• Hna Iëne Hnei Akötresie. “Ngo hnenge hna acile la joxunge . . . tro ni a hamë [eö la itre nöj] nyine thatraqai ’ö me ite cane la fene nyine zi ’ö.”—Salamo 2:6, 8.

• Matra i Dravita Joxu. “Ke hna hnahone thatraqai shë la nekönat, hna hamë shë la nekö trahmany, . . . Tha tro kö a nyi pune [la etrune] la musi me tingetinge i nyidë, hune la therone i Davita, me hune la baselaia i nyidë, troa acaten’ eje me sajuën’ eje.”—Isaia 9:6, 7.

• Hna Hnahon e Bethelema. “Nge eö, Betheleema . . . troa xulu thatraqai ni qa thei ’ö la ate musi . . . tro nyidëti a atraqat’ enehila uti hë la cane la fene hnengödrai.”—Mika 5:2, 4.

• Hna Xele Ma Wang Hnei Itre Atr, Me Humuth. “Hna methinë nyidë me thipe tije hnei at, . . . Nge eatë hë nyidë pine la ite hna shashaithe hne shë ; pujepi hë nyidë pine la thina ka ngazo shë.”—Isaia 53:3, 5.

• Hna Amelene Hmaca Me Atrun. “Ke tha tro kö cilieti a nue tije la ung’ e hedis ; kete tha tro kö cilieti a nue tije la [hlue] i cilie troa öhne la hnyeqet. . . . Nge ngöne la [ime] maca i cilie la ite nyine amadin’ epine palua.”—Salamo 16:10, 11.

Thene la nöjei atr, casi hi la ka ijij troa xom la hnëqa cili, ene Iesu Keriso. Hnene la ketre angela hna qaja koi Maria, thine i Iesu ka hape: “Tro Iehova Akötresie a hamë nyëne la therone i Dravita, keme i nyën. . . . nge tro ha pë pun la Baselaia i nyën.”—Luka 1:31-33.

Ame lo Iesu e celë fen, tha hnei nyidrëti kö hna hane mus. Tro nyidrëti a musinëne la itre atr qa hnengödrai, la nyidrëti a cilëne la Baselaia i Akötresie. Hnauëne laka, nyidrëti la ka ijij troa joxu? Tro sa ce wang la itre huliwa hnei nyidrëti hna kuca e celë fen.

•   Hnei nyidrë hna xatuane la itre atr. Hnei Iesu hna xatuane la itre trahmany, itre föe, itre nekönatr, itre qatr, ngacama isa zi angatre kö, me aqane mel. (Mataio 9:36; Mareko 10:16) Hnene la ketre atr ka si lepera hna sipo iele nyidrë ka hape: “Maine ajane nyipë, atreine hi nyipë aloinyi ni.” Hnei Iesu hna utipi angeic, me amele angeic.—Mareko 1:40-42.

• Hnei nyidrëti hna inine la aqane troa amadrinë Akötresie. Öni Iesu: “Thatreine kö nyipunie troa ce nyihlue i Akötresie me Mani.” Hnei nyidrëti fe hna upi së troa kuca koi itre xan la hne së hna ajan troa kuca koi së. Kolo Wathebo Ka Sisitria! Hnei nyidrëti hna amamane laka, tha Akötresieti hi a goeëne la hne së hna kuca, ngo ka tru fe koi Nyidrë la aliene hni së, me itre mekuna së. Haawe, maine aja së troa amadrinë Nyidrë, loi e tro sa xomehnöth la itre aja së. (Mataio 5:28; 6:24; 7:12) Nge, tro sa öhne la nyipi madrin, e tro sa inine la aqane troa ujë thenge la aja i Akötresie, me trongën.—Luka 11:28.

• Hnei nyidrëti hna amamane la aqane troa ihnim. Hna ketr la hni ne la itre atr hnene la aqane ithanata, me ujë i Iesu. “Hnene la nöjei atr ka ala nyimu hna haine atraqatr la aqane hamë ini i nyidrë. Ke nyidrëti a ini angatr kösë atre trene musi qaathei Akötresie.” (Mataio 7:28, 29) Öni nyidrë: “The mano kö hnime la itre ithupëjia me nyipunie.” Hnei nyidrëti fe hna thithi sane la itre ka humuthi nyidrë, me hape: “Kaka, nue pi la ngazo i nyudren, ke thatre kö nyudreni la hnei nyudreni hna kuca.”—Mataio 5:44; Luka 23:34.

Iesu la ka ijij troa mus, ke, ka ihnim me thina ka loi nyidrë. Eue la ijine tro nyidrëti a mus?