HAPEU, hnei epuni kö hna hane mekun troa hnöjua? Nga trotrohni Adriana hi hnei epun. Hna tithi angeic hnene la ketre mec, nge tru catr la xou, me hleuhleu thei angeic. Ka meci fë mekun (dépressive) Adriana.

Hanawang la hna melën hnei Kaoru qaa Zapo. Angeic a thupëne la keme me thine i angeic ka qatre hë. Öni angeic, “Ame ngöne la ijine cili, tru catr la itre jol ka traqa koi ni ngöne la hna huliwa. Tha pi xeni hë ni, nge jol koi ni troa meköl. Eni ha mekun ka hape, loi e tro ni a mec matre mano pi ni.”

Öni Ojebode qaa Nigeria, “Hace catre la hning, matre eni pala hi a treij, uti hë la eni a nyiqaane thel la aqane tro ni a hnöjua.” Eloine pe, tha hnei Ojebode kö, me Kaoru, me Adriana hna thupatëne la mele i angatr. Ngo, e nöjei macatre, itre hadredr lao atr ka hnöjua.

Alanyimu la itre trahmanyi ka hnöjua, ke, angatr a hmahma troa sipo ixatua. Öni Iesu, ame la atr ka wezipo, loi e tro angeic a wai droketre. (Luka 5:31) Maine epuni a hleuhleu, nge epuni ha mekun troa hnöjua, the hmahma kö troa sipo ixatua! Alanyimu la itre ka meci fë mekun (dépression) hna aloine hnene la itre drösinöe qaathei droketre. Hnei Ojebode, Kaoru, me Adriana hna wai droketre, matre ame enehila, lolo hë la mele i angatr.

Itre droketre a nyinyine la itre ka meci fë mekun (dépression) jëne drösinöe me jëne thérapie (Tro la atr ka wezipo a qaja kowe la droketre la aliene hni angeic, nge tro la droketre a xatua angeic troa amekötine la mekun me aqane ujë i angeic). Ketre, nyipiewekë kowe la itre ka meci fë mekun (dépression) troa trotrohni angatr hnene la fami me enehmu i angatr. Troa atreine xomihni, me thupë angatre hnyawa. Ame la enehmu së ka sisitria, tre, Iehova. Nyidrëti la ka hamë së la ixatua ka tru jëne la Tusi Hmitrötr.

Ame kowe la itre ka meci fë mekun (dépression), tre, troa qea la ijine inyië. Ketre, loi e tro angatr a saze la aqane mele i angatr. Ngo, maine hna tithi epun hnene la mec cili, ijije hi tro epuni a trengeneune la ketre mele ka loi elany, tui Ojebode. Öni angeic, “Eni a lapa treqene la ijine troa eatr la hna perofetane ngöne Isaia 33:24. Kola qaja la ijine laka, tha tro hmaca kö ketre e easë a qaja ka hape ‘Ini a mec.’ ” Ijije hi tro sa tui Ojebode, ene la troa xomi trengecatr qa ngöne la itre hna thingehnaeane hnei Akötresie. Troa hetre “fene ka hnyipixe,” nge tha tro hmaca kö a “akötr” la itre atr. (Hna Amaman 21:1, 4) Kola qaja hnene la hna perofetane celë laka, tha tro hmaca kö la itre atr a hetre sine mec, ene mina fe la itre mec ka ej ngöne la mekun me hni. Troa patre palua la itre akötre ne la hni. Tha tro hmaca kö sa mekun la itre akötr ‘hnapan, nge tha tro hmaca kö itre ej a fetra e kuhu hni së.’—Isaia 65:17.