AME la aqane mele së enehila, tre, tha celë kö aja i Akötresie ngöne la qaan. Ame la aja i Nyidrëti ekö, tre, troa nyialiene la ihnadro hnene la itre atr ka metrötrëne la musi Nyidrë, me kepe thangan qa ngöne ej. Ketre, tro fe angatr a nyitipune la aqane ihnimi Nyidrë, me itre xaa thiina i Nyidrë. Aja i Akötresie tro angatr a madrine ngöne la angatr a hiane la itre nekö i angatr, me öhne la itre ewekë ka hnyipixe, me aparadraisone la ihnadro.

• “Kola nyi pune la ite ishi uti hë la cane la fene hnengödrai.”—Salamo 46:9.

• “Traqa ha la ijine hna sa . . . tro fe nyipëti a të kowe la itre ka qanangazone la ihnadro.”—Hna Amaman 11:18.

• “Tha tro kö a qaja hnene la ate lapan’ eje, ka hape, Ini a mec.”—Isaia 33:24.

• “Tro la ite hnenge hna iëne a mele ahoeane kowe la huliwa ne la ite ime i angat.”—Isaia 65:22.

Troa eatr tune kaa la itre hna perofetane celë? Hnei Akötresie hna acile la nekö i Nyidrë, Iesu, troa musi qa hnengödrai kowe la fen. Tusi Hmitrötr a hëne la musi nyidrë ka hape, Baselaia i Akötresie. (Daniela 2:44) Öni Tusi Hmitrötr göi Iesu: “Akötresie a hamë nyëne la therone . . . Nge tro nyën a mus me Joxu.”—Luka 1:32, 33.

Ame lo Iesu e celë fen, hnei nyidrëti hna kuca la itre iamamanyikeu. Nyidrëti a amamane laka, troa lolo la mele ne la atr ngöne la ijine musi nyidrë.

• Hnei nyidrë hna nyinyine la nöjei pengöne mec; nyine amamane la aqane tro nyidrëti a apatrene la itre sine mec. —Mataio 9:35.

• Hnei nyidrëti hna sawa la enyi me hnagejë, ame hna haodrai pi; nyine amamane la aqane tro nyidrëti a thupëne la itre atr qa ngöne la itre hulö.—Mareko 4:36-39.

• Hnei nyidrëti hna ithuane la itre thauzane lao atr; nyine amamane la aqane tro nyidrëti a hamëne la ka nyipiewekë kowe la mele ne la atr.—Mareko 6:41-44.

• Hnei nyidrëti hna saze la tim koi waina ngöne la ijine faipoipo; tro nyidrëti a hamëne la itre ewekë ka troa amadrinëne la itre atr.—Ioane 2:7-11.

Nemene la aqane tro epuni a kapa la mel hnei Akötresie hna hnëkëne thatraqane la itre ka hnimi Nyidrë? Hetre ewekë nyine tro epuni a kuca. Öni Tusi Hmitrötr, nyipiewekë tro sa thele la ‘gojenyi ka co, jë ne tro kowe la mel, nge xalaithe hi la angetre öhn.’—Mataio 7:14.

Ekaa la gojenyi ne tro kowe la mel? Öni Akötresie: “Ini Iehova Akötesi ’ö, ate ini ’ö troa hete thangan, ate e eö ngöne la gojenyi tro eö a trongën.” (Isaia 48:17) Maine tro sa trongëne la eamo cili, troa tro loi la mele së.

 Ketre, öni Iesu: “Eni hi la gojeny, me nyipici me mel.” (Ioane 14:6) Maine tro sa trongëne la itre ini hna hamën hnei Iesu, me nyitipu nyidrë, tro hë sa easenyi koi Akötresie, nge tro ha tro loi la mele së.

Nemene la aqane tro sa öhne la gojenyi ne tro kowe la mel? Nyimutre catre la itre hmi enehila. Celë hi matre, Iesu a hmekë së, me hape: “Tha angatr asë kö itretre qaja koi ni ka hape, ‘Joxu, Joxu,’ la ka troa lö kowe la Baselaia ne hnengödrai, ngo kolo hmekuje hi la atre kuca la aja i Kakati e hnengödrai.” (Mataio 7:21) Ketre, öni nyidrë: “Tro nyipunieti a wangatrehmekunyi angatr jëne la itre thiina i angatr.” (Mataio 7:16) Tro la Tusi Hmitrötr a xatua epun troa wangatrehmekune la nyipi hmi qa ngöne la itre hmi ka thoi.—Ioane 17:17.

Nemene la aqane tro epuni a xötrëne la gojenyi cili? Nyipiewekë tro epuni a pane atrepengöne la Atre hamë mel: Drei lae Nyidrë? Drei la ëje i Nyidrë? Ka tune kaa la pengöi Nyidrë? Nemene la itre hnei Nyidrëti hna kuca koi së? Nemene la hnei Nyidrëti hna ajane tro sa kuca? *

Tha aja i Akötresieti kö tro hi la atr a huliwa, me xen, me elo, me hiane la hnepe lapa i angeic. Ijiji së troa atrepengöne la Atre Xupi së, me nyisinee i Nyidrë. Troa mama la ihnimi së koi Nyidrë, e hne së hna kuca la aja i Nyidrë. Öni Iesu: “Ame la aqane troa hetrenyi la mele ka pë pun, tre, tro angatr a atrepengöi nyipë, Akötresie ka cas.”—Ioane 17:3.

Ame la easa atre la aja i Akötresie koi së, nyipiewekë tro sa saze la mele së. Ngo, tha ka hmaloi kö. Ame pe, troa tro loi la mele së e tro sa xötrëne la gojenyi ne mel. Maine aja i epun troa atre la itre mekun ka sa la itre xaa hnying göi Akötresie, tro la Itretre Anyipici Iehova a madrine troa ini Tusi Hmitrötr me epun ngöne la ijin me götrane hnei epuni hna ajan. Ijije fe tro epuni a tro kowe la site hun www.pr418.com/dhv matre tro la ketre e eahun a iöhnyi me epun.