Pane mekune jë la aqane imelekeu ne la lue fini. Ka catr la ihnimi nyidro, nge pëkö ka atreine qejepengön. Öni Nancy Segal (hene ka tru ngöne Twin Studies Center, nge ketre fini fe) ka hape, ame thene la itre xa fini, “tha nyipiewekë kö troa qejepengöne la hna qaja, ke, itrotrohni hi nyidro. Kola qaja hnene la ketre föe la aqane imelekeu i eahlo memine la ka ce fini me eahlo, ka hape: “Pëkö ewekë hnenge hna thatre thene la ka ce fini me ni.”

Nemene la ka kuca matre ka itrotrohni palahi la lue fini? Önine la itretre ithel, hnene la aqane mel, me aqane hia nyidro. Ngo, ame la nyipi kepin matre kola epe hnei ketre koi ketre, tre, hnene la itre gènes i nyidro, itre ka tro hi a ceitu thene la itre xa fini.

PANE MEKUNE JË: Ame la Atre Xupi së, atre hnyawa kö Nyidrë la pengö së, hune la itre xa atr. Öni Davita: “Hnei cilieti hna hetë ni e kuhu hni nenë. Tha sihngödi kö e cilie la ngöneteing, lo hna xupi ni ngöne la ga sihngöd, . . . öhnyi ni hnene la lue xajawa i cilie lo tha hna xupi atëne pete kö ; nge hna cinyihane la ite drai ngöne la tusi cilie.” (Salamo 139:13, 15, 16) Akötresieti hmekuje hi la ka atre la itre ewekë hne së hna qëmeke kow ngöne la mele së, me trotrohnine la pengö së enehila. Kola akeukawane la itre hni së la troa atre ka hape, pëkö ewekë the së hnei Nyidrëti hna thatre, goi atre fe Nyidrëti la itre gènes së. Nge, xecie hnyawa koi së laka, trotrohni së hnyawa hi hnei Nyidrë.

Hnei Davita hna thith me hape: “Iehova fe, hnei cilieti hna thelethele ni me ate hmekunyi ni. Cilieti a ate hmekune la e lapa ni, nge e cile ni ; cilieti a trotrohnine la mekuneng’ e ga nany. Iehova fe, pë pete kö ewekë ngöne la thinemeng, ngo hana wang, cilieti a ate hmekun’ asë.” (Salamo 139:1, 2, 4) Ketre, tha sihngödri kö koi Iehova la itre aliene hni së. Nge “ate hmekune [hnyawa hi Nyidrëti] la nöjei mekun’ asë e kuhu hni.” (1 Aqane lapa ite Joxu 28:9; 1 Samuela 16:6, 7) Nemene la aqane qejepengöi Akötresie hnene la itre xötre celë?

Maine tha qaja kö së la itre mekuna së me itre aliene hni së ngöne la thith, ngo öhne kö la Atre Xupi së la hne së hna kuca, memine la kepine matre easa kuca. Ketre, atre hnyawa hi Nyidrë la ewekë ka loi hne së hna ajane troa kuca, ngacama hna tuluthi së hi. Qaathei Akötresie la ihnim ka eje the së, haawe, xecie hnyawa koi së laka, aja i Nyidrë troa atre la itre mekuna së me itre aliene hni së ka loi.—1 Ioane 4:7-10.

Itre Xötr Ka Xatua Së

• ‘Eje hune la itre ka meköti la lue meke i Iehova, nge ame la lue hnangenyë i nyidrë, tre, kola dreng la itre thithi angatr.’​—1 PETERU 3:12.

• Öni Akötresie: “Tro ni a ini ’ö me köjane koi ’ö la jëne qâ i ’ö troa trongën ; tro ni a haji ’ö me alamekë eö.”​—SALAMO 32:8.

Tha sihngödri kö koi Akötresie la itre jol hne së hna melën. Haawe, kola xatua së tune kaa troa cile catr? Tro sa pane ce wang la ka traqa koi Anna, qa Nigeria. Öni angeic, “Hace catre la meleng ekö matre eni a hnyinge ka hape, ‘Nyine uëne hmaca la troa mel?’ Hneng hna hiane casine la neköng jajiny. Nyën e pital, ke, tru la tim hnine la atuate i nyën. Ame pena ni, tre, hna öhn la ketre kaser, nge, kola troa xöji ni, me kuci chimiothérapie, me radiothérapie. Haawe, jole catre koi ni troa tro pital troa hane wange la neköng.”

Nemene la ka xatua Anna? “Hneng hna lapa mekune la itre xötr ne la Tusi Hmitrötr, tune la tusi Filipi 4:6, 7, kola hape, “tro ha thupëne la ite hni nyipunie me ite mekune i nyipunie . . . hnene la tingetinge ka sisitia qa thei Akötesie hune la nöjei mekun’ asë.” Ame la eni a mekune hmaca la xötre cili, tre, kösë kola acatrene catrëne la aqane imelekeung me Iehova, ke, xecie hnyawa koi ni, laka, atrepengönge kö hnei Nyidrë. Hnenge mina fe hna kapa la itre ithuecatre qaathene la itre trejin ne la ekalesia.

“Ngacama eni palahi a wezipo, ngo kolo ha loi trootro la meleng me neköng. Hnene laka, ce Iehova palahi me nyio, matre hnei nyio hna inine troa atreine waiewekë hnyawa qëmekene la itre jole cili. Öni Iakobo 5:11 ka hape: “Eësha mekune laka manathithi angete xomi hni. Dengë hë nyipunie la xomi hni i Iobu, nge ate hë la hna nyi pune hnei Joxu, ka hape, Joxu la ate utipine me hnime atraqat.” Atre kö Iehova la ka traqa koi Iobu. Celë hi matre, xecie hnyawa koi së, laka, tro fe Iehova a trotrohnine la itre jol hne së hna cile kow.