite uqanyi ne ishi. . . . Tro ha cile la kete nöje kowe la kete nöj, me kete baselaia kowe la kete baselaia.”

Hna qaja ka hape, qane lo macatre 1914, ase hë sasaithe la 100 milio lao atr ka mec ngöne la itre isi. Celë hi etrune la itre atr ka mele ngöne la itre xa nöj. Pane mekune jë la itre trenge timidra, me akötr me hleuhleu. Hapeu, hnene kö la itre nöje ka isi, hna xomi ini qa ngöne la itre ngazo i angatr, me apatrene la itre isi?

Mataio 24:7: “Tro ha jin.”

Kola qaja hnene la Programme alimentaire mondial, ka hape: “Ngacama ijije hi troa thuane la nöjei atr asë, ngo hetrenyi palahi la 815 milio lao atr ka meköl, nge pëkö aliene la hni. Tru catre mina fe hnei atr ka tha xeni hnyawa kö.” Ketre, ame e nöjei macatre, kola elë koi 3 milio la etrune la itre nekönatr ka meci hnei mecijin.

Luka 21:11: “Tro ha hete ite sha atraqate ngöne la ite hlapa.”

Ame e nöjei macatre, kola traqa koi 50 000 lao sa, ngo hna e hi la 100 la ka akeine la itre uma. Ketre, hetrenyi palahi la ca sa ka tru ngöne la macatre. Qane lo macatre 1975 koi 2000, hna e lao 471 000 la etrune la itre atr ka mec ngöne la itre sa ka tru.

Mataio 24:14: “Tro ha cainöjëne la maca ka loi celë ne la baselaia e cailo fene nyine anyipicine kowe la nöjei nöj; ame hna traqapi la pun.”

Kola elë koi 8 milio nge hetre munëne la etrune la itre Temoë i Iehova, ka cainöjëne la maca ka loi ne la Baselaia i Akötresie ngöne la 240 lao nöj. Angatr a tro fë la maca ka loi ngöne la itre traon, me itre tribu gaa nany, me e hnine la itre hnaxulu, me hune la itre wetr. Tusi Hmitrötr a perofetan ka hape, troa traqa la ijine tro Akötresieti a axeciën laka, pexeje hnyawa ha la huliwa cili, nge “ame hna traqapi la pun.” Kola hapeue lai? Kola qaja la ijine troa apatrene la musi ne la itre atr, me ijine troa acile la musi ne la Baselaia i Akötresie. Nemene la itre hna thingehnaeane ka troa eatr fene la Baselaia i Akötresie? Kola troa sa la hnying celë ngöne la tane mekune thupen.