Easenyi hë troa ketri së hnene la ketre “wene ka catr,” hna hën hnei Iesu ka hape, “akötr atraqatr.” (Mataio 24:21) Pëkö jëne kötr ka ijij. Ngo, ijiji hi troa thupë së qa ngön. Tro sa tune ka?

Öni Iesu ngöne la Cainöj Hune La Wetr, “Thele panëne jë la Baselaia memine la thiina ka meköt i nyidrë, nge troa hamë nyipunie la nöjei ewekë asë cili.” (Mataio 6:33) Tro sa trongën tune ka la eamo celë?

Thele panëne jë la Baselaia i Akötresie. Nyipiewekë troa tro pa la Baselaia i Akötresie ngöne la mele së. (Mataio 6:25, 32, 33) Pine nemene matre tro sa ujë tun? Thatreine kö la itre atr troa nyinyine la itre jol ne la atr. Baselaia i Akötresie hmekuje hi la ka ijij.

Thele jë la thiina ka meköt i Akötresie. Tro sa trongëne la itre wathebo me itre trepene meköt i Akötresie. Hnauën? Ke, e tro sa ketre sipu iën la loi me ngazo, troa ngazo la pun koi së. (Ite Edomë 16:25) Ngo, e tro sa mele thenge la itre hna amekötin hnei Akötresie, tro hë së lai a amadrinë Nyidrë, me kepe thangan ka loi.—Isaia 48:17, 18.

Thele panëne jë la Baselaia memine la thiina ka meköt i Akötresie. Öni Iesu, tro la itre xan a wangacone la Baselaia i Akötresie, ke, angatr a nyinyiape thele mani matre troa mele ka loi. Tro pena itre xan a nue la itre ejolene  la mel troa xome la traeme i angatr, matre pëhë ijine troa “thele” la Baselaia i Akötresie.—Mataio 6:19-21, 25-32.

Ngo, öni Iesu, ame la itre ka sajuëne la Baselaia i Akötresie enehila, tro angatr a hetrenyi la ka ijij troa mel, me kapa la itre manathith ka tru elany.—Mataio 6:33.

Ngacama hnene la itretre drei Iesu ekö hna thele panëne la Baselaia memine la thina ka meköt, ngo tha patre kö la itre jol ne la atr. Ngo, hna thupë angatr. Hna tune ka?

Hnei angatr hna trongëne la itre hna amekötin hnei Akötresie, matre tha hna ketri angatre kö hnene la itre jol ka traqa kowe la itre ka xele ma drei Nyidrë. Ketre, ka xecie koi angatr laka, troa traqa la Baselaia, nge celë hi ka xatua angatr troa xomihnine la itre jol ka tru. Nge, Akötresie a hamë angatr “la men atraqatr” matre troa cile kowe la itre jole cili.—2 Korinito 4:7-9.

Hnene la itre pane keresiano hna trongëne la hnei Iesu hna amekötin: hnei angatr hna thele panëne la Baselaia. Hnei angatr hna cainöjëne la maca ka loi ne la Baselaia ngöne la nöjei götran hnei angatr hna mele ngön. (Kolose 1:23) Hetre atre kö ka kuca tun enehila?

Öö! Trotrohnine hi la Itretre Anyipici Iehova laka, easenyi hë tro la Baselaia i Akötresie a apatrene la fene celë. Hane hi la kepin matre angatr a isin troa eatrëne la huliwa hna ahnith hnei Iesu. Öni nyidrë: “Nge tro ha cainöjëne la maca ka loi ne la Baselaia e cailo fen nyine anyipicine kowe la nöjei nöj; ame hna traqa pi la pun.”—Mataio 24:14.

Tro kö epuni a dreng la maca ka loi cili? Eahuni a thuecatre koi epun troa xötrethenge la tulu ne la angetre Berea ekö, ketre traon e Makedonia. Ame lo Paulo a tro fë koi angatr la maca ka loi ne la Baselaia, hnei angatr hna “canga kapa madrine.” Nge, “o drai, angatr a sine thel” la trengewekë i Akötresie matre troa jelenyipicine la hnei angatr hna dreng. Ame hnei angatr hna trongëne la itre hnei angatr hna inin.—Itre Huliwa 17:11, 12

Ijije hi tro epuni a tui angatr. Maine tro epuni a thele panëne la Baselaia i Akötresie, memine la thiina ka meköti Nyidrë, tro hë epuni a öhnyi hnë zae, nge troa tingeting la mele i epun elany.