Hanawang la hna melëne hnei Sally, * ka mel e Etazini. Hna paatre la itre ewekë i angeic ngöne lo kola traqa la ketre wene ka tru. Öni angeic: “Thatreine hë ni xomihni.”

Nge, tune kaa e meci pena ha la ketre atr hne së hna hnim? Öni Janice ka mel e Australie ka hape: “Tru la akötreng la kola mec la lue neköng. Kösë ethitre hë la meleng, nge eni pë hë a thel troa eköthe ej hmaca. Hnenge hna xëwe koi Akötresie ka hape: ‘Akötresieti fe, tru pala ha la akötreng! Nue ni pi, eni a pi mec!’ ”

Nge tune kaa e hna nyixetë triji së? Daniel la ketre ka hane melëne la akötre cili. Öni angeic: “Ame la föeng a qaja ka hape, hnei eahlo hna tria, kösë hna thine la wenethëhming hnei hele. Nge, itre treu ne akötre ni.

Tro la Ita Ne Thup celë a amamane ka hape, hetre eloine la troa xomihnine la akötr, ngacama kola

• Lepi së hnei hulö

• Mec la atr hne së hna hnim

• Nyixetë triji së

• Tithi së hnei mec ka pë nyin

• Hace la mele së

Haawe, tune kaa e kola lepi së hnei hulö?