LUZIA KA PEJE CA. Ame lo angeic a nekönatr, hna tithi angeic hnene la ketre mec (Poliomyélite). Ketre meci lai ka solesol, nge ka ajolëne la he. Ame la angeic a 16 lao macatre, hnei Luzia hna huliwan la ketre föe. Önine lai föe, “Akötresieti a ahnëjinë eö hnene la meci cili, ke, hnei eö hna tha idrei, me ngazo thiina kowe la thine i eö ekö.” Nyimu macatre thupen, tha thëthëhmine kö Luzia lo la itre trengewekë ka akötrë angeic.

AME LA KOLA THUEMACANYI DAMARIS, LAKA, HETRE KASER NGÖNE LA ATUAT I ANGEIC, önine la keme i angeic: “Nemene la hnei eö hna kuca matre tithi eö jë hnene la meci cili? Atre hi ni laka, hetre ewekë ka ngazo hnei eö hna kuca. Celë hi matre Akötresieti a ameköti eö.” Hna akötrë Damaris hnene la hna qaja hnene la keme i angeic.

Qaan ekö, alanyimu la ka mekun, laka, jëne la itre sine mec, Akötresieti hi lai a nyithupene koi së. Kola qaja hnene la ketre itus (Manners and Customs of Bible Lands) ka hape, alanyimu ngöne la hneijine i Keriso ka mekun, laka, “ame la kola wezipo la ketre atr, tre, hetre ewekë ka ngazo hnei angeic hna kuca, maine itre sinee i angeice pena. Kolo hi lai a nyithupene koi angeic hnei Akötresie.” Önine la ketre itus (Medieval Medicine and the Plague) ka hape, ame ngöne la itre macatre thupei Keriso, “alanyimu la itre ka mekun, laka, jëne la itre mec ka solesol, Akötresieti hi lai a nyithupene koi angatr la itre ngazo i angatr.” Haawe, ame ngöne la itre macatre 1300, hna mec la itre milio lao atr e Europe hnene la mec ka solesol (la peste). Hapeu, iameköti hi lai qaathei Akötresie kowe la itre atr ka ngazo? Maine hna ixötrekeu pena la ketre mec ka tru, tune la aqane qaja hnene la itretre ithel. Eje hi laka, tro la itre xa atr a qaja ka hape, jëne la itre mec, Akötresieti hi lai a akötrëne la itre atr pine la itre ngazo i angatr. *

PANE MEKUNE JË: Kola mekune lo ka hape, ame la itre mec, me itre akötr, tre, itre ka xulu hi qaathei Akötresie. Ngo, hnauëne kö la Iesu, Nekö i Akötresie, a aloine la itre mec ngöne lo nyidrëti e celë fen? Ka ihmeku kö lai memine la pengöi Akötresie, laka, ka meköti Nyidrë? (Mataio 4:23, 24) Tha hnei Iesu kö hna icilekeu memine la aja i Akötresie. Öni nyidrë: “Ini a kuca pala hi la nöjei ewekë nyine amadi [Akötresie],” nge, “ini a . . . kuca thenge la hnei Tetetroti hna ahnithe koi ni.”—Ioane 8:29; 14:31.

Kola qaja hnyawane hnei Tusi Hmitrötr, ka hape: Ame Iehova Akötresie, tre, ka “pë engazon” Nyidrë. (Deuteronomi 32:4) Thatreine kö Akötresie troa akeine la ketre avio, matre troa humuthe la itre hadredr lao atr ka loi, göi troa nyithupene kowe la ca atr ka ngazo e hnine la avio! Atre hi Aberahama, hlue i Akötresie laka, ka meköti Nyidrë. Celë hi matre, öni angeic, thatreine kö Akötresie “ce apatene la ka meköti me ka ngazo.” Ame koi Aberahama, “tha ijije kö troa qaja tune lai göi” Iehova. (Genese 18:23, 25) Ketre, kola qaja hnei Tusi Hmitrötr ka hape, “iananyi la ngazo me Akötesie, kete tune la thina ka ngazo.”—Iobu 34:10-12.

Tha zöi Akötresieti kö la easa akötr, nge tha Nyidrëti kö lai a të la itre ngazo së. Celë hi hnei Iesu hna qaja kowe la itretre drei nyidrë. Ame la angatr a öhne la ketre atr ka timeke hë qa kuhu hni thin, hnene la “angete dei nyidëti hna hnyingë nyidëti, ka hape, Rabi, dei la ate kë ngazone la, laka hna hnaho nyëne ka timek, hape u, nyën, maine keme me thin ? Iesu a sa, ka hape, Tha ngazo kö nyëne la ; nge kete tha ngazo la keme me thine i nyën ; ngo loi pe mate mamapi la ite huliwa i Akötesie göi nyën.”—Ioane 9:1-3.

 Ame ngöne la ijine cili, hlemu catr la itre aqane mekun ka tria. Celë hi matre, kola sesëkötr la itretre drei Iesu la nyidrëti a qaja ka hape, kola traqa lai jol, ngo, tha hnene kö la hnei angeic hna kuca la ngazo, maine zöi keme me thine pena. Tha hnei Iesu hmekuje kö hna aloine la atr cili, ngo hnei nyidrëti fe hna amekötine la mekun ka qaja ka hape, Akötresie a nyithupene la itre ngazo së hnene la itre akötr. (Ioane 9:6, 7) Troa akeukawane la hni ne la itre atr hna tith hnei mec ka tru, e tro angatr a atre laka, tha Akötresieti kö la qaane la itre akötre i angatr.

Itre Xötr Ka Xatua Së

• “Tha’ teine kö troa tupathi Akötesie hnei ngazo, kete tha hnei nyidëti kö hna tupathi kete ate.” (IAKOBO 1:13) Easenyi hë troa apatrene la itre “ngazo,” kola qaja la itre ewekë ka akötrëne la itre atr qaane hë ekö, ene la itre sine mec, me akötr, memine la mec.

• Hnei Iesu Keriso hna “aloine la ite meci asë.” (MATAIO 8:16) Ame la Iesu a aloine la nöjei mec ne la itre ka traqa koi nyidrë, tre, nyidrëti hi lai a amamane la hna troa kuca elanyi hnene la Baselaia i Akötresie ngöne la fen asë.

• “Tro nyidëti [Akötresie] a köle tije la nöjei tenge timida asëjëihë qa ngöne la ite lue meke i angat ; nge pa hmaca kö mec ; me hace hni me teij, me aköt ; ke patë hë la ite ewekë hnapan.”​—HNA AMAMANE 21:3-5.

Pine nemene hö matre kola akötr la itre atr? Qaan ekö, itre atr a thel troa sa la hnyinge celë. Maine tha zöi Akötresieti kö, nga zöi drei hö? Tro la tane mekun ka troa xulu a sa la itre hnyinge celë.