ITRE ATR

Öni Tusi Hmitrötr: “Tha [hnei Akötresie] hna xupe gufan’ [la ihnadro]; hnei nyidëti hna xup’ eje mate lapan.”—ISAIA 45:18.

IHNADRO

Öni Tusi Hmitrötr: “Kola pate la kete xöt, nge kete xöte pena a xulu; ngo ame la fene hnengödrai, te, cile huti pala kö.”—ATE CAINÖJ 1:4.

ENYIPIEWEKËN: Öni Tusi Hmitrötr, tha tro kö a paatre la ihnadro, ngo tro palahi a lapan ej hnene la itre atr. Nga nemene la aliene la kola hape, “troa nyipune la fene celë”?

ITHUEMACANY: Tusi Hmitrötr a aceitunëne la pune la fene celë memine la ka traqa ngöne lo hneijine i Noa. Ame ngöne la ijine cili, hna ‘tiqa la fene hnei iangazo.’ (Genese 6:13) Ngo ketre atr ka meköti Noa. Celë hi matre, hnei Akötresie hna amele Noa me fami nyidrë, me apatrene la itre atr ka ngazo hnene la Iwë Atraqatr. Öni Tusi Hmitrötr: “Hna apatrene lo fene hnapan . . . hnei tim.” (2 Peteru 3:6) Haawe, tha ihnadro kö la hna apatren, ngo itre atr pe. Ame la Tusi Hmitrötr a qaja la pune la fen, tha eje kö a qaja la kola apatrene la ihnadro. Eje pe a qaja la kola apatrene la itre atr ka ngazo me itre mus qa ngöne la fene celë.

ITRE JOL ME IANGAZO

Öni Tusi Hmitrötr: “Ke panacas, ame hna patepi la ate ka ngazo; nge tro eö a wange hnyawa la hne i nyën, ngo patë hë nyën. Nge tro la ange ka menyike a hetenyi la nöj, nge tro angat’ a madine la tingetinge atraqat.”—SALAMO 37:10, 11.

ENYIPIEWEKËN: Ame ngöne lo hneijine i Noa, tha hnene kö la Iwë Atraqatr hna apatrene palua la ngazo. Ame e thupen, hna xulu hmaca la itre atr ka ngazo nge ka iakötrë. Ngo önine la atre cinyihane la Salamo, calemi hë la ijine tro Akötresieti a apatrene “la ate ka ngazo.” Jëne la Baselaia i Nyidrë e hnengödrai, tro Akötresie a musinëne la itre atr cememine la meköt.

ITHUEMACANY: Hapeu, tro kö la itre musi atr a kapa la Baselaia i Akötresie? Öni Tusi Hmitrötr, waea. Tro pe angatr a icilekeu memine la Baselaia. (Salamo 2:2) Nemene la thangane lai? Tro la Baselaia i Akötresie a nyihnane la nöjei musi atr, nge “tro ej’ a cile hut’ epine palua.” (Daniela 2:44) Ngo pine nemene matre kola troa paatre la nöjei musi atr?

Öni Tusi Hmitrötr: “Tha qâ i ate troa amekötine la ite hna feke ca hnei angeic.”—IEREMIA 10:23.

ENYIPIEWEKËN: Tha hna xupe kö la itre atr matre tro angatr a sipu musinë angatre kö. Nge thatreine kö angatr troa musinë itre xan me nyinyine la itre jol.

ITHUEMACANY: Kola qaja ngöne la ketre sit Ëternet ka hape, thatreine kö la itre musi atr “troa nyinyine la itre jol e cailo fen, tune la jin, pë ewekë, itre sine mec, itre hulö, itre isi me itre xaa aqane iakötrë.” Eje fe a qaja la mekuna itre xan ka hape, “loi e troa acile la ketre baselaia ka troa musinëne la fene hnengödrai asë me nyinyine la itre jol cili.” Ngacama troa acasine la nöjei musi atr, ngo itre atr ka ngazo palahi la ka mus, nge thatreine kö angatr nyinyine la itre jol. Celë hi matre, Baselaia i Akötresieti hmekuje hi la ka ijije troa nyinyine la nöjei jol me akötr e cailo fen.

Haawe, tune la hna qaja hnei Tusi Hmitrötr, tha tro kö la itre atr ka loi a luelu göne la pune la fene celë ka ngazo. Loi e tro pe angatr a lapa treqene lai ke, tro ha nyihnane la fene celë ka ngazo hnene la fene ka hnyipixe hna musinën hnei Akötresie!

Eu la ijine troa eatre lai? Ame ngöne la ketre tane mekun, tro sa ce wang la hna qaja hnei Tusi Hmitrötr göne lai.