Öni Akötresie koi Adramu, “Tro eö a meci ngöne la drai ne xeni eö qa ngön’ [la sinöe].” (Genese 2:17) Maine hnei Akötresie hna xupi Adramu troa qatre trootro me mec, ka pë aliene la hna amekötine celë. Atre hi Adramu laka, e tha xeni kö angeic la wene sinöe, tha tro kö angeic a mec.

Tha tro jë kö Adramu lai me Eva a thë xen, e tha xeni kö nyidroti la wene sinöe cili. Pine nemen? Pine laka, ka tiqa hnei wene sinöe ngöne la hlapa e Edena. (Genese 2:9) Maine tha xeni ju nyidro la wene sinöe hna wathebon, tro nyidroti a amamane laka, nyidroti a drengethenge la Atre hamë mele koi nyidro. Ketre, tro fe nyidroti a amamane ka hape, Akötresie la ka amekötine la nyine tro nyidroti a kuca.

Nyipiewekë tro sa pane ce wange la ketre porotrik ekö, ka hetre ethane kowe la mele së enehila. Tro hë së lai a trotrohnine la kepine matre meci pi Adramu me Eva. Hnei Satana hna nyijëne la ketre un matre troa thoi kowe la atr. Öni Tusi Hmitrötr: “Nge ateine nyinyithina la une hune la nöjei öni asëjëihë ne hnite hnei Iehova Akötesieti hna xup. Nge öni nyëne kowe la fö, ka hape, Hape u, ase hë [qaja] hnei Akötesie, ka hape, The tro kö nyipoti a xeni qa ngöne la nöjei sinöe asëjëihë ne la hlapa?”—Genese 3:1.

Öni Eva e sa ka hape: “Tro nyiho a xeni la wene la nöjei sinöe ne la hlapa ; ngo ame la wene la sinöe ngöne nyipine la hlapa, te, hna [qaja] hnei Akötesie, ka hape, The tro kö nyipoti a xeni wen’ ej, nge the kete kö eje hnei nyipo, ke mecipi.” Thupene lai, önine jë hi la un: “Tha trojë kö nyipo a mec ; ke ate hmekune kö Akötesie laka ngöne la drai ne tro nyipoti a xeni wen’ ej, tro ha maca la lue meke i nyipo, mate kösë lue akötesie nyipo, mate ate hmekune la loi me ngazo.” Satana e cili a jelethoi Iehova, me hape, tha ajane kö Nyidrë tro Adramu me Eva a hetre loi.—Genese 3:2-5.

Hnei Eva hna jelenyipicine la trengewekë i Satana. Hnei angeic hna goeëne la sinöe, me piin, ke, mingöming e troa goeën! Ame hnei angeic hna li ime, me huje la wene sinöe, me xen. Öni Tusi Hmitrötr: Hnei angeic hna “hamëne fe kowe la fö’ i angeice ce me angeic ; nge angeic’ a hane xen.”—Genese 3:6.

Hleuhleu catre la hni Iehova ngöne la Nyidrëti a öhne la lue sipu nekö i Nyidrëti a tha idrei! Nemene la hnei Nyidrëti hna kuca? Öni Iehova koi Adramu: “Tro eö . . . a hmaca kowe la hnadro ; ke hna xomi ’ö qa lai ; ke xaxau eö, nge tro hmaca eö kowe la xaxau.” (Genese 3:17-19) Celë hi matre, “[930] la ite macate la nöjei drai asë ne mele Adamu ; ame hna mecipi angeic.” (Genese 5:5) Tha hnei Adramu kö hna elë hnengödrai eë, maine tro pena kowe la ketre götran. Qëmekene tro Iehova a xupi Adramu qa ngöne la xaxau, maine dro, pë pala kö atr e celë fen. Haawe, ame la angeic a  mec, patre hë la mano ne mel thei angeic, ame hnei angeic hna bëeke kowe la dro, lo hna xomi angeic qa ngön. Paatre hë Adramu!

Pine laka, hnei Adramu me Eva hna tha idrei, tha pexeje hmaca kö nyidro, nge luuzi hë lo mejiune i nyidro troa mele palua. Hna saze la ngönetrei nyidro; atr ka tha pexeje hë nyidro, me ka ngazo. Ngo, tha nyidroti hmekuje kö la ka xeni pun la hna tha idrei. Ame asë hi la itre matra i nyidro, tre, itre ka ngazo asë hë, me itre ka tha pexeje kö. Öni Roma 5:12: “Hnene la ngazo ne la ala cas [Adramu], nge meci a traqa pine la ngazo, ene pe, traqa pi la meci kowe la nöjei atr asë, ke itre ka ngazo asë hë së.”

Tusi Hmitrötr a aceitunëne la ngazo me mec memine “la nyine hetën . . . la nöjei at’ asëjëihë, memine la nyine he, ate he la nöjei nöj’ asëjëihë.” (Isaia 25:7) Ceitune hi lai memine la ketre imaano ka heetrëne la itre atr asë, maine iaw ka apoizinëne la nöjei atr. Nyipici laka, “kola meci la nöjei atr asë hnei Adramu.” (1 Korinito 15:22) Celë hi ka amejëne la ketre hnying hna qaja hnei Paulo aposetolo, kola hape: “Drei la ka troa amele ni qa ngöne la ngönetrei celë ka troa mec?” Hetre atre kö ka atreine troa kuca lai?—Roma 7:24.