“Haawe, hmeke jë nyipunie, ke thatre kö nyipunieti la drai me hawa.”—MATAIO 25:13.

“Haawe, goe jë nge hmeke ju, ke thatre kö nyipunieti la ijine hna sa.”—MAREKO 13:33.

Thatre kö së la ijine troa traqa la pune la fene celë. Ngo Tusi Hmitrötr a qaja ka hape, ase hë Akötresieti sa la ijin, ene la “drai me hawa” ne nyipune la fene ka ngazo. (Mataio 24:36) Hapeu, hetre ewekë kö ka nyihatrene la drai cili? Eje hi. Öni Iesu kowe la itretre drei nyidrë ka hape, hetrenyi la itre ewekë ka troa traqa me amamane laka, calemi hë la pune la fene celë.

Hane hi la itre ewekë ka nyihatrene “la pune la fene celë.” Öni Iesu: “Tro ha isi la ketre nöj me ketre nöj, me ketre baselaia me ketre baselaia, nge troa hetre jiin me itre sa ngöne ketre götran me ketre götran.” (Mataio 24:3, 7) Ketre, öni nyidrë ka hape, troa hetre “itre meci ka ixötrekeu.” (Luka 21:11) Hapeu, kolo kö lai a eatr enehila?

Ame enehila, kola isi me jiin ngöne la itre xaa nöj, nge hetre sa me itre mec ka ixötrekeu. Ame lo 2004, hna traqa la ketre sa atraqatr e hnine la Océan Indien, ame hna traqa la gejë madra ka humuthe la 225 000 lao atr. Ketre, ame ngöne la köni macatre, hnene la mec COVID-19 hna humuth la 6,9 milio lao atr e cailo fen. Öni Iesu ka hape, celë hi ka nyihatrene la pune la fene celë ka ngazo.

Tusi Hmitrötr a hëne la ijine qëmekene troa nyipune la fen ka hape, “itre drai ne la pun.” (2 Peteru 3:3, 4) Kola qaja ngöne 2 Timoteo 3:1-5 ka hape, ame ngöne la itre drai ne la pun, tro ha ngazo catre la thiina ne la itre atr. (Wange ju la hna eköhagen hna hape, “ Qëmekene Troa Traqa La Pun.”) Hapeu la itre atr enehila, tha angatre kö a pi tru, me pi aja mo, me iakötrë, me pë ihnimin? Ketre hatrene hi lai ka amamane laka, calemi hë la pune la fen.

Hapeu, ka qea maine ka hohopatre hi la itre drai ne la pun? Öni Tusi Hmitrötr, “hohopatre pe hi la ijin.” Thupene lai, tro Akötresieti a apatrene “la itre ka qanangazone la ihnadro.”—Hna Amaman 11:15-18; 12:12.

Ase hë Akötresieti sa la drai me hawa tro Nyidrëti a apatrene la fene ka ngazo. (Mataio 24:36) Ngo “xele kö Nyidrë troa apatrene la ketre [atr].” (2 Peteru 3:9) Aja i Nyidrëti pe tro la nöjei atr asë a mel ngöne la fene ka hnyipixe, ngöne la Paradraiso. Celë hi matre, Nyidrëti a aijijëne la nöjei atr troa hane atrepengöi Nyidrëti hnyawa.

Hnei Akötresie hna eköth la ketre porogarame ne ini. Aja i Nyidrëti tro la nöjei atr a atre la nyine troa kuca, matre hane mel ngöne la fene ka hnyipixe, fene la musi Nyidrë. Öni Iesu lo ka hape, troa cainöjëne la maca ka loi ne la Baselaia i Akötresie “e cailo fen.” (Mataio 24:14) Hna cainöj koi itre miliar lao hawa hnene la Itretre Anyipici Iehova. Öni Iesu fe ka hape, troa cainöjëne la maca ne iamele e cailo fen qëmekene troa traqa la pun.

Calemi hë la ijine troa apatrene la itre musi atr. Eloine pe, ijije hi troa amele epun qa ngöne la fene celë ka ngazo, me mel ngöne la Paradraiso hna thingehnaean hnei Akötresie. Ame ngöne la ketre tane mekun, tro sa ce wang la nyine troa kuca matre troa hane mel ngöne la fene ka hnyipixe.