Ame ngöne la hawa thupene hna hnahone la nekönatr, nyipiewekë tro nyën a easenyi catr kowe la thine i nyën, ke, celë hi ka troa xatua nyën elanyi troa tru trootro. *

Nemene la ka upe la thine troa thupëne hnyawan, me hnim la medreng? Kola qaja hnei Jeannette Crenshaw, ketre porofesör, kowe la ketre zonal (The Journal of Perinatal Education) ka hape, kola elë la etrune la itre hormone ocytocine “ngöne la thin a ketr, me goeën, me iji thin la nekö i eahlo ka hnyipi mala. Nge celë hi ka acatrene catrëne la ihnimi eahlo kowe la medreng.” Ame ngöne la ijine cili, hetre ketre hormone kö ka “xatuane la thin matre troa hnim hnyawane la nekönatr,” nge ka acatrene la aqane imelekeu i nyidro. Pine nemene matre ka nyipiewekë lai?

Iehova Akötresie la Atre Xupi së. Nyidrëti la ka kuca matre troa imelekeu tune lai hnene la thin memine la medreng. * Öni Davita joxu, Akötresie la ka ‘xomi angeic qa ngöne la hni’ ne la thine i angeic, me kuca matre tha tro kö angeic a xou hune la imano ne la thin. Öni angeic e thith: “Hna nue ni koi cilie qane la hna hnahon ; cilieti la Akötesingö qa kuhu hni nenë.”—Salamo 22:9, 10.

PANE MEKUNE JË: Hnei Akötresieti hna xup la thin matre troa hnime catrëne la nekö i eahlo, me thupë nyëne hnyawa. Haawe, kolo hi lai a amaman, ka hape, tro Nyidrëti a nyipiewekë së, “ite Matra i Akötesieti.”—Itre Huliwa 17:29.

Iesu Keriso hi lo atr ka atrepengöi Akötresieti hnyawa. Öni nyidrë: “Hape u, tha hna itöne kö la lue sisi thupene la asari? nge tha mala kö kete hune la hnadro e tha musi kö la Tetetro i nyipunie. Ngo asesë hë e la ite pene he i nyipunie. Celë hi mate the qou kö, ke nyipunieti e koho hune la nöjei sisi ka kösau.”—Mataio 10:29-31.

Xalaithe hi la itre atr ka goeëne hnyawa la itre waco ka co, ka sesë e caha nyipin. Nge the qaja palaha lo itre ka ‘mala hune la ihnadro.’ Ngo, atre kö hnene la Keme së e koho hnengödrai la pengöne la itre waco, itre ej isa ala cas! Maine tru ju hë hnei waco, ngo sisitria kö la atr koi Akötresie hune itre ej. Hetre ini nyine tro sa xom qa ngön. Tha tro pi kö sa “qou,” ke, tro kö Akötresieti a nyipiewekë së. Nyipici, ka sisitria catre kö së xajawa i Nyidrë!

Itre Xötr Ka Xatua Së

• ‘Eje kö la lue meke i Iehova ngöne la nöjei hnë asë, kola öhne la ngazo me loi.’​—ITE EDOMË 15:3.

• ‘Eje la lue meke i Iehova hui ange ka meköt, nge ame la lue hnangenyë i nyidrë, tre, kola dreng la nine hë i angatr.’​—SALAMO 34:15.

• ‘Tro ni a aciacine me madrine la trenge ihnimi i cilie ; hnei cilieti hna öhne la akötreng ; trotrohnine kö cilieti la nöjei akötreng.’​—SALAMO 31:7.

Hapeu, tro kö a hetre thangane ka loi kowe la mele së e tro sa atre ka hape, Akötresieti a nyipiewekë së, me thupë së? Eje hi, celë hi mekuna i Hannah, * ka mel e Agele:

“Nyimutre la itre ijine hnenge hna mekun, laka, tha hnimi ni kö hnei Iehova, nge tha drenge kö Nyidrëti la itre thithing. Ame koi ni, maine jë, tha ka catre kö la lapauneng. Nge, Nyidrëti a wangaconyi ni, me xele ma wai ni, ke, tha hnimi ni kö hnei Nyidrë.”

Ngo, ame enehila, tha luelue hmaca kö Hannah, laka, tru la ihnimi Iehova koi eahlo. Nemene la ewekë ka saze? Öni eahlo: “Hna saze trootro la aqane mekuneng. Mekune palahi ni la ketre cainöj ekö, nge ka qejepengöne la thupene mel hna hamën hnei Iesu. Celë hi ka ketr la hning, me xatua ni troa trotrohnin, laka, Iehova a hnimi ni. Nge, ame la Nyidrëti a sa la itre thithing, kola xölaxöla la trenge timidrang, ke, kola mama e cili la etrune la ihnimi Iehova koi ni. Ketre, hnene la ini Tusi Hmitrötr, memine la itre icasikeu hna amamane koi ni la pengöi Nyidrë, memine la ihnimi Nyidrëti koi së. Ame enehila, mama hnyawa ha koi ni la ixatua, memine la ihnimi Iehova koi së asë. Nge, hetre aja i Nyidrëti troa thupë së, isa ala cas.”

Eje hi laka, ka hamë ithuecatre la itre ithanata i Hannah. Ngo, nemene la aqane troa xecie koi epun, laka, atre hnyawa hi Akötresie la aliene hni epun? Tro la tane mekun ka troa xulu a sa la hnyinge celë.