Maine tha Akötresieti kö la qaane la itre akötr, pine nemene matre kola elë la etrune la itre jiin, me itre ka pë ewekë, me itre isi, me itre mec, me itre hulö? Hnene la Wesi Ula i Akötresie, ene la Tusi Hmitrötr, hna amamane la köni kepine matre kola akötr la itre atr:

1. Pi Mama, Meciun, Me Imethinë. “Kete ate a musinëne la kete mate angazo nyëne kö.” (Ate Cainöj 8:9) Pine laka, itre atr ka tha pexeje kö së, ame itre xa ijin, hnei pi mama me pi iakötrë matre kola akötr la itre atr.

2. Ijin Me Ewekë Ka Xulu Xan. Kola akötr la itre atr, ke, “ame la ijine memine la ewekë ka xulu, te, kola traqa koi angat’ asë.” (Ate Cainöj 9:11) Maine jë, kola traqa la ketre ewekë kowe la atr, ke, angeice hnyawa hi ngöne la götran, nge hmekune la ijine kola traqa la ewekë cili. Maine jë, ketre aksida, maine tha hna hmekëne kö hnene la atr, maine hnei angeic hna tria.

3. Kola Haöthe La Fen Hnene La Ngazo. Tusi Hmitrötr a amamane la nyipi kepin matre kola akötr la itre atr, kola hape: “Fene hnengödrai asëjëihë a meköle thene la ate ka ngazo.” (1 Ioane 5:19) Ame “la ate ka ngazo” tre, kola qeje Satana Diabolo, ketre angela i Akötresieti ekö, ngo “tha cile huti kö ngöne la nyipici.” (Ioane 8:44) Hnene la itre xa angela hna ce xöle me Satana, me icilekeu me Akötresie. Hnei angatr hna kuca la itre sipu aja i angatr, matre itre dremoni hë angatr enehila. (Genese 6:1-5) Qaan ekö lo icilekeu, tha mano kö Satana me itre dremoni ajojezin, me akötrëne la fen. Celë hi ka mama catr enehila! Elëhni catr Diabolo, lo “ate amenune la fene hnengödrai asëjëihë,” celë hi matre kola qaja ka hape, “Ekölö hi ni la hnadro.” (Hna Amamane 12:9, 12) Ka ngazo la aqane musinëne Satana la fen. Angeic a madrine la kola akötr la itre atr. Zöi Satana la kola akötr la itre atr enehila, ngo tha Akötresieti kö.

PANE MEKUNE JË: Hnene la atr ka ngazo, nge ka pë ihnimin, matre kola akötr la itre xan. Ngo, öni Tusi Hmitrötr: “Akötesieti la ihnim.” (1 Ioane 4:8) Pine laka, ka ihnimi Iehova, haawe, ka “iananyi la ngazo me [Nyidrë], kete tune la thina ka ngazo me Kapucatinasë.”—Iobu 34:10.

Ngo, loi e tro sa isa hnying ka hape, ‘Utihë eu tro Akötresie a nue Satana troa musinëne la fen tune lai?’ Tune lo hne së hna ce wange hë, methi Akötresieti la ngazo. Nge ame la easa akötr, Nyidrëti fe a hane akötr. Ketre, Tusi Hmitrötr a qaja ka hape: ‘Nue pi koi Nyidrëti la nöjei hnei nyipunie hna hnehengazon.’ (1 Peteru 5:7) Akötresieti a hnimi së, nge tha jole kö koi Nyidrëti troa apatrene la itre akötre së. Celë hi hne së hna troa ce wang ngöne la tane mekun ka troa xulu. *