Hetre aqane xup Akötresie la ngönetrei së matre tro kö ej a sipu nyinyine ej. Ame la kola xöje la ngönetrei së, maine gelëth, maine thinyi së pena, tre, hetre ewekë hnene ej hna kuca matre troa ameune lai ka akötr, ka co ju hë maine ka tru pena.” (Johns Hopkins Medicine) Tro ngönetrei lai a kuca matre tha tro kö a neni menu la madra, nge tro fe a ketre meu xan la ka akötr.

PANE MEKUNE JË: Pine laka hna xup tune lai la ngönetrei së hnene la Atre Xup, haawe, tha luelue kö së laka, tro kö Nyidrëti a xatua së la easa hace hni. Önine la ketre atre cinyihane la Salamo, ka hape: Akötresie “lo ate axapone la angete thë fë hni me atuthe la ite eate i angat.” (Salamo 147:3) Ngo, tune kaa la easa akötr enehila, maine hace pena pine la itre hne së hna kuca ekö? Nemene la aqane troa xecie koi së, laka, tro kö Iehova a axapone la itre akötre së?

Ase hë Akötresie sisiny, me hape: “The qou kö, ke ce ini me eö ; the hlohlo kö, ke ini la Akötesi ’ö ; tro ni a aegöcatenyi ’ö ; he, tro ni a xatua eö.” (Isaia 41:10) Maine ka xecie hnyawa kowe la ketre atr, laka, Iehova a thupë angeic, troa lapa hnyawa la mekuna i angeic, nge tro ha hetre trengecatre i angeic troa cil kowe la itre jol. Hnei Paulo hna qaja la tingetinge cili, ka hape, “tingetinge ka sisitia qa thei Akötesie hune la nöjei mekun’ asë.” Öni Paulo fe: “Ateine ni troa kuca la nöjei ewekë asëjëihë hnei nyidëti ate aegöcatenyi ni.”—Filipi 4:4-7, 9, 13.

Itre Xötr ka xatua së troa acatrene la lapaune së kowe la itre hna thingehnaean hnei Iehova thatraqane la itre atr. Hna Amamane 21:4, 5 (ka mama ngöne la götrane ka troa xulu) a qaja koi së la ewekë hnei Nyidrë hna troa kuca, memine la kepin matre loi e tro sa mejiune koi Nyidrë:

• “Tro nyidëti a köle tije la nöjei tenge timida asëjëihë” qa ngöne la lue mek ne la itre atr. Tro Iehova a apatrene la itre akötr, me itre xou asë, ene mina fe la itre hna wangacon hnei itre xan.

• Kola “[të hune] la theron” e hnengödrai hnene la Joxu Kapucatinasë, nge tro Nyidrëti a musinëne la nöjei ewekë hna xup asë matre tha tro hmaca kö së a akötr. Nge, Nyidrëti fe a hamë së la hne së hna ajan.

• Öni Iehova, ka “nyipici me meköt” la itre hnei Nyidrëti hna thingehnaean. Hnei Nyidrëti hna anyipicine jëne la ëje i Nyidrë, laka, troa eatr la itre trengewekë i Nyidrë.

“Tro nyidëti a köle tije la nöjei tenge timida asëjëihë qa ngöne la ite lue meke i angat ; nge pa hmaca kö mec ; me hace hni me teij, me aköt ; ke patë hë la ite ewekë hnapan. Nge hna ulatine hnei nyidëti ate [të hune] la theron, ka hape, Hana wang, tro ni a ahmadradrane la nöjei ewekë asëjëihë. Nge öni nyidëti koi ni, ka hape, Cinyihaneju ; ke nyipici me meköti la nöjei tenge ewekë cili.”​—Hna Amamane 21:4, 5.

Kola mama la pengöne la Keme së e hnengödrai jëne la itre hna xup, me jëne fe la Tusi Hmitrötr. Kola upi së hnene la itre ewekë hna xup troa nyisinee i Iehova. Nge, Tusi Hmitrötr a thuecatre koi së, me hape: “Eashenyijë koi Akötesie, nge tro nyidëti a eashenyi koi nyipunie.” (Iakobo 4:8) Öni Ite Huliwa 17:27: ‘Tha iananyi kö nyidrë me easë asë.’

Maine tro epuni a xomi ijine troa atre Akötresie, tro ha xecie koi epun, laka, “nyidëti a meku nyipunie.” (1 Peteru 5:7) Nemene la thangane la troa mejiune koi Iehova?

Ka mele Toru e Zapo. Ngacama hna hia angeic hnene la thine i angeic ka hmi, ngo hnei angeic hna lö hnine la ketre Mafia e Zapo hna hape, yakuza. Öni angeic, “Ame koi ni, Akötresie a methinë ni. Nge ame la kola mec hnene la itre atr hnenge hna hnim, tre, aqane nyithupene hi lai koi ni hnei Nyidrë.” Kola mama enehila koi Toru, laka, hnene la aqane mele i angeic, me aqane mekuna i angeic matre “ketre atr ka pë ihnim angeic, nge ka catre hni.” Öni angeic, “Ame la ajang, tre, troa humuth la ketre atr ka hlemu catre kö hung, nge thupene lai eni ha mec. Ajang troa hlemu la ëjeng.”

 Hnei Toru me Hannah, föi angeic, hna nyiqaane ini Tus. Ame hë e cili, hna saze la aqane mekune me aqane mele i angeic. Öni Hannah, “Ketre atr pena ha la föeng.”[5a] Ame enehila, Toru a qaja ka hape: “Hetre Akötresie ka nyipiewekë së isa ala cas. Tha aja i Nyidrëti kö tro sa mec, ngo Nyidrëti pe a ajan troa nue la itre ngazo ne la itre ka ietra. Nge, Nyidrëti a dreng la itre ewekë hne së hna qaja koi Nyidrë, itre ewekë lai hne së hna thatreine qaja koi itre xan, ke, tha tro kö angatr a trotrohnin. Easenyi hë la ijin tro Iehova a apatrene la itre ngazo, me itre akötr, me itre hne së hna xouen. Ngo, hetre ixatua hnei Nyidrëti hna hamë së enehila. Nyidrëti a hnimi së, me xatua së ngöne la itre ijin easa kucakuca.”—Salamo 136:23.

Kola mama jëne la hna melën hnei Toru, ka hape, easenyi hë tro Akötresie a apatrene la nöjei ngazo e celë fen, me köletrij la nöjei trenge timidra asë. Tha Nyidrëti hmekuje kö a hamë mejiune koi së elany, ngo Nyidrëti fe a xatua së troa hetre mele ka loi enehila. Nyipici laka, tiqa ha la fen hnei ngazo, ngo ijiji së hi troa kepe thangane la ihnimi Akötresieti enehila.