DREI LA KETRE EWEKË NYINE HAIN! Hnene la Atre Xupi së hna thingehnaeane troa hamë së la mel ka tha ase palua kö e celë fen. Ngo, jole catr koi itre xan troa mejiune kowe lai. Öni angatr, ‘Tro asë hi sa mec e ketre ijin. Pengöne kö la mele së lai.’ Ame pena koi itre xan, ijije hi tro sa mel epine palua ngo tha e celë kö fen. Ame koi angatr, tro sa mel epine palua, thupene la easa mec me elë hnengödrai eë. Nemene fe la mekuna i epun?

Qëmekene troa sa la hnying, pane goeëne jë la aqane sa hnei Tusi Hmitrötr la köni hnying celë: Hapeu, hna xupe kö la itre atr troa mel epine palua? Nemene lo aja i Akötresieti ekö kowe la ihnadro me kowe la itre atr? Pine nemene matre kola meci la itre atr?

Ame la nöjei ewekë asë hnei Akötresie hna xup e celë fen, pëkö ka ceitu memine la atr. Pine nemen? Tusi Hmitrötr a qaja ka hape, itre atr hmekuje hi la hna xup “hnaiji” Akötresie me “tui” Nyidrë. (Genese 1:26, 27) Kola hapeue lai? Hna xupe la itre atr cememine la atreine troa nyitipune la itre thiina i Akötresie, tune la ihnim me meköt.

Ketre, hna xupe la itre atr cememine la atreine mekun me inamacan, me atreine wangatrehmekune la loi me ngazo. Celë hi matre, ijiji së hi troa haine la edraiën me emingömingöne la itre hna xup ngöne la fene hnengödrai asë, tune la itre desë, me miuzik, me poésie. Ngo ame la ka sisitria, tre, hna xupe la itre atr cememine la atreine troa hetre imelekeu memine la Atre Xup. Haawe, kola amamane hnyawa hnene la itre ewekë cili laka, isapengöne catr la itre atr memine la itre xa ewekë hna xup e celë fen.

Pane mekune jë: Maine tha aja i Akötresieti ju tro sa mel aqeany, hapeu, tro kö Nyidrëti a xupi së cememine la itre thiina ka lolo nyine troa melën? Ame la sipu kepine matre xupe jë Akötresieti la atr cememine la itre thiina cili, tre, matre troa mele madrin e celë fen uti hë epine palua.

Ame pe koi itre xan, tha aja i Akötresieti kö tro la itre atr a mel epine palua e celë fen. Angatr a mekun ka hape, tha ka cile huti kö la ihnadro. Hna xupe hi matre troa tupath la itre atr, me atre la itre ka troa elë e koho hnengödrai troa ce mel epine palua me Akötresie. Ngo maine nyipici la mekun celë, hapeu, tha kolo kö lai a upezö Akötresie la kepine matre kola haöthe la fen hnene la ngazo? Tha ka ihmeku kö lai memine la nyipi pengöi Akötresie. Tusi Hmitrötr  a qeje Nyidrë me hape: “Meköti asë la ite jë i nyidë; Akötesie ka nyipici, nge pë engazon, nge meköti me uthautha nyidë.”—Deuteronomi 32:4.

Tusi Hmitrötr a amamane hnyawa la aja i Akötresieti kowe la ihnadro, me hape: “Ame la ite hnengödrai, te, ite hnengödrai Iehova; ngo hnei nyidëti hna hamëne la fene hnengödrai kowe la ite nekö i at.” (Salamo 115:16) Eje hi, hnei Akötresieti hna xupe la ihnadro matre ketre götrane ka mingöming, me hnalapa ka cile hut thatraqane la nöjei atr asë. Hnei Nyidrëti hna hamëne koi së la mel ka epine palua, me nöjei ewekë nyine amadrinë së.—Genese 2:8, 9.

“Ame la ite hnengödrai, te, ite hnengödrai Iehova; ngo hnei nyidëti hna hamëne la fene hnengödrai kowe la ite nekö i at.”​—Salamo 115:16

Tusi Hmitrötre fe a amamane la aja i Akötresie kowe la nöjei atr. Hnei Nyidrëti hna upe lo lue pane atr troa ‘atiqane la fene hnengödrai, me xom’ acon’ ej; me musinëne la . . . itre öni ka sesë e caha nyipin, me itre öni asë ka wewë e celë fen.’ (Genese 1:28) Drei la ketre hnëqa ka tru koi nyidro, ene la troa nyihnyawane la ihnadro me aparadraisone la fen asë! Eje hi, hna xupi Adamu me Eva ekö, matre tro nyidro me itre matra i nyidro a mel epine palua e celë fen, ngo tha e koho kö hnengödrai.

Ngo, hnauëne la easa mec? Tusi Hmitrötr a amamane laka, hnene la ketre angela i Akötresie, hna thele troa ajolëne la aja i Akötresie e Edena. Hna hë angeic e thupen ka hape, Satana Diabolo. Tune kaa la aqane kuca i angeic?

Hnei Satana hna uku Adamu me Eva, lo lue pane keme me thine së, troa icilekeu me Akötresie. Hnei Satana hna upezö Akötresieti ka hape, Nyidrëti a cipane la ketre ewekë ka lolo koi Adamu me Eva, ene la atreine troa ketre sipu wangatrehmekune la loi me ngazo. E cili, hnei nyidroti hna drei Satana troa icilekeu me Akötresie. Nemene la thangane lai? Tune lo hna qaja hnei Akötresie, meci pi hi nyidro. Tha ijiji nyidroti hmaca kö troa mel epine palua ngöne la Paradraiso e celë fen.—Genese 2:17; 3:1-6; 5:5.

Ka hetre thangane la icilekeu i Adamu me Eva kowe la nöjei atr asë. Wesi Ula i Akötresieti a qaja ka hape: “Traqa ha la ngazo kowe la fene hnengödrai hnene la ate ka cas [Adamu], nge meci fe pine la ngazo; tune lai hna traqa la meci kowe la nöjei ate asë.” (Roma 5:12) Easa mec ke, hna xötre koi së la ngazo me mec qaathene lo lue pane kem me thine së. Ngo tha qa ngöne kö la ketre ‘hna amekötine’ hë hnei Akötresie.

Tha hnene kö la icilekeu e Edena hna apatrene lo aja i Akötresieti kowe la itre atr me ihnadro. Hnene la ihnim me meköti Akötresieti hna aijijë Nyidrë troa thepe së qa ngöne la ngazo me mec. Öni Paulo aposetolo: “Ame la thupene la ngazo, te, mec; ngo ame la ahnahna i Akötesie, te, mele ka tha ase palua kö göi Iesu Keriso Joxu shë.” (Roma 6:23) Hnene la ihnim, matre hnei Akötresieti hna “hamëne la Nekö i nyidëti ka cas [Iesu Keriso], mate tha tro kö a meci la kete e angete lapaune koi nyidë, ngo tro ha hetenyi la mele ka tha ase palua kö.” (Ioane 3:16) Ame la Iesu a huujëne la mele i nyidrë nyine thupene mel, nyidrëti hi lai a nyihnane la mel hna aluzin hnei Adamu. a

Easenyi hë matre eatre pi la hna thingehnaean hnei Akötresie göne la Paradraiso e celë fen. Ijiji epuni fe hi troa hane öhne la kola troa eatr la hna thingehnaean celë. Nyipiewekë tro epuni a drengethenge la hna qaja hnei Iesu, ka hape: “Löjë kowe la qanahage ka ilit; ke atraqate la qanahag, me ishaisha la gojenyi ne tro kowe la hnëjin; nge ala nyimu angete löth; Ngo ilite la qanahag, me co hi la gojenyi ne tro kowe la mel; nge ala xalaithe hi angete öhne lai.” (Mataio 7:13, 14) Eje hi, isa qanyi së kö iëne la mele së elany. Nemene la hnei epuni hna troa kuca?