Ame la easa qaja la atreine troa kapa la itre akötr ka ej thene la itre atr, tre, kola qaja la “troa atre la ewekë ka ej e kuhu hni ne la atr, kösë easë fe a melëne la akötr hnei angeic hna melën.” Öni Rick Hanson (expert en santé mentale) ka hape, “Hna hnaho së cememine la atreine troa kapa la itre akötr ka ej thene la itre atr.

PANE MEKUNE JË: Pine nemene matre hetrenyi së la thiina cili, ene la troa atreine kapa la akötr ne la itre atr, nge patre kö thene la itre xa xupuana i Akötresie? Öni Tusi Hmitrötr, hna xup la atr hnaiji Akötresie. (Genese 1:26) Hnene laka, hna xupi së hnaiji Nyidrë, haawe, atreine hi së nyitipune la pengöi Nyidrë, me melëne la itre thiina i Nyidrë. Celë hi matre, ame la easa trotrohnine la akötr ne la itre atr, me thel troa xatua angatr, easë hi lai a nyitipu Iehova, Atre Xupi së.—Ite Edomë 14:31.

Akötresieti a kapa la itre akötre së, nge tha ajane kö Nyidrë tro sa akötr. Itre macatre ne thahluëne la angetre Isaraela ekö e Aigupito, nge 40 lao macatre ne lapa angatr ngöne la hnapapa. Ngo öni Tusi Hmitrötr: “Ame la nöjei akötre ka ej thei angatr, tre, kolo fe a akötrë Nyidrë.” (Isaia 63:9, MN) Tha Akötresieti hmekuje kö a goeën, ngo Nyidrëti fe a ce akötr me angatr. Öni Nyidrë, “Ate kö ni la aköte i angat.” (Esodo 3:7) Öni Nyidrëti fe: ‘Ame la atr ketri nyipunie, tre, kola ketr la wene dremune alamekeng.’ (Zakaria 2:8) Ame la kola akötrë së hnei itre xan, kola hace la hni Nyidrë.

Ngacama kola upe zö së hnene la hni së, nge kösë tha ijiji së kö troa kapa la ihnimi Nyidrë, ngo Tusi Hmitrötr a amamane ka hape, “sisitia kö Akötesie hune la ite hni shë, nge kola wangate hmekune la nöjei ewekë asëjëihë.” (1 Ioane 3:19, 20) Atrepengö së hnyawa kö hnei Nyidrë. Öhne kö Nyidrëti la ewekë ka traqa koi së, me itre mekune ka ej the së, me itre aliene hni së. Nyidrëti a kapa la itre akötre së.

Itre Xötr Ka Xatua Së

• “Ame hna tro eö a hë, nge tro Iehova a sa ; tro eö a xëwe, nge tro nyidëti a hape, Ini ha la.”​—ISAIA 58:9.

• “Ate kö ni la ite mekune la hnenge hna mekune koi nyipunie, öni Iehova, ite mekune ka tingetinge nge pëkö ngazo ngön, mate hamë nyipunie la pune memine la mejiun. Nge tro nyipunie a hë ni, me tro mate thithi koi ni, ame hnenge hna troa dei nyipunie.”​—IEREMIA 29:11, 12.

• “Nengeju la ite tenge timidange kowe la ge i cilie ; hape u, tha it’ eje kö ngöne la tusi cilie ?”​—SALAMO 56:8.

Tha sihngödri kö koi së laka, Akötresieti a trotrohnine la nöjei akötre së. Haawe, kola xatua së tune kaa? Hanawang la hna melëne hnei Maria:

“Qaane lo kola meci la neköng ka 18 lao macatre hnei kaser, kösë kola haitre la meleng. Nge, lue macatre ne lapa fë nyën la meci cili qëmekene troa mec. Ame hnenge hna wesitr koi Iehova, ke, pëkö hnei Nyidrëti hna kuca kowe la neköng, nge tha hnei Nyidrëti kö hna nyinyine la meci nyën!

“Sikisi lao macatre thupen, hnenge hna fe la hning kowe la ketre trejin ne la ekalesia, me qaja ka hape, pëkö ihnimi Iehova koi ni. [6] Itre hawa ne ce lapa nyio, nge hnei angeic hna nue ni hnyawa troa ithanata. Thupene lai, hnei angeic hna amamane koi ni la tusi 1 Ioane 3:19, 20, nge celë hi ka ketr la hning. Kola hape: “Sisitia kö Akötesie hune la ite hni shë.” Hnei angeic hna qaja koi ni, ka hape, trotrohnine hi Iehova la itre hne së hna melën.

“Ngazo pe, thatreine kö ni troa apatrene la trengehning! Thupene lai, hnenge hna e la Salamo 94:19, ka hape: “Ngöne la nyimu mekun’ e kuhu hning, kola akeukawane la hninge hnene la ite nyine aupune qa thei cilie.” Ame koi ni, thatraqai ni hnyawa la xötre celë! Ame hë enehila, jëne la hnenge hna qaja la itre aliene hning koi Iehova, kola apujene la elëhning, ke, atre hi ni laka, Nyidrëti a drei ni, me trotrohni ni.”

Drei la ketre madrine ka tru e tro sa atre ka hape, trotrohnine hi Akötresieti la hne së hna melën! Nga, hnauëne kö, laka, kola elë catre la etrune la itre akötr? Nyidrëti kö lai a ameköti së pine la itre ngazo së? Tro kö Akötresie a apatrene la itre akötr elany? Troa sa la itre hnyinge celë ngöne la itre tane mekun ka troa xulu.