KOLA mama ngöne la itre hna qaja hnei Solomona joxu la aliene hni ne la itre atr enehila. Pine laka, ka hohopatre hi la mel, nge canga tro hi sa mec, matre itre atr a ajan troa mel aqeany. Ekö hë la itre atr thel la aqane troa mel aqeany.

Alanyimu la itre ifejicatre ka qaja la hna melëne hnei Gilgamesh. Ame la ketre, kolo Épopée de Gilgamesh. Gilgamesh la joxu ne Sumer. Angeic a troa nyinyape thel la aqane troa kötrene la mec. Ngo, tha öhne pi kö angeic la jëne troa apatrene la mec, me mele palua.

Ame ngöne la itre macatre 400 M.P.K., hnene la itre alchimistes qa Chine hna thel la aqane troa kuca la ketre tim ka troa aijijëne la atr troa aqean catrën la mele i angeic. Hna hëne la tim cili ka hape, “Élixir.” Ngo, tha ie kö. Hnei angatr hna kuca la ketre nyine ij hna ithuenyiköne hnei mercure me arsenic. Kola mekune laka, celë hi ka humuth la itre xaa joxu ne Chine. Ame ngöne la itre macatre 500 M.K. utihë 1 500 M.K., e Europe, hnene la itre alchimistes hna thel troa amudromudrone la gool matre ijije kowe la atr troa ij. Ame koi angatr, pine laka, tha ka hnyiqetre kö la gool, haawe, e tro la atr a iji lai, tro angeic a mel aqeany.

Ame enehila, alanyimu la itre ka inamacan (itre biologistes me généticiens) ka ithele matre troa trotrohnine la kepine la easa qatre trootro. Kola amamane hnene la itre trengecatr hnei angatr hna nu laka, xele kö la itre atr enehila troa qatre trootro me mec. Aja i angatr troa mele palua. Ngo, nemene la pune la itre hna ithel?

Ame kowe la itre ka inamacan, itre ka ithel ngöne la itre cellules së, ma ala 300 lao kepine matre easa qatre trootro me mec. Ame ngöne la itre macatre ka ase hë, hnene la itre ka inamacane hna kuca matre tro la itre cellules ne la itre öni me atr a mel aqeany. Celë hi matre hnene la itre atr ka trenamo hna hamë manie kowe la itre ka inamacan. Kola ajane hnene la itre ka trenamo troa atre la kepine matre easa mec. Nemene la hnei angatr hna kuca?

Kola tupath troa aqeane la mele së. Alanyimu la itre ka inamacan ka mekun laka, hnene la télomère, kola qaja la pune la chromosome, matre easa qatre trootro. Ame la kola thawaluëne la ketre cellule, tro la télomère a thupëne la itre ithuemacany (information génétique). Ngo, ame la kola thawaluëne la ketre cellule, kola hopatre trootro la télomère. Celë hi matre, tha  nyihnane hmaca kö la itre cellules, nge easa ha qatre trootro.

Hnene la huliwa i Elizabeth Blackburn me ekipe i eahlo ngöne sias, matre hnei angatr hna kapa la ketre prix Nobel lo 2009. Hna öhne la ketre pengöne tim ka sawa la télomère troa hopatr. Celë hi timi lai ka kuca matre tha canga hnyeqetre kö la cellule. Ngo, trotrohnine hë angatr laka, thatreine kö la itre télomères troa aqeane la mele ne la atr.

Kola tupath troa saze la itre ithuemacanyi ka ej e hnine la itre cellules. Maine qatre pala ha la itre cellules së, tro itre ej a hamëne la itre ithuemacany ka tria. Nge, celë hi matre, kola fetra la itre xaa mec, me itre akötr, maine idreuthi pena. Hnene la itre ka inamacan e Faras hna tupath troa xome la itre xaa cellules thene la itre ka qatre catr, me saze la itre ithuemacany ka ej e kuhu hnin. Nge itre cellules hmaca a isaije. Öni porofesör Jean-Marc Lemaître, ka xomiujine la ithele cili ka hape, “Kola amamane hnene la huliwa hun laka, ijije hi tro la itre cellules së a hnyipixe hmaca.”

Alanyimu la itre ka inamacan ka mekun ka hape, ngacama nyimutre la itre nyin ka xatua së matre tha tro kö sa canga qatr, ngo tha ijije kö tro la atr a mel aqeany. Eje hi laka, qaane lo itre macatre 1 800, itre atr a mel aqeany, hnene laka, itre atr ka porope hë angatr, nge ka thupëne wanga ixötrekeu pi la itre xaa sine mec, nge hetre antibiotiques hë me vaccins. Alanyimu la itre généticiens ka mekune laka, hna hmaca hi lai la itre macatre ne mele la atr.

Kola mama ngöne la itre trengewekë i Mose ngöne lo nyidrëti a cinyihan ekö, ka hape: “Ame la nöjei drai ne la ite macate huni, te, [70] la o macate ne it’ ej ; nge maine egöcate kö, te, [80] la o macate, ngo ngazo me aköte la emingömingön’ it’ ej ; ke hna weje catë hun, ame hna sheshepi hun.” (Salamo 90:10) Ngacama thele ju hë së troa aqeane la itre macatre ne mele së, ngo ceitune hi la mele së memine la hna qaja hnei Mose.

Ketre laka, hetre öni ka mel koi 200 lao macatre, me itre sinöe ka mel koi itre thauzane lao macatre. Ame la easa goeëne la eqeane la mele ne la itre öni maine itre sinöe memine la eqeane la mele ne la atr, easë a isa hnying ka hape, ‘Hapeu tro hi sa mele koi 70 maine 80 lao macatre?’