Pine nemene matre easa ajane troa mele palua? Önine la Tusi Hmitrötr, Akötresie la ka amë la aja cili e kuhu itre hni së. (Ate Cainöj 3:11) Ketre, ej a qaja ka hape, “Akötresieti la ihnim.” (1 Ioane 4:8) Ka ihnimi Akötresie. Tha tro kö Nyidrëti a amë la aja cili e kuhu hni së, nge tha mel aqeany pena kö së.

Pëkö atr ka ajan troa mec. Tusi Hmitrötr a qaja la mec ka hape, “ithupëjia.” (1 Korinito 15:26) Ame itre xan, kola canga thupatë la mele i angatr, nge ame pena itre xan, angatr a mel utihë la qatre trootro, me mec. Meci hi la pun koi së asë. Nyimutre la itre atr ka xoue mec. Hapeu, tro kö a apatrene la mec elany? Nyipici kö lai?

Hapeu, sesëkötre kö epuni la kola qaja ka hape, tha aja i Akötresieti kö tro la atr a mec? Kola amamane hnene la tusi Genese laka, aja i Akötresie tro sa mele palua ngöne la fen. Hnei Iehova Akötresie hna pane hnëkëne hnyawane la fene matre tro la atr a mele ngön ej. Thupene lai, hnei Nyidrëti hna xup la pane atr, ene Adramu, me ami angeic nyipine la hlapa e Edena, kolo paradraiso ekö. Nge, “[öhne] hë Akötesie la nöjei ewekë asëjëihë lo hnei nyidëti hna kuca, nge hana wang, nyipi loi.”—Genese 1:26, 31.

Hnei Akötresie hna xupi Adramu hnaiji Nyidrë, nge ka pexej angeic. (Deuteronomi 32:4) Ketre, ame  lo Nyidrëti a xupi Eva, ke ka pexeje mina fe angeic. Pëkö engazo i angeic ngöne la mekun me ngönetrei fe. Öni Iehova koi nyidro: “Manapi me hate, me atiqane la fene hnengödrai, me xom’ acon’ ej ; nge musinënejë la ite i e kuhu hnagejë, me ite öni ka sheshë e caha nyipin, me ite öni asë ka wewë e celë fen.”—Genese 1:28.

Tha tro kö Adramu me Eva a aca atiqane la fene hnengödrai. Hetre ijine kö lai. Tro Eva a pane hnaho, thupene lai, tro la itre nekö i nyidro a hnaho, utihë la troa nyialiene la ihnadro, tune lo aja i Akötresie ngöne la qaan. (Isaia 45:18) Hapeu, ka meköti kö tro Iehova a aijijë Adramu me Eva troa nyialiene la ihnadro, nge atre hi Nyidrë laka, tro hi nyidroti a mele treqe mec me goeëne la itre nekö i nyidro me itre api nyidro?

Ketre, hnei Iehova hna upi Adramu troa musinëne la itre öni, me ati ëje i nyudren. Tro lai a hetre ijin. (Genese 2:19) Maine aja i Adramu troa musinëne hnyawa la itre öni, loi e tro angeic a pane atrepengöi nyudreni hnyawa, me inine la aqane troa thupë nyudren. Tru kö la itre drai hna xom troa thupë nyudren hune la troa ati ëje i nyudren.

Haawe, mama hi jëne la itre hna amekötine hnei Akötresie, ene la troa atiqane la ihnadro me thupëne la itre öni, laka, hna xup la lue pane atr troa mel aqeany. Eje hi laka, qea pi hë la hna mele hnei Adramu.

Tusi Hmitrötr a amamane laka, qea kö la hna mele hnene la itre atr ekö hun enehila. Öni Tusi Hmitrötr: “[930] la ite macate la nöjei drai asë ne mele Adamu.” Thupene lai, kola e wengëne la sikis lao trahmanyi ka sasaithe la 900 lao macatre! Kola qeje Setha, me Enosa, me Kainana, me Iareda, me Methusela, me Noa. Hnei angatr asë hna mel qëmekene troa traqa la Iwë Atraqatr ngöne lo hneijine i Noa. Nge, ame la kola traqa la Iwë, 600 lao macatre i Noa. (Genese 5:5-27; 7:6; 9:29) Pine nemene matre tru pi hë la itre macatre ne mele angatr?

Hnene laka tha iananyi kö angatr memine lo ijine pexeje petre kö Adramu me Eva. Celë hi matre angatr a mele aqeany. Pine nemene matre mel aqeanyi la atr ka pexej? Nge, nemene la aqane troa apatrene la mec? Qëmekene troa sa la lue hnyinge celë, loi e troa pane trotrohnine la kepine matre easa qatre trootro me mec.