AME LA KOLA LEPE LA ITRE ATR HNENE LA ITRE HULÖ, HNEI EPUNI KÖ HNA HNYING, KA HAPE, ‘EKAA JË HË AKÖTRESIE?’ NGE, TUNE KAA LA KOLA TRAQA KOI EPUN LA KETRE JOL, MAINE JË, TRO EPUNI A HNYING KA HAPE, AKÖTRESIETI KÖ A NYIPIEWEKË NI.

Sheila la ketre föe ka mel e Etazini. Hnei angeic hna tru ngöne la ketre hnepe lapa ka hmi catr. Maine jë casi hi la mekuna i epun me angeic. Öni angeic: “Tru jë hi ni a thele Akötresie, ke, Nyidrëti hi la Atre Xupi ni. Ngo, kösë nanyi Nyidrëti koi ni. Atre hi ni, laka, tha Nyidrëti kö a xele ma wai ni, ngo ame ngöne la ketre götran, tha hnimi ni kö hnei Nyidrë.” Pine nemene matre angeic a mekune tune lai? Öni angeic: “Ame la kola traqa itrai la itre jol kowe la hnepe lapang, kösë pëkö ixatua hne huni hna kapa qaathei Akötresie.”

Tui Sheila, atre hi së, laka, hetre Akötresie Kapucatinasë. Ngo, easë fe a isa hnying, ka hape, Nyidrëti kö a hnimi së. Ketre tui Iobu, ka mejiune angeic kowe la men me inamacane i Akötresie, ngo hnei angeice fe hna hane luelu. (Iobu 2:3; 9:4) Nyipici, hna traqa itrai la itre jol ka tru koi Iobu, matre ame koi angeic, ke, pëkö nyin. Celë hi matre öni angeic koi Akötresie: “Ngöne nemene laka cilieti a juetëne la xajawa i cilie, me mekune laka ithupëjia ha ni me cilie?”—Iobu 13:24.

Nemene la hna qaja hnei Tusi Hmitrötr? Akötresieti kö la qaane la itre akötre së? Nemene la ka amaman, ka hape, Akötresie a hnimi së asë, ngo easë mina fe isa ala cas? Isa öhne kö së, ka hape, Nyidrëti a nyipiewekë së, me trotrohni së, me hnimi së, me xatua së ngöne la itre jole së?

Ame ngöne la itre tane mekun ka troa xulu, tro sa ce wang la itre ini hne së hna kapa qa ngöne la itre hna xup göne la aqane nyipiewekë së hnei Akötresie. (Roma 1:20) Thupene lai, tro sa ce ithanatane la hna qaja hnei Tusi Hmitrötr göne lai. Maine tro palahi sa thel troa “ate nyidëti” jëne la itre hna xup memine la Tusi Hmitrötr, haawe, tro hë lai a xecie koi së laka, “nyidëti a meku” së.—1 Ioane 2:3; 1 Peteru 5:7.