Calemi hë tro Akötresieti a musi qa hnengödrai. E cili, troa tingeting me lolo la mele ne la itre atr e celë fen, nge tro angatr a ihnimikeu me ce huliwa madrin. Ketre, hnei Akötresieti hna acili Iesu Keriso troa joxu hune la ihnadro. Tha ceitu i Iesu kö memine la itre ka musi enehila. Nyidrëti a wangatrune la aja ne la itre atr. Nge hna nyitrepene la musi nyidrë hnene la ihnim. Ketre joxu ka menyik, me utipin, me meköti nyidrë.—Isaia 11:4.

Ame ngöne la fene ka hnyipixe, tha tro kö a aisane la itre atr hnene la isa nöje i angatr me qene hlapa. Tro pe angatr a caas. (Hna Amaman 7:9, 10) Eje hi, tro la itre atr a hnimi Akötresie me itre xan. Tune lo aja i Akötresie, tro hë angatr a mele tingeting me ce huliwa troa nyihnyawane la ihnadro.—Salamo 115:16.

Fene la Baselaia i Akötresie, tro la Atre Xup a musinëne la nöjei ewekë e celë fen, tune la itre hnedrai. (Salamo 24:1, 2) Ame lo Iesu e celë fen, hnei nyidrëti hna amamane la trengecatre i nyidrë qaathei Akötresie. Hnei nyidrëti hna lep athaupune la eny. (Mareko 4:39, 41) Fene la musi Keriso, tha tro kö sa xouene la itre hulö. Tro ha tingeting la mele ne la itre atr me itre öni.—Hosea 2:18.

Tha tro hmaca kö sa wezipo, me qatre trootro, me mec. Ngo tro hë sa egöcatr. (Isaia 35:5, 6) Tro ha porop me lolo la ihnadro tune lo gatran e Edrena. Ketre, tha tro hmaca kö a mecijine la itre atr. Tro ha mana la xen ke, lolo la ihnadro. (Genese 2:9) Eje hi, tune la angetre Isaraela ekö, tro hë sa “xeni mej” ngöne la Paradraiso.—Levitiko 26:4, 5.

Fene la musi Akötresie, tro la itre atr a mele tingeting me caas me ihnim. Pë hmaca kö isi me iwajahuj, nge tha tro hmaca kö sa hnehengazo menu göne la mele së. Öni Tusi Hmitrötr: “Tro angat’ a isa lapa fene la ite vine i angate me fene la ite hmejienge i angat; nge pëkö ate troa aqounyi angat.”—Mika 4:3, 4.

Tro la itre atr a isa hetre uma, nge pëkö ka troa upi angatr qa cili. Ketre, tro palahi angatr a huliwa madrin. Öni Tusi Hmitrötr, tha tro kö angatr “a huliwa gufa.”—Isaia 65:21-23.

Öni Tusi Hmitrötr: “Troa tiqa la fene hnengödrai hnene la ate hmekunyi Iehova.” (Isaia 11:9) Tro la nöjei atr a kepe ini qaathei Iehova, Atre Xupi së. Nge tro angatr a xomi ini qa ngöne la nöjei ewekë hna xup. Tha tro kö angatr a huliwane la inamacane i angatr, matre troa kuca la itre jiane isi me akötrëne la itre xan. (Isaia 2:4) Ngo tro pe angatr a inine troa mele tingeting me itre xan, me thupëne la ihnadro.—Salamo 37:11.

Hnei Akötresieti hna hnëkëne la ihnadro matre tro sa mele madrin o drai. Nge aja i Nyidrëti lo tro sa mele palua. (Salamo 37:29; Isaia 45:18) Celë hi matre, tro Akötresieti “a cengöne apatene la mec.” (Isaia 25:8) Ketre, öni Tusi Hmitrötr: “Pë hmaca kö mec, me hleuhleu, me treij, me akötr.” (Hna Amaman 21:4) Eje hi, tro Akötresieti a hamëne la mel ka pë pun kowe la nöjei atr, itre hna thapa qa ngöne la fene ka ngazo, me itre hna troa amelene hmaca elany.—Ioane 5:28, 29; Itre Huliwa 24:15.

 Itre milio la itre atr enehila ka hnëkë troa mel ngöne la fene ka hnyipixe. Ngacama itre atr ka ngazo angatr, ngo angatr a thele troa kuca la aja i Akötresie. Tune kaa? Angatr a thele troa atrepengöi Iehova Akötresie me Iesu Keriso.—Ioane 17:3.

Hapeu, aja i epuni kö troa atre la nyine troa kuca, matre troa mele pe qa ngöne la fene celë, me hane mel ngöne la fene ka hnyipixe? Maine eje hi, sipone jë kowe la ketre Temoë Iehova troa ini tusi me epun jëne la itus Gojenyi Kowe La Nyipi Mel!