MAINE hna mec la ketre atr hne së hna hnim, hne së fe hna akötr, me pë trengecatr, nge kösë pëkö ka trotrohni së. Ketre, hne së hna elëhni, me upe zö së kö, me xou. E cili, easa hnyingëne thel ka hape, ‘Nyine ue la tro na mel?’

Tha tro kö sa hmahmane la akötr ka ej the së. Celë hi hatrene ka amamane la etrune la ihnimi së kowe la atr ka mec. Nemene la ka troa xatua së troa cile kowe la akötr?

Maine ame koi së, ke, qeadridri pala ha la ijine easa akötr, tupathe jë cahu itre mekun ka troa akeukawane la hni së:

NUE IJINE JË

Isapengöne kö la aqane akötre ne la itre atr. Ame itre xan, ka canga paatre la akötr, nge ame pena itre xan, loi e troa pane nue ijin. Ame itre xaa ijin, loi e troa treij, matre troa xomihnine la akötr. Öni Vanessa, hna qaja ha e caha, ka hape: “Loi e tro ni a treij, matre troa mama la akötreng.” Hna mec la trejine me Sofía. Öni angeic: “Tru catre la akötreng la eni a mekun hmaca la itre ewekë ka traqa ekö. Kösë lo eni hmaca ha a melëne itre ej. Ngacama akötre catre koi ni, ngo ame pe, hetre thangane ka loi.”

LOI E TRO SA FE LA HNI SË

Maine jë, tro sa thel troa lapa caas. Ame la easa thue caasine la akötre së, ke, kösë ketre ehnefe lai ka  tru catr. Hna mec la keme i Jared, nge 17 lao macatre i angeic. Öni angeic: “Hnenge pala hi hna fe la aliene hning koi itre xan. Thatre kö ni ka hape, trotrohnine jë kö angatr, ngo tru la madrineng troa ce ithanatan. Hnei Janice, lo ketre föe hna qaja ha ngöne lo pane tane mekun, hna amexeje la ketre thangan, e tro sa fe la aliene hni së. Öni angeic: “Ame la eni a ithanata me itre xan, kola akeukawane la hning. Drenge hi ni laka, angatr a trotrohni ni, nge tha eni kö a thue caasine la akötreng.”

KAPA JU LA IXATUA

Önine la ketre droketre: “Maine tro la itre ka meci sineen a kapa la ixatua hna hamëne hnene la itre enehmu, me fami angatr, troa hmaloi koi angatr troa xomihnine la akötr utihë la troa paatre trootro.” Qaja jë kowe la itre enehmu së la nyine tro angatr a kuca matre troa xatua së; angatr a ajane troa hamë ixatua, ngo thatre kö angatr la aqane troa kuca.—Ite Edomë 17:17.

EASENYI JË KOI AKÖTRESIE

Öni Tina: “Ame la kola mec la föeng hnei kaser, tre, pëhë sine porotrikeng, matre eni a qaja asë koi Akötresie! Ame ngöne la nöjei drai, eni a sipo Nyidrë troa xatua ni. Ketrepengöne kö la aqane xatua ni hnei Nyidrë, thatreine kö ni troa qaja asë.” Hna mec la thine i Tarsha ngöne la kola 22 lao macatre i angeic. Öni angeic: “Ame la eni a e Tusi Hmitrötr o drai, tre, kola akeukawane la hning. Kola hamë mekune ka lolo nyine tro ni a lapa mekun.”

LAPA MEKUNE JË LA IJINE MELEHMACA

Öni Tina: “Ame ngöne la qaan, tha hna akeukawanyi ni kö hnene la mejiune kowe la melehmaca, ke, eni a pi canga iöhnyi memine la föeng, ketre tune fe la köni nekö i nyio. Ngo, ame enehila, footre hë lao macatre thupen, ka mel e kuhu hning la mejiune cili. Ceitune hi la melehmaca memine la ketre ewekë ka manij, nge ka troa xatuane la atr ka nunucil. Kola xatua ni troa wangatrune la mele elany, me xomihnine la akötr. Eni a mekun la ijine tro nyio a iöhnyi hmaca, nge kola tingeting, me madrin la hning!”

Maine jë, tha tro kö lai a canga akeukawane la hni së. Ngo, hanawang la hna melën hnei Vanessa. Öni angeic, “Tro epuni a mekun ka hape, tha tro hmaca kö epuni a loi, ngo ame la kola tro la itre drai, tro hë epuni a loi trootro.”

Eje hi laka, thatreine kö tro sa thëthëhmine la atr ka mec, ngo hetre eloin e tro sa xomihnine la akötr. Jëne la ixatua i Akötresie, tro hmaca së a ce mele madrine memine la itre enehmu së. Nge, easenyi hë tro Akötresieti a amelene hmaca la itre atr ka mec. Nyidrëti a ajan tro sa imadri hmaca memine la atr hne së hna hnim. Nge, paatre palua ha la akötr!